TITO 3:1 - Chatino Zona Alta Occidental

¹ Kwaꞌuu ꞌin neꞌ taꞌa wan nu ndiꞌin chaꞌ ꞌin Jesucristo chaꞌ tukwa neꞌ chaꞌ nu nchkwiꞌ nchga nu nduun loo la ꞌin neꞌ, nchga neꞌ wsiya; ndiꞌin chaꞌ tukwa neꞌ nchga loo tñan suꞌwe nu kulo neꞌ kanꞌ ꞌin neꞌ.

TITO 3:1 Iomraidhean Croise

SAN MATEO 22:21

―Nin ree tlyu nu ndiꞌin xka laꞌa tsuꞌ, kanꞌ ngaꞌan chunꞌ tñi kwa ―ndukwin neꞌ bra kanꞌ. ―Suꞌwe ―ndukwin Jesús bra kanꞌ―, ta wan tñi nu ndiꞌin chaꞌ ta wan ꞌin ree tlyu kanꞌ sikwa; kwiꞌ ngwañaꞌan, ta wan ꞌin Ndiose nchga nan nu ndiꞌin chaꞌ ta wan ꞌin Ni.

1 CORINTIOS 15:58

ꞌWan taꞌa msñian chaꞌ ꞌin Jesús, suꞌwe ꞌa nka tiyeěn ñaꞌaǎn ꞌwan. Nde lka chaꞌ nu nchkwiǐnꞌ loꞌo wan, chaꞌ ñaꞌan ti xñi suꞌwe wan chaꞌ ꞌin Ndiose, nchga tsan lye la tsaa ñaꞌan tiꞌ wan ꞌin Ni; xkwiꞌ lye ꞌa kuꞌni wan tñan ꞌin ykwiꞌ Xꞌnaan, loꞌo ja ka ndaja tiꞌ wan chaꞌ kuꞌni wan tñan kanꞌ. Wa jlyo tiꞌ wan chaꞌ ja tsaa tii ngwa ti ñaꞌan ska tñan nu ngiꞌni wan chabiyaꞌ ꞌin Ndiose.

EFESIOS 2:10

Ndiose ngwiñan Ni ꞌñaan taꞌaan, kwiꞌ Ni yꞌni suꞌwa Ni chaꞌ ꞌñaan loꞌo Jesucristo; loꞌo ni, nchka tiꞌ Ni chaꞌ xkwiꞌ chaꞌ suꞌwe ti kuꞌnian xa nu tyiꞌian lo chalyuu, chaꞌ wa lka nda Ni ska tñan suꞌwe nu ka kuꞌnian kwenta skaan lo chalyuu re.

FILIPENSES 1:11

Kaꞌan ꞌa chaꞌ suꞌwe ka kuꞌni wan nchga seꞌen ndiꞌin wan lo chalyuu chunꞌ Jesucristo, chaꞌ ngiꞌni Krixtu tñan niꞌ kasiya ꞌwan; kanꞌ chaꞌ ka kuꞌni tnun wan ꞌin Ndiose, bra nu tyuꞌwi tiꞌ wan chaꞌ tnun nu ngiꞌni Ni.

COLOSENSES 1:10

Kanꞌ chaꞌ nchga tsan nu ndiꞌin wan lo chalyuu ka kuꞌni wan tñan, ti kwiꞌ tñan nu nchka tiꞌ Ndiose chaꞌ kuꞌni wan; ka kuꞌni wan nchga lo tñan nu suꞌwe chaꞌ ꞌin Ndiose bra kanꞌ, ka ka biyaꞌ la tiꞌ wan sa ñaꞌan ndiꞌin nchga chaꞌ ꞌin Ni.

1 TIMOTEO 2:2

Ndiꞌin chaꞌ chkwianꞌ loꞌo Ndiose chaꞌ ꞌin nchga neꞌ nu nka ndloo, chaꞌ ꞌin nchga neꞌ nu nka tñan; jñan wan ꞌin Ni chaꞌ kuꞌni Ni chaꞌ tiin ti tyiꞌian, chaꞌ ja xuun neꞌ nu nka ndloo loꞌoan, chaꞌ ta neꞌ kanꞌ chabiyaꞌ kuꞌnian nchga loo chaꞌ suꞌwe, sa ñaꞌan nu nchka tiꞌ Ndiose chaꞌ kuꞌnian.

1 TIMOTEO 4:6

Loꞌo nuꞌwin Timu, kwaꞌuu nchga chaꞌ nu ndaꞌaǎn lo kityi re ꞌin taꞌa nten ꞌin Jesucristo nde kwa, chaꞌ ka nuꞌwin ska nten nu suꞌwe ꞌa ngiꞌni tñan ꞌin Jesucristo. Tyuꞌwi suꞌwe tiiꞌ nchga chaꞌ nu wa msñii, kwiꞌ chaꞌ ꞌin Ndiose; loꞌo ti xñii suꞌwe tuwiin ꞌin Xꞌnaan bra kanꞌ, sa ñaꞌan nu ngiꞌnii ni.

1 TIMOTEO 5:10

Kwaꞌan neꞌ nin neꞌ kula nu chkwiꞌ nten chaꞌ ꞌin neꞌ chaꞌ suꞌwe ꞌa tñan ngiꞌni neꞌ: si wa yꞌni kuꞌu suꞌwe neꞌ ꞌin nu lyuꞌ sñiꞌ neꞌ; si wa mda neꞌ seꞌen ndiꞌin neꞌ xka kichen nu mdiyan naꞌan tyi neꞌ; si wa mdayaꞌ neꞌ ꞌin taꞌa nten ꞌin Jesucristo, ni siya lye tñan mskeꞌ tiꞌ neꞌ; si ngwa tꞌnan tiꞌ neꞌ ꞌin nten nu tiꞌí tiꞌ ꞌin neꞌ. Si ngwañaꞌan xkwiꞌ tñan suꞌwe wa yꞌni neꞌ kula kanꞌ, kwaꞌan yu nin neꞌ lo kityi kanꞌ sikwa.

2 TIMOTEO 1:6

Chkwiǐnꞌ ska chaꞌ loꞌoo ni: Xñii suꞌwe kwenta ꞌin chaꞌ suꞌwe nu wa nda Ndiose ꞌiin ti bra nu mstyaǎn yaǎnꞌ kee, chaꞌ kaa kuꞌnii tñan chaꞌ ꞌin nu nka Xꞌnaan.

2 TIMOTEO 2:14

Taꞌa ti chkwiiꞌ loꞌo neꞌ chaꞌ tukwa neꞌ nchga chaꞌ nu ndaꞌaǎn re. Wa jlyo tiꞌ Xꞌnaan nchga tñan nu ngiꞌni skaa neꞌ, kanꞌ chaꞌ kuloo tñan chaꞌ ja chkwiꞌ neꞌ kaꞌan ꞌa chaꞌ loꞌo taꞌa neꞌ chaꞌ ꞌin ya ñaꞌan ti kwentu nu nchkwiꞌ nten. Ja suꞌwe siyaꞌ ti ngwañaꞌan, chaꞌ lye ꞌa xtiyaaꞌ chaꞌ nu nsuꞌwi ke nten nu kunan chaꞌ kanꞌ.

2 TIMOTEO 2:21

Ñaꞌan tiꞌ nan nu nnanjoꞌo niꞌ ñaꞌan kiiꞌ, ngwañaꞌan lka nten ꞌin Jesucristo; nxkeꞌ tiǎnꞌ chaꞌ nduwe tiꞌ Xꞌnaan ꞌñaan sa ñaꞌan nu nduwe tiꞌ xꞌnan naꞌan ꞌin kaꞌnan ꞌin yu, nu kaꞌan ꞌa ngaꞌan. Loꞌo ja ka kuꞌnian tñan suꞌwe kanꞌ si ja luwi kasiya ꞌñaan; kanꞌ chaꞌ ndiꞌin chaꞌ kulaa yaanꞌ nchga chaꞌ kuxi chaꞌ ka luwi kasiya ꞌñaan, chaꞌ ska ti tñan nu nda Ndiose ꞌñaan ka kuꞌnian bra kanꞌ.

TITO 1:16

Nten ꞌin Ndiose lka neꞌ kanꞌ, ndukwin neꞌ, loꞌo ja siyaꞌ ngiꞌni neꞌ tñan nu nchka tiꞌ Ndiose; kanꞌ chaꞌ ka biyaꞌ tianꞌ chaꞌ kwiñi neꞌ kanꞌ. Kuxi ꞌa ngiꞌni neꞌ, chunꞌ ja xlyaa neꞌ tukwa neꞌ chaꞌ nu ñi; kwiꞌ ngwañaꞌan, ja ska ꞌa chaꞌ suꞌwe ka kuꞌni neꞌ kanꞌ siyaꞌ ti.

TITO 2:14

Bra nu mda Jesús chabiyaꞌ yjwi neꞌ ꞌin yu, chaꞌ ka tyoꞌo laan ꞌin chaꞌ kuxi. Ngwañaꞌan yꞌni luwi yu niꞌ kasiya ꞌñaan chaꞌ kaan nten ꞌin Ni, chaꞌ xlyaan kuꞌnian xkwiꞌ chaꞌ suꞌwe bra kanꞌ.

TITO 3:14

Ndiꞌin chaꞌ kuꞌni xaꞌan nchga nten ꞌin Jesucristo nde kwa, chaꞌ kuꞌni neꞌ nchga chaꞌ suꞌwe, chaꞌ ka tayaꞌ neꞌ ꞌin taꞌa nten neꞌ nu lyiji chinꞌ nan ꞌin. Ja suꞌwe si xkwiꞌ chaꞌ ndaja ti tiꞌ neꞌ taꞌaan ndiꞌin neꞌ lo chalyuu.

TITO 3:8

Ndiꞌin chaꞌ xñi suꞌwe wan chaꞌ nu ñi nu ndaꞌaǎn lo kityi re, kanꞌ chaꞌ lye chkwiiꞌ chaꞌ re loꞌo nchga nten nu msñi chaꞌ ꞌin Ndiose la kwa, chaꞌ xkwiꞌ chaꞌ suꞌwe kuꞌni wan bra kanꞌ. Suꞌwe ꞌa chaꞌ nu ñi re, ka kunanjoꞌo chaꞌ kanꞌ ꞌin ya ñaꞌan ti nten.

HEBREOS 13:21

Ndiose yꞌni chaꞌ tiin ti tyiꞌin kasiya ꞌñaan lo chalyuu, loꞌo ni, nchka tiǎnꞌ chaꞌ suꞌwa yaꞌ Ni ꞌwan nchga seꞌen lyiji ꞌwan, chaꞌ ka kuꞌni wan nchga tñan, sa ñaꞌan tñan nu nchka tiꞌ Ni chaꞌ kuꞌni wan. Loꞌo nchka tiǎnꞌ chaꞌ kuꞌni Ni loꞌoan nchga nan nu suꞌwe la nka tiye Ni, chabiyaꞌ ꞌin Jesucristo. Loꞌo ngwañaꞌan nan, ja tsaa tii ꞌa chaꞌ kuꞌniin tnuan ꞌin Krixtu. ¡Ngwañaꞌan ka sikwa!

2 SAN PEDRO 1:12

Ti tyun yaꞌ nka tiyeěn chkwiǐnꞌ loꞌo wan chaꞌ ꞌin nchga chaꞌ nu ñi ꞌin Ndiose, ni siya wa jlyo tiꞌ wan chaꞌ kanꞌ. Loꞌo ngwañaꞌan, jlyo tiǎnꞌ chaꞌ wa msñi suꞌwe wan nchga chaꞌ nu ngwaꞌaǎn lo kityi.

SAN JUDAS 1:5

Wa jlyo tiꞌ wan nchga chaꞌ nu ndukwa lo kityi ꞌin Ndiose nu ngwa sꞌni, loꞌo ni, katsaǎnꞌ chinꞌ chaꞌ kanꞌ ꞌwan xiyaꞌ. Wa ngulaa Xꞌnaan ꞌin ayman kula ꞌin neꞌ Israel, bra nu mdiꞌin neꞌ presu la lo yuu ꞌin Egipto; loꞌo chunꞌ ndiꞌin la yjwi Ndiose ꞌin nchga ayman kanꞌ nu ja ynan chaꞌ nu ykwiꞌ Ni.