Hosea 7:1 - De Beebaa Dabu

¹ de masavaa aagu e lodo ai e hagaieiangi Israel, gai gu gidee mai baubau a Ephraim, ma hegau dee heohi a Samaria. Gilaau ne hai hegau i de hagasenga, de gau gaiaa e ulu gi lodo hale e gaiaa ai, denga hagabuulinga e gaiaa mee o dangada i honga denga haiava;

Hosea 7:1 Iomraidhean Croise

Isaiah 28:1

E vakaa naa de hau hagadubu a de gau ssenga o Ephraim e tuhi laa, go dono mahamaha gu dai lilo bei de huaala gu mmae laa, go de aduhale e duu laa i honga tuuduu o de geelonga iai gelegele danuaa, go de mommee a de gau ssenga i uvaini e tuhi laa.

Isaiah 59:12

Go hiidinga omaadeu baubau i mada luoo mada e lagolago mmao, omaadeu haisala gu hagabaubau donu gi gimaadeu. Omaadeu baubau e daakodo donu i omaadeu daha, gai gimaadeu e iloo donu omaadeu baubau.

Isaiah 59:13

Gimaadeu ne hagamaanege ma de hagadee iloo Tagi Maolunga, gimaadeu ne daahuli gee i demaadeu Maadua; gimaadeu ne hai denga hagatau hagadaemaha ma de hai baasi, gimaadeu e tala muna hhadu ne loage laa i omaadeu lodo.

Isaiah 59:14

Gai de hagamodu muna heohi gu buibuia, de heohi gu mmao gee; gai mee abodonu gu dee gidee i denga aduhale, gai de muna abodonu gu dee gidee hogi.

Jeremiah 51:9

Gimaadeu ne hagatale de hai gi ieiangi Babylon, aagai ia tee maua gi ieiangi. Gidaadeu ga tili ia, gai dahi ma dahi gi hano gi dono henua; go hiidinga dono hagaduasala gu dae age loo gi lo te langi gai gu maolunga donu bei denga giliiga.

Ezekiel 16:46

Doo daina hahine madua go Samaria, ia e noho madali ana damaa hine i oo baasi ngaiho; gai doo daina hahine gauligi go Sodom, ia e noho i oo baasi i ngaage madali ana damaa hine.

Ezekiel 23:4

De ingoo o tamaa hine madua go Oholah, gai dono daina gauligi go Oholibah. Gilaau ngaadahi ni bodu niiogu, gai gilaau ne haanau hanu gauligi daane ma gauligi haahine. Oholah go Samaria, gai Oholibah go Jerusalem.

Ezekiel 24:13

Koe gu hakino gee i hiidinga o au dahulinga baubau; au ne hagatale de hagagilimalali goe, gai koe tee gilimalali donu. Deelaa ai, koe e dee maua donu gi gilimalali ga dae ai gi de sili dogu bole i dua dagu hagaduasala goe.

Hosea 10:5

Dangada e nnoho i Samaria gu maatagu i hiidinga o dahi ⌊diinonga e hagadulagi ange laa gi de⌋ kaau i Beth Aven. Dono huaadangada e tangi naa i hiidinga o delaadeu diinonga, ono dangada haimeedabu e tangi naa hogi, aama dangada ne malangilangi i de mahamaha o tiinonga laa, go hiidinga gu gaavee gee mai i olaadeu daha.

Hosea 11:12

Ephraim gu duuli au i denga muna hhadu, de gau Israel gu daahanga mai au; gai a Judah goi hai baasi ange huu gi de Maadua, de Ia Dabu e hai hegau laa i de mee abodonu.

Hosea 11:8

Ephraim, e maua e au i de tili goe? Israel, e maua e au i de dugu goe gi hano? E maua e au i de hai goe bei dagodo o Admah? E maua e au i de hai goe bei dagodo o Zeboiim? Ogu lodo gu dee baba mmao, au gu dee maua i de golomagi dogu lodo aloha.

Hosea 12:1

Ephraim e gai de madangi, ma de doolohi de madangi mai i dua i taiao ga boo ai. Gilaadeu e dee modu de hadu muna ma de vaivai hai dangada; gilaadeu e hai dahi hagatoo donu hagaheloongoi madali Assyria, ma de kave denga lolo gi Egypt.

Hosea 12:2

Tagi Maolunga e dahi ana mee e hagabaubau ai Judah, ia e hagaduasala naa Jacob gi bei dagodo o ana haingaa mee, ma de hagao ange ia gi bei dagodo o ana hegau.

Hosea 4:17

Ephraim gu hagabuni ange gi denga diinonga, dugua donu huu ia.

Hosea 4:2

Gilaadeu e hagatoo donu i de hagasenga, e hadu muna, ma de daa gi maakau dangada, e gaiaa ma de dagodo haisala. Gilaadeu gu oha hainga alodahi, ma de duudagi de daa ga maakau dangada.

Hosea 5:1

De gau haimeedabu, nnoho mai hagalaangona muna nei! Dangada o Israel, goodou nnoho mai hagalaangona! Huaabodu o denga hodooligi, nnoho mai hagalaangona! De hagaduasala nei e hai adu donu gi goodou; go hiidinga goodou ne hagasengalia i Mizpah, gai dahi sele gu doha i honga de mounga go Tabor.

Hosea 6:4

Ephraim, dee hee dagu hai e hai ai goe? Judah, dee hee dagu hai e hai ai goe? Doo aloha e bei de mama o de maluulu i taiao, ma de mee suungia o taiao e moolau laa teai.

Hosea 7:13

E vakaa naa gilaadeu, go hiidinga gilaadeu gu daahuli gee i de au! Daia gilaadeu gi maakau, go hiidinga gilaadeu gu hai baasi mai gi de au! Au ne lodo mmao e hagaola gilaadeu, aagai gilaadeu e hadu muna i de au.

Hosea 8:5

Samaria, dilia doo ⌊diinonga e hagadulagi ange laa gi de⌋ kaau! Au e kona mmao de lili i gilaadeu. Dee hee maa taulooloa delaadeu dee maua i de hai gi gilimalali gilaadeu?

Hosea 8:9

Gilaadeu gu hulo gi Assyria, bei dahi donkey aada e silivaahea saele laa. Ephraim gu hagao ange ia gi ono dau soa.

Amos 3:10

“Gilaadeu e dee iloo de hai de mee heohi, go Tagi Maolunga e hagadaba. Gilaadeu e hagabudu mee alaadeu e gaiaa ma de vaivai hai ai dangada i lodo olaadeu mommee buibui makaga.”

Amos 3:9

Hagailoo ina ange gi denga mommee buibui makaga o Ashdod, ma ange gi mommee buibui makaga i de henua go Egypt, hai ange, “Goodou hagabuni mai gi honga mounga o Samaria; diiloo ai de hellumi laumalie i kilaa, ma de hagaduasala gu hai i magavaa o ono dangada.”

Amos 8:14

Gilaadeu e hagatoo donu i tiinonga hagadookaa o Samaria, be go de hagataba, ‘Dan, au e hagatoo donu i de mouli o doo diinonga,’ aabe go de hagataba, ‘Au e hagatoo donu i de mouli o tiinonga o Beersheba;’ gilaadeu e maakau naa donu, gai e dee aahe ange e hiihidi age.”

Micah 6:16

Koe ne kana ange ga daohi hainga a Omri, ma hegau alodahi a de huaabodu o Ahab; goodou e daudali i alaadeu hagasaele. Deelaa ai, au e hai naa goe gi ngadi dagodo, gai oo dangada e hai naa ga llele mouli o dangada, ma de hagangadi mee ina daho dangada.”

Matthew 23:37

“Jerusalem, Jerusalem! De aduhale ne daia ga maakau denga pelaabisi ma de maga i hadu, gilaadeu ne hai gi loomai gi oo daha! Gu dee modu donu dogu lodo e hagabudu mai au dama, bei de hai a de gaagoo hahine e hagabudu ai laa ana dama i lalo luoono bakau, aagai koe e dee lodo!

Luke 13:34

Jerusalem, Jerusalem, de aduhale ne daia ga maakau denga pelaabisi ma de maga i hadu gilaadeu ne hai gi loomai gi de aduhale! Gu dee modu dogu lodo e hagabudu au dama, bei de hai a de gaagoo hahine e hagabudu ai laa ana dama i lalo luoono bakau, aagai koe e dee lodo!

Luke 19:42

ga hagadaba, “Noo anailaa nei koe ne iloo mee e haia ga noho baba goe — aagai iainei mee nei gu hagammuni i de goe.