Jeremias 10:12 - Chol: I T’an Dios

¹² Diosʌch tsa' bʌ i mele pañimil ti cabʌl i p'ʌtʌlel. Tsi' xuc'choco pañimil cha'an cabʌl i ña'tʌbal. Tsi' lich'i tac panchan jini wen yujil bʌ.

Chol de Tumbalá Bible

¹² Diosʌch tsa' bʌ i mele pañimil ti cabʌl i p'ʌtʌlel. Tsi' xuc'choco pañimil cha'an cabʌl i ña'tʌbal. Tsi' lich'i tac panchan jini wen yujil bʌ.

Jeremias 10:12 Iomraidhean Croise

Genesis 1:1

Che' ti' cajibal tsi' mele Dios jini panchan yic'ot pañimil.

Genesis 2:5

Che' maxto pasemic jini mu' bʌ i colel ti pʌc'ʌbʌl, lac Yum Dios maxto anic tsi' choco tilel ja'al ti pañimil. Maxto anic majch tsi' cha'le e'tel ti lum.

1 Cronicas 16:26

Come dioste' jach pejtelel i dios tac winicob x'ixicob mach bʌ anic mi' cʌñob Dios. Pero lac Yum tsi' mele panchan.

Job 26:7

Dios mi' lich' panchan che' bajche' pisil ya' ba' ma'anic chuqui an. Che jach mi' ts'uychocon pañimil ya' ba' ma'anic chucul.

Job 37:18

Dios tsi' lich'i panchan che' bajche' colem espejo. Jixcu jatet, ¿awujil ba lich'ol?

Job 9:8

I bajñel tsi' lich'i panchan. Tsi' xʌñʌ majlel colem ja'.

Salmos 104:2

Jini a pislel jiñʌch i c'ʌc'al pañimil. Jini panchan tsʌye'el a cha'an che' bajche' pisil.

Salmos 104:24

C Yum, cabʌl jax a melbal. Ti a ña'tʌbal tsa'ix a mele ti pejtelel. Ti pejtelel pañimil tsiquil jini wen tac bʌ tsa' bʌ a melbeyon lojon.

Salmos 119:90

C Yum, mi caj a pʌsbeñob i xuc'tilel a pusic'al calobilob ti lajm ti lajm. A wa'chocobal jini pañimil c'ʌlʌl wʌle.

Salmos 24:2

Come lac Yum tsi' yʌc'ʌ lum ti' t'ejl tac colem ñajb. Tsi' yʌc'ʌ ti' t'ejl tac jini colem ja'.

Salmos 33:6

Tsa' mejli jini panchan cha'an ti' t'an lac Yum, Tsa' mejli pejtel ec' tac cha'an i yiq'uilel i yej.

Salmos 65:7

Ma' ñʌch'tesan colem ñajb ju'ucña bʌ woli ti t'an, yic'ot ju'ucña bʌ winicob x'ixicob.

Salmos 78:69

Chan tsi' mele ch'ujul bʌ i yajñib ti pam wits. Xuc'ul tsi' mele che' bajche' tsi' wa'choco pañimil cha'an mi' yajñel ti pejtelel ora.

Salmos 93:1

C Yum wola' cha'len a yumʌntel. I t'ojol jax a ñuclel. Che' bajche' mi lac xoj lac bujc, xojol a cha'an a p'ʌtʌlel. Tsa' wen wa'choco jini pañimil. Ma'anic mi' ñijcʌyel.

Proverbios 3:19

Lac Yum tsi' yʌc'ʌ i c'ʌclib pañimil ti cabʌl i ña'tʌbal. Tsi' mele panchan cha'an ti cabʌl i pusic'al.

Proverbios 30:4

¿Majqui jini tsa' bʌ letsi ti panchan tsa' bʌ jubi tilel? ¿Majqui tsi' yʌc'ʌ ti' wenta jini ic' cha'an ma'anic mi' ñumel? ¿Majqui tsi' melbe i ti' ja' cha'an cʌchʌl yilal jini ja' che' bajche' ti pisil? ¿Majqui tsi' p'isi pañimil che' ti' cajibal? ¿Chuqui i c'aba'? ¿Chuqui i c'aba' i yalobil? ¿Mach ba a wujilic?

Isaias 40:22

Jiñʌch Dios jini buchul bʌ ya' ti panchan ti' chañelal pañimil. Biq'uit mi' q'uel jini chumulo' bʌ ti pañimil bajche' xc'ajba sajc'. Mi' lich' panchan che' bajche' pisil bʌ otot ba' mi' chumtʌl.

Isaias 42:5

Joñon a Yumon jini cojach bʌ Dios. Tsac mele panchan. Tsac lich'choco. Tsac mele jini pañimil yic'ot pejtel i bʌl. Mi cʌq'uen i c'uxtʌlel jini año' bʌ ti pañimil.

Isaias 44:24

Che'ʌch woli' yʌl lac Yum, jini a Waj Coltaya tsa' bʌ i meleyet che' cʌntʌbilet to. Joñon a Yumon tsa' bʌ c mele pejtel chuqui tac an. Tic bajñel tsac lich'i jini panchan. Tic bajñel tsac mele pañimil yic'ot pejtelel i bʌl.

Isaias 45:12

Joñon tsac mele pañimil. Tsac mele winic ti pañimil. Tsac lich'choco panchan tij c'ʌb. Tsa cʌc'ʌ jini ec' ti' yajñib tac. Añʌch c p'ʌtʌlel cha'an mic ts'ʌctesan pejtelel tsa' bʌ c subu.

Isaias 45:18

Lac Yum, jiñʌch Dios. Tsi' mele panchan yic'ot pañimil, yic'ot pejtelel chuqui tac an. Mach lolomic tsi' mele pañimil. Tsi' mele cha'an i chumlib winicob. Tsi' yʌlʌ: Joñon Yumʌlon, ma'anic yambʌ.

Isaias 48:13

Joñon tsac xuc'choco jini pañimil tij c'ʌb. Joñon tsac lich'choco jini panchan ti ñoj bʌ j c'ʌb. Ujtel jax to c pejcañob, tsa' cajiyob ti ajñel.

Isaias 49:8

Lac Yum woli' chʌn suben i Winic: Tsa cubi a t'an che' i yorajlelix mic jac'. Ti' yutslel c pusic'al tsac jac'beyet. Che' ti' yorajlel i coltʌntel c cha'año' bʌ tsaj coltayet. Mi caj j cʌntañet. Mi caj cʌq'uet che' bajche' prenda ti' tojlel Israel cha'an mi' wen ña'tañob mi caj c cha' aq'ueñob i lumal. Cha' talob ti chumtʌl ti jochol bʌ tejclum.

Jeremias 10:13

Che' mi' cha'len t'an mi' ñijcan i bʌ tocal. Mi' yʌc' ti letsel i yowix lum ti' petol pañimil. Mi' choc tilel chajc yic'ot ja'al. Mi' loc'san ic' ya' ba' lotol cha'an mi' choc tilel.

Jeremias 10:16

Mach che'ic i Dios Jacob, come jini tsi' mele pejtel chuqui tac an. Tsi' yajca Israel cha'an mi yochel ti' cha'an bʌ. Jiñʌch i Yum Panchan.

Jeremias 14:22

¿Mejl ba i chocob tilel ja'al i diosob yan tac bʌ tejclum? ¿Yilol jach ba mi' tilel ja'lel ti panchan? Jatet c Yumet, c Dioset. Mic pijtañet lojon. Jatet jach ma' mel pejtel iliyi.

Jeremias 27:5

Joñon tsac mele pañimil. Tsac mele pejtel winicob ti pañimil yic'ot bʌte'el. Lu' c melbalʌch cha'an cabʌl c p'ʌtʌlel. Mi cʌq'uen i p'ʌtʌlel majqui jach com.

Jeremias 32:17

Obol c bʌ, c Yum Dios. Awilan a melbalʌch panchan yic'ot pañimil. Tsa' mele ti a c'ʌb ti ñuc bʌ a p'ʌtʌlel. Ma'anic ti pañimil chuqui wocol ti melol a cha'an.

Zacarias 12:1

Jiñʌch i t'an lac Yum ti' contra Israel. Jiñʌch lac Yum tsa' bʌ i mele panchan yic'ot pañimil, tsa' bʌ i yʌq'ueyob i cuxtilel winicob.

Juan 1:3

Jini T'an tsi' mele pejtelel chuqui tac an. Ma'anic chuqui mach melbilic i cha'an.

Colosenses 1:16

Melbil i cha'an Jesús pejtelel chuqui tac an ti panchan yic'ot ti pañimil, jini tsiquil tac bʌ yic'ot jini mach bʌ tsiquilic, mi reyob, mi yumʌlob, mi gobierno, mi i p'ʌtʌlel año' bʌ i ye'tel. Pejtelel chuqui an, melbilʌch i cha'an Jesús cha'an mi' q'uejlel ti ñuc lac Yum.