Joel 2:17 - Chol: I T’an Dios

¹⁷ Jini motomajob mu' bʌ i melbeñob i ye'tel Dios mi caj i wa'tʌlob ti' ts'ejts'ejtʌl i pulʌntib i majtan Dios ti' tojlel winicob x'ixicob. La' i cha'leñob uq'uel che' mi' melob oración. La' i yʌlob: C Yum lojon, ñusʌbeñob i mul jini winicob x'ixicob. Mach ma' wʌc'ob ti' wenta jini sajtemo' bʌ cha'an mi' tse'tañob, come a cha'añobʌch. Mach yomic mi' yʌjq'uelob ti quisin ti' tojlel jini ñajt bʌ chumulob mu' bʌ i lon alob: “¿Bacan i Dios?” che'ob. Che'ʌch yom mi' pejcañob Dios jini motomajob.

Chol de Tumbalá Bible

¹⁷ Jini motomajob mu' bʌ i melbeñob i ye'tel Dios mi caj i wa'tʌlob ti' ts'ejts'ejtʌl i pulʌntib* i majtan Dios ti' tojlel winicob x'ixicob. La' i cha'leñob uq'uel che' mi' melob oración. La' i yʌlob: C Yum lojon, ñusʌbeñob i mul jini winicob x'ixicob. Mach ma' wʌc'ob ti' wenta jini sajtemo' bʌ cha'an mi' tse'tañob, come a cha'añobʌch. Mach yomic mi' yʌjq'uelob ti quisin ti' tojlel jini ñajt bʌ chumulob mu' bʌ i lon alob: “¿Bacan i Dios?” che'ob. Che'ʌch yom mi' pejcañob Dios jini motomajob.

Joel 2:17 Iomraidhean Croise

1 Reyob 6:3

An i lejch' otot ya' ti' tojel jini Templo, lujump'ejl metro i tamlel lajal bajche' i xujc otot, yic'ot jo'p'ejl metro i xujc jini coyerol.

1 Reyob 9:7

che' jini mi caj c loc'san israelob wʌ' ti' lumal tsa' bʌ cʌq'ueyob. Mi caj c sʌc jisan ili ch'ujul bʌ Templo ba' tsa cʌc'ʌ c bʌ ti cʌjñel. Che' jini mi caj i wajlentelob israelob.

2 Cronicas 7:20

che' jini mi caj c choquetla ti la' lum tsa' bʌ cʌq'ueyetla. Mi caj c jisan ili Templo tsa' bʌ c sʌq'uesa cha'an i ch'ujutesʌntel j c'aba'. Mi caj la' wajlentel, mi caj la' wʌjq'uel ti quisin ti' tojlel yan tac bʌ tejclum.

2 Cronicas 8:12

Salomón tsa' caji i pulben tsʌnsʌbil bʌ i majtan lac Yum ya' ti pulʌntib tsa' bʌ i wa'chocobe lac Yum ti' tojel jini corredor cha'an Templo.

Nehemias 9:36

Jini cha'an woliyonix lojon ti to'ol e'tel. Jixcu jini lum tsa' bʌ a wʌq'ueyob c ñojte'el lojon cha'an mi' c'uxob i wut cha'an mi' wen chumtʌlob, mach c cha'anix lojon. Mozojon lojon ti ili lum.

Salmos 115:2

¿Chucoch mi' lon alob jini sajtemo' bʌ: ¿Bacan tsiquil i Dios? che'ob?

Salmos 42:10

Lajalʌch bajche' c'ʌscujemon che' mi' yʌ'leñoñob j contrajob. Ti pejtelel ora mi' subeñoñob: ¿Baqui'an a Dios mu' bʌ i coltañet? lon che'ob.

Salmos 42:11

¿Chucoch ch'ijiyem c pusic'al? ¿Chucoch wulwulña c pusic'al? La c pijtan Dios, come mi caj c cha' suben wocolix i yʌlʌ. Jiñʌch caj Coltaya Dios.

Salmos 42:3

Cha'an ch'ijiyemon tsac wen cha'le uq'uel ti q'uiñil ti ac'ʌlel. Bele q'uin mi' c'ajtibeñoñob winicob: ¿Baqui an a Dios? lon che'ob.

Salmos 42:4

Che' mic ña'tan iliyi, cabʌl mic mel c pusic'al, Come c'ajal c cha'an bajche' tsac pi'leyob ti xʌmbal jini winicob x'ixicob Che' bʌ tsac pʌyʌyob majlel ti' yotot Dios. Che' tijicña lojon c pusic'al, tsac subu lojon i ñuclel Dios. Cabʌlon lojon tsac mele lojon q'uin.

Salmos 74:10

Dios, ¿jayp'ejl to q'uin mi caj i chʌn cha'len a'leya jini laj contra? ¿Mu' ba caj i chʌn ts'a'libeñet a c'aba'?

Salmos 79:10

Come mi' yʌlob jini sajtemo' bʌ: ¿Bacan tsiquil i Dios? che'ob. Q'uextʌbeñob i mul j contrajob lojon tsa' bʌ i bec'beyob i ch'ich'el a winicob. Che' ma' melob, ac'ʌ ti cʌjñel ti yan tac bʌ lum ti' tojel lojon c wut.

Salmos 79:4

Ts'a'lebilonix lojon cha'an jini chumulo' bʌ tic t'ejl lojon. Mi' tse'tañon lojon jini año' bʌ tic joytilel.

Salmos 89:41

Pejtel mu' bʌ i ñumelob majlel ti bij mi' xujch'ibeñob i chubʌ'an. I cʌñʌyo' bʌ mi' tse'tañob.

Salmos 89:51

Come a contrajob woli' yʌ'leñon, jini yajcʌbil bʌ a cha'an.

Exodo 34:9

Tsi' yʌlʌ Moisés: Mi tsa'ix c taja i yutslel a pusic'al, c Yum, yom ma' majlel tic tojlel lojon, come wen tsʌtsob i pusic'al jini tejclum. Ñusʌbeñon lojon contolil yic'ot pejtelel c mul lojon. Ch'ʌmʌyon lojon che' bajche' a cha'an bʌ, che'en.

Isaias 22:12

Jini cha'an lac Yum, i Yum Panchan yic'ot Pañimil, tsi' pʌyʌyetla cha'an mi la' mel la' pusic'al ti' tojlel yic'ot uq'uel, cha'an mi la' set' i tsutsel la' jol yic'ot cha'an mi la' lʌp coxtal.

Isaias 37:20

Wʌle, c Yum, c Dioset bʌ lojon, coltañon lojon ti a p'ʌtʌlel. La' loq'uicon lojon ti' p'ʌtʌlel cha'an mi' ña'tañob pejtelel yumʌlob ti pañimil jatet jach cojach bʌ Dioset. Che' tsi' cha'le oración.

Ezequiel 20:9

Pero ma'anic tsac jisayob. Tsaj coltayob cha'an mi cʌc' ti ñuc j c'aba' ame wajlentic ti' tojlel jini egiptojob ya' ba' chumulob. Jini cha'an tsa cʌq'ueyob i cʌn che' bʌ tsac loc'sayob ti' lumal Egipto.

Ezequiel 8:16

Che' jini tsi' pʌyʌyon ochel ti' patiojlel i yotot lac Yum. Ya' ti' yochibal Templo ti' tojel jini pulʌntib tsaj q'uele jo'tiquil i cha'c'al winicob laj wa'alob, sujtemob i pat ti' tojel i Templo lac Yum, sujtemob i wut ti' tojel i pasibal q'uin. Woli' ch'ujutesañob jini q'uin.

Oseas 14:2

Yom mi la' c'ajtiben lac Yum ti wocol t'an: Lu' loc'sʌbeñon lojon c sojquemal. Pʌsbeñon lojon i yutslel a pusic'al. Yom uts'at ma' q'uelon lojon. Che' jini mi caj c sub lojon a ñuclel.

Joel 1:13

Motomajob, yom mi la' lʌp coxtal cha'an i ch'ijiyemlel la' pusic'al. I winiquet bʌ la Dios, ñusanla ac'ʌlel ti uq'uel ba'an pulʌntib, come ma'anix trigo yic'ot i ya'lel ts'usub cha'an mi la' wʌq'uen i majtan Dios.

Joel 1:9

Jilemix i wut jam yic'ot i ya'lel ts'usub mu' bʌ i ch'ʌmob ochel ti mal Templo cha'an i majtan lac Yum. Jatetla motomajob, x'e'telet bʌ la i cha'an lac Yum, yom mi la' mel la' pusic'al.

Amos 7:2

Jini mote' sajc' tsi' lu' c'uxu jini woli bʌ ti colel ti lum. Tsa cʌlʌ: C Yum Dios, awocolic ñusʌben i mul Israel. ¿Bajche' mi mejlel i cuch wocol i p'olbal Jacob? come mach cabʌlobic, cho'on tsac sube.

Amos 7:5

Tsac sube: C Yum Dios, awocolic jasʌlix, yʌpʌ jini c'ajc. ¿Bajche' mi mejlel i cuch wocol i p'olbal Jacob? come mach cabʌlobic, cho'on.

Miqueas 7:10

Che' mi' q'uelon j contra, mi caj i yubin quisin cha'an tsi' wajleyon. Tsi' subeyon: ¿Bac'an tsiquil a Yum Dios? che'en. Mi caj j q'uel che' p'ump'un mi' t'uchtʌntel che' bajche' oc'ol ti bij.

Malaquias 1:9

Jini cha'an toj'esan la' bʌ yic'ot Dios cha'an mi' p'untañetla. ¿Mu' ba caj i q'ueletla ti uts'at che' mi la' wʌq'uen i majtan mach bʌ wenic? che'en i Yum Panchan yic'ot Pañimil.

Numeros 25:6

Juntiquil winic israel bʌ tsi' pʌyʌ tilel x'ixic ch'oyol bʌ ti Madián, che' woli' q'uelob Moisés yic'ot pejtelel israelob che' woliyob ti uq'uel ya' ti' ti' Tabernáculo.

Mateo 23:35

Jini cha'an mi caj la' tojbeñob i mul jini tsa' bʌ i tsʌnsayob jini x'alt'añob c'ʌlʌl che' bʌ tsa' tsʌnsʌnti Abel, jini toj bʌ i pusic'al, c'ʌlʌl tsa' tsʌnsʌnti Zacarías (i yalobil Berequías). Zacarías tsa' tsʌnsʌnti ti' tojel pulʌntib ya' ti' t'ejl Templo. Isujm mic subeñetla, pejtel i mul mi caj i yotsʌbentelob ti' wenta jini winicob x'ixicob año' bʌ ti pañimil wʌle. Mi caj i tojob pejtel ili mulil.

Mateo 27:43

Tsi' ñopo Dios. La' i coltan wʌle mi yom. Come tsi' yʌlʌ: “Joñon i Yalobilon Dios”, che'en. Che' tsi' yʌlʌyob.

Deuteronomio 28:37

Bʌbʌq'uen mi caj a wubin. Mi caj i wajleñetob. Mi caj i ts'a'leñetob jini winicob x'ixicob ti yan tac bʌ tejclum, ya' ba' mi caj i pʌyet majlel lac Yum.

Deuteronomio 32:27

Pero mach che'ic tsac mele ame i lon chañ'esañob i bʌ i contrajob che' mi' jisʌntelob jini israelob, Ame mi' lon alob: “Tsa' mʌjli lac cha'an ti lac bajñel p'ʌtʌlel. Mach jinic i ye'tel lac Yum”, ame lon che'icob.

Josue 7:9

Che' mi' yubiñob jini cananeojob yic'ot pejtelel chumulo' bʌ ya' ti lum, mi caj i joy mʌctañon lojon. Mi caj i jisañon lojon. ¿Chuqui mi caj a mel che' jini, cha'an i ñuclel a c'aba'? che'en Josué.