Juezob 7:2 - Chol: I T’an Dios

² Lac Yum tsi' sube Gedeón: Ñumenix ti p'is jini soldadojob woli' majlelob a wic'ot. Mach mejlic cʌq'ueñetla la' jisan jini madiañob che' cabʌletla ame che' jini mi cajel i lon chañ'esañob i bʌ jini israelob, ame cajic i yʌlob: “Tic bajñel p'ʌtʌlel tsa' mejli j coltan c bʌ”, ame lon che'ob.

Chol de Tumbalá Bible

² Lac Yum tsi' sube Gedeón: Ñumeñix ti p'is jini soldadojob woli' majlelob a wic'ot. Mach mejlic cʌq'ueñetla la' jisan jini madiañob che' cabʌletla ame che' jini mi cajel i lon chañ'esañob i bʌ jini israelob, ame cajic i yʌlob: “Tic bajñel p'ʌtʌlel tsa' mejli j coltan c bʌ”, ame lon che'ob.

Juezob 7:2 Iomraidhean Croise

Genesis 46:2

Dios tsi' pejca Israel che' ti ac'ʌlel. Tsi' yʌlʌ: Jacob, Jacob, che'en. Israel tsi' jac'ʌ: Wʌ' añon, che'en.

2 Cronicas 14:11

Asa tsa' caji i pejcan lac Yum Dios: C Yum Dios, ma'anic yambʌ che' bajche' jatet. Mi mejlel a coltan jini mach bʌ anic i p'ʌtʌlel. Coltañon lojon ti ili ora c Yum Dios, come ya' cʌyʌlon lojon ti a tojlel. Ti a c'aba' tsa'ix tiliyon lojon cha'an mij contrajin lojon cabʌl soldadojob. Dios, c Dios lojon, mach yomic mi' chʌn cha'leñob guerra ti a contra. Che' tsi' yʌlʌ Asa.

Isaias 10:13

Come tsi' yʌlʌ: Pejtelel chuqui tac tsac mele tsa' mejli c mel cha'an c bajñel p'ʌtʌlel yic'ot c ña'tʌbal. Jini cha'an tsac jisa winicob ti cabʌl tejclum tac. Tsac chilbeyob i chubʌ'an. Che' bajche' tat wacax mi' ñijcan loq'uel pejtel chuqui mi' mʌctan ti majlel, tsac tʌts'esa jini año' bʌ i ye'tel.

Isaias 2:11

Jini winicob ñuc bʌ mi' q'uelob i bʌ, wersa mi caj i lijob i bʌ. Jini chan bʌ mi melob i bʌ wersa mi caj i peq'uesʌntelob. Ti jim bʌ q'uin jini jach lac Yum mi caj i q'uejlel ti ñuc.

Isaias 2:17

Mi caj i peq'uesan jini ñuco bʌ mu' bʌ i lon chañ'esañob i bʌ. Mi caj i jultesʌbeñob i pusic'al winicob chan bʌ mi' melob i bʌ. Cojach lac Yum mi caj i q'uejlel ti ñuc che' ti jini q'uin.

Jeremias 9:23

Lac Yum woli' yʌl: Jini cabʌl bʌ i pusic'al mach i chañ'esan i bʌ cha'an cabʌl i pusic'al. Jini p'ʌtʌl bʌ winic mach i chañ'esan i bʌ cha'an i p'ʌtʌlel. Jini wen chumul bʌ winic mach i chañ'esan i bʌ cha'an cabʌl i chubʌ'an.

Ezequiel 28:17

Come tsa' chañ'esa a bʌ cha'an a t'ojol jax. Tsa' soco a ña'tʌbal cha'an a ñuclel. Jini cha'an tsac chocoyet jubel ti lum cha'an mi' q'uelob jini reyob ti pañimil peq'uesʌbilet.

Ezequiel 28:2

I yalobil winic, suben jini ñuc bʌ yumʌl ti Tiro: “Che'ʌch woli' yʌl lac Yum Dios: Tsa' lon chañ'esa a bʌ. Tsa' wʌlʌ: Joñon juntiquil dioson. Mic buchtʌl ti' buchlib Dios wʌ' ti ojlil colem ñajb, lon che'et. Ya winiquet jach, mach diosetic, pero ti a pusic'al ma' lon ña'tan dioset.

Daniel 4:30

tsa' caji i yʌl: ¡Q'uelela wen ñuc Babilonia! Joñon tsac mele ili ñuc bʌ tejclum ba' chumulon tic yumʌntel cha'an mi' cʌjñel c p'ʌtʌlel yic'ot c ñuclel ti pejtelel pañimil, che'en.

Habacuc 1:16

Mi' ch'ujutesañob i chimo'chʌy. Mi' lon alob jiñʌch i dios. Mi' pulbeñob pom come ya' tilem cabʌl i chubʌ'an.

Zacarias 12:7

Che' ti ñaxan lac Yum mi caj i coltan jini xchumtʌlob ti Judá ame mi' chañ'esañob i bʌ jini xchumtʌlob ti Jerusalén yic'ot i p'olbal jini rey David.

Zacarias 4:6

Che' jini tsi' yʌlʌ: Jiñʌch i t'an lac Yum tsa' bʌ i sube Zorobabel. Woli' yʌl: “Mach ti' p'ʌtʌlelic winicob, mi ti' ña'tibalic winicob mi caj i mejlel que'tel, pero ti' p'ʌtʌlel quEspíritu”. Che' tsi' yʌlʌ i Yum Panchan yic'ot Pañimil.

Numeros 31:4

Yajcanla jump'ejl mil ti jujunmojt bʌ israelob, che'en Moisés. Che'ʌch tsi' meleyob. Ti' pejtelelob tsa' pʌjyiyob lajchʌmp'ejl mil winicob yujilo' bʌ guerra.

Romanos 11:18

Mach a sub a bʌ ti ñuc ti' contra i c'ʌb te' tsa' bʌ jajqui loq'uel. Mi tsa' subu a bʌ ti ñuc, ña'tan ma'anic wola' wʌq'uen i p'ʌtʌlel i wi' tac jini te'. Jini i wi' tac mi' yʌq'ueñet a p'ʌtʌlel.

Romanos 3:27

¿Mu' ba lac chʌn sub lac bʌ ti ñuc? Ma'anic. ¿Chucoch? ¿Mach ba anic lac ñuclel cha'an ti' jac'ol jini mandar? Ma'anic. Come mach cha'anic i jac'ol mandar mi' ñusʌbeñonla lac mul Dios che' mi' yotsañonla ti' wenta, pero cha'an jach tsa' lac ñopo Jesús.

2 Corintios 4:7

Uts'atʌch i sʌclel Cristo am bʌ ti lac pusic'al. Che' yilal bajche' c'ax letsem tac bʌ i tojol lotol bʌ ti uc'um, come melbilonla ti lum che' bajche' uc'um. Tsiquil mach ch'oyolic ti joñonla jini ñuc bʌ lac p'ʌtʌlel, pero ch'oyol ti Dios.

Efesios 2:9

Mach cha'anic wen bʌ la' melbal, ame anic majqui mi' lon chañ'esan i bʌ.

Deuteronomio 32:27

Pero mach che'ic tsac mele ame i lon chañ'esañob i bʌ i contrajob che' mi' jisʌntelob jini israelob, Ame mi' lon alob: “Tsa' mʌjli lac cha'an ti lac bajñel p'ʌtʌlel. Mach jinic i ye'tel lac Yum”, ame lon che'icob.

Deuteronomio 8:17

Chʌcʌ q'uele la' bʌ cha'an ma'anic mi la' wʌl ti la' pusic'al: “Cha'an ti lac p'ʌtʌlel yic'ot ti lac ñuclel tsa' lac taja pejtelel jini chu'bʌ'añʌl”, ame lon che'iquetla.

Deuteronomio 8:18

Pero ña'tanla jiñʌch lac Yum Dios tsa' bʌ i yʌq'ueyetla la' p'ʌtʌlel ti' tajol pejtelel la' chu'bʌ'an, cha'an mi' ts'ʌctesan i t'an tsa' bʌ i yʌlʌ ti' tojlel la' ñojte'elob. Wolix i ts'ʌctesan wʌle.

Santiago 4:6

Cabʌl mi' yʌq'ueñonla lac p'ʌtʌlel cha'an mi' mʌjlel lac cha'an. Jini cha'an mi' yʌl: “Dios mi' contrajin jini mu' bʌ i chañ'esañob i bʌ, pero mi' p'ʌt'esan jini mu' bʌ i peq'uesañob i bʌ”, che'en.

1 Samuel 14:6

Jonatán tsi' sube jini x'e'tel i cha'an mu' bʌ i ch'ʌmben majlel e'tijibʌl cha'an guerra: Conla ti ñumel ya' ba' añob jini mach bʌ tsepbilobic i pʌchʌlel. Tic'ʌl mux i coltañonla lac Yum, come cabʌl i p'ʌtʌlel jini lac Yum. Mi' c'ʌn winicob ti' ye'tel. Mi cabʌlob o mi ma'anic jaytiquil, junlajal ti' wut, che'en.