Jeremiah 50:2 - De Beebaa Dabu

² “Goodou daalaa gi langona e dangada i denga huaahenua, hagaduulia age dahi hagailonga ma de hagailoo ange gi dangada; goodou e dee hagammuni donu, aagai hagataba, ‘Babylon e hagadee kii naa, gai a Bel e hagadogaa naa, Merodak e madagu naa. Ono diinonga e hagadookaa ina naa, gai ono diinonga gu maatagu.’

Jeremiah 50:2 Iomraidhean Croise

Psalm 64:9

Dangada alodahi e maatagu naa; gilaadeu e tala naa dagodo hegau a de Maadua ma de maanadu dagodo o ana hegau gu hai.

Psalm 96:3

Daalaa dagodo o dono mahamaha i magavaa o denga huaahenua, aama ana hegau hagalele mouli i magavaa o dangada alodahi.

Psalm 97:7

Dangada alodahi e daumaha ange gi denga diinonga e dookaa naa, ma gilaadeu e duuhia denga diinonga; denga diinonga alodahi, daumaha ange gi de ia!

Isaiah 12:4

De laangi laa gai goodou e hagataba naa: “Hagaahe ange de abodonu gi Tagi Maolunga, ma de dalodalo ange gi de ia; hagadele ina i denga huaahenua dagodo o ana hegau gu hai, ma de tala bolo gi hagaamua ina dono ingoo.

Isaiah 13:2

Hagaduulia age dahi hagailonga i honga dahi duuduu malaelae, gai oo ange gi gilaadeu, ma de aloalohagi ange gilaadeu gi loomai gi ulu i haitoga o de gau aamua.

Isaiah 21:9

Tilo, hanu dangada e kage i honga hoosa gu loomai, gai denga hoosa e hagatau dagilua.” Gai tangada dagitilo ne basa ange, “Babylon gu maoha, Babylon gu maoha! Denga diinonga alodahi o olaadeu maadua gu maoha ma gu daakodo i honga de gelegele.”

Isaiah 37:19

gai ne tili ange olaadeu diinonga gi lo te ahi ga dudu ai, go hiidinga diinonga laa e dee ni maadua abodonu, gai ni mee nii dangada ne hagatuu i laagau ma hadu. Deelaa ai, gilaadeu gu lava i de oha.

Isaiah 39:1

De masavaa laa gai Merodak-Baladan, tama daane a de hodooligi o Babylon go Baladan, ne gaamai hanu leda ma dahi mee ngadi gaavange gi Hezekiah, go hiidinga ia gu langona bolo ia nogo magi gai gu ieiangi.

Isaiah 46:1

Bel gu ino gi lalo, Nebo gu duuduli; olaadeu diinonga e hagauda i honga manu dolodolo ma manu haangai. Gai mee nei e kave saele ma de hagauda ma e hagadaemaha ai denga manu.

Isaiah 48:20

Goodou hulo gee mai i Babylon, gai saavini hulo gee mai i daho de gau Babylon! Hagailoo ina de mee nei ma de oo i de malangilangi, hagadele ina de longo nei gi dae gi de bido laa o henua i lalo; hai ange, “Tagi Maolunga gu hagaola dono dangada hai hegau go Jacob.”

Isaiah 48:6

Koe gu langona mee nei; galo ange diiloo mee nei alodahi, gai koe gi daalaa hagadonu mee nei. Mai iainei gai au e tala adu hanu mee hoou, ma mee e hagammuni gai koe e dee iloo.

Jeremiah 10:11

Gai goodou hai ange gi gilaadeu: “E dee go denga diinonga ne haia de langi ma henua i lalo, gai gilaadeu e hai naa ga llilo i honga de henua ma lalo de langi.”

Jeremiah 10:15

E deai olaadeu haigamaiana, gai ni mee hakadanga; gilaadeu e llilo naa i de masavaa o delaadeu hagaduasala.

Jeremiah 31:10

Denga huaahenua, goodou hagalaangona muna a Tagi Maolunga, gai hagadele ina i denga henua mmao: ‘De ia ne haia ga mavaevae saele Israel e hagabuni mai naa gilaadeu, ma de tilo ange gilaadeu bei dagodo o tangada hagaloosi ssiibi.’

Jeremiah 4:16

“Hagamanadua ange gi denga huaahenua, gai hagailoo ina i Jerusalem: ‘Dahi hagabuulinga hebagi gu loomai i dahi henua mmao; gilaadeu e hevaalogi e daamada de hebagi ange gi aduhale o Judah.

Jeremiah 4:6

Hagaduulia de hagailonga e hulo ai gi Zion! Goodou aude nnoho, gai saavini mage hulo mmuni! Go hiidinga au e hai naa gi humai dahi hai ngadaa i ngaiho, gai se mee e haia de oha laumalie.”

Jeremiah 46:14

“Daalaa ange gi Egypt gai hagailoo ina i Migdol; hagailoo ina hogi i Memphis ma Tahpanhes, hai ange, ‘Goodou tuu mage hagadabena, go hiidinga de gadilaasa e daa naa dangada i oodou gaogao.’

Jeremiah 50:46

Gai henua i lalo e bolebole naa i delaadeu langona de hagadee kii ina o Babylon; gai dono leo e dangi ai e dae naa gi denga huaahenua.

Jeremiah 51:12

Hagaduulia age dahi hagailonga i gaogao de buibui o Babylon; haia gi soa dangada e hagaloosia; hagatuu ina denga daane hagaloosi; go hiidinga Tagi Maolunga gu hai dahi hagatau gai gu hagassula donu ana mee gu tala ai dagodo o dangada e nnoho i Babylon.

Jeremiah 51:27

Hagaduulia age dahi hagailonga i honga de henua, gai ilihia de hanga manu i denga huaahenua. Hagadaabena ina denga huaahenua e hebagi ange gi de ia; gai hagahia de nohoanga hodooligi o Ararat, ma Minni, aama Ashkenaz. Hilia tagi o denga daane hebagi gi hebagi ange gi de ia, gai gaamai denga hoosa lagolago bei denga itebuubuu.

Jeremiah 51:31

Dahi dangada adi muna e savini adu naa i dua o de ia ange laa; dahi dangada e gaavee de longo e savini adu naa i dua o de ia ange laa, e hagailoo ange gi de hodooligi o Babylon bolo dono aduhale alodahi gu hagadee kii ina.

Jeremiah 51:44

Gai au e hagaduasala naa a Bel i Babylon, ga hai ia gi lueia mai mee aana gu holo. Gai denga huaahenua gu dee daga e hulo gi ono daha; de buibui o Babylon gu maoha.

Jeremiah 51:47

Deenei ai, tilo, e tae mai naa donu laangi aagu e hagaduasala ai denga diinonga o Babylon; dono henua alodahi e hagangadi mee ina naa, gai ono dangada e maakau naa ma e daakodo saele i kilaa.

Jeremiah 51:52

Aagai e hagadaba Tagi Maolunga, “Tilo, e tae mai naa laangi aagu e hagaduasala ai diinonga o Babylon, gai honga de henua alodahi iai naa de gau lagolagohia gai gilaadeu e gonogono.

Jeremiah 51:8

Gai tee mmule donu gai Babylon gu oha ga maoha; oo mage dangi i ono hiidinga! Gai gaavee hanu valaai e hai ai ono mee mmae; kana adu e maua naa huu gi ieiangi ia.

Jeremiah 52:31

Gai de matolu ma hidu ngadau huu i dua de gaavee gee o de hodooligi o Judah go Jehoiachin, i de madalua ma lima laangi o de madaangahulu ma lua malama, gai go de ngadau o Evil-Merodak ne dae ange ai ga hodooligi i Babylon, gai ia ne degi ange gi Jehoiachin, de hodooligi o Judah, ga hagasao mai ia i lo te hale pono.

Jeremiah 6:18

Deenei ai, denga huaahenua, goodou hagalaangona; de hagabuulingaa dangada, goodou gi iloo mee e hai ange gi gilaadeu.

Daniel 1:2

Gai de Ia Aamua ne dugu ange ia gi hagadee kii ina de hodooligi o Judah go Jehoiakim, ma de kave hanu goloa mai i de hale o de Maadua. Ia ne kave mee nei ga dugu i lo te hale daumaha o dono diinonga i Babylon.

Daniel 3:14

gai Nebuchadnezzar ne ssili ange gi gilaadeu, ga hai ange, “Shadrak, ma Meshak, aama Abednego, ni muna abodonu goodou e dee daumaha ange gi ogu diinonga ma dagu diinonga goolo gu hagaduu laa?

Zephaniah 2:11

Tagi Maolunga e hagalele mouli i dono hai baasi ange gi gilaadeu, i de masavaa aana e oha ai denga diinonga alodahi o de henua. Denga huaahenua alodahi e daumaha ange naa gi de ia, dahi ma dahi i dono henua donu.

Revelation 18:2

Gai ia ne oo i de leo mmahi, ga hagadaba, “Gu maoha, gu maoha loo Babylon maolunga laa! Gai gu se mommee e nnoho ai denga hagasaalunga baubau, se mommee e mmuni ai denga hagasaalunga hakino gee alodahi, se mommee e nnoho ai denga manu llele hakino gee alodahi, aagai se mommee e mmuni ai denga manu dolodolo hakino gee alodahi ma de kino ai o dangada.