Juan 3:34 - Kuna San Blas

³⁴ Ar Bab-Dummad we-dule-barmiarsoggu, a-ulale, we-dule-nibneggi-danikidi, Bab-Dummad-e-gayaburba sunmaked. Ar Bab-Dummad E-Burba ise-obinagwar uked, ise-wilubsaar uksulid.

Bab dummad Jesucristoba igar mesisad garda

³⁴ Ar Bab Dummad we-dule-barmiarsoggu, a-ular we-dule-nibneggi-danikid Bab-Dummad-gaya-burba sunmaked. Ar Bab Dummad na E-Burba-Nued ise-obinagwar uked, ise-wilubsaar uksulid.

Juan 3:34 Iomraidhean Croise

2 Reyes 2:9

Obaksamargu, Elías, Eliseoʼga sokalid: —An begi bangusokalid-idu, ¿ibu-bega-imakbi be an-abege? Eliseo ega sogded: —An be-sorbali, Bab-Dummad-Burba-Gandikid-be-nikadi ilabo-wilub an nikubie.

Salmo 45:7

Igar-innikigwad-imaked be yeer-itodaed, ibmar-isganadi, be isdar-daked. A-ulale, Bab-Dummad-be-Bab-Dummadi, be-aimar-baiganba be-susad. Be-Bab-Dummad, ina-wawadikidgi be-wawamaksad, weligwar-ito be-imaksad.

Isaías 59:21

”An bemarbo igar mesed, An-Burba bemargi maigu guoed. Be-gwabindukugine, an bega an-gayaburba-nasiksadi, bar begine alliosulid. Degi, be-mimmigangine, be-wagangine, bar an-gayaburba alliosulid, emi-ibadse degisadegu guoed.”

Levítico 7:35

Bab-Jehová dule-irwa-ese-goledga, Aarón, degi, e-masmala-nug-imaksad-iba-akale, we-ibmar-Bab-Jehováʼga-ogumakar-uklegedi, Aarónʼga, degi, e-masmalaga ukleged-igar megnonikid.

Números 11:25

Degidgine, Bab-Jehová mogir-abalagi aidenonikid, Moisésʼga sunmaksad. Geb degine, Bab-Jehová Israel-girmar-dummaganga Moisés-Bab-Burba-nikad ukdemogad. Bab-Dummad-Burba amargi aidenonimogu, amala Bab-Burbaba sunmakdemalad. Deyob-gusadi, a-sorba we-dummagangi bar deyob gussulid.

Mateo 12:18

“We an-mai, anga arbaega an susad. An nue na sabed, an egi nue-weligwar itoged. An-Burba an ega ukoed, ar dulemar-yar-baid-baidgi-bukmaladga igar-naboged-igargi sunmakoed.

Lucas 4:18

“Bab-Dummad-e-Burba angi maid. Ar ade, dule-wilemaladga gayaburba-nuegangi-sunmakega, Bab-Dummad an-susad. Bab-Dummad an-barmialid: Dule-gwage-nunmak-itodimaladga gwage-armakegar. Dule-galesbukmaladga binnasur sogegar, bemar ainimarye. Dule-ibyasuli-gudimaladga ibya-egaegar. Dule-mesagwar-gudimalad-ollor-imakegar.

Juan 1:16

Ar a-dule, bela-bela anmargi nued binsamaisoggu, belagwapa ibmar-nikadba ibmar-nuegan anmarga ukmaiguad.

Juan 15:26

”Ar Dule-Gwage-Armaked, an-Bab-nuggi an barmidagoedi, Burba-Napiragwad gued. A an-Babgi danikid. A bemarse nonikile, angi sunmaknonikoed.

Juan 16:7

Ar nue-napira an bemarga sogmalad: An bemar-idu naele, bur bemarga ibnuedid. An bemar-idu nasulile, Dule-Gwage-Armaked geg bemarse daged. Ar an bemar-idu naerdina, a-dule, an bemarga barmidagoed.

Juan 3:17

Ar Bab-Dummad we-napnegse na E-Machi-barmiargu, dule-we-napneggi-bukmalad-sabsur-odurdakega barmiarsulid. Na E-Machi-barmialid, adi, dule-we-napneggi-bukmalad E-Machigi abonolemalagar.

Juan 5:26

Ar igi Bab na-dukin dula-gudigued-nika, amba deyob, na E-Machiga na-dukin dulagudigued uksamogad.

Juan 7:16

Jesús amarga sogdesun: —An-ibmar-odurdaked angadsulid, Bab-Dummad-an-barmialid-sogedba an dulemar-odurdaked.

Juan 8:40

Bab-Dummadgi an-ibmar-napiragwad-itosad an bemarga-sogsad. Degite, be an-oburgwebimalad. Dad-Abrahamʼdi gwen deyob gussulid.

Juan 8:47

Ar dule Bab-Dummadgadile, Bab-Dummad-gayaburba-sunmaked itoged. Bemar, Bab-Dummadgadsulid, a-ulale, bemar Bab-Dummad-gayaburba itosulid.”

Gusmalad 1:2

degine, igi-Jesús nibnegse-nakwide gusbali, ase an narmaksado. Emisgindi, an bega sogbalodo, igi-Jesús yoo nibnegse-nakwed-iduale, e-sapingan-bur-dummagan-susadga, Bab-Dummad-Burba-Isligwaledbali sogsagusa, ibu imakmaloe.

Gusmalad 10:38

Deginbali, bemardi nue wismarbalid, igi Bab-Dummad Jesús-Nazaretʼginedga E-Burba-Isligwaled uksa, degine, e-gangued ega uksabali. Degine, igi Jesús ibmar-nueganbi imakdii gusbali, degi, igi dulemar-niaburbase-wiledimalad nudakdii gusbali. Ar Jesús weyob gudigusad, ar ade, Bab-Dummad eba gudiguad.

Romanos 8:2

Cristo-Jesúsʼba Bab-Dummad-Burba-e-igar-dule-odulogedi isgued-igargi an-ollor-imaksad, degine, burgwed-igargi an-ollor-imaksabalid.

Efesios 3:8

Ar an-bur Jesucristoʼba-nanaimaladba bur-bipi-inigwele, degite, Bab-Dummad, Judíoʼsurmaladga E-Gayaburba-Nued-Cristoʼgi-soglesadgi-an-sunmakega an-susad. We-Cristo-igar, bur igar-nuedid, dulemar bela-mag-itogosulid-igalad.

Colosenses 1:19

Ar Bab-Dummad na e-abegedbali, bela Cristoʼga na Bab-Dummadga-gued uksad.

Colosenses 2:9

Ar Cristoʼgi bela Bab-Dummad-gued sanar dakleged.

Apocalipsis 21:6

Anga sogdebalid: “Bato bela gwinmaksad. ”Ani an, Gebesailaginedid (Alfa), ani an, Napisoladbalid (Omega). Ar dule uku-uku itogele, ani an ega dii binsa ukoed. We-dii, dii-saila-degisadegu-dule-dula-imakedid.

Apocalipsis 22:1

Degine, a-sorbali, baliwitur diwar-nued, diwar-burba-dula-dule-imaked, anse oyosbalid. We-diwar isbe-daledyobi dakarmakmaid. We-diwar, Bab-Dummad-ologanagi, degi, Sibad-Wawaad-Mimmi-ologanagi, danikid.