SAN JUAN 3:5 - Chatino Zona Alta Occidental

^5-6 ―Chañi chaꞌ nu chkwiǐnꞌ loꞌoo ni ―ndukwin Jesús―. Nten lka nu ndlya xa nu yꞌni kala nten chalyuu ꞌin neꞌ, loꞌo Tyiꞌi Ndiose lka nu ngiꞌni chaꞌ xaꞌan kasiya ꞌin nten ―ndukwin Jesús―. Ndiꞌin chaꞌ ka kwi kasiya ꞌwan si nchka tiꞌ wan chaꞌ kulo Ndiose tñan niꞌ kasiya ꞌwan. Ndiꞌin chaꞌ xuꞌwi wan lo tyiꞌa, kwiꞌ ngwañaꞌan ndiꞌin chaꞌ kanun Tyiꞌi Ndiose niꞌ kasiya ꞌwan ―ndukwin Jesús ꞌin Nicodemo―.

SAN JUAN 3:5 Iomraidhean Croise

SAN MATEO 18:3

―Chañi chaꞌ nchkwiǐnꞌ loꞌo wan ―ndukwin Jesús ꞌin neꞌ―, chaꞌ ja ka sten wan chaꞌ ꞌin Ndiose chaꞌ ka Ndiose ndloo niꞌ kasiya ꞌwan bra nu ja ya xaꞌan chaꞌ tiye wan; ndiꞌin chaꞌ ka tiye wan sa ñaꞌan lka tiye nu xuwe ti re, chaꞌ ja ngiꞌni siyeꞌ nu xuwe.

SAN MATEO 19:24

Sa la tñan tyijin ska ꞌni kiyaꞌ kuxa, ni siya ska ꞌni tnun ñaꞌan tiꞌ ska camello; sa la chaꞌ kanꞌ, loꞌo tukwi la kala ska neꞌ kuliyaꞌ seꞌen lka Ndiose ndloo.

SAN MATEO 21:31

¿Ni sa ñaꞌan xkeꞌ tiꞌ wan ni? Taꞌa tyukwaa yu kuneꞌ kanꞌ ni, ¿ti lka ska nu yꞌni tñan nu ngulo sti ꞌin a? ―Sñiꞌ yu nu kula la, kanꞌ nu yꞌni tñan kanꞌ ―ndukwin neꞌ ꞌin Jesús bra kanꞌ. ―Chañi chaꞌ ꞌwan ―ndukwin Jesús ꞌin neꞌ―. Loꞌo chañi chaꞌ nu nchkwiǐnꞌ loꞌo wan ni, chaꞌ ndiya neꞌ kuxi, ñaꞌan tiꞌ msu ꞌin neꞌ xka laꞌa tsuꞌ nu kwiñi ti ndlo kaꞌan ꞌa tñi ꞌin nten, ndiya neꞌ kanꞌ nu ndla la sten chaꞌ ꞌin Ndiose, chaꞌ ka Ni ndloo la niꞌ kasiya ꞌin neꞌ; kwiꞌ ndiya nu kunaꞌan calle ti nu ndla la sten chaꞌ ꞌin Ndiose, chaꞌ ka Ndiose ndloo la niꞌ kasiya ꞌin neꞌ. Loꞌo ꞌwan ni, tiyaꞌ la kala wan seꞌen ndiꞌin Ndiose.

SAN MATEO 28:19

Yaa wan nchga kichen lo chalyuu chaꞌ kuꞌni xaꞌan nchga nten chaꞌ ꞌñaǎn. Kwiꞌ tukwatya wan ꞌin neꞌ chabiyaꞌ ꞌin Stiǐn Ndiose, ngwañaꞌan chabiyaꞌ nu ndiꞌin ꞌñaǎn chaꞌ lkaǎn Sñiꞌ Ni, kwiꞌ ngwañaꞌan chabiyaꞌ ꞌin Tyiꞌi Ndiose tukwatya wan ꞌin neꞌ bra kanꞌ.

SAN MATEO 3:11

Loꞌoǔn ni, ndukwatyaǎn ꞌwan loꞌo tyiꞌa chku re, si chañi chaꞌ wa ngwa jyuꞌu tiꞌ wan ꞌin kiꞌya nu ndukwi wan; loꞌo wa kan ti xka nu tnun la chaꞌ nchka ꞌin ke naꞌ. Loꞌoǔn, kuꞌni tnuǔn ꞌin yu kanꞌ; suꞌwe ꞌa ka tiyeěn, ni siya xtiǐnꞌ tiǎn ti ndukwa snan yu kanꞌ. Loꞌo yu kanꞌ ni, ja tukwatya yu ꞌin nten loꞌo tyiꞌa ti; kuꞌni yu chaꞌ kanun Tyiꞌi Ndiose niꞌ kasiya ꞌin nten xa nu tukwatya yu ꞌin neꞌ. Kwiꞌ ngwañaꞌan, kuꞌni luwi yu kasiya ꞌin neꞌ loꞌo xaa ꞌin yu.

SAN MATEO 5:20

Nde ndiya chaꞌ nu chkwiǐnꞌ loꞌo wan ni: Chaꞌ kaja chalyuu nu ja tsaa tii ꞌa ꞌwan, ndiꞌin chaꞌ ka suꞌwe la tñan nu kuꞌni wan, siꞌi sa ñaꞌan nu ngiꞌni neꞌ kti kwa, neꞌ fariseo kwa loꞌo mstru nu nduꞌu chaꞌ joꞌo kwa.

SAN MARCOS 10:14

Bra nu naꞌan Jesús sa ñaꞌan nu ngiꞌni neꞌ nu ngiꞌni xaꞌan chaꞌ ꞌin yu, ja mdiya tiꞌ yu chaꞌ ngiꞌni neꞌ ngwañaꞌan: ―Ta wan chabiyaꞌ ꞌin nu xuwe chaꞌ kan neꞌ seꞌen ndiꞌiǐn ―ndukwin Jesús ꞌin neꞌ kanꞌ―. Ja chkwiꞌ wan loꞌo nu xuwe kanꞌ chaꞌ ja kan neꞌ seꞌen ndiꞌiǐn. Sa ñaꞌan lka chaꞌ ndyaa ñaꞌan tiꞌ nu xuwe ꞌin sti neꞌ, kwiꞌ ngwañaꞌan ndiꞌin chaꞌ tsaa ñaꞌan tiꞌ nten ꞌin Ndiose, chaꞌ ka Ni ndloo niꞌ kasiya ꞌin neꞌ bra kanꞌ.

SAN MARCOS 16:16

Xa nu sten nten chaꞌ ꞌñaǎn, tyukwatya neꞌ chabiyaꞌ ꞌñaǎn bra kanꞌ, tyoꞌo laa neꞌ kanꞌ ꞌin chaꞌ kuxi bra kanꞌ. Nten nu ja xlyaa sten chaꞌ ꞌñaǎn siyaꞌ ti, kanun kiꞌya ꞌin neꞌ bra kanꞌ.

SAN MARCOS 9:47

Ti kwiꞌ ti chaꞌ, ndiya ꞌa tiꞌ wan ska chaꞌ kuxi nu ñaꞌan wan, kanꞌ chaꞌ ndiꞌin chaꞌ kulaa yaꞌ wan ꞌin chaꞌ kuxi kanꞌ siyaꞌ ti, sa ñaꞌan si nan kulo wan ꞌin kiloo ykwiꞌ wan. Suꞌwe la tyisnan Ndiose kulo Ni tñan niꞌ kasiya ꞌwan, ni siya ja loꞌo chaꞌ kuxi kanꞌ nu ndloo ꞌa ꞌwan, chaꞌ ja kala wan seꞌen kuxi ꞌa nde lo jwlyaa bra kanꞌ.

SAN LUCAS 13:24

―Lti ti tunaꞌan seꞌen sten wan la kanꞌ, kanꞌ chaꞌ kuꞌni lya wan chaꞌ tyija tuwiin ꞌwan nu kala nde tunaꞌan kanꞌ. Nde lka chaꞌ nu chkwiǐnꞌ loꞌo wan, chaꞌ kaꞌan ꞌa nten ndiꞌin nu nchkwiꞌ chaꞌ wa sten ti neꞌ tunaꞌan kanꞌ, loꞌo ya ñaꞌan ti ngiꞌni neꞌ kanꞌ ndiꞌin neꞌ lo chalyuu, kanꞌ chaꞌ ja nchka tyija lyo ꞌin neꞌ siyaꞌ ti sa ñaꞌan ka nu sten neꞌ tunaꞌan kanꞌ.

SAN LUCAS 13:3

siꞌi nan kuxi la yꞌni neꞌ kanꞌ. Kwiꞌ ngwañaꞌan ꞌwan ni, si ja ka jyuꞌu tiꞌ wan ꞌin nchga chaꞌ kuxi nu ngiꞌni wan, chaꞌ kulaa yaꞌ wan chaꞌ kuxi kanꞌ, ti kwiꞌ ti chaꞌ, ndukwa chaꞌ kaja wan bra kanꞌ ―ndukwin Jesús ꞌin neꞌ―.

SAN LUCAS 13:5

siꞌi nan kuxi la yꞌni neꞌ kanꞌ. Kwiꞌ ngwañaꞌan ꞌwan ni, si ja ka jyuꞌu tiꞌ wan ꞌin nchga chaꞌ kuxi nu ngiꞌni wan, chaꞌ kulaa yaꞌ wan chaꞌ kanꞌ, ti kwiꞌ ti chaꞌ, ndiꞌin chaꞌ kaja wan.

SAN JUAN 1:13

Loꞌo nten nu lka sñiꞌ Ndiose ni, ja ndlya neꞌ kanꞌ sa ñaꞌan nu ndlya nchga sñiꞌ nten; sñiꞌ Ndiose lka neꞌ kanꞌ, siꞌi ska nten chalyuu lka nu yꞌni kwi kasiya ꞌin neꞌ kanꞌ.

SAN JUAN 3:3

Ykwiꞌ Jesús loꞌo yu bra kanꞌ: ―Chañi ꞌa chaꞌ nu nchkwiǐnꞌ loꞌoo ni, chaꞌ ngiꞌni Stiǐn Ndiose chaꞌ kala nten xiyaꞌ, xa nu xlyaa neꞌ sten neꞌ chaꞌ ꞌin Ndiose, chaꞌ ka Ni ndloo niꞌ kasiya ꞌin neꞌ ―ndukwin Jesús.

SAN JUAN 3:4

―¿Ni sa ñaꞌan ka kalaan xiyaꞌ xa nu wa msuanꞌ? ―ndukwin Nicodemo ꞌin Jesús―. ¿Ta ka stean niꞌ jyaꞌaan xiyaꞌ a?, chaꞌ xiyaꞌ kalaan ―ndukwin yu.

LOS HECHOS 2:38

―Suꞌwe si ka jyuꞌu tiꞌ wan ꞌin chaꞌ kuxi; nchga chaꞌ kuxi nu nsuꞌwi tiye wan, kulo chunꞌ wan chaꞌ kuxi kanꞌ ―ndukwin Tyu ꞌin neꞌ―. Loꞌo ngwañaꞌan, tukwatya neꞌ ꞌwan chabiyaꞌ ꞌin Jesús bra kanꞌ. Katin nchga kiꞌya nu ndukwi wan bra kanꞌ; kwiꞌ ngwañaꞌan, ta Ndiose Tyiꞌi Ni chaꞌ kanun niꞌ kasiya ꞌwan.

LOS HECHOS 3:19

Kanꞌ chaꞌ ndiꞌin chaꞌ ka jyuꞌu tiꞌ wan ꞌin nchga kiꞌya nu ndukwi wan, bra kanꞌ jñan wan chaꞌ tlyu tiꞌ ꞌin Ndiose chaꞌ kuꞌni tyii Ni nchga chaꞌ kuxi nu nsuꞌwi tiye wan. Kuꞌni Xꞌnaan chaꞌ ka suꞌwe kasiya ꞌwan xiyaꞌ bra kanꞌ.

ROMANOS 14:17

Bra nu Ndiose lka ndloo la ꞌñaan, siꞌi ska nan nu nchkuan, ska nan nu koꞌoan nu ndloo la ꞌñaan; nu ndloo la ꞌñaan lka chaꞌ kanun Tyiꞌi Ndiose niꞌ kasiya ꞌñaan, chaꞌ ka suꞌwe kasiya ꞌñaan chabiyaꞌ ꞌin Jesús. Kanꞌ chaꞌ ka tyiꞌin tiin tian lo chalyuu, ka suꞌwe ka tiyean loꞌo Ndiose; nchga chaꞌ kanꞌ ka bra nu Ndiose ka ndloo la ꞌñaan.

ROMANOS 8:2

Bra nu lka Tyiꞌi Ndiose ndloo la ꞌñaan, bra kanꞌ kaja chalyuu kwi ꞌñaan chabiyaꞌ ꞌin Jesucristo, chaꞌ suꞌwa ndiꞌin chaꞌ ꞌñaan loꞌo Ni; wa ngulaa Ni ꞌñaan yaꞌ nu xaꞌan nu ngiꞌni chaꞌ kanaꞌ kasiya ꞌñaan.

1 CORINTIOS 15:50

ꞌWan taꞌa msñian chaꞌ ꞌin Krixtu, ndiya ska chaꞌ nu nchka tiǎnꞌ chkwiǐnꞌ loꞌo wan: Sa ñaꞌan nu ñaꞌan ti kunaanꞌ ni, ja ka xuꞌwi chaꞌ ꞌñaan loꞌo Ndiose bra nu kulo Ni tñan xa wa mdyii chalyuu; ja ka tsaan sa ñaꞌan nu ñaꞌan taan lo chalyuu kwi nu ka nde loo la, seꞌen nu ja ska nu tiꞌí nsuꞌwi siyaꞌ ti.

1 CORINTIOS 2:12

Siꞌi ska kwiꞌin xaꞌan nu ndiꞌin lo chalyuu ti lka Tyiꞌi nu wa nda Ndiose chaꞌ kanun niꞌ kasiya ꞌñaan ni; wa nda Ndiose Tyiꞌi Ni ꞌñaan, chunꞌ nu wa msñian chaꞌ ꞌin Ni. Kwiꞌ ngwañaꞌan loꞌo Tyiꞌi Ndiose ka biyaꞌ tianꞌ nchga tñan suꞌwe nu ngiꞌni Ni niꞌ kasiya ꞌñaan.

1 CORINTIOS 6:11

Kwiꞌ ngwañaꞌan, ndiya chinꞌ taꞌa wan nu yꞌni wan ti kwiꞌ taꞌa chaꞌ kuxi kanꞌ ti ngwa sꞌni; loꞌo xka ñaꞌan ngiꞌni wan ni, chaꞌ wa yꞌni tyii Jesús nchga kiꞌya nu ndukwi wan ti bra kanꞌ, loꞌo ni, wa yten wan chaꞌ ꞌin Ndiose bra kanꞌ. Wa ngwa suꞌwa chaꞌ ꞌwan loꞌo Ndiose chaꞌ wa msñi wan chaꞌ ꞌin Jesucristo nu nka Xꞌnaan, loꞌo wa nda Ndiose Tyiꞌi Ni chaꞌ xuꞌwi niꞌ kasiya ꞌwan.

GÁLATAS 6:15

Bra nu suꞌwa ndiꞌin chaꞌ ꞌñaan loꞌo Jesucristo, ja nꞌni ꞌa chaꞌ ni siya nkwaan, ni siya ja nkwaan, ska ti chaꞌ ꞌñaan loꞌo taꞌaan. Ska ti chaꞌ nu ndloo la ꞌñaan ni, chaꞌ xaꞌan Ni siyaꞌ ti nchga chaꞌ nu ngiꞌnian laja nu ndiꞌian lo chalyuu, chaꞌ xkwiꞌ chaꞌ suꞌwe kuꞌnian bra kanꞌ.

EFESIOS 5:26

Ngwa tiꞌ Jesús chaꞌ kunan nten nu xñi chaꞌ ꞌin Ni nchga chaꞌ nu nchkwiꞌ yu, kanꞌ chaꞌ ngujwi yu chaꞌ kaja ñaꞌan kuꞌni luwi Ni ꞌin neꞌ kanꞌ, chaꞌ ka kuꞌni tyii Ni kiꞌya nu ndiꞌin ꞌin neꞌ, chaꞌ ta Ni chalyuu kwi ꞌin neꞌ. Ngwañaꞌan yꞌni Jesús chaꞌ ska yaꞌ ti ka neꞌ kanꞌ nten ꞌin Ni. Loꞌo kanꞌ ka tukwatya nten ꞌin neꞌ kanꞌ chaꞌ ꞌin Jesús.

1 SAN PEDRO 1:2

Ti kulo, ngwa jlyo tiꞌ Ndiose Stian nchga chaꞌ nu ka nu ndyaa nde loo la, kanꞌ chaꞌ ngulo suwi Ni ꞌwan. Loꞌo ni, ngiꞌni Tyiꞌi Ni tñan chaꞌ kanun luwi kasiya ꞌwan, chaꞌ tukwa wan chaꞌ nu nchkwiꞌ Jesucristo; kwiꞌ nu wa ngujwi lo wsi siꞌya wan, ngalu tnen yu chaꞌ kaja ñaꞌan ka luwi niꞌ kasiya ꞌwan. Loꞌo ni, nchka tiǎnꞌ chaꞌ ti kuꞌni Ndiose chaꞌ suꞌwe loꞌo wan, kwiꞌ ngwañaꞌan ti kuꞌni Ni chaꞌ tiin ti tyiꞌin niꞌ kasiya ꞌwan nchga bra.

1 SAN PEDRO 3:21

Sa ñaꞌan nu ngulaa Ni ꞌin neꞌ nu mdiꞌin niꞌ yka naꞌan kanꞌ lo tyiꞌa nu ngwa sꞌni, chaꞌ mdukwa neꞌ kanꞌ chaꞌ nu ykwiꞌ Ni; ngwañaꞌan tyoꞌo laa wan ni, chaꞌ ndukwa wan chaꞌ nu nchkwiꞌ Ni. Wa ndyaa wan lo tyiꞌa chaꞌ tyukwatya wan. Siꞌi nan kata tian chku ndyoꞌo chaꞌ kanꞌ, siꞌi chaꞌ kuuꞌ kunaanꞌ, kanꞌ chaꞌ ndyukwatyaan. Nde ndiya sa ñaꞌan ndyoꞌo chaꞌ kanꞌ: Nan njñaan ꞌin Ndiose chaꞌ xnun luwi Ni kasiya ꞌñaan chunꞌ ndyuꞌu Jesucristo xiyaꞌ, kanꞌ chaꞌ ndyukwatyaan.

1 SAN JUAN 2:29

Wa nchka biyaꞌ tiꞌ wan ni, chaꞌ luwi ꞌa kasiya ꞌin Jesucristo, kanꞌ chaꞌ suꞌwe si ka biyaꞌ tiꞌ wan chaꞌ nchga nten nu kuꞌni chaꞌ suꞌwe sa ñaꞌan nu ngiꞌni Jesús, lka neꞌ kanꞌ sñiꞌ Ndiose.

1 SAN JUAN 5:1

Nchga nten nu ndyaa ñaꞌan tiꞌ ꞌin Jesús, chaꞌ lka Ni Krixtu nu wa msuꞌwa Ndiose ꞌin chaꞌ kan Ni lo chalyuu, chañi chaꞌ lka neꞌ sñiꞌ Ndiose. Ndiose lka Stian, loꞌo ngwañaꞌan suꞌwe ꞌa nka tiyean ñaꞌaan ꞌin Ni, kanꞌ chaꞌ suꞌwe ꞌa nka tiyean ñaꞌaan ꞌin xka ta sñiꞌ Ndiose, taꞌa msñian chaꞌ ꞌin Jesús.