Oseas 1:4 - Chol: I T’an Dios

^4-5 Lac Yum tsi' sube Oseas: Yom ma' wotsʌben i c'aba' ti Jezreel, come ya' ti joctʌl i c'aba' Jezreel mi caj cʌq'ueñob i toj i mul i p'olbal jini rey Jehú cha'an tsi' cha'le tsʌnsa Jehú ya' ti Jezreel. Mi caj c jisʌben i yumʌntel Israel ya' ti Jezreel. Mach jalix mi' caj ti ujtel, che'en.

Chol de Tumbalá Bible

^4-5 Lac Yum tsi' sube Oseas: Yom ma' wotsʌben i c'aba' ti Jezreel, come ya' ti joctʌl i c'aba' Jezreel mi caj cʌq'ueñob i toj i mul i p'olbal jini rey Jehú cha'an tsi' cha'le tsʌnsa Jehú ya' ti Jezreel. Mi caj c jisʌben i yumʌntel Israel ya' ti Jezreel. Mach jalix mi' caj ti ujtel, che'en.

Oseas 1:4 Iomraidhean Croise

2 Reyob 10:1

Ya' ti Samaria an lujuntiquil i chʌnc'al (70) i yalobilob jini rey Acab. Jini cha'an Jehú tsi' ts'ijbubeyob majlel carta jini año' bʌ i ye'tel ya' ti Jezreel yic'ot jini año' bʌ ti' wenta cha'an mi' cosañob i yalobilob Acab ya' ti Samaria. Tsi' yʌlʌ ti jun:

2 Reyob 10:17

Che' bʌ tsa' c'oti Jehú ya' ti Samaria, tsa' caji i jisan i pi'ʌlob Acab tsa' bʌ cʌleyob. Tsi' laj jisayob che' bajche' tsi' yʌlʌ lac Yum, che' bajche' tsi' yʌlʌ jini x'alt'an Elías.

2 Reyob 15:29

Che' woli ti yumʌntel Peka, tsa' tili Tiglat Pileser i rey asiriajob. Tsi' chilbe cabʌl tejclum: Ijón, Abel Betmaaca, Janoa, Cedes, Hazor, Galaad, Galilea, yic'ot pejtelel i lumal Neftalí. Cʌchʌl tsi' pʌyʌyob majlel jini israelob ti Asiria.

2 Reyob 15:8

Zacarías, i yalobil Jeroboam, tsi' teche i ye'tel ti Israel che' ti waxʌclujump'ejl i yuxc'al (38) jab i ye'tel Azarías rey bʌ ti Judá. Wʌcp'ejl jach uw tsi' cha'le i ye'tel.

Isaias 7:14

Jini cha'an lac Yum mi caj i wersa pʌsbeñet i yejtal i p'ʌtʌlel. Juntiquil xch'oc mi caj i cʌntan alʌl. Mi caj i yʌc' ti pañimil ch'iton. Mi caj i yotsʌben i c'aba' Emanuel mu' bʌ i yʌl ti lac t'an, “Dios la quic'ot”.

Isaias 8:3

Che' jini tsa' c'otiyon ba'an quijñam, jiñʌch x'alt'an ja'el. Tsa' caji' cʌntan i yalobil. Che' bʌ tsa'ix i yila pañimil, lac Yum tsi' subeyon: Yom ma' wotsʌben i c'aba' jini alʌl ti Mahersalal Hasbaz. P'isi ti wenta i sujmlel i c'aba'.

Isaias 9:6

Come mi caj i yilan pañimil alʌ ch'iton cha'an mi' coltañonla. Dios mi caj i yʌq'ueñonla i yalobil. Mi caj i yotsʌbentel i c'aba': C'ax Ñuc Bʌ, Caj Cʌntesa, P'ʌtʌl bʌ Dios, Lac Tat Am Bʌ ti Pejtelel Ora, Xlajmesaleto mu' bʌ i cha'len yumʌl.

Jeremias 20:3

Jump'ejl q'uin yic'ot jump'ejl ac'ʌlel ya' chucul. Ti' yijc'ʌlal Pasur tsi' colo. Jeremías tsi' sube: Lac Yum ma'anix mi caj i chʌn pejcañet ti Pasur. Tsa'ix i yotsʌbeyet yambʌ a c'aba', jiñʌch Magor Misabib, come tal wocol i joy ñet'et.

Jeremias 23:2

Jini cha'an lac Yum, i Dios Israel, woli' yʌl: Jatetla am bʌ la' we'tel, an la' mul, come an ti la' wenta cha'an mi la' we'san c winicob x'ixicob, pero tsa' la' wʌc'ʌyob ti pam pujquel. Tsa' la' wets'eyob majlel. Ma'anic tsa' la' wen q'ueleyob. La' wilan joñon mi caj c sutq'uibeñet wocol cha'an a jontolil.

Jeremias 3:8

Junlajal i jontolil Judá, i chich Israel. Tsi' q'uele i ts'i'lel Israel. Q'uelelix i cha'an che' bʌ tsac choco majlel yic'ot i juñilel divorcio cha'an tsi' cʌyʌyon che' bajche' x'ixic mu' bʌ i cʌy i ñoxi'al. Pero mach yujilic bʌq'uen Judá. Junlajal tsa' caji' mel i ts'i'lel che' bajche' Israel.

Ezequiel 23:10

Tsi' jochbeyob i pislel. Tsi' pʌybeyob ti majtan e'tel ch'iton bʌ yic'ot xch'oc bʌ i yalobilob. Tsi' tsʌnsayob. Ba' ora tsi' yubi wocol cha'an i mul tsa' caji i ña'tañob x'ixicob ti pejtelel pañimil.

Ezequiel 23:31

Ti jini jach bʌ bij ba' tsa' ñumi a chich, ya' tsa' ñumiyet ja'el. Jini cha'an mi caj cʌq'ueñet wocol che' bajche' tsa' cʌq'ue a chich.

Oseas 1:6

Gomer (i yijñam Oseas) tsi' cha' cʌnta yambʌ i yalobil. Lac Yum tsi' sube jini x'alt'an: Yom ma' wotsʌben i c'aba' jini xch'oc Loruhama (mi' yʌl ti lac t'an: “Ma'anix i p'untʌntel”), come ma'anix mi caj c chʌn p'untan israelob. Ma'anix mic chʌn ñusʌbeñob i mul.

Oseas 1:9

Lac Yum tsi' sube Oseas: Yom ma' wotsʌben i c'aba' Loammi (mi' yʌl ti lac t'an: “Mach c cha'añetic”), come jatetla mach c pi'ʌleticla, mach la' Diosonic.

Oseas 2:13

Mi caj cʌq'uen i toj i mul cha'an tsi' pulbe pom jini Baal dios. Tsi' ch'ʌlʌ i bʌ ti ujʌl yic'ot mʌtc'ʌb wen letsem bʌ i tojol. Tsa' majli i sʌclan i winic. Ma'anix tsi' chʌn ña'tayon. Jini cha'an mi caj i toj i mul. Jiñʌch laj cʌntesʌntel ti lac Yum.

Oseas 9:17

Che' jini Dios mi caj i chocob, come ma'anic tsi' ñich'tʌbeyob i t'an. Pam pujquemob mi caj i yajñelob ti pañimil.

Amos 9:8

Awilan, la' Yum Dioson. Wolij q'uel pejtel la' mul, israelob. Mi caj c boquetla loq'uel ti la' lumal, pero ma'anic mi caj c laj jisañetla, che'en lac Yum.

Mateo 1:21

Mi caj i yʌc' ti pañimil alʌ ch'iton. Yom ma' wotsʌben i c'aba' Jesús, come jini mi caj i coltan winicob x'ixicob i cha'año' bʌ cha'an mi' loq'uelob ti' p'ʌtʌlel i mul. Che' tsi' yʌlʌ jini ángel.

Lucas 1:13

Jini ángel tsi' sube: Mach a cha'len bʌq'uen Zacarías, come tsa' ubinti a woración. Mi caj i tsictiyel i yalobil a wijñam Elisabet. Mi caj i yilan pañimil ch'iton bʌ a walobil. Mi caj a wotsʌben i c'aba' Juan.

Lucas 1:31

Mi caj a cʌntan alʌl. Mi caj i yilan pañimil ch'iton bʌ a walobil. Mi caj a wotsʌben i c'aba' Jesús.

Lucas 1:63

Tsi' c'ajti jun. Tsi' ts'ijba: I c'aba'ʌch Juan. Che' tsi' ts'ijba. Tsa' toj sajtiyob i pusic'al ti pejtelob.

Juan 1:42

Andrés tsi' pʌyʌ tilel Simón ba'an Jesús. Che' bʌ tsi' q'uele Jesús, tsi' sube: Jatet, Simón, i yalobilet Juan. Mi caj a wotsʌbentel a c'aba' ti Cefas, che'en. (Mi' yʌl ti lac t'an, xajlel.)

Josue 19:18

Tsa' ochi ili tejclum tac: Jezreel, Quesulot, Sunem, Hafaraim, Sihón, Anaharat, Rabit, Quisión, Abez, Remet, Enganim, Enhada, Betpases.