Joel 2:13 - Chol: I T’an Dios

¹³ Mach mi la' tsil la' pislel che' ch'ijiyem la' pusic'al, pero yom pec' mi la' mel la' pusic'al. Sutq'uin la' bʌ ba'an lac Yum Dios, come an i yutslel i pusic'al. Yujil i p'untañetla. Mach orajic mi' mich'an. Cabʌl i yutslel i pusic'al. C'ux mi' yubiñet che' mi' ju'sʌbeñet la' pusic'al.

Chol de Tumbalá Bible

¹³ Mach mi la' tsil la' pislel che' ch'ijiyem la' pusic'al, pero yom pec' mi la' mel la' pusic'al. Sutq'uin la' bʌ ba'an lac Yum Dios, come an i yutslel i pusic'al. Yujil i p'untañetla. Mach orajic mi' mich'an. Cabʌl i yutslel i pusic'al. C'ux mi' yubiñet che' mi' ju'sʌbeñet la' pusic'al.

Joel 2:13 Iomraidhean Croise

Genesis 37:29

Che' bʌ tsa' cha' majli Rubén ba'an joyol bʌ lum tsi' q'uele mach ya'ix an José ti mal. Tsi' tsili i pislel.

Genesis 37:34

Jacob tsi' tsili i pislel. Tsi' lʌpʌ coxtal i wenta i wex. Tsi' yuc'ta i yalobil cabʌl q'uin.

2 Samuel 1:11

Che' bʌ tsi' yubi iliyi, David tsi' jet' tsili i bujc. Che'ʌch tsi' meleyob ja'el pejtelel i winicob.

1 Reyob 21:27

Acab tsi' yubibe i t'an Elías. Tsi' jet' tsili i pislel. Tsa' caji i lʌp coxtal ti q'uiñil yic'ot ti ac'ʌlel. Tsi' cha'le ch'ajb. Wen ch'ijiyem tsa' caji ti ajñel.

2 Reyob 22:11

Jini rey tsi' wen ubi pejtel jini t'an am bʌ ti' juñilel jini mandar. Tsi' jet' tsili i bujc cha'an bʌq'uen.

2 Reyob 5:7

Che' bʌ tsa' ujti i q'uel jini jun jini rey ti Israel, tsi' jet' tsili i bujc. Tsi' yʌlʌ: ¿Dioson ba cha'an mi cʌq'uen i cuxtʌlel winicob, cha'an mi cʌc'ob ti chʌmel ja'el? ¿Chucoch mi' choc tilel ba' añon juntiquil winic am bʌ leco bʌ i tsoy? Q'uelela bajche' woli' ña'tan i jop'beñon c mul cha'an mi' contrajiñon. Che' tsi' yʌlʌ jini rey ti Israel.

2 Reyob 6:30

Jini rey tsi' jet' tsili i bujc che' bʌ tsi' yubi. Jini winicob ya' bʌ añob tsi' q'ueleyob che' bʌ tsi' tsili i bujc. Lʌpʌl i cha'an coxtal ya' ti' mal i bujc jini rey.

2 Cronicas 6:27

yom ma' ñich'tañon lojon ya' ti panchan. Ñusʌbeñon lojon c mul. Pʌsbeñon lojon jini toj bʌ bij ba' yom mic cha'len lojon xʌmbal. Cha' chocbeñon lojon tilel ja'al wʌ' ti c lumal lojon tsa' bʌ a wʌq'ueyon lojon.

Nehemias 9:17

Mach yomobic i ch'ujbin a t'an. Ma'anic tsi' yotsayob ti' pusic'al jini bʌbʌq'uen tac bʌ tsa' bʌ a melbeyob. Tsʌts tsi' meleyob i pusic'al c ñojte'el lojon. Ti' bajñel pusic'al tsi' yajcayob i yum cha'an mi' sujtelob ti to'ol e'tel ya' ti Egipto. Uts bʌ Dioset. A wujil i ñusʌntel mulil. Wen a wujil p'untaya. Jal ma' mich'an. Cabʌl a c'uxbiya. Ma'anic tsa' cʌyʌ c ñojte'el lojon

Job 1:20

Tsa' wa'le Job. Tsi' tsili i bujc. Tsi' set'e i jol cha'an ch'ijiyem i pusic'al. Tsi' choco i bʌ ti lum. Tsi' ch'ujutesa Dios.

Salmos 103:8

Lac Yum mi' cha'len p'untaya, uts i pusic'al. Jal mi' mich'an. Cabʌl mi' p'untañonla.

Salmos 106:45

Tsi' ña'ta jini xuc'ul bʌ i t'an tsa' bʌ i yʌq'ueyob. Tsi' cʌyʌ i mich'leñob cha'an cabʌl i yutslel.

Salmos 34:18

Lʌc'ʌl an lac Yum ba'an ch'ijiyemo' bʌ i pusic'al. Mi' coltan jini woli bʌ i melob i pusic'al.

Salmos 51:17

Jini mu' bʌ a mulan jiñʌch ju'sʌbilix bʌ c pusic'al lojon, I wenta tsʌnsʌbil bʌ a majtan. Dios, ma'anic ma' ts'a'len jini ju'sʌbilix bʌ i pusic'al mu' bʌ i cʌy i mul.

Salmos 86:15

C Yum, ma' p'untan winicob x'ixicob. Ma' pʌsbeñob i yutslel a pusic'al. Ma' cuchbeñob i sajtemal. Cabʌlʌch a wutslel, wen xuc'ulet.

Salmos 86:5

Isujm uts'atet, c Yum, ma' ñusʌbeñon lojon c mul. Ma' pʌsbeñob i yutslel a pusic'al pejtel mu' bʌ i pejcañetob.

Isaias 57:15

Jini cuxul bʌ ti pejtelel ora, Ch'ujul Bʌ i c'aba', woli i yʌl: Joñon chumulon ti chan ti Ch'ujul bʌ Cajñib, pero wʌ' chumulon ja'el yic'ot jini mu' bʌ i mel i bʌ ti pec', yic'ot jini am bʌ i wocol. Mic ñuq'uesʌben i pusic'al jini uts bʌ. Mi cʌq'uen i tijicñʌyel jini am bʌ ti c'oj'ol.

Isaias 58:5

¿Tsa' ba c subeyetla cha'an mi la' cha'len ch'ajb che' bajche' iliyi? ¿Uts'at ba mij q'uel che' ma' lij a bʌ che' bajche' ac', che' ma' lʌp coxtal, che' ma' wʌc' ti a pam i tinil c'ajc? ¿Jimba iliyi i q'uiñilel ch'ajb mu' bʌ c mulan? Mach jinic.

Isaias 66:2

Pejtelel iliyi joñon tsac mele yic'ot j c'ʌb. Tsa' jach caji ti ajñel cha'an jach com, che'en lac Yum. Majqui jach uts i pusic'al mi caj j q'uel ti uts'at. Che' ju'sʌbilix i pusic'al mi' bʌc'ñañon, mi' jac'beñon c t'an.

Jeremias 36:7

Tic'ʌl mi mux caj i cʌyob i mul cha'an mi' pejcañob lac Yum ti wocol t'an ti jujuntiquil cha'an mi' ñusʌbeñob i mul. Come cabʌl woli ti mich' lac Yum. Tsa'ix i yʌc'ʌ i t'an cha'an mi' jisʌntelob, che'en Jeremías.

Jeremias 41:5

tsa' tiliyob chʌnc'al winicob loq'uemo' bʌ ti Silo ya' ti Samaria. Tsijlem i pislel yic'ot bocbil i tsucti'. Lajchibilobix i bʌc'tal. Woli' ch'ʌmob tilel majtañʌl yic'ot pom cha'an mi' yʌc'ob ti' yotot lac Yum.

Jeremias 42:10

“Yom wʌ' jach mi la' chumtʌl ti la' lum. Che' jini mi caj j coltañetla. Ma'anic mi caj c jisañetla. Mi caj c pʌq'uetla yilal. Ma'anic mi caj c boquetla. Che' uts'at ma' jac'beñon, mi caj c mel c pusic'al cha'an jini ñuc bʌ wocol tsa' bʌ c chocbeyetla tilel.

Ezequiel 9:4

Tsi' sube: Yom ma' ñumel ti' yojlil Jerusalén cha'an ma' wʌq'ueñob i marcajlel ya' ti' pam jini winicob mu' bʌ i cha'leñob uq'uel yic'ot tsic pusic'al cha'an i jontolil i pi'ʌlob, che'en.

Oseas 14:1

Awocolic, israelob, sutq'uin la' bʌ ba'an lac Yum, i Dios israelob, come ti' caj la' mul tsa' la' taja wocol.

Jonas 3:9

Mach la cujilic, tic'ʌl mi mux i q'uextan i pusic'al Dios cha'an mi' cʌy i mich'ajel, cha'an ma'anic mi lac jilel. Che' tsi' yʌc'ʌ mandar jini rey.

Jonas 4:2

Tsi' pejca lac Yum ti oración. Tsi' sube: ¡Aj! c Yum, mic pejcañet. ¿Mach ba jiniqui tsa' bʌ c wʌn ña'ta che' bʌ ya'to añon tic lumal? Tsa cʌlʌ tic pusic'al ma'anic mi caj a jisañob come cujil Dioset, cujil cabʌl i yutslel a pusic'al. Ma' p'untan winicob x'ixicob. Jal ma' cuchbeñob i mul. Wen cabʌl a c'uxbiya. Mi' cha' uts'an a pusic'al che' wola' ña'tan a choc tilel wocol. Jini cha'an tsac ñopo puts'el majlel ti Tarsis.

Miqueas 7:18

¿Am ba yambʌ Dios lajal bajche' jatet? Jatet jach ma' ñusan mulil. Ma' wʌc' ti ñajʌyel ti a pusic'al i jontolil a winicob tsa' bʌ colobʌjiyob. Come mach mich'etic ti pejtelel ora, Dios. Tijicña a pusic'al che' ma' pʌsbeñon lojon a c'uxbiya.

Nahum 1:3

Jal mi' tejchel i mich'ajel lac Yum. Cabʌl i p'ʌtʌlel. Ma'anic mi' to'ol q'uel ti toj jini am bʌ i mul. Lac Yum mi' pʌs i p'ʌtʌlel ti sutujt ic' yic'ot ti p'ʌtʌl bʌ ic'. Lac Yum mi' pʌs i p'ʌtʌlel ti tocal.

Numeros 14:18

Uts'at a pusic'al c Yum. Jal ma' cuchbeñon lojon c mul. Wen a wujil p'untaya. Ma' ñusʌbeñon lojon c mul yic'ot c jontolil lojon. Tojet ja'el. Wersa mi caj a wʌq'ueñob i tojol i mul jini xmulilob, yic'ot i yalobilob, yic'ot i butsob, yic'ot i p'olbalob i buts. Mi caj i tojbeñob i mul ti chʌnlajmlel.

Romanos 2:4

¿Mu' ba a lon ñusʌben on bʌ i yutslel i pusic'al Dios? ¿Mu' ba a lon ñusan che' jal woli' cuchbeñet a mul ti' yutslel i pusic'al? ¿Mach ba a wujilic, Dios mi' pʌsbeñet i yutslel i pusic'al cha'an ma' cʌy a mul?

Efesios 2:4

Pero cabʌl tsi' p'untayonla Dios, cabʌl tsi' c'uxbiyonla.

1 Timoteo 4:8

Mi lac taj ts'ita' lac wenlel che' mi laj cʌntan lac bʌc'tal. Pero cabʌl mi lac taj che' ch'ujul mi la cajñel. Come mi' coltañonla wʌle ti ili ora yic'ot ti jini tal to bʌ ora.