SAN LUCAS 11:31 - Chatino Zona Alta Occidental

³¹ Wa lka ndiꞌin nu tiꞌí ꞌwan nten chalyuu nde seꞌen ndiꞌin Ndiose bra wa mdyii chalyuu, siꞌya chaꞌ kuxi nu ngiꞌni wan; bra kanꞌ tyoꞌo tukwa ska ayman nu ngwa reina nu ngwa ndloo lo chalyuu nu ngwa sꞌni, chaꞌ xtya kiꞌya ꞌwan seꞌen ndiꞌin Ndiose. Bra kanꞌ chkwiꞌ neꞌ kula kanꞌ sa ñaꞌan ngwa bra nu yaa ykwiꞌ neꞌ kula kanꞌ loꞌo ayman ree Salomón. Tijyuꞌ ꞌa kichen tyi reina kanꞌ, bra kanꞌ wa ynan chaꞌ tiya ꞌa ree Salomón chaꞌ nchkwiꞌ yu loꞌo nten; kanꞌ chaꞌ mdiya reina seꞌen ndiꞌin ree kanꞌ bra kanꞌ, chaꞌ kunan chaꞌ tiya nu nchkwiꞌ ree kanꞌ. Loꞌo ꞌwan ni, ja xlyaa wan kunan wan chaꞌ ꞌin Ndiose. Tnun la tñan ngiꞌni Ndiose ni, chaꞌ ndiꞌiǐn lo chalyuu; chinꞌ la chaꞌ ngwa ꞌin ayman ree Salomón nu ngwa sꞌni.

SAN LUCAS 11:31 Iomraidhean Croise

SAN MATEO 12:42

Loꞌo ayman reina nu ngwa ndloo la ꞌin neꞌ nde Sur, tyituun nu kunaꞌan kanꞌ tloo Ndiose tsan nu kuꞌni biyaꞌ Ni ꞌin nten chalyuu. Xtya nu kunaꞌan kanꞌ kiꞌya ꞌwan nu ndiꞌin wan lo chalyuu ni bra kanꞌ. Chkwiꞌ neꞌ kula kanꞌ sa ñaꞌan ngwa bra nu yaa seꞌen mdiꞌin ayman ree Salomón. Tijyuꞌ ꞌa kichen tyi reina kanꞌ; wa ynan neꞌ kula chaꞌ tiya ꞌa Salomón kanꞌ, chaꞌ suꞌwe ꞌa chaꞌ tiya nu nchkwiꞌ yu. Kanꞌ chaꞌ yaa neꞌ kula kanꞌ seꞌen mdiꞌin ree chaꞌ kunan ni sa ñaꞌan chaꞌ tiya nu nsuꞌwi ꞌin yu kula kanꞌ. Loꞌo chinꞌ la chaꞌ ngwaꞌu ayman Salomón ke chaꞌ nu nduꞌuǔn ꞌwan ni; tnun la chaꞌ ꞌin Ndiose lka nu nduꞌuǔn ꞌwan ni, loꞌo ja nnan wan siyaꞌ ti.

SAN LUCAS 3:22

Ngwiꞌya Tyiꞌi Ndiose seꞌen ndiꞌin Jesús; sa ñaꞌan ndukwi ska kiñi cha kuun, ngwañaꞌan ngwiꞌya Tyiꞌi Ndiose lo jlyuꞌwe Jesús. Bra kanꞌ ynan neꞌ ykwiꞌ Ndiose nde niꞌ kwan: ―Sñiěnꞌ, suꞌwe ꞌa nka tiyeěn ñaꞌaǎn ꞌiin. Ndiya ꞌa tiǎnꞌ ꞌiin ―ndukwin Ndiose ꞌin Jesús.

SAN LUCAS 9:35

Bra kanꞌ ynen tyiꞌi ska nten, bra ti ngwa biyaꞌ tiꞌ neꞌ chaꞌ Ndiose lka nu nchkwiꞌ laja koo kanꞌ: ―Ti kwiꞌ yu re lka Sñiěnꞌ; ndiya ꞌa tiǎnꞌ ꞌin yu ―ndukwin Ni―. Seen tyuun wan chaꞌ kunan wan nchga chaꞌ nu chkwiꞌ yu re loꞌo wan ―ndukwin Ni.

ROMANOS 2:27

Chañi chaꞌ ja nsiꞌyu neꞌ kanꞌ kijin sa ñaꞌan nu nsiꞌyu neꞌ judío kijin; ja nsuꞌwi chaꞌ kanꞌ ꞌin neꞌ, chaꞌ neꞌ xka laꞌa tsuꞌ lka neꞌ. Loꞌo ni, si kuꞌni neꞌ kanꞌ nchga tñan nu nchka tiꞌ Ndiose chaꞌ kuꞌni neꞌ, ta neꞌ chaꞌ jyuꞌu ꞌwan neꞌ judío, chunꞌ ja ndukwa wan chaꞌ kanꞌ, ni siya wa ynan wan nchga chaꞌ nu ñi ꞌin Ndiose, ni siya wa msiꞌyu wan kijin wan.

HEBREOS 11:7

Yaa ñaꞌan tiꞌ ayman Noé ꞌin Ndiose, kanꞌ chaꞌ ynan yu chaꞌ nu ykwiꞌ Ni loꞌo yu, bra nu ykwiꞌ Ni sa ñaꞌan ka chaꞌ kuxi nu wa ndijyan ti lo chalyuu, ni siya ja mgii ꞌa tiꞌ Noé sa ñaꞌan ka chaꞌ kanꞌ. Msñi yu chaꞌ ꞌin Ndiose, loꞌo ngwiñan yu ska yka naꞌan seꞌen tyiꞌin yu loꞌo nchga taꞌa ndiꞌin yu bra kanꞌ; ngwañaꞌan ngwa chaꞌ wa lka ti neꞌ kanꞌ mdoꞌo laa neꞌ ꞌin tyoo tlya kanꞌ bra kanꞌ. Jlyo tianꞌ ni, chaꞌ kuxi ꞌa ngwa chalyuu kula kanꞌ; ska ti Noé yaa ñaꞌan tiꞌ yu chaꞌ nu ykwiꞌ Ndiose loꞌo yu, kanꞌ chaꞌ yꞌni Ni chaꞌ suꞌwe ꞌa nganun kasiya ꞌin yu bra kanꞌ.