Jeremias 16:12 - Chol: I T’an Dios

¹² Lajaletla bajche' la' tat. Cʌlʌx jax tsa' la' cha'le mulil. Ti pejteletla woli la' mel bajche' jach la' wom cha'an jontol la' pusic'al. Tsʌts la' pusic'al. Mach la' womic la' jac' che' mic pejcañetla.

Chol de Tumbalá Bible

¹² Lajaletla bajche' la' tat. Cʌlʌx jax tsa' la' cha'le mulil. Ti pejteletla woli la' mel bajche' jach la' wom cha'an jontol la' pusic'al. Tsʌts la' pusic'al. Mach la' womic la' jac' che' mic pejcañetla.

Jeremias 16:12 Iomraidhean Croise

Genesis 6:5

Lac Yum tsi' q'uele cabʌlix i jontolil winicob ti pañimil. Tsi' q'uele jontol jax ti pejtelel ora pejtel chuqui an ti' pusic'al winicob yic'ot pejtel chuqui tsi' ña'tayob.

Genesis 8:21

Che' bʌ tsi' yubi lac Yum jini xojocña bʌ i yujts'il tsi' yʌlʌ ti' pusic'al: Ma'anix mi caj c cha' jisan jini lum cha'an i mul winicob che' bajche' tsac mele, anquese jontol chuqui mi' ña'tañob ti' pusic'al c'ʌlʌ che' ch'iton to. Ma'anix mi caj c chʌn tsʌnsan pejtelel cuxul tac bʌ che' bajche' tsac jisa.

Eclesiastes 8:12

An xmulilob c'ʌlʌl cuxulob to anquese jo'c'al ti yajl tsi' cha'leyob jontolil. Pero cujil uts'at mi' cajelob ti ajñel jini mu' bʌ i bʌc'ñañob Dios, mu' bʌ i jac'ob.

Eclesiastes 9:3

Jini cha'an ma'anic mi' cʌyob i jontolil winicob. Mi' bajñel ña'tañob chuqui yomob i mel anquese socol i bijlel. Yujilob mi' cajelob ti chʌmel.

Jeremias 13:10

Jontolob. Mach yomobic i yubin c t'an. Mi' bajñel melob bajche' yom i bajñel pusic'al. Majlemobix yic'ot yan tac bʌ dios cha'an mi' ch'ujutesañob. Jini cha'an lajal mi caj i sujtelob che' bajche' jini cajchiñʌc' mach bʌ anix i c'ʌjñibal.

Jeremias 17:9

Wen yujilob lot i pusic'al winicob. Cabʌl i sajtemal. ¿Majqui mi' lu' c'ʌn?

Jeremias 18:12

Pero mi' yʌlob: “Lolom jach ma' pejcañon lojon. Wersa com c mel lojon bajche' wolic ña'tan lojon. Wersa com c mel lojon jontolil bajche' jach yom lojon c pusic'al”, che'ob.

Jeremias 22:28

¿Bajche' yilal Conías? Che'ʌch yilal bajche' junxejt' p'ejt. ¿Mach ba anic majqui mi' chʌn c'uxbin? ¿Chucoch tsʌts chocbilix ti yambʌ lum mach bʌ i cʌñʌyic?

Jeremias 7:24

Pero ma'anic tsi' ñich'tayob c t'an. Ma'anic tsi' jac'ʌyob. Tsi' chʌn cha'leyob xʌmbal che' bajche' yomob i bajñel pusic'al. Tsʌtsob i pusic'al. Jontol bajche' tsi' meleyob. Tsi' tʌts'ʌyob i bʌ. Ma'anic tsi' lʌc'tesayob i bʌ.

Jeremias 7:26

Pero ma'anic tsa' la' ñich'tayob. Ma'anic tsa' la' jac'beyob. Tsʌts la' pusic'al, ñumen bajche' la' tatob.

Jeremias 9:14

Tsʌtsob i pusic'al. Tsi' bajñel yajcayob i bijlel che' bajche' yom i pusic'al. Tsi' ch'ujutesayob jini Baalob che' bajche' tsi' cʌntesayob i tatob.

Lamentaciones 5:7

Tsi' cha'leyob mulil c tat lojon. Jini cha'an mach chʌn añobix.

Ezequiel 20:30

Jini cha'an suben jini israelob: “Lac Yum Dios woli' yʌl: ¿Mu' ba caj la' chʌn cha'len ts'i'lel che' bajche' la' ñojte'elob? ¿Mu' ba caj la' chʌn ch'ujutesan dios tac?

Amos 2:4

Lac Yum woli' yʌl: Cabʌlix i jontolil Judá. Tsa' cʌlʌx ñumi i p'isol i jontolil. Mach chʌn cujchix c cha'an, come tsi' ñusʌbeyon c t'an, ma'anic tsi' jac'beyon c mandar. Tsa' sajtiyob cha'an tsi' ñopoyob lot. Tsi' ñopoyob dioste' tac che' bajche' i tatob.

Malaquias 3:7

Anquese tsa'ix la' ts'a'le c mandar ti wajali, wʌle yom mi la' cha' sutq'uin la' bʌ ba' añon, che'en i Yum Panchan yic'ot Pañimil. La'la. Mi caj c ñusʌbeñet la' mul, che'en. Pero mi la' lon al: “Ma'anic ba' ora tsaj cʌyʌyet lojon”, che'etla.

Marcos 7:21

Come ch'oyol ti' pusic'al winicob x'ixicob mi' tilel cabʌl jontol bʌ i ña'tʌbal, yic'ot i ts'i'lel, yic'ot i tajol i yixic, yic'ot tsʌnsa,

Deuteronomio 29:19

Che'ʌch mi' yujtel ti' tojlel winic mu' bʌ i ñusan i tic'ol. Mi' lon chañ'esan i bʌ. Che' mi' yujtel i yubin mi yʌl: “Uts'at añon anquese mic mel chuqui jach com ila ti pañimil. Ma'anic muc'on ti bʌq'uen”, lon che'en. Jini mu' bʌ i mel che' bajche' jini woli' yʌc' ti jilel i lum.

Deuteronomio 9:27

C Yum, ña'tan a winicob Abraham yic'ot Isaac yic'ot Jacob. Mach a q'uelbeñob i tsʌtslel i pusic'al ili winicob mach bʌ anic mi' ñopetob. Yom ma' ñusʌbeñob jini ñuc bʌ i mul tsa' bʌ i meleyob,

2 Timoteo 3:13

Pero jini jontolo' bʌ yic'ot xlotiyajob, utsi utsijax mi' chʌn melob i jontolil. Mi caj i lotiñob yaño' bʌ. Mi caj i lotintelob ja'el.

Hebreos 3:12

Jini cha'an hermanojob, chʌcʌ q'uele la' bʌ ame tejchic jontolil ti la' pusic'al, ame mi la' cʌy jini cuxul bʌ Dios mi mach xuc'ulic mi la' ñop.

Juezob 2:19

Che' bʌ tsa' chʌmi jini juez, tsa' caji i cha' melob ñaxan bʌ i melbal. Ñumen leco tsi' cha'leyob bajche' i ñojte'elob. Tsi' tsajcayob yan tac bʌ dios. Tsi' ñocchocoyob i bʌ ti' tojlel. Ma'anic tsi' cʌyʌyob jontol bʌ i melbalob. Mach yomobic i cʌy jini bij woli bʌ i tsajcañob.

1 Samuel 15:23

Jini mu' bʌ i ñusʌben i t'an Dios lajalʌch i mul bajche' xwujt. Lajal i mul jini tsʌts bʌ i pusic'al bajche' jini mu' bʌ i ch'ujutesan dioste' tac. Tsa'ix a ñusʌbe i t'an lac Yum. Jini cha'an chojquemetix loq'uel ti a yumʌntel. Ma'anix mi caj a chʌn ajñel ti rey, che'en.