Jeremías 27:9 - Kuna San Blas

⁹ ” ’Degisoggu, be-gayaburba-barsogmalad, be-nermar, be-dule-gabdaked-odulomalad, be-niisgwaba-dakar-ibmar-sogmalad, be-ina-isgana-imakmalad, bega sokarmalale, melle be Babilonia-e-reyba ibsamaloye, melle be itomalo.

Jeremías 27:9 Iomraidhean Croise

Éxodo 22:18

”Melle be ome-ina-isgana-imaked, dula-gudii imako, oburgwemalo.

Éxodo 7:11

Ar Faraónʼdi e-dulemar-nue-ibmar-wisimaladse, nelemarse gochad. Wemala, ibmar-burba-wisimaladba bela deyob imaksamarmogad.

Proverbios 19:27

Machi, dule-be-unaed be itosulile, binsaed-nikaguedgi be bangudoed.

Isaías 8:19

Dule bemarga sokarmalale: “Dule-ibmar-e-burbagan-wismaladse be ibmar-wilubagan egisnamarye, yoedse-ibmar-guoed-barsogmaladse be ibmar-wilubagan egisnamarye.” Weyob be sogo: “¿Ar dulemar e-bab-dummaganse geg idakmarsogeye? ¿Ar dulemar dule-burgwarmaladse geg idakmarsogeye?”

Jeremías 14:14

Geb Bab-Jehová an-abin sogded: “Wedi, gayaburba-barsogmalad an-nuggi gakansaar sunmakdimalad. Gwen an we-dulemar barmissulid, gwen an ega an-nuggi-sunmakega igar uksasurbalid, gwen an ega sunmakdisulid. We-dulemar-sunmakmaladi, unnila binsa yogasaar na wargwen-ibya-apuredba sunmakdimalad, binsa ee gordimalad, dukin-yogasaar-e-itogedba sunmakmalad.”

Jeremías 23:16

Bab-Jehová-Bela-Gangued-Nikad weyob soged: “Melle be an-gayaburba-barsogmalad-e-sunmaked be itomar. Ar binsa gakansaar bega igar-nueganbi sunmakmalad, na emar wargwengi gaya-onoardamalad, gwen an ega ibmar-sogdasulid sokardamalad.

Jeremías 23:25

”Gayaburba-barsogmalad, gakansaar weyob an-nuggi-sunmake an itosad: ‘¡An negburgan daksaye, an negburgan daksaye!’

Jeremías 23:32

Bab-Jehová soged: “Gayaburba-barsogmaladgi an gwichid. Negburgan-daksasulidgi gakansaale sunmakdimalad. An-dulamarga deyob gakansaale sunmakedba, igar-noaledba an-dulamar-seddamalad, yamo-binsaed-gaale, ega sunmakmaladba an-dulamar-binsaed gadamalad.” Bab-Jehová soged: “Ani an, gwen we-dulemar barmissulid, gwen an ega igar uksasurbalid. We-dulemar, an-dulamarga igar-nued gwen senonisulid.”

Jeremías 29:8

Israel-dulemar-e-Bab-Dummad-Jehová Bela-Gangued-Nikad soged: “Melle be Bab-gayaburba-barsogmaladse binsaed-galemalo, melle be nermar bemar-abargi-gudimaladse yamolemalo. Melle be e-gabdaked itomalo.”

Ezequiel 21:29

Es-suid, we-dulemar-isgana-e-dukar egwannoed, ar e-negburgan-daked gakanad, degi, e-ibmar-guoed-soged gakanbalid. Ar e-iba omosad, e-sabsur-odurdakleged-wachi bato omosad.

Daniel 4:7

Ar dule-ibmar-burbar-oyomalad, dule-ibmar-burbaled-wisid-nerguarmalad, Caldeo-dulemar-binsaed-ibedmar, degi, nermar-yoedse-ibmar-guoed-sogmalad anse nonimargua, an ega an-gabdaksad sogsad. Degi-inigwele, gwen anga odulossurmalad.

Miqueas 3:7

An-gayaburba-barsogmaladi, bingedar itodmaloed. Nergan aku neg-dake gudmaloed. Ar bela wemar bar-ibmar sogosurmalad, ar ade, an gwen ega ibmar sogosulid.”

Zacarías 10:2

Ibmar-bab-dummadyob-imaklemalad, dule-yardakmaladid. Nergan gabgi-ibmar-gakanad dakmalad. Gakansaar-negburgan-dakmaladgi sunmakmalad, yamo-nabir-emar-obinsaega sunmakmalad. Dulemar na e-idued-satesoggu, ibdurgan-igarsuli-gudiidyobi, yogasaar gudimalad.

Malaquías 3:5

Bab-Jehová-Bela-Gangued-Nikad soged: “Degisoggu, an bemarga igar-nabogega an bemarse warmaknonikoed. We-dulemargi-ibmar-sogega an guagwar danikoed: Ina-isgana-imakdimaladgi, abirgunagwarsuli negsichigi galagwensuli-nanadimaladgi, gakansaar ise-sogar ibmar-sogmaladgi, ega-arbamalad-sabsur-imakdimaladgi, siamar-ei-sui-burgwismalad-sabsur-imakdimaladgi, dule-sergan-sated-sabsur-imakdimaladgi, degi, gwen an-dobsuli, dule-yar-baidsikmalad-sabsur-imakdimaladgi, amargi dobsulidba-gwisguega an danikoed.”

Gusmalad 8:11

Bukidar Simón-ibmar-sogedba imakdedamalad, ar ade, dikasurgus Simón dulemar-yardakar, ibmar-dakledisulid-imakdisoggu, ese binsaed galeddamarsunnad.

Efesios 5:6

Mer dulemar-emar-binsaed-gaega yogasaar-sunmakmaladse be yardaklemalo. Ar Bab-Dummad, eba-dasurmalad galagwensulidaedbali, sabsur-odurdakdedaed.

Deuteronomio 13:2

”Geb ibmar-bega-sogsad deyob gunonikile, geb agine, bega weyob sokarbalile: ‘Anmar bab-dummagan-baiganba namarye, bab-dummagan-akudakedse anmar gormarye.’

Deuteronomio 18:14

Ar we-dulemar e-ibe-be-yar-suesokalid, wemar dule-ina-isganagi-arbamaladse idakdamalad, degine, dule-yoedse-ibmar-guoedgi-sunmakmaladse idakdamarbalid. Ar bemargardi, be-Bab-Dummad-Jehová bemarga soged, melle bipisaagwale deyob be damaloye.”

Josué 13:22

Israel-dulemar bila-onolesadgi dulemar-bukidar es-suidgi oburgwismalad. Beor-machi-ner-Balaamʼye-nugadse-bakale oburgwismalad.

Apocalipsis 18:23

Gwallumar bar be-abargi gwen gaosulid, abirgin-nikuleged-iba, bar begi gwen itolegosulid. Ar be-dulemar begi-mani-onomaladi, we-napneggi dule-dummagan guenad. Ar be ina-isgana-imakedba, bela dulemar-yar-baid-baidgi-bukmalad bese yardaklesmalad.

Apocalipsis 21:8

Dule-doberbamaladdi, angi-gadi-bengumaladdi, ibmar-isgana-imakedba isdar-daklemaladdi, dule-gindakmaladdi, na-abirgunagwarsuli-negsichigi-yoledimaladdi, ina-isganagi-dulemar-yardakmaladdi, bab-dummaganga-imaklegedse-gormaladdi, degine, bela dule-gakansilimaladdi, soo-mata-dummad azufreʼba-mesa-gwakwarmaksiidgi melledmaloed. Ar we, burgwed-ilabogwad gued.”

Apocalipsis 22:15

”Ar neggwebur-magabardi, dulemar-galagwensulidamalad, ina-isgana-imakmalad, abirgunagwarsuli-negsichigi-yolemalad, dule-gindakmalad, dule bab-dummaganga-imaklegedse-gormalad, bela dule-gakansilimar gakan-saed-yeer-itodamalad. Wemar, neg-magaba milebukwa gumaloed.

Apocalipsis 9:21

We-dulemar-burgwissurmaladi, dule-oburgwismaladgi gwen nunmak itossurmalad. Emargi-ina-isgana-imakedgi gwen bangussurmalad, abirgunagwarsuli-negsichigi-yoleged gwen iessurmalad, degine, atursaedgi gwen bangussurmarbalid.