Jeremías 2:8 - Kuna San Blas

⁸ Dule-irwa-anse-gormalad bipisaale gwen sogsasurmalad: ‘Bab-Jehová ¿bia-nadye?’ Dule-bulegan-an-igar-mamaid-wisimaladi, Bab-Dummadsuliyobi an-daksamalad. Dulemar-idumaladi, angi yoledmalad. An-gayaburba-barsogmaladi, bab-dummad-Baal-nuggi sunmakdemalad, degine, bab-dummad-baigan-ibnuedga-gusurmaladba nanadmalad.

Jeremías 2:8 Iomraidhean Croise

1 Reyes 18:22

Agine, Elías sogdebalid: —Napi anbi Bab-Jehová-gayaburba-barsogega bedapid. Degi-inigwele, bab-dummad-Baal-gayaburba-barsogmaladdina, e-dulataled-ilabake gaka dulabo-gakambe (450) nikad.

1 Reyes 18:29

Yorukud-obitegua, amba deyob gunanai gusmalad. Deyob-gunanai ega neg-sedoded. Ibmar-ogumakar-ukleged-wachi-mosgua, e-bab-dummad-Baal-gaya itolessulid, gwen ega soo ogassurbalid.

1 Reyes 18:40

Agine, Elías Israel-dulemarga sogded: —Bab-dummad-Baal-gayaburba-barsogmalad bela be gamar. Mer wargwensaar be owakinmalo. Israel-dulemar bela a-dulemar-gasmalad. Agine, Elías, Cisón-dian-maidse a-dulemar-sesad. Agi, Elías bela a-dulemar-e-gammu egwachad.

Job 35:10

Degi-inigwele, dule gwen sogsulid: ‘Bia Bab-Dummad-an-obinnisad nadye. Mutikidba an-niga-ogannoardaedi,

Isaías 28:7

Amba dule-irwa-Bab-Dummadse-gormaladi, degi, Bab-Dummad-gayaburba-barsogmaladi, vinoʼba bipirmakdemarmogad, inna-gagbid ebipiledimarmogad. Vinoʼba binsaedsuli nadmalad Inna-gagbid-gobedba yoledimalad. Negburgan-dakalile, wawanmakdedamalad, ibmar-sokarmalale, suli-suli-ito naddamalad.

Isaías 29:10

Bab-Jehová bela-belad bar-ibmar-daksuli be-imaksad. Bab-Dummad-gayaburba-barsogmalad-ibe burbar-geg-ibmar-dake imaksad. Negburgan-dakmalad bar negburgan-daksuli imaksad.

Isaías 30:5

Bela Israel-dulemala, neggwebur ega ibmar-nued-imaksulidba bingedar itodmaloed. Ar Egipto-dulemar wis gwen ega ibmar-nued imakosulid. Unnila we-dulemala, emar-obingegsaedginbi binsadimalad, dulemar-isdar-obelogedgi binsadimalad.”

Jeremías 10:21

Dule-negdakmamaidi, binsaedsulidga gusmalad, gwen Bab-Dummad-amiedgi binsassurmalad. A-ulale, igar-nued ega gussulid, e-dulemala, yogasaar-aisakis gudimalad.

Jeremías 12:10

Bukidar dule-isdarmalad-e-dummagan, an-uvaʼmar-digaled obelosad, an-nainu bela oichosmalad. An-nainu-yeerdaklegedi, nega-dulesulid-ollonaidga imaksamalad.

Jeremías 16:19

Bab-Jehováʼye, an suli-suli-itogedgine, be an-ganguedga guedid, be an-ogannogedid, be an-edarbedid. Bela yalamar-ugakaase-bukmaladi bese danimaloed, bega sognonimaloed: “Anmar-dadgan bab-dummadsulid e-bab-dummadga na imaksamalad. Gwen ibmar-nued abingassurmalad, unnila ibmar-igarga-gusulid na abingasmalad.

Jeremías 18:18

Dulemar weyob Jeremíasʼgi sogdemalad: “Anmar Jeremíasʼgi-gwisguega igar amimargwelo. Amba anmarga dule-irwa-Bab-Dummadse-gormalad igar-maidgi-anmar-odurdakega surguosulid. Degine, dule-binsaed-ibed anmarga-binsaed-uked surguosurbalid. Anmarga Bab-Dummad-gayaburba-barsoged surguosurbalid. Anmar melle we-dule-ibmar-soged itomalo. Anmar naibid ega ukega, e-sunmaked-egi-aibinega imakmalo.”

Jeremías 2:11

Ar neggwebur-gwensak e-bab-dummagan Bab-Dummadsunnadsur-inigwele, e-bab-dummagan-ogwasye gwen an itossulid. Ar bemardi, bab-dummagan-ibnuedga-gusurmaladba-nanaed-ular, be an-obatemalad. Andi bur Bab-Dummad-napiragwadid, Bab-Dummad-gandikidid.

Jeremías 2:6

Bipisaale, be-dadgan gwen-egichasurmalad: Bab-Jehová-Egipto-yalagi-anmar-onosadi, ¿bia-nadye? Bab-Jehová-nega-dulesulidganba-anmar-idusadi, napa-dii-sateganba, degi, nega-buleganba-anmar-seargusadi, bia-nadye, gwen egichasurmalad. Bab-Jehová-nega-dinnaganba, degi, negasichidganba-anmar-seargusadi, bia-nadye, gwen egichasurmalad. Nega-dulemar-iirmaksurmaladba, degine, dulemar-bukwasulidba-anmar-seargusadi, bia-nadye, be-dadgan gwen egichasurmalad.

Jeremías 4:22

Bab-Jehová soged: “An-dulamar binsaedsurmaladid, aku an-dakmalad. Mimmigan-binsaedsurmaladid, aku neg-itomalad. Ibmar-isgana-imakedsikdi binsaed-ibegan nanamalad. Ibmar-nued-imakeddi wissurmalad.”

Jeremías 5:31

An-gayaburba-barsogmalad, unnila gakansaale sunmakmalad. Dule-irwa-anse-gormalad, na e-itolegedba negsemamaid. An-dulamarde, weyob-abeye soged. Ar bela ibmar bergunonikile, ¿bemar igi-gudmalosunna?”

Jeremías 7:8

” ’Ar bemar, gakangi be bensurmalad. Ar we-gayamardi gwen nabiridsulid. Gwen ibmar-nued bega uksulid.

Jeremías 9:14

Aka e-binsaed-isganaba nadmalad, bab-dummagan-Baalʼmarba nanasmalad. E-babgan-e-odurdaksadba nanasmalad.”

Ezequiel 22:26

E-dule-irwa-anse-gormalad an-Igar-Maidgi yolesmalad, degi, an-ibmar-islidikmalad ibmar-islidikidsuliyob daksamalad. Wemar daksulid, biti ibmar-islidikidi, biti ibmar-isganabali. Deginbali, ibmar-islidikid, ibmar-islidikidsulidbo akar-dakedgi odurdaksurmarbalid. An-obunnoged-ibagi obunnosurmalad. A-ibagi, an-nug odummossurmalad.

Ezequiel 34:2

“Dule-machi, Israel-sibad-wawaad-edarbemaladgi ibmar-guoed iduakwaa be soge. Bab-Jehová-Bela-Gangued-Nikadi weyob sogye, ega be soge: ‘Israel-sibad-wawaad-edarbemalad, bemar duledar-wilesmar, na beginbi be binsamalad. ¿Sibad-wawaad-edarbemalad, na sibad-wawaadmar edarbergebsursi?

Oseas 4:6

Ar an-dulamar aku an-daksamaladbali bela burgwismalad. ”Ar be aku an-daksamarsoggu, dule-irwa-anse-goled-igargi an be-obanmarmosunnad. Ar be an-igar-mamaid be obachasoggua, be-wagan-danimaloed an iemosunnoed.

Habacuc 2:18

”Duleyob-ibmar-sobaledi, ¿ibi-nuedga wis gue? Ibmar-nuedga gusuli. Nuchu-esgoro-diregwadgi-sobaledi, ¿ibi-nuedga wis gue? Unnila gakansaedginbi emar-odurdaked. Dule nuchu-gege-sunmaked-sobedi, unnila na e-arbaedginbi bensulid.

Mateo 16:26

Ar dule napneg-naid bela egadga imaksar, ar e-san-burbadi yoggusar, we-dulega, ¿ibi-nuedga ega gusar be insae? Gwen ega ibmar-nuedga guosulid. Deginbali, dule-gwensak e-san-burba mer ei yogguega, ¿ibi na uksar be insae? Ibmar-uked, sate.

Lucas 11:52

”Ar bemar, Moisés-Igar-Maid-odulomaladi, ¡be duledar-wilesmar! Ar bemar Bab-Dummad-igar-wisgulegoed-yabe be susmalad, degi-inigwele, bemar Bab-Dummad-e-negdakmaid-e-dulamarga gwen-gussurmalad, degine, dulemar-Bab-Dummad-negdakmaidse-dogbimaladga igar-dutusur bemar mesdimalad.”

Juan 16:3

We-dulemar Bab-wissulidba, degine, aku an-dakedba, deyob be-imakmaloed.

Juan 8:55

Bemardi a-Bab-Dummad akudakmalad, andi a-Bab-Dummad mag daked. An bemarga sogdibe, a-Bab-Dummad aku an dakye, bemar-sunnaa an gakansasaled. Andi a-Bab-Dummad mag an daked, degine, e-gayaburbaba an nanadibalid.

2 Corintios 4:2

Agala, ibmar-dukuar-imakleged, ibmar-dule-obingegsaed, an metemarsun. Mer dule-yardakdii gumalo, degi, mer Bab-Dummad-Gayaburba ibnuedsulise ogwamalo. Bur unnila napiragwadgi Bab-Dummad-asabin dulemar ibmar-mag-itogega an imakdiid.

Deuteronomio 33:10

Leví-wagan, be-Igarmar-sogedba Jacob-wagan-odurdakoed, Be-Igar-Maidgi Israel-dulemar-odurdakoed. Leví-wagan, be-asabin ina-wawadikmalad obupurmakmaloed, degine, ibmar-ogumakar-ukleged-ailagi bega ibmar ogumakar ukmaloed.

1 Samuel 12:21

Mer bab-dummadyob-ibmar-imaklemalad-e-nug odummomalo. Ar amardi, gwen bemar-bendakosulid, gwen bemarga ibmar-nued-imakosurbalid, ar ade, ibmar-binsarmaladid.

1 Samuel 2:12

Elí-masmala, dule-isganad, gwen Bab-Jehová-dobsuli gudii damalad.