Joel 2:26 - De Beebaa Dabu

²⁶ Goodou e lagolago naa oodou gai, goodou e gaimee naa ga boobosu, gai goodou ga tuhi ai naa de ingoo o Tagi Maolunga doodou Maadua, i dana hai mee hagalele mouli i oodou daha; gai ogu dangada e dee aahe ange naa donu ga dookaa.

Joel 2:26 Iomraidhean Croise

Genesis 33:11

Aude haihaia, gaavee dagu mee ngadi gaavange gu gaamai nei gi de goe, go hiidinga de Maadua gu abodonu mai gi de au, ma gu gaamai gi de au mee alodahi oogu e mouli ai.” Gai ia ga usuusu ange ia, gai Esau ga kave mee laa.

Nehemiah 9:25

Gilaadeu ne kave denga aduhale buibui, ma gelegele danuaa, ma denga hale e hoohonu i denga hagadaagangaa mee danuaa alodahi, ma vai gu hoda gi lo te baba, ma denga veelengaa grape, ma denga veelengaa olive, ma manu iai hua lagolago. Deelaa ai, gilaadeu ne gaimee ga boobosu ma de pedi, aama de malangilangi i doo abodonu laumalie.

Psalm 103:5

Ia e hagadanuaa goe i denga mee danuaa, deelaa ai, koe e ahe ange ga mmahi bei de igele.

Psalm 116:7

Dogu hagasaalunga, koe gi ahe ange gi noho baba, go hiidinga Tagi Maolunga gu abodonu adu gi de goe.

Psalm 13:6

Au e daahili ange gi Tagi Maolunga, i hiidinga dono abodonu mai gi de au.

Psalm 22:26

De gau hagaau aloha e gaimee naa ga boobosu; gilaadeu e saalaa Tagi Maolunga e tuhi naa ia, gai oodou lodo gi mouli ga hano ai!

Psalm 37:19

Gilaadeu e dee dookaa i masavaa hai ngadaa, gai gilaadeu e boobosu i de masavaa o de onge.

Psalm 67:5

De Maadua, denga huaadangada gi duuhia goe; denga huaadangada alodahi gi duuhia goe!

Psalm 72:18

Hagadegi ina Tagi Maolunga de Maadua, de Maadua o Israel, go ia donu huu e haia hegau hagalele mouli.

Proverbs 13:25

Tangada heohi e gaimee ga bosu danuaa, aagai lo te dinae o tangada baubau e hiigai i masavaa alodahi.

Song of Songs 5:1

Dogu daina hahine, dogu hagababa, au gu humai gi dagu veelenga, au gu hagabudu agu myrrh ma agu mee hagamanongi. Au gu gai de mee e hhao ai hooni ma hooni iai; au gu unu agu uvaini ma agu vai uu. Luoomaadeu soa, gooluu gaimee ma de unu; luu dau soa, gooluu unu gi boobosu!

Isaiah 25:1

Tagi Maolunga, go koe dogu Maadua; au e hagaamua goe ma de tuhi doo ingoo; koe gu hai denga mee hagalele mouli, ma mee aau gu hagatau e hai madagidagi loo, i hiidinga koe e hai hegau i de mee abodonu ma de heohi.

Isaiah 29:22

Deenei ai, Tagi Maolunga ne hagaola ina laa Abraham, e hagadaba i dagodo o dangada o Jacob: “Jacob e dee ahe ange naa donu ga dogaa, gai luoono mada e dee mada tea naa donu i dono dogaa.

Isaiah 45:17

Aagai Tagi Maolunga e hagaola naa Israel i de hagaola e deai se hagaodi; gai goodou e dee dookaa naa donu aabe e hagangadi mee ina ga hano ai e dee ngado mai.

Isaiah 49:23

Denga hodooligi e tilo adu naa goodou, gai denga haahine hodooligi e haele naa goodou. Gilaadeu e ino gi honga de gelegele i oodou mada i mua, gilaadeu e samusamu laa gelegele i oodou vae. Gai gi iloo ai e goodou bolo go au donu go Iahweh; gilaadeu e haia au go delaadeu tali hagalodolodo e dee dookaa naa donu.”

Isaiah 54:4

Koe gi dee madagu; koe e dee hagadogaa ina naa donu. Koe gi dee manavasaa i doo hagangadi mee ina; koe e dee hagamaolalo ina. Gai koe e ngalo naa doo hagadogaa ina i de masavaa oou e gauligi ai, gai koe e dee manadua naa donu doo hagadogaa ina i teai soo bodu.

Isaiah 55:2

Gu aha gu moumou ai oodou sseene i mee e dee ni gai, ma de moumou oodou mahi i mee oodou e dee boobosu ai? Nnoho mai hagalaangona agu muna, ma de gai mee danuaa, gi malangilangi ai goodou i denga gai mammami.

Leviticus 25:19

Gai de gelegele o de henua e hhua lagolago naa, gai goodou e gaimee naa ga boobosu ma tee maatagu i de nnoho i honga de henua.

Leviticus 26:26

De masavaa naa huu aagu e hai ai gi deai oodou gai, gai e dinoangahulu haahine e dao naa alaadeu momo pelaoaa i e dahi umu, gai gilaadeu e hagahidi naa pelaoaa laa ga duha dagi de momo. Goodou e gaimee naa, gai e dee maua gi boobosu.

Leviticus 26:5

Gai goodou e hili naa oodou hua grain ga dae ai gi de masavaa e hagihagi ai denga grape, gai de hagihagi o denga grape e daea adu naa de masavaa e aahe ange ai e doo; gai goodou e gaimee naa ga boobosu i oodou gai, ma de nnoho paba i honga doodou henua.

Micah 6:14

Koe e gaimee naa, aagai e dee maua gi bosu, gai doo dinae e dee maua donu gi honu. Koe e hagabudu goloa, gai e dee maua donu gi daakodo, go hiidinga au e dugu ange naa gi de gadilaasa au mee gu doange.

Zephaniah 3:11

De laangi laa, gai koe e dee dogaa naa, i hiidinga o au hegau, go mee oou ne haisala mai ai gi de au, go hiidinga au e kave gee mai naa i oo daha de gau pasa hagamaolunga. Gai koe e dee aahe ange e hagamaolunga i honga dogu mounga dabu.

Zechariah 9:15

gai Tagi o denga hagabuulinga hebagi e buibui naa gilaadeu. Gilaadeu e daa naa dangada ma de hagadee kii gilaadeu i denga buada. Gilaadeu e unu naa ma de hevaalogi bei dagodo o dangada gu ssenga i de unu uvaini; gilaadeu gu hoohonu bei de gumedi iai laa dodo e hagassii ange laa gi dege o de mommee o ssigidaumaha.

Zechariah 9:17

Ga dae laa de tilo danuaa ma de mahamaha ono dangada! Hua o denga grain e hai naa ga mmahi denga dama daane, gai denga uvaini hoou e hai naa ga mmahi denga damaa hine.

Romans 10:11

Gai e hagadaba de Beebaa Dabu, “Tangada e hagadonusia ia e dee hagadogaa ina naa donu.”

Romans 5:5

Gai de tali hagalodolodo nei e hai gi dee llodo baageaa gidaadeu, go hiidinga de Maadua gu gaamai dono aloha gi odaadeu lodo, i daho de Hagasaalunga Dabu aana ne gaamai laa gi noho i odaadeu lodo.

Romans 9:33

bei de hai gu sisi ai laa, “Tilo, au e hagaduu dahi hadu i Zion e hagalaavea vae o dangada, se hadu e haia ga baakuu gilaadeu; gai be goai e hagadonusia e dee hagadogaa ina donu.”

Deuteronomy 11:15

Gai ia e gaavadu naa hogi gi goodou helii i honga oodou gelegele, e gaimee ai oodou manu, gai goodou e gaimee naa ga boobosu.

Deuteronomy 12:12

Gai goodou ga malangilangi ai i mada luu mada o Tagi Maolunga doodou Maadua, madali oodou dama daane ma oodou damaa hine, ma oodou daane ma haahine hai hegau, ma dangada de aamuli o Levi i oodou aduhale, teai laa se mommee ne vvae ange gi gilaadeu madali goodou.

Deuteronomy 12:18

Gai goodou e gai donu huu mee nei i mada luu mada o Tagi Maolunga doodou Maadua, i de mommee a Tagi Maolunga doodou Maadua e hili. Gai goodou gaimee ai madali oodou dama daane ma oodou damaa hine, ma oodou daane ma haahine hai hegau, aama tangada de aamuli o Levi i doodou aduhale; gai goodou ga gaimee ga malangilangi i mada luu mada o Tagi Maolunga doodou Maadua i mee alodahi oodou e hai hegau ange aagena.

Deuteronomy 12:7

Gai go kilaa oodou ma oodou huaabodu e gaimee ai i mee oodou e sigidaumaha ai, i mada luu mada o Tagi Maolunga doodou Maadua, ga malangilangi ai i oodou mee gu hai hegau ange aagena, go hiidinga Tagi Maolunga doodou Maadua gu hagamanuuia goodou.

Deuteronomy 8:10

Gai ga gaimee naa huu goodou ga boobosu, gai goodou ga tuhi Tagi Maolunga doodou Maadua i dana gaavadu gi goodou de henua danuaa laa.

1 Timothy 6:17

Aagai koe daalaa ange gi de gau lava o henua i lalo, gilaadeu gi dee llodo maolunga aabe gi tali hagalodolodo ange gi de lava e dee maua laa gi dagodo daulooloa, aagai gi haia go de Maadua delaadeu tali hagalodolodo, go de ia e gaamai mee alodahi odaadeu e mouli ai ma de malangilangi ai.

1 John 2:28

Agu dama, goodou gi duudagi ina de nnoho i ono lodo, gi llodo mmahi ai goodou ma tee dookaa, i ono mada i mua i dono masavaa e hagasula mai ai.