Jeremiah 5:6 - De Beebaa Dabu

⁶ Deenei ai, dahi laiono mai i lodo mee muimui e daa naa gilaadeu ga maakau, dahi wolf e hangahanga naa gilaadeu, dahi leopard e dagitilo naa i gaogao olaadeu aduhale e hangahanga dangada alodahi e ssao mai i kilaa, i hiidinga gilaadeu gu kona de hagamaanege gai ne lagolago olaadeu hanonga ne aahe dua ai.

Jeremiah 5:6 Iomraidhean Croise

2 Chronicles 36:14

Gai dagi alodahi o de gau haimeedabu, ma dangada ne kii ange donu tee hai hegau i de mee abodonu, i delaadeu ago ange i dahulinga hakino gee alodahi a denga huaahenua ange laa; gilaadeu ne hai ga hakino gee de hale o Tagi Maolunga, go de mommee aana ne hagadabu laa i Jerusalem.

Ezra 10:10

Gai tangada haimeedabu go Ezra ga duu age ga hai ange gi gilaadeu, “Goodou gu haisala i doodou hai bodu ange gi denga haahine henua gee, gai goodou gu hai ma gu kii ange de lagolago haisala o Israel.

Ezra 9:6

ga dalodalo, ga hai ange: “Dogu Maadua, au gu dogaa mmao i de dangage age luoogu mada e galo age gi de goe, go hiidinga omaadeu haisala gu maolunga ange i omaadeu biho, gai omaadeu sala gu tae age donu gi de langi.

De Beebaa go Job 10:16

Noo au e hagamaolunga, gai koe e dagitilo au bei dagodo o de laiono, ma de ahe ange ga hai baasi mai ai gi de au i doo sauaa hagalele mouli.

Psalm 104:20

Koe e hai gi humai de gohu, gai gu boo de mee, gai denga manu lodo henua ga sasao mai.

Psalm 80:13

Denga biigi lodo henua e oha de manu laa, gai denga manu dolodolo e gai ono hua.

Isaiah 1:23

Oodou dagi ni dangada hai alaadeu hai, gilaadeu ni soa niio de gau gaiaa. Gilaadeu alodahi e malangilangi i ngadi gaavange hagasenga ma de llodo i denga mee ngadi gaavange. Gilaadeu e dee bale ange de gauligi gu deai sono damana, be go de hine gu magau dono bodu.

Isaiah 59:12

Go hiidinga omaadeu baubau i mada luoo mada e lagolago mmao, omaadeu haisala gu hagabaubau donu gi gimaadeu. Omaadeu baubau e daakodo donu i omaadeu daha, gai gimaadeu e iloo donu omaadeu baubau.

Jeremiah 14:7

Tagi Maolunga, omaadeu baubau gu hagahaisala gimaadeu, aagai koe balea mai i hiidinga o doo ingoo. Gu kona mmao tee modu demaadeu aahe dua; gimaadeu gu haisala adu donu gi de goe.

Jeremiah 2:15

Denga laiono e hagangolo ange gi de ia, gilaadeu gu kona donu de hagangolo. Gilaadeu gu hai dono henua gi se mommee e ngadi dagodo; ono aduhale gu maoha, gai gu deai dangada e nnoho ai.

Jeremiah 2:17

Gai e dee go koe ne hidi mai ai de hai adu mee nei gi goe, i dau tili Tagi Maolunga doo Maadua, i de masavaa aana ne dagi mai ai goe i lo te haiava?

Jeremiah 2:19

Au hegau baubau e hagaduasala naa goe, gai doo huli gee i de au e hagabaubau donu huu goe. Hagasaelea age gi gidee iho ai e goe de baubau ma de kona de hai ngadaa adu gi de goe, i dau tili Tagi Maolunga doo Maadua, ma dau dee hagadubu au, go de Ia Aamua, Tagi o denga hagabuulinga hebagi e hagadaba.

Jeremiah 2:31

Goodou de atangada nei, hagalaangona muna a Tagi Maolunga: E aha, au gu bei laa dagodo o de vao i daho Israel, aabe ne bei dahi henua gohu boo dangodango? Gai gu aha ogu dangada gu hagataba ai laa, ‘Gimaadeu gu ilaage i de hulo be go hee omaadeu e llodo e hulo aagena, gimaadeu e dee aahe ange e loomai gi de goe’?

Jeremiah 25:38

Ia gu bei dagodo o de laiono e hano gee laa i dono hale, gai delaadeu henua gu maoha ma gu ngadi dagodo, i hiidinga o de gadilaasa a tangada daa dangada, ma hiidinga o de lili o Tagi Maolunga.

Jeremiah 30:14

Oo dau soa alodahi gu ngalo goe, gilaadeu e dee anga adu donu gi de goe; i hiidinga au gu hagalagohia goe bei de hagadaumee, ma de hagaduasala goe bei tangada alasala e deai sono lodo aloha, i hiidinga doo hagabaubau ina e laumalie mmao, gai oo haisala e lagolago mmao.

Jeremiah 30:15

Gu ahe gu dangi ai naa goe i doo lagohia, gai e dee maua gi helui doo mmae? Go hiidinga oo baubau nnui, ma oo haisala e lagolago, aagu ne hai adu ai nei mee nei gi de goe.

Jeremiah 30:24

Gai de lili mmahi o Tagi Maolunga e dee ahe naa donu ga dae ai gi dana hagassula mee alodahi aana e lodo e hai. Muli mai naa huu gai goodou gu tonu ange naa aagena.

Jeremiah 4:7

Dahi laiono gu sao mai i lodo mee muimui; gai de ia e oohaa denga huaahenua gu sao e humai. Ia gu dugu dono mommee gai ia ga oha ai gi maoha doo henua. Oo aduhale e ngadi daakodo naa, gu deai dangada e nnoho ai.

Jeremiah 49:19

Tilo, au e bei de laiono i lodo mee muimui i Jordan e humai laa e hai baasi ange gi de mommee iai helii lau kohu; gai e moolau naa donu dagu doolohi ia ga hai gi hano gee i dono henua. Gai au ga hili tangada oogu e malangilangi ai gi de hegau nei. Goai e bei ogu dagodo? Gai goai e maua i de hai baasi mai gi de au? Gai goai tangada hagaloosi e maua i de hebagi mai gi de au?

Jeremiah 8:5

Gai gu aha de gau nei gu huuhuli gee ai nei? Gai gu aha Jerusalem gu duudagi ai nei de huli dua? Gilaadeu e daohi donu huu hegau hagasenga; gai gilaadeu e dee llodo e aahe mai.

Jeremiah 8:7

De manu lele go de stork i lo te moana e iloo masavaa gu hagailonga ange gi de ia, gai de manu kono, de swallow aama de crane e daudali olaadeu masavaa e aahe mai ai. Aagai ogu dangada e dee iloo e gilaadeu hagamodu a Tagi Maolunga.

Lamentations 1:5

Dangada e kino i Zion gu ni dagi i kilaa, ono hagadaumee gu nnoho paba. Tagi Maolunga gu hagaduasala Zion, i hiidinga ono haisala gu lagolago mmao. Ana dama gu gaavee gee mai i de henua, gai gu hai gi seesee i mada i mua o olaadeu hagadaumee.

Ezekiel 16:25

Gai koe ne hagaduu doo mommee maolunga i dege o denga haiava alodahi, gai koe ga hai ai ga hakino gee doo mahamaha, i dau gaavange doo angaanga gi dangada alodahi e loomai gi oo daha ga hai ai ga kii ange doo hai be se manu.

Ezekiel 22:27

Ono dangada aamua e bei denga wolf e hangahanga ina laa alaadeu manu gu mau. Gilaadeu gu hagassali dodo o dangada ma de daa gilaadeu ga maakau gi maua ai olaadeu goloa i hegau dee heohi.

Ezekiel 23:19

Gai Oholibah ne kii ange donu dono hai be se manu, i dana manadua ono laangi nogo se damaa hine ai, go de masavaa oona nogo se hine hai be se manu ai i de henua go Egypt.

Daniel 7:4

Tahi manu alasala laa e bei de laiono, gai ono bakau e bei bakau o de igele. Gai au ne duudagi de haaina, ga dae ai gi de aau gee luoono bakau, ma de hagahidi age ia gi duu i honga luu vae bei dagodo o tangada; gai gu gaavange gi de ia dahi hadu manava bei de hadu manava o tangada.

Daniel 7:6

Dua mee laa, gai au ne galo adu gu gidee dahi manu bei de leopard. Gai e haa bakau i lo tono dua. De manu laa e haa ono biho, gai gu gaavange gi de ia ssauaa e dagi ai.

Hosea 5:14

Au e hebagi ange naa gi Ephraim bei dahi laiono, gai e hebagi ange gi Judah bei dahi laiono mmahi. Au e hagalagolagohia naa gilaadeu ga tili gilaadeu gai au ga hano. Au e kave gee naa gilaadeu, gai e deai donu e maua i de hagaola gilaadeu.

Habakkuk 1:8

Alaadeu hoosa e kemo ange i denga leopard, gai e hagamaatagu ange i denga wolf i de ahiahi boo. Olaadeu hagabuulinga hebagi e hagassoe mai donu huu; olaadeu daane i honga hoosa e loomai i de mommee mmao. Gilaadeu e bei de igele e hagatili iho laa ga kadi dahi manu;

Zephaniah 3:3

Denga dangada aamua e bei denga laiono e hagangolo laa, ono dagi e bei denga wolf i de ahiahi, gilaadeu e dee dugu hanu mee gi doe gi taiao age.

Numbers 32:14

Gai tilo, goodou go dama donu a oodou damana, goodou gu sui donu oodou damana e hai ai gi kii ange de lili o Tagi Maolunga i de gau Israel.

Revelation 13:2

Gai de manu alasala aagu e gidee laa e bei de leopard, ono vae e bei vae o de bea, gai dono ngudu e bei de ngudu o de laiono. Gai de dragon ne gaavange dono sauaa ma dono nohoanga hodooligi, aama dono duulanga maolunga gi de manu alasala laa.