Juezob 10:13 - Chol: I T’an Dios

¹³ Pero tsa'ix la' cʌyʌyon cha'an mi la' lon ch'ujutesan dioste'. Jini cha'an ma'anix mi caj c chʌn coltañetla wʌle.

Chol de Tumbalá Bible

¹³ Pero tsa'ix la' cʌyʌyon cha'an mi la' lon ch'ujutesan dioste'. Jini cha'an ma'anix mi caj c chʌn coltañetla wʌle.

Juezob 10:13 Iomraidhean Croise

1 Cronicas 28:9

Jini cha'an, calobil Salomón, yom ma' wen cʌn Dios, i Dios a ñojte'el. Ch'ujutesan ti pejtelel a pusic'al yic'ot ti' tijicñʌyel a pusic'al. Come lac Yum mi' wen cʌmben i pusic'al winicob x'ixicob. Mi' cʌmbeñob i pensar. Che' ma' sajcan lac Yum, mi caj a taj. Pero mi tsa' cʌyʌ, mi caj i junyajlel cʌyet.

2 Cronicas 12:5

Tsa' c'oti jini x'alt'an Semaías i pejcan Roboam yic'ot año' bʌ i ye'tel ti Judá tsa' bʌ i tempayob i bʌ ti Jerusalén cha'an mi' puts'tañob Sisac. Tsi' subeyob: Lac Yum tsi' yʌlʌ: “Jatetla tsa' la' cʌyʌyon. Jini cha'an tsaj cʌyʌyetla ti' c'ʌb Sisac cha'an mi la' tic'lʌntel”. Che' tsi' yʌlʌ lac Yum, che'en jini x'alt'an.

2 Cronicas 15:2

Tsa' majli Azarías i taj jini rey Asa. Tsi' sube: Ñich'tʌbeñon Asa, jatet yic'ot pejtelel Judá yic'ot Benjamín. Lac Yum mi caj i chʌn ajñel la' wic'ot, mi xuc'ul mi la' chʌn ajñel yic'ot. Che' mi la' sajcan lac Yum mi caj la' taj. Pero mi tsa' la' cʌyʌ, mi caj i cʌyetla ja'el.

2 Cronicas 21:10

Pero Edom tsa' cʌle ti libre ti' tojlel Judá c'ʌlʌl wʌle. Tsa' cʌle ti libre ja'el Libna ti' tojlel Judá, come che'ʌch tsi' yʌlʌ lac Yum cha'an ti' caj i mul Joram cha'an tsi' cʌyʌ i Dios i ñojte'elob.

Jeremias 2:13

Come cha'chajp i mul c winicob x'ixicob. Tsi' cʌyʌyoñob, anquese joñon Cuxul bʌ Ja'on. Tsi' wersa t'oboyob xajlel cha'an mi' yajñel i ya'al. Tsi' sajcayob ja' ba' bajñel yomob i pusic'al. Mu' jach i jilel i ya'al cha'an tocolix i yajñib.

Jeremias 2:19

Jini a jontolil mi caj i yʌq'uet ti quisin che' mi' cajel ti t'an a pusic'al. Mi caj c jultesʌbeñet a pusic'al cha'an tsa' cʌyʌyon. Yomix ma' ña'tan quisintic jax a jontolil cha'an tsa'ix a cʌyʌyon. Tsa' cʌyʌ a Yum Dios. Ma'anix ma' bʌc'ñañon, che'en i Dios Panchan yic'ot Pañimil, jiñʌch lac Yum.

Jonas 2:8

Majqui jach mi' ñop dioste' tac mach bʌ anic i c'ʌjñibal wolix i cʌy jini Yujil bʌ P'untaya.

Deuteronomio 32:15

Jini israelob tsa' ñaj'ayob, Tsa' wen jujp'iyob. Che' jini tsi' cʌyʌyob i Dios anquese i melbalob. Tsi' ts'a'leyob jini Xajlel tsa' bʌ i coltayob.

Juezob 10:14

Cucula, pejcan la' dios tac tsa' bʌ la' yajca. La'ix i coltañetla ti pejtelel la' wocol mu' bʌ la' taj. Che' tsi' yʌlʌ lac Yum.

Juezob 2:12

Tsi' cʌyʌyob lac Yum, i Dios i ñojte'elob tsa' bʌ i loc'sayob ti' lumal Egipto. Tsi' tsajcayob majlel dios tac i cha'an yambʌ tejclumob am bʌ ti' joytilel. Tsi' ch'ujutesayob. Tsi' techbeyob i mich'ajel lac Yum.

Juezob 2:19

Che' bʌ tsa' chʌmi jini juez, tsa' caji i cha' melob ñaxan bʌ i melbal. Ñumen leco tsi' cha'leyob bajche' i ñojte'elob. Tsi' tsajcayob yan tac bʌ dios. Tsi' ñocchocoyob i bʌ ti' tojlel. Ma'anic tsi' cʌyʌyob jontol bʌ i melbalob. Mach yomobic i cʌy jini bij woli bʌ i tsajcañob.