Isaiah 44:8 - De Beebaa Dabu

⁸ Goodou aude bolebole, goodou aude maatagu. E aha, tee hagailoo ina e au ma de tala mee nei madagidagi loo? Go goodou ogu dangada hagadonu. E aha, e dahi ange maadua bei au? E deai, e deai ange donu se Baba mmahi; au e dee iloo bolo e dahi ange.”

Isaiah 44:8 Iomraidhean Croise

Genesis 46:3

Gai ia ne hai ange, “Go au go de Maadua, go de Maadua o doo damana; aude madagu i de hano gi Egypt, go hiidinga au e hai naa goe gi se huaahenua soa i kilaa.

Genesis 48:19

Aagai dono damana e dee lodo, ga hai ange, “Dagu dama, au e iloo. Ia e hai naa ga se huaadangada soa, ia e sula naa hogi ga maolunga. Aagai dono daina gauligi e maolunga ange naa i de ia, gai ono hagadiilinga e hai ai naa ga ni huaahenua soa.”

2 Samuel 22:32

Goai de Maadua, e dee go Iahweh donu huu? Gai goai de baba makaga, e dee go taadeu Maadua donu huu?

Ezra 1:2

“E hagadaba Cyrus, de hodooligi o Persia: Tagi Maolunga, de Maadua o de langi, gu gaamai gi de au denga nohoanga hodooligi o henua i lalo alodahi, gai ia gu tala mai au gi hagaduulia age dono hale i Jerusalem i Judah.

Ezra 8:22

Go hiidinga au ne dogaa i de dangidangi ange gi de hodooligi i hanu daane hebagi, ma hanu daane e kage i honga hoosa, gi buibuia gimaadeu i denga hagadaumee i honga de haiava, i hiidinga gimaadeu ne hai ange gi de hodooligi, “De lima sauaa o demaadeu Maadua i honga olaadeu alodahi e hagadonusia ia, aagai dono sauaa ma dono lili e hai baasi ange gi gilaadeu alodahi e daahuli gee i de ia.”

Psalm 18:31

Goai de Maadua, e dee go Iahweh donu huu? Gai goai de baba makaga, e dee go taadeu Maadua donu huu?

Psalm 18:32

Go ia de Maadua e hagammahi ina mai au, ma de hai gi heohi abodonu dogu haiava.

Psalm 86:10

I hiidinga koe e maolunga mmao gai e hai hegau hagalele mouli, go koe donu huu de Maadua abodonu.

Isaiah 17:10

Goodou gu ngalo de Maadua doodou Ia Hagaola; goodou tee manadua de Baba ne buibuia goodou. Deelaa ai, e dee galemu donu doodou doo manu danuaa, ma denga grapevine ne sigi mai i denga henua gee;

Isaiah 26:4

Goodou hagadonusia Tagi Maolunga ga hano ai, i hiidinga Iahweh, Tagi Maolunga, go de Baba makaga e dee ngado mai.

Isaiah 30:29

Aagai goodou e daahili naa bei doodou daahili i de boo oodou e hai ai dahi daonga dabu; goodou e malangilangi naa bei de masavaa o dangada e ili ai denga flute, ga daga age ai gi de mounga o Tagi Maolunga, go de Baba makaga o Israel.

Isaiah 41:23

Daalaa mai gi gimaadeu mee e loomai i muli mai, gi iloo ai e gimaadeu bolo goodou ni maadua abodonu. Haia hanu hegau danuaa aabe ne hegau baubau, gi manavasaa ai gimaadeu ma de maatagu.

Isaiah 42:9

Tilo, mee gu i mua gu hai ma gu lava, iainei gai au e tala mee hoou gu dai hai; au e tala adu mee nei gi goodou i mua de hai.”

Isaiah 43:10

E hagadaba Tagi Maolunga, “Go goodou ogu dangada hagadonu, gai go dogu dangada hai hegau aagu gu hili, gai gi iloo ai e goodou ma de hagadonu, aama de tonu ange bolo go au donu deenei. E deai ange donu se maadua gu humai i ogu mua, aabe se maadua e humai i ogu dua.

Isaiah 43:11

Go au, go au donu go Iahweh, gai e deai ange donu se Ia Hagaola bei au.

Isaiah 43:12

Au gu hagaago adu, ma de hagaola, aama de tala adu gi goodou — go au donu, e dee go dahi diinonga i oodou magavaa. Go koe dogu dangada hagadonu, go Tagi Maolunga e hagadaba, gai go au donu de Maadua.

Isaiah 43:9

Denga huaahenua alodahi gu hagabuni mai gai dangada alodahi gu hagabuni. Gai goai i olaadeu magavaa e maua i de tala mee nei, ma de hagailoo mai gi gidaadeu mee gu hai i mua? Gilaadeu gi gaamai dangada e daalaa olaadeu heohi, gi langona ai e dangada gai gilaadeu ga hagataba, bolo gilaadeu e heohi!

Isaiah 44:2

E hagadaba Tagi Maolunga, go de ia ne haia goe, ma de hagaholi goe i de mommee o denga dama, gai go de ia ne balea adu goe: Aude madagu, Jacob, dogu dangada hai hegau; Jeshurun, de mommee aagu ne hili.

Isaiah 44:6

E hagadaba Tagi Maolunga, de hodooligi o Israel, ma dono Ia Hagaola, go Tagi o denga hagabuulinga hebagi: “Go au taamada gai go au de hagaodi, e deai ange donu se maadua, go au donu huu.

Isaiah 45:19

Au tee tala hagammuni mee nei aabe ne tala i lo te gohu; au tee hai ange gi hagadiilinga o Jacob, ‘Saalaa au i dahi ngadi mommee.’ Go au Iahweh, au e tala de muna abodonu; au e tala de mee heohi.

Isaiah 46:9

Manadua mee ne hai madagidagi; go au donu de Maadua, e deai ange donu; go au donu de Maadua, e deai ange donu e bei ogu dagodo.

Isaiah 48:3

Au ne tala mee i mua madagidagi loo, au ne tala ma de hai gi iloo mee nei; gai ne daa hagalele dagu hagahai hegau mee nei, ga hagassula mee nei.

Isaiah 48:5

Deenei ai, au ne tala adu mee nei madagidagi loo, gai au ne tala adu mee nei gi de goe i mua de hai, gi dee hagadaba ai goe, “Go dogu diinonga ne haia mee nei; gai go denga diinonga laagau ma diinonga baalanga ne hagasauaa ina mee nei.”

Jeremiah 10:7

De Hodooligi o denga huaahenua, goai e dee madagu i de goe? Deenei de mee e heohi de hai adu gi de goe. Gai e deai donu e bei oo dagodo, i magavaa o de gau heiangi alodahi o denga huaahenua, ma olaadeu nohoanga hodooligi alodahi.

Daniel 2:28

aagai e dahi Maadua i de langi e maua i de hagaago mai mee e dee iloo laa. Ia gu hagaago ange gi de hodooligi go Nebuchadnezzar mee e hai i muli mai. Deenei de midi ma midi hagaago ange aau ne gidee i de masavaa oou e dagodo ai i honga doo moenga:

Daniel 2:47

Gai de hodooligi ne hai ange gi Daniel, “Ni muna abodonu, doo Maadua go de Maadua o denga maadua alodahi, gai go de Ia Aamua o denga hodooligi, gai se ia e hagaago mai mee e dee iloo laa, i hiidinga koe ne maua i de hagaago mai mee e dee iloo laa.”

Daniel 4:25

Koe e hano gee mai naa i daho dangada ga noho madali denga manu aada i lodo henua. Koe e gai naa denga helii bei denga kaau, ma de ssui doo angaanga i de mee suungia o de langi, ga dae ai gi de odi ange de hidu ngadau, gai koe gu donu iho, bolo go de Ia Maolunga Mmao laa e dagina nohoanga hodooligi o dangada, ma de dugu ange gi tangada aana e lodo e gaavange aagena.

Daniel 6:22

Dogu Maadua ne hai gi humai dono dangada de langi, gi bonodia ngudu o denga laiono. Deenei ai, gilaadeu tee hagalagohia donu au, go hiidinga au tigi haisala ange donu gi de ia. De hodooligi, tigi ai hogi se mee dee heohi aagu gu hai adu gi de goe.”

Joel 2:27

Gai goodou e tonu ange naa bolo au e noho donu i Israel, gai go au go Iahweh doodou Maadua, e deai ange donu; ogu dangada e dee aahe ange naa donu ga dookaa.

John 1:1

De Muna gu dahi donu i taamada, gai de Muna gu noho huu madali de Maadua, gai de Muna go de Maadua donu.

John 10:30

Gimaau ma dogu Damana e dahi donu huu.”

John 6:10

Iesu ne hai ange, “Haia dangada gi nnoho gi lalo.” Gai kilaa e lagolago helii e ssomo ai; gai dangada alodahi ga nnoho gi lalo, agu made se limamano dangada.

Acts 1:8

Aagai goodou e kave naa ssauaa i dua de hano iho o de Hagasaalunga Dabu gi oodou elunga; gai goodou e hai naa ga ni dangada e daalaa hagadonu ogu dagodo i Jerusalem, ma Judea alodahi, aama Samaria, ga dae ai loo gi de bido laa o henua i lalo.”

Acts 14:15

“Goodou denga daane, gu aha goodou gu hai ai naa mee naa? Gimaau ni dangada donu huu bei oodou dagodo. Gimaau ne gaamai gi goodou de longo danuaa gi daahuli gee ai goodou i mee e deai olaadeu haigamaiana, gi daahuli ange gi de Maadua e mouli laa, go ia ne haia de langi ma henua i lalo ma tai aama mee alodahi iai.

Deuteronomy 32:31

Delaadeu baba e dee bei taadeu Baba, odaadeu hagadaumee e hagasaele hogi bei gidaadeu.

Deuteronomy 32:39

Goodou kalo mai diiloo, go au donu deenei, gai e deai ange donu se maadua, go au donu huu. Go au e daia gi maakau, gai go au e hagamouli ina; go au e hagalagolagohia ina, gai go au hogi e hagaieiangi ina; e deai donu se dangada e maua i de hagaola dahi mai i dogu lima sauaa.

Deuteronomy 32:4

Ia se baba makaga, ana hegau e hoohonu danuaa, gai ia e hai hegau i de hagamodu heohi. Ia se Maadua e hai hegau i de muna abodonu ma teai se baubau i ono daha, ia e hagamodu i de heohi ma de soe.

Deuteronomy 4:35

Gai mee nei ne hagaago adu gi iloo ai e goodou bolo Tagi Maolunga go de Maadua donu, gai e deai ange donu se Maadua e bei ono dagodo.

Deuteronomy 4:39

Deenei ai, ailaa nei gai goodou haia gi tonu ange goodou aama de dugu mee nei i oodou lodo, bolo Tagi Maolunga go de Maadua donu o de langi ma henua i lalo, gai e deai ange donu e bei ono dagodo.

Hebrews 12:1

Deenei ai, go hiidinga e soa mmao de gau tala hagadonu, e daumada ina ma de duuli ina gidaadeu bei denga giliiga, deenei ai, gidaadeu ga tili mee alodahi e hagalaavea ina laa gidaadeu, ma de haisala e hai ngaohie laa taadeu noodia ai. Gai gidaadeu gi llodo mmahi i de saavini e houhou ange gi de mee gu hagailonga mai gi gidaadeu.

1 John 1:2

De mouli nei gu hagasula mai donu, gai gimaadeu gu gidee ma de tala hagadonu ono dagodo. Gimaadeu gu agoago adu goodou i dagodo o de mouli e dee ngado mai, ia nogo noho donu madali Tamana, gai ne hagasula mai gi gidaadeu.

1 Samuel 2:2

E deai ange donu se dangada e dabu bei Tagi Maolunga, e deai ange donu e bei oo dagodo; e deai ange donu se baba e bei taadeu Maadua.