EFESIOS 1:20 - Chatino Zona Alta Occidental

²⁰ ti kwiꞌ tñan tnun lka kanꞌ, sa ñaꞌan nu yꞌni Ni bra nu mda Ni Tyiꞌi Ni ngala niꞌ kasiya ꞌin Krixtu xiyaꞌ, chaꞌ ndyuꞌu yu xa nu ngujwi yu; chunꞌ ndiꞌin la ndyaa loꞌo Ni ꞌin yu chaꞌ ndyaa tukwa yu laꞌa seꞌen kwin ꞌin Ndiose Sti yu, xka chalyuu seꞌen nu suꞌwe la nde niꞌ kwan.

EFESIOS 1:20 Iomraidhean Croise

SAN MATEO 26:64

―Kwiǐnꞌ lkaǎn, sa ñaꞌan nu ndukwiin chaꞌ lkaǎn ―ndukwin Jesús bra kanꞌ―. Loꞌo xka chaꞌ katsaǎnꞌ ꞌwan ni, chaꞌ nde loo la ñaꞌan wan ꞌñaǎn xa nu tyukwaǎn laꞌa seꞌen kwin seꞌen ndukwa Stiǐn Ndiose, nu nchka ꞌin nchga tñan, naꞌ nu wa msuꞌwa Ni ꞌñaǎn ndijyaǎn chaꞌ kaǎn nten. Loꞌo ñaꞌan wan xa nu kaǎn xiyaꞌ laja ko bra kanꞌ.

SAN MATEO 28:18

Mdiyan Jesús kwiꞌ seꞌen la, ykwiꞌ loꞌo neꞌ bra kanꞌ: ―Wa mda Stiǐn Ndiose nchga chabiyaꞌ ꞌñaǎn chaꞌ lkaǎn ndloo ꞌin nchga nan, ni siya nchga nan nu nsuꞌwi seꞌen ndiꞌin Ni nde niꞌ kwan, ni siya nchga nan nu nsuꞌwi lo chalyuu ―ndukwin Jesús ꞌin neꞌ―.

SAN MARCOS 14:62

―Chañi chaꞌ nu ykwiꞌ wan, naꞌ lkaǎn nu kanꞌ ―ndukwin Jesús ꞌin neꞌ bra kanꞌ―. Kwiꞌ ngwañaꞌan, nde loo la ñaꞌan wan ꞌñaǎn nu wa msuꞌwa Ndiose ꞌñaǎn ndijyaǎn chaꞌ kaǎn nten; ñaꞌan wan ꞌñaǎn seꞌen tyukwaǎn laꞌa seꞌen kwin ꞌin Ndiose Stiǐn. Nchga tñan siyaꞌ ti nchka ꞌin Ndiose kuꞌni Ni. Loꞌo ñaꞌan wan ꞌñaǎn bra nu kaǎn xiyaꞌ laja koo nde niꞌ kwan bra kanꞌ.

SAN MARCOS 16:19

Bra wa mdyii ykwiꞌ Jesús nu lka Xꞌnaan, bra kanꞌ yꞌni Ndiose chaꞌ mchkwen yu ndyaa yu nde niꞌ kwan; ndyaa tukwa Jesús laꞌa seꞌen kwin ꞌin Ndiose la kanꞌ.

SAN JUAN 10:18

Ja tukwin ka kujwi ꞌñaǎn, ti ykwiǐnꞌ tiǎn xlyaǎn kajaǎn ―ndukwin Jesús―. Ka kuꞌniǐn ngwañaꞌan, chaꞌ wa nda Stiǐn Ndiose chabiyaꞌ kajaǎn; kwiꞌ ngwañaꞌan, nda Ni chabiyaꞌ chaꞌ tyuꞌuǔn xiyaꞌ.

SAN JUAN 10:30

Kwiꞌ ngwañaꞌan suꞌwa ndiꞌin chaꞌ ꞌin Stiǐn Ndiose loꞌoǔn ―ndukwin Jesús.

LOS HECHOS 10:40

Xa wa mdaꞌa snan tsan, bra kanꞌ yꞌni Ndiose chaꞌ ndyuꞌu Jesús xiyaꞌ.

LOS HECHOS 26:8

¿Ni chaꞌ ndiꞌin nten taꞌa wan re nu ja ndyaa ñaꞌan tiꞌ chaꞌ ka ꞌin Ndiose kuꞌni Ni chaꞌ tyuꞌu ayman xiyaꞌ? ―ndukwin Palyu―.

LOS HECHOS 4:10

Kunan suꞌwe wan chinꞌ sikwa. Chkwiǐnꞌ ska chaꞌ loꞌo wan loꞌo nchga nten lo yuu re, chaꞌ Jesucristo lka nu yꞌni chaꞌ nchkaa yu tiꞌí re. Ti kwiꞌ Jesús Nazaret nu yjwi wan lo wsi, kanꞌ lka nu yꞌni Ndiose chaꞌ ndyuꞌu xiyaꞌ xa wa ngujwi. Loꞌo Jesús kanꞌ mda chabiyaꞌ chaꞌ nchkaa yu re, kanꞌ chaꞌ nduun suꞌwe ti yu re ni.

LOS HECHOS 5:31

Nchka ꞌin Jesús kanꞌ kuꞌni tyii Ni chaꞌ kuxi nu ndiꞌin ꞌin nten chalyuu. Ska ti Jesús nka Xꞌnaan, kanꞌ chaꞌ laꞌa seꞌen kwin nde seꞌen ndukwa Ndiose, nda Ni seꞌen tyukwa Jesús. Wa yꞌni Ndiose ngwañaꞌan chaꞌ ka jyuꞌu tianꞌ chunꞌ kiꞌya nu ndiꞌin ꞌñaan, nan nu lkaan neꞌ Israel, loꞌo ngwañaꞌan kuꞌni Ndiose chaꞌ tlyu tiꞌ ꞌñaan bra kanꞌ.

ROMANOS 1:4

kwiꞌ ngwañaꞌan lka Jesús ska ti nu nka Sñiꞌ ykwiꞌ Ndiose. Nde ñaꞌan ka biyaꞌ suꞌwe tianꞌ chaꞌ kanꞌ: chabiyaꞌ ꞌin Ndiose Sti yu ndyuꞌu Jesús xiyaꞌ xa wa ngujwi yu, loꞌo tnun ꞌa tñan yꞌni Ndiose bra kanꞌ. Bra nu mda Ndiose Tyiꞌi ykwiꞌ ꞌin Jesús, bra kanꞌ ytsaꞌ Ni ꞌñaan chaꞌ Sñiꞌ ykwiꞌ Ndiose lka Jesús kanꞌ.

ROMANOS 8:34

Ja ndiya nu ka ta nu tiꞌí ꞌñaan bra kanꞌ, chaꞌ wa ngujwi Jesús chaꞌ ꞌñaan, wa ndyuꞌu Ni xiyaꞌ chaꞌ ꞌñaan. Loꞌo ni, ndukwa Krixtu laꞌa seꞌen kwin la seꞌen ndukwa Ndiose, njñan Ni chaꞌ tlyu tiꞌ ꞌin Ndiose Sti Ni chaꞌ ꞌñaan.

EFESIOS 1:3

Lye ꞌa tyaǎn xuꞌwe ꞌin Ndiose Stian, nu lka Sti Jesucristo nu nka Xꞌnaan. Wa ngwa suꞌwa chaꞌ ꞌñaan loꞌo Krixtu; kanꞌ chaꞌ loꞌo Ndiose, suꞌwe ꞌa nka tiye Ni ñaꞌan Ni ꞌñaan. Nchga loo chaꞌ suꞌwe nu ndiꞌin chaꞌ kaja ꞌñaan chaꞌ msñian chaꞌ ꞌin Jesucristo, wa mda Ni chaꞌ suꞌwe kanꞌ ꞌñaan loꞌo Krixtu.

FILIPENSES 3:10

Loꞌo ni, sa kanꞌ ti chaꞌ nchka tiǎnꞌ, chaꞌ xuꞌwi lyoǔn jiǐn ꞌin Krixtu, chaꞌ ka jlyo tiǎnꞌ chaꞌ ti ngiꞌni Ndiose tñan loꞌoǔn loꞌo ti kwiꞌ jwersa nu wa yuꞌwi ꞌin Ni bra nu yꞌni Ni chaꞌ ndyuꞌu Jesús xiyaꞌ. Ja nꞌni chaꞌ ni siya ngwañaꞌan tyijiǐn nu tiꞌí sa ñaꞌan nu wa mdijin Jesús nu tiꞌí, ni siya kanaꞌ chalyuu ꞌñaǎn kajaǎn sa ñaꞌan nu ngujwi Krixtu lo wsi.

COLOSENSES 1:16

Suꞌwa mdiꞌin Krixtu loꞌo Ndiose Sti Ni bra nu mdyisnan ndyaꞌ chalyuu, ni siya ndyaꞌ tyukwi ñaꞌaan niꞌ kwan, ni siya ndyaꞌ tyukwi ñaꞌaan lo chalyuu. Wa ngwiñan Ni nchga nan nu nchka ñaꞌaan lo chalyuu; loꞌo ngwiñan Ni nchga nan nu ja nchka ñaꞌaan, ñaꞌan tiꞌ nchga kwiꞌin nu nka ndloo nde niꞌ kwan; kwiꞌ ngwañaꞌan, wa ngwiñan Ni nchga xꞌnan nu kulo tñan ꞌin nten, ni siya lo chalyuu, ni siya nde niꞌ kwan. Loꞌo Krixtu kanꞌ ndyaꞌ nchga lo nan sikwa; ti kwiꞌ ti chaꞌ wa ndyaꞌ ran chaꞌ ka kuꞌni tnuun ꞌin Ni.

COLOSENSES 3:1

ꞌWan ni, wa mjwi xka chalyuu kwi ꞌwan chunꞌ wa ngwa suꞌwa chaꞌ ꞌwan loꞌo Krixtu; kanꞌ chaꞌ sikwa, lye tyaꞌan chaꞌ tiye wan nchga chaꞌ suꞌwe nu ndiꞌin ꞌin Krixtu, chaꞌ ndukwa Krixtu laꞌa seꞌen kwin ꞌin Ndiose.

HEBREOS 1:3

Nchga xaa tnun nu nsuꞌwi seꞌen ndiꞌin Ndiose nganun loꞌo Krixtu nu nka Sñiꞌ Ni xa nu mdiꞌin Ni lo chalyuu. Sa ñaꞌan lka Ndiose, kwiꞌ ngwañaꞌan lka Krixtu Ndiose; suꞌwe ꞌa ndlo Krixtu tñan ꞌin nchga chaꞌ nu ndiꞌin lo chalyuu siyaꞌ ti, kanꞌ chaꞌ suꞌwe ndiꞌin nchga nan bra kanꞌ. Bra wa mdyii yꞌni Krixtu tñan nu mdiꞌin chaꞌ kuꞌni Ni lo chalyuu re, chaꞌ yꞌni tyii Ni nchga kiꞌya nu ndukwi nten chalyuu, xiyaꞌ ndyaa Ni seꞌen ndiꞌin Ndiose Sti Ni, ndyaa tukwa Ni nde laꞌa seꞌen kwin seꞌen ndukwa Ndiose nde niꞌ kwan bra kanꞌ.

HEBREOS 10:12

Loꞌo Jesucristo ni, ska yaꞌ ti ngujwi yu lo wsi chaꞌ katin kiꞌya nu ndukwi nten. Ni siya chalyuu ni, ja ya tyii jwersa ꞌin tñan nu yꞌni yu. Chunꞌ ndiꞌin la mdoꞌo Jesús chalyuu re ndyaa yu nde niꞌ kwan, ndyaa tukwa yu laꞌa seꞌen kwin seꞌen ndukwa Ndiose Sti yu nde niꞌ kwan.

HEBREOS 13:20

Ndiose lka nu yꞌni tñan chaꞌ ndyuꞌu Jesucristo nu nka Xꞌnaan xiyaꞌ, xa wa ngujwi Ni. Loꞌo ni, lka Jesús ndloo la ti, chaꞌ kuꞌni Ni kwenta ꞌñaan nu lkaan nten ꞌin Ni, ñaꞌan tiꞌ si ngiꞌni Ni kwenta ꞌin slyaꞌ ꞌin Ni, chaꞌ ngujwi Ni chaꞌ ꞌñaan. Bra nu ngujwi Jesús ni, kanꞌ mskanꞌ Ni chaꞌ loꞌo nchga nten ꞌin Ni, ska chaꞌ kwi nu ja tsaa tii ꞌa siyaꞌ ti.

HEBREOS 2:9

Wa jlyo tianꞌ sa ñaꞌan ngwa ꞌin Jesús nu ngwa bra kanꞌ, chaꞌ chinꞌ ti bra ngwa angajle tnun la ꞌin ykwiꞌ yu. Ngujwi yu lo wsi siꞌya nchga nten chalyuu, chaꞌ xkwiꞌ kaꞌan ꞌa chaꞌ suꞌwe ngiꞌni Ndiose loꞌoan. Loꞌo ngwañaꞌan, nduwe ꞌa tianꞌ sa ñaꞌan nchka ꞌin Ni ni, chaꞌ lye ꞌa ngiꞌni tnun nten ꞌin Ni chaꞌ ngujwi Ni siꞌyaan, chaꞌ wa mdijin ꞌa Ni nu tiꞌí siꞌyaan.

1 SAN PEDRO 1:3

Kuꞌniin tnuan ꞌin Ndiose, ti kwiꞌ nu lka Sti Jesucristo nu nka Xꞌnaan. Nchka tꞌnan ꞌa tiꞌ Ni ꞌñaan, kanꞌ chaꞌ yꞌni kwi Ni kasiya ꞌñaan; loꞌo ni, nsuꞌwi chalyuu kwi ꞌñaan, chunꞌ chaꞌ ndyuꞌu Jesucristo xiyaꞌ xa wa ngujwi yu. Loꞌo ni, ndiꞌin taan ꞌaan chaꞌ kaja chalyuu nu ja tsaa tii ꞌa ꞌñaan,

EL APOCALIPSIS 1:17

Bra nu naꞌaǎn ꞌin Ni, mlyuǔn lyuu tloo Ni siyaꞌ ti bra kanꞌ; wa mdsoꞌo ꞌñaǎn ñaꞌan tiꞌ neꞌ ngujwi, chunꞌ nu ytseěn ꞌaǎn. Kanꞌ mstya Ni yaꞌ Ni laꞌa seꞌen kwin chuǔnꞌ, loꞌo nde ndiya chaꞌ nu ykwiꞌ Ni loꞌoǔn: ―Ja kutseen ―ndukwin Ni―. Ykwiǐnꞌ ndiꞌiǐn ti bra nu mdyisnan chalyuu, loꞌo ti kwiǐnꞌ ndiꞌiǐn bra nu tsaa tii chalyuu bra kanꞌ.