Jeremias 15:6 - Chol: I T’an Dios

⁶ Tsa' cʌyʌyon, che'en lac Yum. Woli a chʌn tʌts' a bʌ tic tojlel. Jini cha'an tsac sʌts'ʌ j c'ʌb cha'an mic jisañet. Mach chʌn comix j cuch a mul. Wocol jax mi cubin.

Chol de Tumbalá Bible

⁶ Tsa' cʌyʌyon, che'en lac Yum. Woli a chʌn tʌts' a bʌ tic tojlel. Jini cha'an tsac sʌts'ʌ j c'ʌb cha'an mic jisañet. Mach chʌn comix j cuch a mul. Wocol jax mi cubin.

Jeremias 15:6 Iomraidhean Croise

Isaias 1:4

Cabʌl jax i mul jini año' bʌ ti Judá. Cʌlʌx but'ulob jax ti jontolil. I yalobilob xñusa t'añob. Tsa'ix i ñajtesayob i bʌ ba' añon. Tsa'ix i ts'a'leyob jini Ch'ujul Bʌ i cha'an Israel.

Isaias 28:13

Jini cha'an c'unte' c'unte' mi caj i chʌn subeñob i mandar lac Yum. Ti jujump'ej q'uin mi caj i ts'ita' cʌntesañob. Ti' tsolom tac mi caj i yubiñob ts'ita' ilayi, yambʌ ts'ita' ya'ya'i. Pero anquese wen tsiquil i cʌntesʌbal, mi caj i tʌts'ob i bʌ. Mi caj i jats'ob i yoc. Mi caj i yajlelob. Mi caj i cʌjchelob majlel.

Isaias 31:3

Come winicob jach jini egiptojob. Mach Diosobic. Jixcu i caballojob, caballo jach. Mach lajalic bajche' espíritu. Che' mi' wox i c'ʌb lac Yum cha'an mi' contrajiñob, mi caj i p'ʌjcʌs jats'ob i yoc. Mi caj i yajlelob yic'ot jini tsa' bʌ i c'ajtiyob i coltʌntel ti' tojlel. Lajal mi caj i jilelob.

Jeremias 1:16

Cabʌl jax i jontolil c tejclumob. Jini cha'an mi caj c chocbeñob tilel pejtel jini wocol cha'an tsa'ix i cʌyʌyoñob. Mi' pulbeñob pom yambʌ diosob. Mi' ñocchocoñob i bʌ ti' tojel jini melbil tac bʌ tsa' bʌ i meleyob.

Jeremias 13:14

Mi caj cʌc'ob i contrajiñob i bʌ winicob yic'ot ch'iton bʌ i yalobilob, che'en lac Yum. Ma'anic mi caj c p'untañob. Ma'anic mi caj j coltañob. Mi caj c jisañob”. Che'ʌch yom ma' subeñob, che'en.

Jeremias 2:13

Come cha'chajp i mul c winicob x'ixicob. Tsi' cʌyʌyoñob, anquese joñon Cuxul bʌ Ja'on. Tsi' wersa t'oboyob xajlel cha'an mi' yajñel i ya'al. Tsi' sajcayob ja' ba' bajñel yomob i pusic'al. Mu' jach i jilel i ya'al cha'an tocolix i yajñib.

Jeremias 2:17

¿Mach ba cha'anic a mul tsa' tili ili wocol? Tsa' cʌyʌ a Yum Dios che' bʌ tsi' wen pʌsbeyet jini wen bʌ bij.

Jeremias 2:19

Jini a jontolil mi caj i yʌq'uet ti quisin che' mi' cajel ti t'an a pusic'al. Mi caj c jultesʌbeñet a pusic'al cha'an tsa' cʌyʌyon. Yomix ma' ña'tan quisintic jax a jontolil cha'an tsa'ix a cʌyʌyon. Tsa' cʌyʌ a Yum Dios. Ma'anix ma' bʌc'ñañon, che'en i Dios Panchan yic'ot Pañimil, jiñʌch lac Yum.

Jeremias 20:9

Tsac lon ña'ta ma'anix mi caj c chʌn c'ajtesan Dios. Ma'anix mi caj c chʌn pejcan winicob ti' c'aba', lon cho'on, pero ya' jach tic pusic'al tsa' caji cubin i t'an che' bajche' c'ajc woli bʌ ti lejmel. Che' jini ma'anic tsa' mejliyon ti ñʌjch'el. Wersa tsac subu ti jamʌl.

Jeremias 44:22

Mach chʌn cuchbilix i cha'an la' jontolil yic'ot pejtelel chuqui mi la' mel. Jini cha'an tsa' pujch'i la' lum. Tsa' sujti ti tiquin bʌ lum mach bʌ anic i c'ʌjñibal. Ma'anix i yumob. Tsa' p'ajleyob jini ya' bʌ chumulob. Tsa' jiliyob. Jini cha'an woliyetla ti wocol wʌle.

Jeremias 6:11

Jini cha'an an i mich'ajel Dios tic pusic'al. Mach chʌn cujchix c cha'an. Mi caj c mich'len Jerusalén. La' i yubiñob wocol jini alp'eñelob woliyo' bʌ ti alas ti bij yic'ot jini ch'iton winicob woli bʌ i tempañob i bʌ. Mi caj i cʌjchelob majlel winicob yic'ot i yijñamob, jini xñoxo' bʌ ja'el yic'ot jini mach bʌ añobix i p'ʌtʌlel.

Jeremias 6:12

Mi caj i chilbentelob i yotot yic'ot i jamil yic'ot i yijñamob. Mi caj i ch'ʌmob i contrajob. Joñon mi caj cʌq'ueñob i toj i mul jini chumulo' bʌ ti jini lum, che'en lac Yum.

Jeremias 6:19

Ubinla, pejtel cuxulo' bʌ ti pañimil: Awilan, wolix c choc tilel wocol ti' tojlel ili c tejclum. Mi caj i tojob i mul come ma'anic tsi' jac'ʌyob c t'an. Tsi' juch'teq'ueyob j cʌntesʌbal.

Jeremias 7:16

Jixcu jatet, mach ma' taj ti oración ili winicob. Mach ma' wuc'tañob. Mach ma' xin otsan a bʌ cha'an ma' c'ajtibeñon i coltʌntel, come ma'anic mi caj c jac'.

Jeremias 7:24

Pero ma'anic tsi' ñich'tayob c t'an. Ma'anic tsi' jac'ʌyob. Tsi' chʌn cha'leyob xʌmbal che' bajche' yomob i bajñel pusic'al. Tsʌtsob i pusic'al. Jontol bajche' tsi' meleyob. Tsi' tʌts'ʌyob i bʌ. Ma'anic tsi' lʌc'tesayob i bʌ.

Jeremias 8:5

Pero mach che'ic mi' melob jini chumulo' bʌ ti Jerusalén. Tsi' junyajlel tʌts'ʌyob i bʌ tic tojlel. Ñajt mi' majlelob. Mi' mulañob jontolil, mi' wen mulañob lot. Mach yomobic sujtel.

Jeremias 8:9

Jini xcʌntesajob woli' yʌjq'uelob ti quisin. Mʌcʌlob i yej. Cʌchʌlob mi caj i majlelob ti yambʌ lum cha'an tsi' juch'teq'ueyob i t'an lac Yum. Tsiquil che' jini ma'anic i ña'tʌbal.

Ezequiel 14:9

Che' mi' bajñel cha'len t'an jini x'alt'an jiñʌch lot. Mach che'ic mi caj i yujtel bajche' tsi' yʌlʌ. Joñon mi caj j contrajin jini x'alt'an. Mi caj c jisan ti' tojlel c tejclum Israel.

Ezequiel 25:7

Jini cha'an wʌle ti' caj la' mul wolij contrajiñetla. Tsa'ix cʌc'ʌyetla ti' c'ʌb yambʌ winicob ti pañimil cha'an mi' jisañob la' chubʌ'an. Mi caj c chilbeñetla la' yumʌntel. Mi caj c jisañetla cha'an ma'anix mi la' chʌn ña'tʌntel. Che' jini mi caj la' ña'tan Yumʌlon.

Ezequiel 35:3

Che'ʌch yom ma' subeñob: “Lac Yum Dios woli' yʌl: Wʌle wolix j contrajiñetla añet bʌ la ti wits i c'aba' Seir. Mux caj c jats'etla tij c'ʌb. Jochocña mi caj i cʌytʌl la' lumal.

Oseas 11:7

C cha'año' bʌ tsi' junyajlel cʌyʌyoñob. Anquese jini x'alt'añob mi' subeñob cha'an mi' pejcañob Dios am bʌ ti Chan, pero mach yomobic.

Oseas 13:14

¿Yom ba mij coltañob cha'an ma'anic mi' tojob i mul ti' yajñib chʌmeño' bʌ? Ma'anic mi caj c loc'sañob ba' woliyob ti chʌmel. La' i cha'leñob bʌq'uen che' colel i chʌmel. La' i ña'tañob mux caj i mujquelob ti mucoñibʌl. Ma'anic mij q'uex c t'an, che'en lac Yum.

Oseas 4:16

Pejtelel jini israelob tsi' ñusayob c mandar che' bajche' jontol bʌ ña' wacax mach bʌ yomic i q'uel i yum. Mach yomobic mij cʌntañob che' bajche' mi' cʌntʌntel alʌ tat tiñʌme'.

Sofonias 1:4

Mi caj cʌq'ueñob wocol ya' ti Judá yic'ot ti Jerusalén. Mi caj c laj jisan jini mu' bʌ i ch'ujutesañob Baal yic'ot i motomajob. Ma'anix mi caj i chʌn ña'tʌntelob i c'aba'.

Zacarias 7:11

Pero la' ñojte'elob ma'anic tsi' jac'ʌyob. Tsi' mʌyʌyob i wut. Tsi' mʌcʌyob i chiquin cha'an mach yomobic i yubin.