Exodo 23:8 - Chol: I T’an Dios

⁸ Mach ma' mucul ch'ʌm a majtan, come che' mi' ch'ʌm i majtan jini am bʌ i ña'tʌbal, mi' jac' i lotintel. Che' jini, mi' yubin wocol jini toj bʌ winic ti' tojlel xmeloñel.

Chol de Tumbalá Bible

⁸ Mach ma' mucul ch'ʌm a majtan, come che' mi' ch'ʌm i majtan jini am bʌ i ña'tʌbal, mi' jac' i lotintel. Che' jini, mi' yubin wocol jini toj bʌ winic ti' tojlel xmeloñel.

Jiñi Tsiji' bʌ Wen T'añ cha'añ Estudio

⁸ Mach ma' mucul ch'ʌm a majtañ cha'añ ma' mel jiñi mach bʌ tojic, come jiñi mu' bʌ i mucul ch'ʌm i majtañ, woli i mʌcbentel i wut, yic'ot mi' socben isujmlel i t'añ jiñi tojo' bʌ.

Exodo 23:8 Iomraidhean Croise

Salmos 15:5

Ma'anic mi' ch'ʌm i jol taq'uin che' mi' yʌc' ti majan. Ma'anic mi' ch'ʌm taq'uin cha'an mi' tic'lan jini mach bʌ anic i mul. Jini toj bʌ mu' bʌ i mel pejtel iliyi, chʌn xuc'ul mi' caj ti ajñel.

Salmos 26:10

Jontol i melbalob, Mi' ch'ʌmob cabʌl taq'uin ti' majtan.

Proverbios 15:27

Jini wo'atax bʌ ti taq'uin mi' yotsan ti pobre i pi'ʌlob año' bʌ ti' yotot. Jini mu' bʌ i ts'a'len i majtan taq'uin mu' bʌ i pʌsben xjontolil tijicña mi' yajñel.

Proverbios 17:23

Jini sajtem bʌ mi' mucul aq'uen i majtan xmeloñel cha'an mi' ñusʌben i mul.

Proverbios 17:8

Jini mu' bʌ i yʌq'uen i majtan am bʌ i ye'tel cha'an mi' yuts'esʌben i pusic'al, lajalʌch i majtan bajche' i t'ojol jax bʌ xajlel letsem bʌ i tojol. Jini mu' bʌ i ch'ʌm mi' jac'ben i mandar i yum.

Proverbios 19:4

I pi'ʌlob jini wen chumul bʌ cabʌl mi' tilelob ti jula', pero mi' tʌts'ob i bʌ i pi'ʌlob jini pobre bʌ.

Eclesiastes 7:7

Jini am bʌ i ña'tibal, mi' sujtel ti tonto che' mi' ch'ʌm i majtan ti' c'ʌb xjontolil. Jini mu' bʌ i wersa c'ajtin taq'uin ñumen bajche' yom, woli' yʌc' i bʌ ti asiyel.

Isaias 1:13

Mach comix mi la' ch'ʌmbeñon tilel c majtan. Ts'a' mij q'uel i buts'il pom. Ts'a' mij q'ueletla che' mi la' tempan la' bʌ yic'ot la' pi'ʌlob cha'an mi la' melben i q'uiñilel jini tsiji' bʌ uw yic'ot i q'uiñilel c'aj o. Mach cujchix c cha'an la' mul. Mach tijicñayonic che' mi la' tempan la bʌ cha'an mi la' ch'ujutesañon.

Isaias 1:23

Jini yumʌlob la' cha'an xñusa t'añob, i pi'ʌlobʌch xujch'. Mi ch'ʌmob taq'uin cha'an mi' mucbeñob i mul i pi'ʌlob. Mu' jach i sʌclañob i majtan. Ma'anic mi' wen coltañob jini meba'ob. Ma'anic mi' p'isob ti wenta i wocol t'an jini meba' x'ixicob.

Isaias 33:15

Lac Yum tsi' jac'ʌ: Jini mu' bʌ i mel chuqui uts'at, mu' bʌ i cha'len toj bʌ t'an, jini mach bʌ yujilic xujch', mach bʌ anic mi' ch'ʌm majtañʌl tac cha'an chuqui tac mi' mel, jini mach bʌ yomic i yubin leco bʌ t'an, jini mach bʌ anic mi' coltan stsʌnsa, jini mach bʌ anic mi' jac'ob i pʌyol ti mulil.

Isaias 5:22

Obol jax la' bʌ come ch'ejletla ti lemoñel. Bʌxetla ti' melol lembal.

Isaias 5:23

Mi la' ch'ʌm taq'uin cha'an mi la' mucben i mul xjontolil cha'an mi la' p'ump'un tic'lan jini mach bʌ anic i mul.

Ezequiel 22:12

Mi la' ch'ʌm la' tojol cha'an mi la' cha'len tsʌnsa. Mi la' tic'lan la' pi'ʌlob. Tsa'ix ñajʌyiyon la' cha'an, che'en lac Yum Dios.

Oseas 4:18

Che' mi' yujtelob ti lemoñel, mi' majlel i melob i ts'i'lel. Mi' mulañob jini quisintic jax bʌ. Mi' ts'a'leñob chuqui tac uts'at.

Amos 5:12

Come cujil cabʌlix la' mul. Ti' tsʌtslel la' pusic'al tsa'ix la' ñusʌbeyon c t'an. Mi la' tic'lan jini tojo' bʌ. Mi la' ch'ʌm la' majtan ti mucul. Mi la' xit choc loq'uel jini p'ump'uño' bʌ ti melobʌjʌl.

Miqueas 7:3

Wen bʌxob ti jontolil. Wen ñʌmʌlob ti mulil. Jini xmeloñelob yic'ot año' bʌ i ye'tel mi' wersa c'ajtiñob taq'uin ñumen bajche' yom. Jini wen chumulo' bʌ on mi' yʌq'ueñob taq'uin cha'an mi' tajob i coltʌntel ti jontolil. Che' jini mi' tem socob meloñel.

Deuteronomio 10:17

Come lac Yum Dios i Diosʌch jini diosob, i Yumʌch jini yumʌlob. Wen ñuc lac Yum, wen bʌc'ñʌbil. Mach jelchojquic mi' c'uxbin winicob x'ixicob. Mach yujilic i ch'ʌmol majtañʌl cha'an mi' ñusan jontolil.

Deuteronomio 16:19

Mach yomic mi la' jem jini toj bʌ. Mach yomic jelchojc jach mi la' c'uxbin winicob. Mach yomic mi la' ch'ʌm la' majtan ti' tojlelob, come jini majtañʌl mi' mʌcben i wut jini am bʌ i ña'tʌbal. Mi' socben i t'an jini tojo' bʌ.

1 Samuel 12:3

Wʌ'ix añon wʌle. Yomix mi la' sub ti' tojlel lac Yum, yic'ot ti' tojlel jini yajcʌbil bʌ rey, mi an chuqui leco tsac melbeyetla. Subula mi an juntiquil tsa' bʌ c tic'la, mi tsac ch'ʌmʌ la' wacax, mi la' burro, mi mach tojic tsac meleyetla, mi tsac ch'ʌmʌ c majtan cha'an mij coltan jini am bʌ i mul. Subuxla wʌle. Che' tsi' yʌlʌ Samuel.

1 Samuel 8:3

Pero mach lajalobic tsi' meleyob che' bajche' i tat. Tsa' jach caji i mulañob taq'uin. Tsi' ch'ʌmʌyob tac i majtan. Mach tojic tsi' cha'leyob meloñel.