Ecclesiastes 9:3 - De Beebaa Dabu

³ Deenei de mee baubau e hai i mee alodahi e hai i lalo de laa: de hagaodi o dangada alodahi e dagodo daudahi donu huu. E dahi ange mee, lodo o dangada e hoohonu i de baubau, gai de llodo ssenga e dagodo i olaadeu lodo i de masavaa olaadeu e mouli ai, gai muli mai gilaadeu e hulo gi daho de gau maakau.

Ecclesiastes 9:3 Iomraidhean Croise

Genesis 6:5

Gai Tagi Maolunga gu gidee bolo gu kona mmao de baubau o dangada i henua i lalo, gai alaadeu dahulinga ma maanadu i olaadeu lodo i masavaa alodahi go de baubau donu huu.

Genesis 8:21

Gai Tagi Maolunga gu dungua de kala o ssigidaumaha laa, gai Tagi Maolunga ga hagadaba i ono lodo: “Au gu dee ahe ange naa donu e hagamalaia de gelegele i hiidinga o dangada, e dee galemu donu maanadu i lodo o tangada, e baubau donu mai i dono gauligi. Au gu dee ahe ange naa donu e daa gi maakau mee alodahi e mouli, bei dagu hai ne hai ai nei i de haonga nei.

De Beebaa go Job 15:16

gai tangada hakino gee ma de haisala e kii mai ange donu, ia se dangada e unumia tee heohi bei denga vai!

De Beebaa go Job 21:26

Gai luu dangada nei ngaadahi ne danu i lo te gelegele, denga ilo e tolo i olaau angaanga ngaadahi.

De Beebaa go Job 9:22

Gai e bei donu huu, aanei hiidinga aagu e hagadaba ai laa, ‘Ia e daa ga magau tangada tigi haisala aama tangada baubau.’

Psalm 51:5

Ni muna abodonu, au se dangada baubau mai i dogu haanau, gai au ne haisala mai donu i de masavaa oogu ne hagadili ai i daho dogu dinana.

Psalm 64:7

Aagai de Maadua e tili naa gilaadeu i dao o dana mee hholu, gai e moolau naa donu de lagolagohia.

Proverbs 14:32

Tangada baubau e hagaduasala donu huu i ana hegau baubau, aagai tangada heohi e dahi donu ono buibui i de masavaa o de magau.

Ecclesiastes 1:17

Gai au ne hai gi donu ange au gi dagodo o de heiangi ma de senga aama de lodo senga; aagai au gu iloo hogi, bolo de mee nei e bei de ngadi doolohi a dahi de madangi.

Ecclesiastes 12:7

gai de mama o de gelegele e ahe ange naa gi de gelegele, ne daamada mai ai laa, gai de hagasaalunga e ahe gi daho de Maadua ne gaavange laa.

Ecclesiastes 2:14

Tangada heiangi e hanu ono ganomada e tilo ai, gai tangada lodo senga e seesee i lo te gohu; aagai au gu donu ange bolo gilaau ngaadahi e tuu ange naa gi de mee daudahi.

Ecclesiastes 7:2

E danuaa ange doo hano gi de hale o de hinangalosaa i doo hano gi de hale e hai ai taonga, go hiidinga de magau go de hagaodi o dangada alodahi; gai dangada e mouli gi daohia de mee nei i de lodo.

Ecclesiastes 7:25

Au ne hagammahi gi donu ange au, ma de ssala gi maua de heiangi ma ono dagodo, ma de hai gi donu ange au gi de baubau o de lodo senga ma de lodo senga e haia laa ga senga tangada.

Ecclesiastes 8:11

De masavaa naa huu e dee hagaduasala ai tangada i de masavaa moolau, i ana hegau baubau, gai lodo o dangada gu nnoho ai naa donu huu e hai de baubau.

Ecclesiastes 9:11

Au ne gidee ange dahi mee i lalo de laa: de saavini houhou e dee se mee ange donu huu gi tangada gemo, taua e dee se mee ange donu huu gi tangada mmahi; denga gai e dee ni mee ange donu huu gi tangada heiangi, gai de lava e dee se mee ange donu huu gi tangada iloo mee, gai de abodonu e dee se mee ange donu huu gi tangada gu agoagona; aagai de masavaa ma mee e hai ni mee ange gi gilaadeu alodahi.

Ecclesiastes 9:2

Gai de hagaodi o dangada alodahi se dagodo daudahi — tangada heohi ma tangada baubau, tangada danuaa ma tangada dee heohi, tangada gilimalali ma tangada e dee gilimalali ono lodo, tangada e haia sigidaumaha ma tangada e dee haia sigidaumaha. Mee e hai ange gi tangada danuaa, e hai ange hogi gi tangada haisala; gai gilaadeu e haia hagatoo donu e bei hogi gilaadeu e dee hagatoo donu.

Ecclesiastes 9:4

Tangada goi mouli laa e dahi donu ana tali, gai de gaaduu goi mouli laa e danuaa ange i de laiono gu magau laa!

Jeremiah 16:12

Gai goodou gu kii ange donu de baubau i oodou dubuna madagidagi. Tilo, goodou alodahi gu hagamakaga oodou lodo i de hai de baubau ma tee hagallongo mai gi de au.

Jeremiah 17:10

Gai au, Tagi Maolunga, e tilo dagodo o de lodo ma de hagatale maanadu a tangada, au e hagao ange naa gi bei dagodo hegau a dahi.”

Jeremiah 17:9

Lodo o tangada e kii ange de laumalie de hagasenga iai i mee alodahi, gai e kona de hakino gee. Goai e maua gi donu ange aagena?

Luke 15:17

Aagai ga gidee iho huu e ia ono dagodo, gai ia ga hagadaba, ‘De gau hai hegau soa o dogu damana e lagolago mmao alaadeu gai, gai au e magau i de hiigai i kinei!

Luke 6:11

Aagai de gau sisi ma denga Pharisee gu llili mmao, gai gilaadeu ga daamada de hagasaele delaadeu hai e hai ai Iesu.

Acts 12:23

De masavaa laa donu huu gai tangada de langi o Tagi Maolunga ga hagaili Herod, gai denga ilo ga gai dono angaanga, gai ia gu magau, go hiidinga ia tee hagamahamaha de Maadua.

Acts 26:11

Au ne hagadaga hogi i denga synagogue alodahi ga hagaduasala gilaadeu, ma de hai gilaadeu gi hagangadi mee ina Iesu. Au ne vaivai hai gilaadeu i aduhale o denga henua gee, i hiidinga dogu kino i gilaadeu.

Acts 26:24

Gai de masavaa a Paul e tala ai dono heohi, gai Festus ga hai ange i de leo laumalie, “Paul, koe gu senga i de kona de lagolago au mee gu ago!”

Titus 3:3

Go hiidinga i mua gai gidaadeu alodahi ni dangada llodo ssenga, ma tee hagallongo i muna, gai ne daahangadia, ma de noodia i denga hagadaagangaa lodo odaadeu e malangilangi ai. Gidaadeu ne mouli i de kino ma de lodo gaiaa, gai e hai hegau i de lili ma de hagadau kino.

2 Peter 2:16

Aagai ne hagaseegina i hiidinga ono haisala i e dahi donkey — se manu e dee maua i de basa i de laa tubua — gai ne basa ange gi de ia i de leo o tangada ga hai de pelaabisi laa gi dee hai hegau bei dagodo o tangada lodo senga.