Juan 7:37 - Kuna San Blas

³⁷ Napi-iba-dummad-naidgi, Jesús gwisgusgu, binnasur sunmakded, sogded: —Ar dule-wargwen uku-uku itodiile, anse dage. Anse dii gobdage.

Bab dummad Jesucristoba igar mesisad garda

³⁷ Napi-iba-naidgi, a-iba bur iba-dummadid, a-ibagi Jesús gwisgusgu, binnasur sunmakded, sogded: —Ar dule-wargwen uku-uku itodiile, anse dage, anse dii gobdado.

Juan 7:37 Iomraidhean Croise

Nehemías 8:18

Esdrasʼde, gebe-iba-onoded-akar, Neg-Matargana-Iba-bergunaidse bane-bane dulemarga Bab-Dummad-Igar-Maid absosad. Ibagugle (7) Iba-onosmalad. Geb a-banedgine, bela-dulemar bulakwaa igar-sogmaidba Bab-Jehová-nug odummosmalad.

Salmo 143:6

An-argan an besik oyoged, ar igi napa-dinnagwad dii-abedae, deyobi, an bebina soged.

Salmo 42:2

Bab-Dummadbina an nue-soged, Bab-Dummad-san-burba-ukmaidbina an nue-soged. ¿Ar sana Bab-Dummad-asabin an gwisgunonikoe?

Salmo 63:1

¡Bab-Dummad, be an-Bab-Dummadid! ¡Bolegoedba an be-amioed! An uku-uku-itogeyob an bebina soged, an-sana bela bebina soged. Ar igi dule nega-dulesulidganba dii-satedgi dii-amididae, deyobi, an be-amied.

Proverbios 1:20

Binsaed-Nikaguedi, binnasuli galimbaba goled, dulemar-bukidar-ambikued-abargi isseed sunmaked.

Proverbios 8:1

Binsaed-Nikagued, ¿anmarse iseedi gornaisursi? Ibmar-wisigued, ¿iseedi gornaisursi?

Proverbios 8:17

Dule-an-sabmaladi, an sabmogad. Dule-an-amidimaladi, baisursunna an-amimalad.

Proverbios 8:3

Neggwebur-doged-e-yawagakmar-dikarba ise-gollar gornaidaed. E-yawagak-dogedgine binnasuli weyob-gornaid:

Proverbios 9:3

Binsaed-Nikagued, e-garda-berbemalad barmisad, neggwebur-siid-birise barmisad agi iseedi gorbukwa gumalagar.

Cantares 5:1

Be, an-ome-nue-sabesailad, an-bunbalid. An-dutugaluse an dogsad, agi an-mirra-wawadikid an aminonikid, agi an-ina-wawadikid an sunonikid. Agi an-achanis an nue-masad, agi an-achanis-e-uu an nue-guchabalid. Agi vino an nue-gobsad, nunis an nue-gobsabalid. An-aimar, mas-nued be gunmala, gatik be gobmarbali, immee gudii be imakmala.

Isaías 12:3

Deginbali, bemar abonolegedgi weligwar itomaloed, bela-bela be Bab-Dummad-e-abonolegedgi yeer itomaloed.

Isaías 40:2

Jerusalén-dulemarga nue-sabedgi be sunmakmar, ega be sogmar: ‘Be maiga-arbadigusmalad-ibagan wese bergunoniye, be-isgusmalad bato bega bennuklesye. Bemar isgusad-nukad unniguar bato ilabo-wilub sabsur-odurdaklesye. Bab-Jehová bemarga isgued elisye.’ ”

Isaías 40:6

Gayaburba weyob soged: “Binnasuli be soge.” An ega weyob soged: “¿Ibu an binnasuli sogosunna?” Geb anga soged: “Bela dulemarga be soge: ‘Dulemar gaganyobi gued. E-yeerdaklegedi, nainugi-dutu-achunneyobi gued.

Isaías 44:3

Napa-dinnaganaba dii-suurmakega an imakoed, nega-dinnaganaba dianmar an omesoed. Be-wagangine, An-Burba an odegoed, be-anagangine, ise-nued an binsaoed.

Isaías 55:1

Bab-Jehová sogbalid: “¡Dule-uku-uku-itodimaladi, dii gobdamar! Dule-mani-surmaladi, ibmar-sudamar, vino be sudamar, moli-nunis be sudamar. Gwen be bennukosulid, binsa bega uklegoed.

Isaías 55:3

Nue be bogi itomar, be anse dagmar. Be nue an-itomar, adi, be dula gudii gumaloed. An bemar-ebo degisadegu igar mesoed, adi, an-mai-David-sabedba an-ega-ibmar-sogsa-gusadba guegar.

Isaías 58:1

Bab-Dummadi Isaíasʼga sogded: “Gandikidba be binnasuli gole, melle be bogguo, gar-trompetaʼyob be binnasuli gole. An-dulamarga e-nodiid be soge, Jacob-waganga e-isgudiid be soge.

Jeremías 16:19

Bab-Jehováʼye, an suli-suli-itogedgine, be an-ganguedga guedid, be an-ogannogedid, be an-edarbedid. Bela yalamar-ugakaase-bukmaladi bese danimaloed, bega sognonimaloed: “Anmar-dadgan bab-dummadsulid e-bab-dummadga na imaksamalad. Gwen ibmar-nued abingassurmalad, unnila ibmar-igarga-gusulid na abingasmalad.

Jeremías 2:2

“Be nae, Jerusalén-dulemarga be sunmakna, ega weyob be sogna, Bab-Jehová weyob-sogye: ‘An ebinsado. Be yagwa-unni anbinarbi be-sogdidaed. Ome machered-abesiidyobi, nega-dulesulidganba be an-balimaksa gusad. Napaneg-ibmar-digar-sulidganba be an-balimaksa gusad.

Ezequiel 47:9

We-diwar bia suurmakmaioe, agi, bela ibdurgan-gudimalad dula-gudii guoed. Ar we-diwar, dii-balu-balud dii-sayegwadga-imakosoggu, egi bukidar uamar gudii guoed. Bela ibdurgan-e-diigi-gudimaloed dula-gudii guoed.

Levítico 23:36

Bemar ibagugle (7) Bab-Jehováʼga ibmar-ogumakar-uknai guoed. Ibabaabakadgine (8), bemar Bab-Jehová-e-nug-odummogega islidiki danar ambikunonimaloed. Agine, amba bemar Bab-Jehováʼga ibmar ogumakar ukbaloed. A-iba, iba-dummadid. Degisoggu, bemar a-ibagi, bipisaale arbaosurmalad.

Levítico 23:39

” ’Nii-walagugled-ibambe-gakatargi, bemar ibmar-gwag-wesmalad-sorbali, Bab-Jehováʼga ibagugle (7) bemar iba onomaloed. Gebe-iba-onodoedgi, degi, ibabaabakgi (8) bemar arbaosurmalad.

Miqueas 6:9

Jerusalén-dulemar, Bab-Jehová-ibmar-soged nue be itomar: Dule Bab-Dummad-dobee-nanadiile, a-dule, dule-binsaed-ibedid. Sabsur-odurdaklenaid nue be itomala. Bega dule-odurdakleged-barmialidi, nue be itomala.

Zacarías 9:15

Bab-Jehová-Bela-Gangued-Nikad na e-sordamar-bendaknonikoed. E-sordamar, e-isdarmalad-e-gingimar bela obelogoed. Vino-gobeyobi ablis gobmaloed abali, mummu-gunanaiyobi, allenanaioed. Igi ablis ibmar-ogumakar-ukleged-ailagi-eolegega nogmargi enoledae, deyobi, ablisbi-moodo gudimaloed.

Números 29:35

” ’Ibabaabakgine (8), bela bemar Bab-Jehová-nug-odummogegala, ese bulakwaa nonimaloed. A-ibagi, bipisaale dule gwen arbaosulid.

Mateo 11:28

”Bela bemar-yegus-alamaknaimalad, degi, yegus-itodidimalad, anse be dagmar, ani an bemarga obunnoged ukoed.

Mateo 3:3

Ar Bab-Dummad-gayaburba-barsoged-Isaías, deun weyob Juanʼnik sogsagusgu: “Dule-wargwen nega-dulesulidganba binnasur sunmaknonikoed, dulemarga sognonikoed: ‘Dule-Dummad-idu igar mayemar, igar swilidik mesmar.’ ” Isaías 40:3

Mateo 5:6

Dulemar igar-napiragwadbina mas-gunbiedyob-itodimalad, degi, igar-napiragwadbina uku-uku-itodimalad, amargi nued binsalesad. Ar Bab-Dummad, amar nabir igar-innikigwad-imaked imakoed.

Juan 1:23

Juan, abin-sogdegusad: —Bab-Dummad-gayaburba-barsoged-Isaías sogsa gusad: ‘Dule-wargwen nega-dulesulidganba binnasur sunmaknonikoed, dulemarga sognonikoed: Dule-Dummad-idu igar mayemar, igar swilidik mesmar.’ Isaías 40:3 Ani an a-duledo.

Juan 14:6

Jesús, abin-sogded: —Anbi unnila Bab-Dummadse be-sedoed. Ani an napiragwadid, degine, dulagudigued angi danikid. Dule angi nasulile, geg Bab-Dummadse warmaked.

Juan 4:10

Jesús, abin-imakdegu, ega sogded: —Ar Bab-Dummad-ibmar-uked be wisina, degine, doa-dule bega soge: ‘Anga dii gobega be udaye,’ ese be dii egisoenad, degine, e bega dii-burba-nikad ukoenad.

Juan 4:11

Ome, Jesús-abin sogded: —Dummad, ar be dii-weed sated, deginbali, dia matusurbalid, degite, ¿bia be dii-burba-nikadi onogosunna?

Juan 4:14

Ar dii-an-ega-ukoed gobsardi, bar gannar uku-uku itogosulid. Ar dii-an-ega-ukoeddi, dii napa-urba-aryomaiyobi, burba-geg-bergued e-ulubgi nikuoed.

Juan 5:40

Degi-inigwele, bemar burba-geg-bergued-nikuega anse yapa dagmalad.

Juan 6:35

Jesús, abin-sogded: —Ani an madu-burba-duladid. Ar dule anse danikile, bar gwen ukumesosulid. Ar dule an-bengusulile, bar gwen uku-uku itogosulid.

Juan 6:37

Ar Bab bela dulemar-anga-ukedi, anba-naguega anse dagoed. Ar dule anse danikile, gwen an obanosulid.

Juan 6:55

Ar an-sana, masgunned-sunsogedid, degine, an-abe, gobed-sunsogedbalid.

Juan 7:28

Jesús Bab-Dummadse-goled-neggi dulemar-odurdaksigu, binnasur sunmakde, sogded: —Bemar mag-an-dakmalad, degine, be an-wismarbalid an bialidi. An-itolegedba wargwen an danisulid, ar Bab-Dummad-napiragwadid an-barmialid. A-duledi bemar akudakmalad.

1 Corintios 10:21

Ar bemar geg Bab-Jesús-nog-gobnai, degi, nia-nog-gobnai gued. Degine, Bab-Jesús-mesegi mas-gunsii, degi, nia-mesegi mas-gunsii, geg bemar gumarbalid.

1 Corintios 10:4

Degine, bela amar gobed-burbaled emaladbi gobsadbimarbalid. Ar ade, akwa-burbaled eba nadapgusad, agi dii-ainied gobsamalad. Ar we-akwa Cristo gued.

1 Corintios 11:25

Jesús mas-guchad-sorba, amba deyob nog susbalid. Geb sogdebalid: “We-gobeddina, an-abed. Wedi, Bab-Dummad dulemar-ebo igar-bini-mesisad-e-wilub gued. Angi be binsamalaga weyob be gobdii imakmalo.”

1 Corintios 12:13

Ar anmar bela unnila Bab-Burba-wargwenna-guedgi oglesmalad. Agi anmar bela san-wargwenna gunonikid, Judíoʼdibe, Judíoʼsurdibe, maidibe, maisurdibe, ar bela anmargi Bab-Burba ubosadbimalad.

Efesios 5:18

Degine, melle be mumgumar. Ar mumguedi, galagwensuli dule-onanae imaked. Bur bela-bela Bab-Dummad-Burba-Isligwaledse-seledii na be imakmar.

Apocalipsis 21:6

Anga sogdebalid: “Bato bela gwinmaksad. ”Ani an, Gebesailaginedid (Alfa), ani an, Napisoladbalid (Omega). Ar dule uku-uku itogele, ani an ega dii binsa ukoed. We-dii, dii-saila-degisadegu-dule-dula-imakedid.

Apocalipsis 22:1

Degine, a-sorbali, baliwitur diwar-nued, diwar-burba-dula-dule-imaked, anse oyosbalid. We-diwar isbe-daledyobi dakarmakmaid. We-diwar, Bab-Dummad-ologanagi, degi, Sibad-Wawaad-Mimmi-ologanagi, danikid.

Apocalipsis 22:17

Bab-Burba, degine, Sibad-Wawaad-Mimmi-e-ome soged: “Dage.” Ar dule itogele, soge: “Dage.” Dule uku-uku itogele, dage. Ar dule dii-dula-dule-imaked gobbiele, maniginsuli binsa gobdage.