Lucas 1:53 - Chol de Tumbalá Bible

⁵³ Tsi' lajmesʌbeyob i wi'ñal jini wi'ñayo' bʌ yic'ot cabʌl chuqui tac wen. To'ol che jach tsi' choco majlel jini wen chumulo' bʌ.

Jiñi Tsiji' bʌ Wen T'añ cha'añ Estudio

⁵³ Jiñi wi'ñayo' bʌ tsi' yʌq'ueyob ca'bʌl chuqui tac wen, jiñi wen chumulo' bʌ che' jach tsi' to'ol choco sujtel.

Chol Tila

⁵³ Dios mi yʌq'ueñob i ñaj'añob jini am bʌ i wi'ñal. Mi yʌq'uen i jilel chʌ bʌ an i cha'an jini am bʌ cabʌl chʌ bʌ an i cha'an.

Chol: I T’an Dios

⁵³ Tsi' lajmesʌbeyob i wi'ñal jini wi'ñayo' bʌ yic'ot cabʌl chuqui tac wen. To'ol che jach tsi' choco majlel jini wen chumulo' bʌ.

Lucas 1:53 Iomraidhean Croise

Salmos 146:7

Mi' mel ti toj jini tic'lʌbilo' bʌ. Mi' yʌq'ueñob i waj jini año' bʌ i wi'ñal. Lac Yum mi' yʌc' ti colel jini ñup'ulo' bʌ.

Salmos 34:10

Jini alʌ bajlum mi' yubin wi'ñal. Mach che'ic jini mu' bʌ i sajcan lac Yum. Mi caj i taj pejtel chuqui tac wen.

Ezequiel 34:29

Mi caj cʌq'ueñob juntejc Ac' mu' bʌ caj i q'uelob ti ñuc. Ma'anix mi caj i chʌn jilelob ti wi'ñal ila ti pañimil. Ma'anix mi caj i chʌn ubiñob quisin ti' tojlel winicob ti pañimil.

Mateo 5:6

Tijicñayob jini año' bʌ i wi'ñal i pusic'al yic'ot i tiquin ti' cha'an chuqui toj, come mi caj i bujt'esʌntelob i pusic'al.

Lucas 1:54

Tsi' colta israelob, i winicob, cha'an c'ajal i cha'an bajche' yom i p'untañob,

Lucas 6:21

Tijicñayetla mu' bʌ la' wubin wi'ñal wʌle, come mi caj la' ñaj'an. Tijicñayetla mu' bʌ la' cha'len uq'uel, come mi caj la' cha'len tse'ñal.

Lucas 6:24

Mi caj la' taj wocol wen chumulet bʌ la, come tsa'ix la' taja la' chobejtʌbal.

Juan 6:35

Jesús tsi' subeyob: Joñon Wajon mu' bʌ i yʌq'ueñetla la' cuxtʌlel. Jini mu' bʌ i tsajcañon ma'anic ba' ora mi caj i yubin wi'ñal. Jini mu' bʌ i ñopon ma'anic ba' ora mi caj i tiquin i ti'.

1 Corintios 1:26

Come ña'tanla, hermanojob, bajche' tsa' pʌjyiyetla. Ma'anic cabʌl ñuco' bʌ am bʌ cabʌl i ña'tʌbal ti la' tojlel. Ma'anic cabʌl p'ʌtʌlo' bʌ, mi cabʌl yumʌlob.

1 Corintios 4:8

Mi la' lon al jasʌlix la' cʌntesʌntel ti Dios, cabʌlix la' ña'tʌbal. Che' mach ya'ic añon lojon la' wic'ot mi la' lon mel la' bʌ che' bajche' reyetla. Uts'at, aja reyeticla cha'an temel mi lac cha'len rey.

1 Samuel 2:5

Jini año' bʌ i chubʌ'an ti yambʌ ora woliyobix ti majtan e'tel cha'an mi' tajob i bʌlob i ñʌc'. Tsa'ix lajmiyob i wi'ñal jini wi'ñayo' bʌ. Jini mach bʌ anic i yalobil tsa'ix i meq'ue wuctiquil i yalobil. Jini cabʌlo' bʌ i yalobil i bajñel jax woli' cʌytʌlob.