Jeremiah 22:3 - De Beebaa Dabu

³ E hagadaba Tagi Maolunga: Goodou hai hegau i de mee heohi ma de soe. Gai hagaola ina tangada gu gaiaadia ono goloa, i tangada vaivai dagodo. Goodou aude haia de baubau aabe gi vaivai haia tangada henua gee, de gauligi gu deai sono damana, aabe go de hine gu magau dono bodu. Gai goodou aude daia gi magau tangada tigi haisala i de mommee nei.

Jeremiah 22:3 Iomraidhean Croise

2 Samuel 23:3

De Maadua o Israel gu basa, de Baba o Israel ne hai mai gi de au, ‘Tangada e dagina dangada i de mee heohi, ma de dagi dangada i dono madagu i de Maadua,

2 Kings 24:4

ma hiidinga o dangada tigi haisala aana ne daa ga maakau. Ia ne hagadohu Jerusalem alodahi i dodo o dangada aana ne daa, gai Tagi Maolunga tee degi ange gi de ia.

De Beebaa go Job 22:9

Koe tee bale ange denga haahine gu maakau olaadeu bodu, gai ne vaivai hai denga gauligi gu deai olaadeu damana.

De Beebaa go Job 24:9

Dangada e gaavee tama e deai sono damana mai i daho dono dinana, gilaadeu e kave dahi gaagaa e hagadonu ai de hagao a tangada hagaau aloha ana muli.

Psalm 68:5

De Maadua e noho laa i honga dono mommee dabu, go tamana o denga gauligi gu deai olaadeu damana, gai ia e buibui denga haahine gu maakau olaadeu bodu.

Psalm 82:4

Hagaola ina gilaadeu e baageaa ma gilaadeu e duasala; hagaola ina gilaadeu mai i de gau baubau.

Psalm 94:21

Gilaadeu e hagabuni e hai baasi ange gi tangada heohi, ma de hagamodu e daa gi magau tangada e dee haisala.

Psalm 94:6

Gilaadeu gu daa denga haahine gu maakau olaadeu bodu ma de gau henua gee, aama denga gauligi gu deai olaadeu damana.

Exodus 22:21

Aude haia ange de baubau aabe gi vaivai haia tangada henua gee, i hiidinga goodou nogo nnoho gau mai vaga i de henua go Egypt.

Exodus 22:22

Aude vaivai haia de hine gu magau dono bodu, aabe go de gauligi gu deai sono damana.

Proverbs 23:10

Aude hagangaalue ina denga hadu goinga madagidagi aabe gi hano gi lodo alahenua o denga gauligi gu deai olaadeu damana,

Proverbs 6:17

go luu mada hagamaolunga, ma de alelo hadu muna, ma lima e daia dangada tigi haisala,

Isaiah 1:23

Oodou dagi ni dangada hai alaadeu hai, gilaadeu ni soa niio de gau gaiaa. Gilaadeu alodahi e malangilangi i ngadi gaavange hagasenga ma de llodo i denga mee ngadi gaavange. Gilaadeu e dee bale ange de gauligi gu deai sono damana, be go de hine gu magau dono bodu.

Isaiah 58:6

E aha, e dee deenei de hagahiikai aagu ne hili: go de hagadangadanga daula o hegau baubau, ma de tala daula o de laagau hagahai hegau, ma de hai gi ilaage gilaadeu e vaivai haia, aama de hadihadi laagau hagahai hegau alodahi?

Isaiah 58:7

E aha, e dee go dau duha ange au gai gi gilaadeu e hiikai, ma de gaavange dahi mommee moo tangada e deai sono hale — ma de hakahu tangada e deai ono malo, i de masavaa aau e gidee ai dono gilisau, gai koe e dee hano e mmuni e dee bale ange doo dangada donu?

Jeremiah 19:4

Go hiidinga gilaadeu gu tili au, gai gu hai de mommee nei gi se mommee hakino gee, gilaadeu gu dudu mee maanongi e sigidaumaha ange ai gi denga diinonga, go diinonga olaadeu ma olaadeu dubuna madagidagi, aama denga hodooligi o Judah e dee iloo laa. Gai gilaadeu gu hagahonu honga de henua nei, i dodo o dangada tigi haisala.

Jeremiah 21:12

de huaabodu o David, e hagadaba Tagi Maolunga: Goodou hai hegau i de mee heohi i laangi alodahi; hagaola ina tangada gu gaiaadia ono goloa, i tangada e vaivai haia ia; kana dae mai dogu bole gi goodou, bei de ahi ula e dee maua laa i de diinei, i hiidinga o oodou hegau baubau.’

Jeremiah 22:17

Aagai koe e nnoo ange ma de lodo i goloa e maua i de hadu muna, ma de daa gi maakau dangada tigi haisala, ma de hagaduasala aama de vaivai hai dangada.”

Jeremiah 26:16

Gai dagi o de henua ma dangada alodahi ne hai ange, gi de gau haimeedabu ma denga pelaabisi, “E dee heohi de daa gi magau taane nei, go hiidinga ia ne basa mai gi gidaadeu i de ingoo o Tagi Maolunga taadeu Maadua.”

Jeremiah 5:28

gai gu pedi ma de malali olaadeu gili. E deai donu se tuu mai o alaadeu hegau baubau; gilaadeu e dee hagamodu muna o denga gauligi gu deai olaadeu damana i de heohi gai gilaadeu e dee tala hagadonu heohi o de gau hagaau aloha.

Jeremiah 7:23

aagai au ne tala ange gi gilaadeu muna nei: ‘Goodou hagallongo mai gi de au, gai au ga hai ai goodou go ogu dangada, gai au go doodou Maadua. Goodou daudali i mee alodahi aagu gu tala adu gi goodou, gi danuaa adu ai gi goodou.’

Jeremiah 9:24

aagai tangada e lodo e tuhi, ia gi duuhia dono donu ange ma dana iloo au, gai go au Tagi Maolunga, de ia e abodonu laa, ma de hai hegau i de hagamodu heohi ma de heohi i henua i lalo, go hiidinga aanei mee oogu e malangilangi ai, go Tagi Maolunga e hagadaba.

Lamentations 3:36

ma de hagahaisala de hagamodu muna o tangada, ni mee niio de Ia Aamua e kino ai.

Ezekiel 18:12

gai e vaivai hai de gau hagaau aloha ma de duasala, ia e gaiaa, ia e dee hagaahe ange mee aana ne kave e hagadonu ai de hagao ana muli, ia e daumaha ange gi denga diinonga, gai ia e hai mee hakino gee,

Ezekiel 18:7

Ia e dee vaivai hai dahi dangada, aagai e hagaahe ange ana mee ne kave e hagadonu ai de hagao muli a tangada. Ia e dee gaiaa donu, aagai e gaavange ana gai gi gilaadeu e hiikai, ma de gaavange malo gi tangada e deai ono malo.

Ezekiel 22:7

Gilaadeu ne hagangadi mee denga damana ma dinana i oo daha, ma de vaivai hai de gau henua gee, ma denga gauligi gu deai olaadeu damana aama haahine gu maakau olaadeu bodu.

Ezekiel 45:9

“E hagadaba de Ia Aamua go Iahweh: Denga dagi o Israel, goodou gu gona odi oodou mee e hai! Gu lava oodou vaivai hai ma de hagaduasala dangada, gai hai hegau i hagamodu heohi ma de mee heohi. Goodou aude alualumia dangada mai honga olaadeu mommee, go de Ia Aamua go Iahweh e hagadaba.

Joel 3:19

Egypt e hai naa ga deai dangada iai, gai Edom e bei naa de vao e deai laa dangada iai, go hiidinga delaadeu vaivai hai dangada o Judah, ma delaadeu daa dangada tigi haisala ga maakau.

Leviticus 19:15

Aude hagahaisala ina de hagamodu muna heohi; aude haia gi dagodo gee dau hai e hai ai tangada hagaau aloha ma tangada lava, aagai koe gi hagamodu ina muna o tangada e baa adu gi de goe i de heohi.

Amos 5:15

Goodou kino i de baubau, gai llodo i tanuaa, hai hegau i de hagamodu heohi i de haitoga o de aduhale. Kana adu Tagi Maolunga, de Maadua o denga hagabuulinga hebagi, e abodonu ange naa gi dangada o Joseph e doe.

Amos 5:24

Aagai doodou hai hegau i de hagamodu heohi gi bei dagodo de sali o saalingaa vai, gai doodou hai hegau i de heohi gi bei ssaalingaa vai e dee maua laa gi masa!

Micah 3:11

Dagi o Jerusalem e hagamodu muna e kave ai denga ngadi gaavange hagasenga, de gau haimeedabu e agoago e kave ai dahi hagaoanga, gai denga pelaabisi e tala mee tigi loomai e kave ai denga sseene. Aagai gilaadeu e hagataba bolo delaadeu tali go Tagi Maolunga, “E aha, Tagi Maolunga e dee noho nei i odaadeu daha? E deai naa donu se hai ngadaa e baa i gidaadeu.”

Micah 6:8

Koe tangada, ia gu hagaago adu gi de goe de mee danuaa, gai se aha a Tagi Maolunga e lodo koe gi haia? E dee go de hai hegau i de mee heohi, ma de lodo aloha, aama de seesee i de lodo maolalo madali doo Maadua?

Malachi 3:5

“Gai au e humai naa e hagamodu oodou muna. Gai e moolau naa donu dagu hagabaubau de gau hai huuhuaa mee, ma de gau dagodo haisala, ma gilaadeu e hagatoo donu i de hadu muna, ma gilaadeu e daohia hagaoanga o de gau hai hegau, ma gilaadeu e vaivai haia denga haahine gu maakau olaadeu bodu ma denga gauligi gu deai olaadeu damana, ma gilaadeu e dee abodonu ange gi de gau henua gee, aagai e dee maatagu i de au,” go Tagi o denga hagabuulinga hebagi e hagadaba.

Matthew 23:23

E vakaa naa goodou, de gau sisi ma denga Pharisee! Goodou ni dangada e daahangadia dangada! Goodou e gaavange dahi diba i diba e madaangahulu o oodou mint ma dill aama cummin, gai goodou gu tili muna o de hainga e kii ange laa de hagamogomogo: go de hagamodu muna heohi, ma de abodonu ange gi dangada aama de gai. E heohi donu doodou hai mee nei, gai e dee tili mee ange laa.

Deuteronomy 10:18

Gai ia e hai hegau i de hagamodu heohi ange gi denga gauligi e deai olaadeu damana, ma haahine gu maakau olaadeu bodu, ma de aloha ange gi de gau henua gee e nnoho i oodou magavaa, aama de gaavange alaadeu gai ma olaadeu malo.

Deuteronomy 24:17

Aude hagahaisala ina de hagamodu heohi ange gi tangada henua gee, be go de gauligi e deai sono damana, aabe gi gaavee gee de malo laa daha o de hine gu magau dono bodu, e hagadonu ai de hagao ana muli.

Deuteronomy 24:7

Noo tangada gu gaiaa dahi dangada mai i daho de gau Israel, ga hagahai hegau ia bei dagodo o tangada hai hegau, aabe e hagao ia gi daha, gai tangada laa e daa donu gi magau. Gai goodou ga aau gee ai de baubau i oodou magavaa.

Deuteronomy 25:1

Noo gu dee heloongoi dangada i dahi mee, gai gilaadeu gi gaavee de mee laa gi de mommee hagamodu muna, gai de gau hagamodu muna ga hagamodu ai mee i olaadeu magavaa; gilaadeu gi degi ange gi tangada e dee haisala, gai ga hagaduasala tangada iai ssala.

Deuteronomy 27:19

“E malaia tangada e dee hai hegau i de heohi ange gi tangada henua gee, ma de gauligi gu deai sono damana, aama de hine gu magau dono bodu.” Gai dangada alodahi gi hai ange, “Amen!”

James 1:27

Gai deenei de hai daumaha gilimalali ma de heohi i mada luu mada o Tamana go de Maadua: go de bale ange denga gauligi gu deai olaadeu maadua ma haahine gu maakau olaadeu bodu gu duasala laa, ma tee dugua ange henua i lalo gi haia gi hakino gee tangada.