1 Samuel 3:1 - De Beebaa Dabu

¹ Gai tama daane go Samuel ne hai hegau ange gi Tagi Maolunga i lalo o Eli. Laangi laa gai gu dai deai donu midi hagaago ange, mai i daho Tagi Maolunga.

1 Samuel 3:1 Iomraidhean Croise

Psalm 74:9

Gu deai hagailonga hagalele mouli amaadeu e gidee; gu deai hogi pelaabisi e doe, gai gu deai se gimaadeu e iloo be dee hee maa taulooloa de hai de mee nei.

Proverbs 29:18

Ga deai naa huu midi hagaago ange, gai dangada gu hai donu huu olaadeu lodo, aagai e manuuia tangada e daohia de hainga.

Isaiah 13:12

Au e hai naa dangada gi sogoisi ange i denga goolo danuaa, ma de sogoisi ange i goolo o Ophir.

Ezekiel 7:26

Denga hai ngadaa lagolago e hai anga naa gi gilaadeu, gai gilaadeu e langona naa denga longo hagamaatagu. Dangada e ssala naa denga midi hagaago ange i daho de pelaabisi; tangada haimeedabu e dee iloo naa de hainga, gai denga daane maatua gu dee maua naa, i de bale ange dangada i hagasaele danuaa.

1 Samuel 2:11

Gai Elkanah ga ahe gi dono hale i Ramah. Gai tama daane go Samuel ne noho ga hai hegau ange gi Tagi Maolunga, i daho tangada haimeedabu go Eli.

1 Samuel 2:18

Gai Samuel e hai hegau i mada luu mada o Tagi Maolunga, gai e gahu i de ephod linen mai i dono gauligi.

1 Samuel 2:35

Gai au e hagasula age naa dogu dangada haimeedabu e hai hegau laa i de muna abodonu, gai ia ga hai ai gi bei ogu lodo aama agu maanadu. Gai au e hai naa dono aamuli gi dee lilo ga hano ai, gi hai hegau ange ai gi de hodooligi ga hano ai.

1 Samuel 2:36

Gai dangada alodahi e doe i doo huaabodu e loomai naa ga dangidangi ange gi de ia i hanu sseene aabe go dahi duudangaa pelaoaa, ga hai ange, “Hagahai hegau ina gimaadeu i hegau a tangada haimeedabu, gi maua ai e gimaadeu i de gaimee.” ’ ”

1 Samuel 3:15

Gai Samuel ne dagodo iho ai loo ga dae ai gi taiao age; gai ia ga hidi age ga hhuge denga abaaba o de hale o Tagi Maolunga. Gai ia ne madagu i de tala ange gi Eli mee gu hagaago ange laa gi de ia.

1 Samuel 3:21

Gai Tagi Maolunga ne duudagi de hakide ange gi Samuel i Shiloh. Ia ne hagaago ange ono dagodo gi de ia, ma de tala ange muna a Tagi Maolunga gi de ia.