Amos 4:10 - De Beebaa Dabu

¹⁰ Au ne hai gi loomai denga mee hagamaakau gi goodou bei dagu hai ne hai ai laa Egypt. Au ne daa ga maakau oodou dama daane i de gadilaasa; gai oodou hoosa ne gaavee gee. Au ne hai goodou gi dungua de pilo o oodou mommee nnoho gaainga; aagai goodou tee aahe mai gi de au, go Tagi Maolunga e hagadaba.

Amos 4:10 Iomraidhean Croise

2 Kings 10:32

De masavaa laa gai Tagi Maolunga ne kave gee hanu mommee i de henua o de gau Israel. Hazael ne humai ga hagadee kii dangada i denga mommee o de henua go Israel:

2 Kings 13:3

Gai Tagi Maolunga gu bole mmao i hiidinga o de gau Israel, gai ia ga dugu ange gi lalo ssauaa o Hazael, de hodooligi o Syria, ma Ben-Hadad dana dama.

2 Kings 13:7

Gai gu dinolima donu daane e kage i honga hoosa, ma e madaangahulu hada hebagi, aama e dahisemada daane e seesee e doe i de hagabuulinga hebagi o Jehoahaz, go hiidinga de hodooligi o Syria gu daa gilaadeu ma gu maakau; gilaadeu ne bei donu dagodo o de mama i de masavaa e duuduu ai denga grain.

2 Kings 8:12

Gai Hazael ga ssili ange, “Dogu dangada aamua, gu aha gu dangi ai naa goe?” “Go hiidinga au e iloo bolo koe e hai ange naa dahi hegau baubau gi de gau Israel. Koe e dudu naa olaadeu aduhale buibui, ma de daa gi maakau alaadeu dama daane i de gadilaasa, ma de maga alaadeu gauligi gi honga de gelegele, aama de hangahanga dinae o denga haahine hai tama.”

Exodus 10:27

Gai Tagi Maolunga ga hagamakaga lodo o Pharaoh, gai ia tee dugu gilaadeu gi hulo.

Exodus 10:3

Gai Moses ma Aaron ga hulo gi daho Pharaoh, ga hai ange gi de ia, “E hagadaba Tagi Maolunga de Maadua o de gau Hebrew, ‘Dee hee maa taulooloa dau dee lodo e hagamaolalo goe i mada luoogu mada? Dugua dogu huaadangada gi hulo, gi maua ai e gilaadeu i de daumaha mai gi de au.

Exodus 14:4

Gai au e hagamakaga naa lodo o Pharaoh, gi dolohia mai ai e ia gilaadeu. Aagai dangada e hagamahamaha ai naa au, i hiidinga o mee aagu ne hai ange gi Pharaoh ma dono hagabuulinga hebagi, gi iloo ai de gau Egypt bolo go au donu go Iahweh.” Gai de gau Israel ne hagasula de mee nei.

Exodus 15:26

Ia ne hai ange, “Noo goodou e kana ange e hagallongo muna a Tagi Maolunga doodou Maadua, ma de hai hegau i de mee heohi i mada luoono mada, noo goodou hagallongo ange gi ana hainga ma de daudali i ana hainga gu hagasauaa alodahi, gai au e dee gaamai naa gi goodou denga hagadaagangaa magi aagu ne gaavange laa gi de gau Egypt, i hiidinga go au donu go Iahweh e hagaieiangi ina goodou.”

Exodus 8:19

Gai denga daane hai huuhuaa mee ga hai ange gi Pharaoh, “De mee nei go de madannia donu o de Maadua.” Aagai Pharaoh goi hagamakaga huu ono lodo, ia tee hagallongo ange donu gi gilaau, bei de hai a Tagi Maolunga gu tala ai laa.

Exodus 9:12

Gai Tagi Maolunga ga hagamakaga lodo o Pharaoh, gai ia tee hagallongo ange gi Moses ma Aaron, bei de hai a Tagi Maolunga gu tala ange ai laa gi Moses.

Exodus 9:17

Gai koe e duudagi donu huu de hagamaolunga huu i dogu huaadangada, koe tigi dugu donu gilaadeu gi hulo.

Isaiah 34:3

Gai olaadeu dangada gu daia laa ma gu maakau gu daakodo saele, gai angaanga o alaadeu dangada maakau e pilo naa, gai honga denga mounga e hoohonu naa i olaadeu dodo.

Isaiah 50:11

Tilo, goodou alodahi e haulasia dahi ahi, ma de kave denga lama e haula laa, goodou seesee i de maalama o oodou ahi, ma denga lama oodou gu haula laa. Deenei dagu hai e hai ai goodou: goodou e daakodo gi lalo i doodou mmae.

Isaiah 9:12

De gau Assyria mai i dua ma de gau Philistia mai i dai e hhanga naa olaadeu ngudu ga holo Israel. Gai mee nei alodahi tee maua donu i de hagahelui dono lili, gai dono lima goi hagaabo donu huu.

Isaiah 9:13

Aagai de huaadangada laa tee aahe mai donu gi de ia ne hagaduasala ina gilaadeu, gilaadeu tee ssala hogi Tagi o denga hagabuulinga hebagi.

Isaiah 9:17

Deelaa ai, de Ia Aamua e dee malangilangi i alaadeu dama daane, be e lodo aloha ange gi alaadeu gauligi gu deai olaadeu damana, aabe go haahine gu maakau olaadeu bodu. Go hiidinga gilaadeu alodahi e dee hai hegau i mee heohi aama de baubau, gai muna a dangada alodahi e tala gu hakino gee. Gai mee nei alodahi tee maua i de hai gi helui dono lili, dono lima goi hagaabo donu huu.

Jeremiah 11:22

deenei ai, e hagadaba Tagi o denga hagabuulinga hebagi: Tilo, au e hagaduasala naa gilaadeu. Alaadeu dama daane e daia naa i de gadilaasa, alaadeu gauligi daane ma gauligi haahine e maakau naa i de onge.

Jeremiah 15:3

Au e hai naa gi loomai e haa hagadaagangaa mee oha gi gilaadeu, go Tagi Maolunga e hagadaba: de gadilaasa e daa ga maakau dangada, ma denga gaaduu e dada dangada ga gaavee, aama manu llele ma manu lodo henua e gai laa ma de daa gilaadeu.

Jeremiah 16:4

Gilaadeu e mmagi naa ga maakau. Gai e deai naa donu dangada e tangi aabe danumia gilaadeu, aagai gilaadeu e bei naa denga duudae e daakodo saele laa i honga de gelegele. Gilaadeu e maakau i de gadilaasa ma de onge, gai olaadeu angaanga e gaina naa e denga manu llele ma manu dolodolo o de henua.”

Jeremiah 18:21

Deenei ai, haia gi humai de onge gi alaadeu dama; haia gi daia gilaadeu gi maakau i de gadilaasa. Haia alaadeu haahine gi deai alaadeu dama ma de maakau olaadeu bodu; alaadeu daane gi maakau i de mee hagamaakau, gai alaadeu dama daane gi maakau i de gadilaasa i de hebagi.

Jeremiah 48:15

Gai Moab gu oha ma gu maoha, ono aduhale gu kage mai aagena denga daane hebagi, gai ono dama daane mmahi e daia naa ga maakau, go de Hodooligi e hagadaba, gai dono ingoo go Tagi o denga hagabuulinga hebagi.

Jeremiah 49:26

Deelaa ai, ono dama daane mmahi e maakau naa i honga ono haiava, ono daane hebagi alodahi e hagallilo naa i de laangi laa, go Tagi o denga hagabuulinga hebagi e hagadaba.

Jeremiah 5:3

Tagi Maolunga, e aha, e dee go de muna abodonu aau e ssala? Koe ne hagailiili gilaadeu, aagai gilaadeu tee langona iho de mmae; koe ne hagahai ngadaa gilaadeu, aagai gilaadeu tee llodo e hai de mee heohi. Gilaadeu ne hagamakaga olaadeu lodo bei de hadu, ma tee llodo e daahuli olaadeu lodo.

Jeremiah 6:11

Aagai au gu honu i de bole o Tagi Maolunga, au gu dee maua i de golomagi dogu bole. ⌊Gai e hagadaba Tagi Maolunga,⌋ “Haia gi hano iho lili gi denga gauligi i honga de haiava, ma denga dama daane gu hagabuni laa; gai e duu ange naa hogi gi taane ma dono bodu, ma de gau maatua, aama de gau madumaatua.

Jeremiah 9:22

Hai ange, “E hagadaba Tagi Maolunga: ‘Angaanga o de gau e ngadi daakodo saele naa bei denga duudae i lo te duu malaelae, ma denga grain gu lava laa i de duuduu a de gau hagihagi, gai e deai donu dangada e hagabudulia.’ ”

Hosea 11:5

E aha, gilaadeu e dee aahe naa gi Egypt, gai Assyria e dee dagi naa gilaadeu, i hiidinga delaadeu dee llodo e daahuli olaadeu lodo?

Joel 2:20

Au e kave gee naa denga itebuubuu mai i ngaiho gi mmao gee mai i goodou, ga hai gi hulo gi de vao e deai laa vai iai gai se ngadi mommee. Denga itebuubuu e hulo i mua, e too ange naa gi lo te dai i baasi i dua, gai denga itebuubuu e loomai i muli e too ange naa gi lo te dai i baasi dai; gai e maakau naa ga pilo, i hiidinga ia gu hai hanu hegau hagalele mouli.”

Leviticus 26:16

gai deenei dagu hai e hai ai goodou: au e hai naa gi moolau de tae mai denga mee hagamaatagu gi goodou, ma de magi iviivi, ma de vvela o de angaanga e haia laa ga dee gide tangada, gai mahi o tangada e hagadagadaga mai. Goodou e doo naa oodou veelenga gai e dee haigamaiana adu gi goodou, i hiidinga go oodou hagadaumee e gaina.

Leviticus 26:25

Gai au e hagaduasala naa goodou i de gadilaasa, e sui adu ai doodou oha dagu hagatoo donu hagaheloongoi. Gai de masavaa naa huu oodou e hagabuni i lodo oodou aduhale, gai au e gaamai naa denga mee hagamaakau gi daia goodou, ma de dugu ange oodou hagadaumee gi hagadee kii ina goodou.

Amos 4:6

Au ne hai gi deai gai i lodo oodou aduhale alodahi, ma de hai gi deai gai i oodou mommee alodahi, aagai goodou tee aahe mai gi de au, go Tagi Maolunga e hagadaba.

Amos 8:3

Denga daahili i lo te temple e hai naa gi se dangi see i de laangi laa, go de Ia Aamua go Iahweh e hagadaba. Gai e soa naa donu de gau maakau e daakodo saele. Gai gu dee hagalongaa!”

Haggai 2:17

Au ne hai gi mmae ma de dongidongi oodou manu, ma de gaamai denga dibadibaa haisi gi oohaa oodou manu; aagai goodou tee aahe mai gi de au, go Tagi Maolunga e hagadaba.

Deuteronomy 28:21

Tagi Maolunga e hai naa denga mee hagamaakau gi loomai gi de goe, ga dae ai gi dana hai gi dee noho goe, i honga de henua aau gu dai kave naa e henua ai.

Deuteronomy 28:22

Tagi Maolunga e hai naa goe gi mmagi iviivi, ma de mahana, ma de hua doo angaanga ma de vvela, ma teai vai i honga de henua, ma manu ma mee dongidongi e daia laa denga manu ssomo. Mee nei e hai adu naa donu gi de goe ga dae ai gi doo magau.

Deuteronomy 28:60

Ia e hai naa hogi goe gi magi i denga hagadaagangaa magi o de gau Egypt ne mmagi ai laa, go magi oodou e maatagu ai laa; koe e dee maua naa donu gi ieiangi mai i magi nei.

Deuteronomy 7:15

Gai Tagi Maolunga e hai naa gi dee mmagi goodou i denga hagadaagangaa magi, aagai ia e hai naa gilaadeu e kino i goodou gi mmagi i magi nei.