James 1:12 - De Beebaa Dabu

¹² E manuuia tangada e lodo mmahi i dono masavaa e hagataalea ai, go hiidinga noo ia e duu ga makaga i lo te hagatale, gai ia e kave donu de hau o de mouli, go de mee a de Maadua gu hagatoo donu ange gi gilaadeu e aaloha i de ia.

James 1:12 Iomraidhean Croise

Genesis 22:1

Dua mee nei, gai de Maadua ne hagatale de gai o Abraham. Gai ia ga hai ange gi de ia, “Abraham!” Abraham ne hai ange, “Deenei au.”

Nehemiah 1:5

Au ne hai ange: “Tagi Maolunga de Maadua o de langi, gai se Maadua maolunga ma de hagamaatagu, gai e daohi dau hagatoo donu heloongoi ma doo abodonu ange gi gilaadeu e aaloha i de goe aama de daohi au muna;

De Beebaa go Job 2:10

Job ne hai ange, “Koe e basa donu bei dahi hahine lodo senga. E aha, go mee danuaa donu huu adaadeu e kave mai i daho de Maadua, gai e dee kave hogi denga mee hai ngadaa?” Gai a Job tee haisala donu i ana muna ne tala.

De Beebaa go Job 5:17

Tilo, e manuuia tangada a de Maadua e hagaheohi, deenei ai, aude hagangadi mee ina de haelenga a de Ia Mmahi Mmao laa.

Psalm 11:5

Tagi Maolunga e tilo dagodo o dangada heohi, aagai ia e kino i de gau baubau, ma gilaadeu e vaivai haia dangada.

Psalm 119:67

I mua dogu hagaduasala gai au ne haisala; iainei gai au gu daohi au muna.

Psalm 119:71

Gai ne haigamaiana donu dogu hagaduasala, gai au ga agoago ai i au hainga gu hagasauaa.

Psalm 119:75

Tagi Maolunga, au e iloo bolo au hagamodu e heohi, gai koe ne hagaduasala ngau i hiidinga doo hai hegau i de abodonu.

Psalm 5:11

Aagai alodahi e buibui i oo daha gi malangilangi; gilaadeu gi hevaalogi i de malangilangi. Koe gi doohaa dau buibui i olaadeu elunga, gi malangilangi ai gilaadeu e aaloha i doo ingoo.

Psalm 94:12

Tagi Maolunga, e manuuia tangada aau e haele, ma tangada aau e agoago ange i au hainga;

Exodus 20:6

aagai au e abodonu ange gi atangada soa o dangada e aaloha i de au, ma de daohi agu hainga.

Proverbs 17:3

De anibada se mee ange gi denga selevaa, gai de ahi mmahi se mee ange gi denga goolo, aagai Tagi Maolunga e hagatale dagodo lodo o tangada.

Isaiah 64:4

Mai madagidagi gai dangada tigi langona, be gu tonu ange aagena, aabe gu gidee dahi Maadua bei oo dagodo, ia e balea ange gilaadeu e daalia ange ia.

Zechariah 13:9

Gai au e hai naa tahi diba i diba e dolu nei gi hulo laa lo te ahi; gai au ga hagagilimalali ai gilaadeu bei denga selevaa, ma de hagatale ange olaadeu dagodo bei denga goolo. Gilaadeu e hagaagahi naa dogu ingoo, gai au ga basa ange gi gilaadeu. Au e hagadaba naa, ‘Gilaadeu go ogu dangada,’ gai gilaadeu e hagataba naa, ‘Tagi Maolunga go taadeu Maadua.’ ”

Matthew 10:22

Gai dangada alodahi e kino naa i goodou i hiidinga o dogu ingoo. Gai be goai e lodo mmahi ga dae ai gi de hagaodi, gai ia e hagamouli.

Matthew 25:34

Gai de Hodooligi e hai ange naa gi dangada i dono baasi madau, ‘Loomai, goodou gu lava i de hagamanuuia i daho dogu Damana. Goodou gaavee de nohoanga hodooligi gu hagadabena adu laa gi goodou, mai i taamada age de hai o henua i lalo.

Luke 6:22

E manuuia goodou noo dangada e kino i goodou, ma de vvae gee goodou ma de pasa baubau i goodou, ma de hagangadi mee goodou ma de hagamalaia goodou i hiidinga o Tama a Tangada!

Romans 5:4

gai de lodo mmahi e hai gi maatua abodonu gidaadeu, gai de maatua abodonu e hai gi dahi adaadeu tali hagalodolodo.

Romans 8:28

Gai gidaadeu e iloo bolo de Maadua e hagahai hegau mee alodahi e hai ai de mee danuaa ange gi gilaadeu e aaloha i de ia, go gilaadeu gu hagahia laa bei dagodo o dana hagatau.

1 Corinthians 2:9

Gai gu sisi e hai ange, “Mee a dangada tigi gidee, gai tigi langona, gai tigi maanadu i olaadeu lodo — go mee a de Maadua gu hagadabena ange gi gilaadeu e aaloha i de ia”  —

1 Corinthians 8:3

Gai tangada e aloha i de Maadua, se dangada hogi nii de Maadua e iloo.

1 Corinthians 9:25

Dangada alodahi e hagadau gaavange i denga hagadahao, e hagaduu ngae e hai gi aabo ange gilaadeu. Gilaadeu e hai mee nei e kave ai de hau e dee maua laa gi dagodo daulooloa, aagai gidaadeu e hai de mee nei e kave ai de hau e dagodo laa ga hano ai.

Deuteronomy 13:3

gai goodou e dee hagallongo muna a de pelaabisi laa, aabe go tangada e haia midi bee nei. Go hiidinga Tagi Maolunga doodou Maadua e lodo e hagatale goodou, e tilo ai be goodou e aaloha abodonu i Tagi Maolunga doodou Maadua, i oodou lodo alodahi aama oodou hagasaalunga alodahi.

Deuteronomy 7:9

Deenei ai, goodou gi iloo bolo Tagi Maolunga doodou Maadua go de Maadua donu; ia e hai hegau i de muna abodonu, gai e daohi dana hagatoo donu hagaheloongoi ma de aloha ange gi gilaadeu e aaloha i de ia, ma de daudali i ana muna, ga dae ai loo gi de mano atangada.

Deuteronomy 8:2

Gai goodou manadua de hai a Tagi Maolunga doodou Maadua ne dagi mai ai goodou i lodo henua, i denga ngadau e madahaa nei; ia ne hagamaolalo goodou ma de hagatale goodou e tilo ai dagodo o oodou lodo, be goodou e daohi ana muna gu tala adu gi goodou be deai.

2 Timothy 2:15

Gai koe hagaduu ngae haia gi se dangada goe e hagamalangilangi ina de Maadua, se dangada hai hegau e dee dogaa, gai e maua i de agoago muna a de Maadua gi heohi.

2 Timothy 4:8

Deenei ai, de hau o de heohi gu hagadabena mai donu gi de au, go de hau a Tagi Maolunga, de ia hagamodu muna heohi, e hagao mai ai au i de laangi laa, gai e dee go au donu huu, aagai se mee ange gi gilaadeu alodahi e malangilangi i dono hagasula mai.

Hebrews 10:32

Goodou manadua oodou dagodo i denga laangi i mua, i dua de maalama oodou lodo; goodou ne golomagi oodou lodo gai ne tuu ga makaga i de masavaa ne kona ai doodou hagaduasala.

Hebrews 11:17

De gai o Abraham ne hai ga maua e ia i de gaavange Isaac e hai ai ssigidaumaha, i de masavaa a de Maadua ne hagatale ai dono gai. Taane ne gaavee de hagatoo donu laa, ne baba ange donu e sigidaumaha dana dama dagidahi,

Hebrews 12:5

Gai goodou gu ngalo naa donu muna ne hagammahi adu ai goodou denga dama? “Dagu dama, aude hagangadi mee ina haelenga a Tagi Maolunga, aabe gi baageaa oo lodo i dana hagasee goe.

Hebrews 6:15

Gai Abraham ne kave mee gu lava laa i de hagatoo donu, i hiidinga dana hagammahi ga golomagi ono lodo.

James 2:5

Denga daina hagamogomogo, goodou nnoho hagasaelea age! E dee go gilaadeu e hagaau aloha i henua i lalo a de Maadua ne hai laa gi lava i de gai, aama de henua i de nohoanga hodooligi, gu lava laa i dana hagatoo donu ange gi gilaadeu e aaloha i de ia?

James 5:11

Tilo, gidaadeu e hagataba bolo gilaadeu ne manuuia i delaadeu llodo mmahi. Goodou gu langona hogi dagodo de lodo mmahi o Job, gai goodou ne gidee hogi dagodo de hagatau a Tagi Maolunga; ia e lodo aloha ma de degi.

1 Peter 3:14

Aagai e dee galemu naa donu noo goodou gu hagaduasala i doodou hai de mee heohi, gai goodou gu manuuia. Goodou gi dee maatagu i gilaadeu aabe gi manavasaa oodou lodo.

1 Peter 4:13

Aagai goodou malangilangi i doodou hagauda de hagaduasala madali Klisdo, gai gi malangilangi ai hogi goodou ma de llodo danuaa i de masavaa oona e hagasula mai ai i dono mahamaha.

1 Peter 4:14

Noo goodou e hagadookaa ina i hiidinga de ingoo o Klisdo, gai goodou gu manuuia, go hiidinga de Hagasaalunga o de mahamaha, e bei go de Hagasaalunga o de Maadua, e noho i oodou elunga.

1 Peter 5:10

Gai dua naa huu doodou hagaduasala i dahi damaa masavaa, gai de Maadua o de abodonu alodahi, ne hagahia adu goodou gi gaavee dono mahamaha e deai laa se ngado i lodo o Klisdo, gi hagaieiangi ina goodou ma de hai gi mmahi goodou, gi maua ai e goodou i de tuu gi makaga.

1 Peter 5:4

Gai de masavaa naa huu o Tagi o de gau hagaloosi e hagasula mai ai, gai goodou e kave donu de hau mahamaha e dee maua laa gi mmae.

1 John 4:19

Gidaadeu e aaloha i de ia, i hiidinga go ia ne aloha i gidaadeu i mua.

Revelation 2:10

Aude madagu i mee oou gu dai hagaduasala ina ai. Tilo, de ia hagabaubau laa gu dai hai naa gi dilia ange hanu goodou gi lo te hale pono e hagatale ai goodou, gai goodou e vaivai haia naa i e madaangahulu laangi. Gai goodou tuu gi makaga ga dae ai gi doodou maakau, gai au ga gaavadu gi de goe de hau o de mouli.

Revelation 3:19

Au e hagasee donu ma de haele gilaadeu alodahi oogu e aloha ai. Deenei ai, koe gi hagammahi dahuli oo lodo.

Revelation 3:21

Be goai e kii, gai au e hai ia gi noho madali au i honga dogu nohoanga hodooligi, bei dogu hai ne kii ai laa hogi ga noho i honga de nohoanga hodooligi o dogu Damana.