1 CORINTIOS 4:6 - Chatino Zona Alta Occidental

⁶ Nchkwiǐnꞌ chaꞌ kanꞌ loꞌo wan chaꞌ ka tyiꞌin wan suꞌwe ti. Nchkwiǐnꞌ ꞌaǎn chaꞌ ꞌwa taꞌa tyukwaa ba, naꞌ loꞌo Polo, chaꞌ ka biyaꞌ chinꞌ tiꞌ wan sa ñaꞌan ndiꞌin chaꞌ ꞌwa; ngwañaꞌan ka biyaꞌ tiꞌ wan chaꞌ ja suꞌwe xñi wan xka la chaꞌ, nu siꞌi chaꞌ nu ñi nu ndukwa lo kityi chaꞌ ꞌin Ndiose. Ja suꞌwe chaꞌ nchkwiꞌ suꞌwe wan loꞌo ska ti yu taꞌa ba nu ndaꞌan ñaꞌan ꞌa wan ꞌin yu, loꞌo chunꞌ ndiꞌin la kuꞌni wan chaꞌ xaꞌan loꞌo xka yu taꞌa ba.

1 CORINTIOS 4:6 Iomraidhean Croise

LOS HECHOS 18:24

Laja bra kanꞌ ngala xka yu kiꞌyu neꞌ judío kichen Efeso. Polo naan yu kanꞌ, Alejandría naan kichen tyi yu. Jlyo ꞌa tiꞌ yu nchga chaꞌ ꞌin Ndiose nu ngwaꞌan neꞌ lo kityi nu ngwa sꞌni la, loꞌo suꞌwe ꞌa nduꞌu yu chaꞌ ꞌin Ndiose ꞌin nten.

LOS HECHOS 19:1

Xa nu ti ndiꞌin Polo kichen Corinto, ti kwiꞌ bra ndyaa Palyu nde lo kiꞌya la, sa ñaꞌan yaꞌ ngala yu kichen Efeso. La kanꞌ ndyukwa taꞌa yu loꞌo chinꞌ neꞌ kichen nu ngiꞌni tnun ꞌin Ndiose ykwiꞌ.

ROMANOS 12:3

Tlyu ꞌa chaꞌ suꞌwe yꞌni Ndiose loꞌoǔn, bra nu mda Ni tñan re ꞌñaǎn; kanꞌ chaꞌ nchkwiǐnꞌ loꞌo wan ni, chaꞌ ja kuꞌni ꞌa siyeꞌ wan loꞌo xka ta nten. Nde ñaꞌan ndiꞌin chaꞌ tyaꞌan chaꞌ tiye wan chaꞌ ꞌin nchga tñan nu nchka ꞌwan ni; tyuꞌwi tiꞌ wan chaꞌ Krixtu yꞌni chaꞌ nchka ꞌwan kuꞌni wan tñan kanꞌ, chunꞌ nu msñi wan chaꞌ ꞌin Ni.

1 CORINTIOS 1:12

Ska ñaꞌan nchkwiꞌ wan kwenta ska wan. Ndiya ska ta neꞌ taꞌa wan nu nchkwiꞌ: “Bare, wa msñi ba chaꞌ ꞌin Palyu”; loꞌo xka ta neꞌ taꞌa wan nchkwiꞌ: “Nten ꞌin Polo lka bare”; kwiꞌ xka ta neꞌ taꞌa wan nchkwiꞌ: “Nten ꞌin Tyu lka bare”; loꞌo ndiya xka ta nten nu nchkwiꞌ: “Nten ꞌin Krixtu lka bare.”

1 CORINTIOS 1:19

Ndiya ska chaꞌ nu ndukwa lo kityi kula ꞌin Ndiose nu nchkwiꞌ: Kuꞌniǐn tyiǐn ꞌin nchga chaꞌ nu nchkwiꞌ nten nu tiya ꞌa, ndukwin Ndiose. Loꞌo ja kuꞌniǐn tnuǔn chaꞌ nu ndlo ke nten, ni siya suꞌwe ꞌa yꞌni xaꞌan neꞌ, ndukwin Ni.

1 CORINTIOS 1:31

Kanꞌ chaꞌ, sa ñaꞌan ndukwa chaꞌ lo kityi kula, ngwañaꞌan kuꞌnian: “Si nchka tianꞌ chkwianꞌ loꞌo xka ta nten ꞌin ska chaꞌ tnun nu wa yꞌnian, kanꞌ suꞌwe la si chkwianꞌ ꞌin chaꞌ tnun nu yꞌni ykwiꞌ Xꞌnaan bra kanꞌ.” Ngwañaꞌan nchkwiꞌ kityi kanꞌ.

1 CORINTIOS 13:4

Si chañi chaꞌ suꞌwe nka tiyean ñaꞌaan ꞌin nten, lye la taloan ꞌin neꞌ bra kanꞌ, chka tꞌnan tianꞌ ꞌin neꞌ bra kanꞌ; ja ndiꞌin chaꞌ tyijin chaꞌ ꞌñaan loꞌo neꞌ bra kanꞌ, ja ndiꞌin chaꞌ kuꞌni tukwa tianꞌ bra nu chkwianꞌ loꞌo neꞌ, ja ndiꞌin chaꞌ kuꞌni siyeanꞌ loꞌo neꞌ bra kanꞌ.

1 CORINTIOS 3:19

Ni siya nchkwiꞌ nten chalyuu chaꞌ nchka ꞌa ꞌin neꞌ, chaꞌ suꞌwe ꞌa chaꞌ nu ndaꞌan tiye neꞌ, siꞌi ngwañaꞌan nxkeꞌ tiꞌ Ndiose ñaꞌan Ni ꞌin neꞌ; ja suꞌwe siyaꞌ ti chaꞌ nu nchkwiꞌ nten chalyuu, nxkeꞌ tiꞌ Ni. Ndukwa ska chaꞌ lo kityi kula nu nchkwiꞌ chaꞌ: “Ngiꞌni Ndiose chaꞌ xtiyaaꞌ chaꞌ tiya nsuꞌwi ke nten chalyuu, ni siya tiya ꞌa neꞌ, nxkeꞌ tiꞌ neꞌ” ndukwin lo kityi kula kanꞌ.

1 CORINTIOS 3:21

Kanꞌ chaꞌ ja kuꞌni siyeꞌ wan loꞌo taꞌa wan chaꞌ ndyaa ñaꞌan ꞌa tiꞌ wan ꞌin ska ti nten taꞌa ba. Chaꞌ ꞌwan lka nchga taꞌa ngiꞌni ba tñan,

1 CORINTIOS 5:2

¡Loꞌo ñaꞌan ti ngiꞌni siyeꞌ wan loꞌo taꞌa wan, ni siya ndiꞌin chaꞌ ka jyuꞌu ꞌa tiꞌ wan siꞌya chaꞌ xaꞌan kanꞌ! Ndiꞌin chaꞌ kulo wan ꞌin yu nu ngiꞌni chaꞌ xaꞌan kanꞌ laja wan, chaꞌ ja tyaꞌan suꞌwa ꞌa yu loꞌo wan.

1 CORINTIOS 5:6

Siꞌi chaꞌ suꞌwe ngiꞌni wan bra nu ngiꞌni siyeꞌ wan loꞌo taꞌa wan. ¿Ja jlyo tiꞌ wan sa ñaꞌan ngiꞌni skwan tiyeꞌ a? Ni siya chinꞌ ti skwan tiyeꞌ xuꞌwi lo kata jaxlya, loꞌo kuꞌni ran chaꞌ skwen kaꞌan ꞌa skwan bra kanꞌ.

1 CORINTIOS 8:1

Nde kwaꞌaǎn xka chaꞌ lo kityi re, chaꞌ ka biyaꞌ tiꞌ wan sa ñaꞌan ndyoꞌo chaꞌ nu ngiꞌni wan bra nu nchku wan lomstan nu wa mstya neꞌ tloo joꞌo ti kulo. Ndiya wan nu nchkwiꞌ wan: “Jlyo tiꞌ ba, wa ngwiꞌya ba kwenta chaꞌ ja ndiꞌin chaꞌ kti ꞌin joꞌo kwa; ka ku ba lomstan kanꞌ” ndukwin wan. Chañi ꞌa chaꞌ kanꞌ. Loꞌo siyeanꞌ loꞌo taꞌa ntean bra nu chkwianꞌ ngwañaꞌan. Ska ti si suꞌwe ka tiyean ñaꞌaan ꞌin taꞌa ntean, si kuwe tianꞌ ꞌin neꞌ kanꞌ, bra kanꞌ ka tayaanꞌ ꞌin neꞌ.

1 CORINTIOS 9:23

Ngwañaꞌan ngiꞌniǐn nchga seꞌen ndaꞌaǎn, chaꞌ nchkwiǐnꞌ loꞌo nten chaꞌ suꞌwe ꞌin Jesús. Nchka tiǎnꞌ chaꞌ sa ñaꞌan nchka suꞌwe niꞌ kasiya ꞌñaǎn xa wa ynaǎn chaꞌ kanꞌ, kwiꞌ ngwañaꞌan ka suꞌwe niꞌ kasiya ꞌin nchga nten.

2 CORINTIOS 10:12

Loꞌo bare, ja ka suꞌwa chaꞌ ꞌwa loꞌo nten kanꞌ, nxkeꞌ tiꞌ ba; siyeꞌ ꞌa neꞌ kanꞌ loꞌo taꞌa neꞌ, ja nsuꞌwi ꞌa chaꞌ tiya ꞌin neꞌ kanꞌ. Ti ykwiꞌ ti neꞌ wa yꞌni biyaꞌ neꞌ ꞌin neꞌ, kanꞌ chaꞌ nxkeꞌ tiꞌ neꞌ chaꞌ suꞌwe ꞌa ngiꞌni ykwiꞌ neꞌ.

2 CORINTIOS 10:15

Ja nchkwiꞌ ba chaꞌ ꞌin tñan nu ngiꞌni xka ta nten chabiyaꞌ ꞌin Ndiose; nchkwiꞌ ba chaꞌ ꞌin sa kwa ti tñan nu nda Ni chabiyaꞌ chaꞌ kuꞌni ykwiꞌ ba nde seꞌen ndiꞌin wan. Sa kanꞌ ti chaꞌ nchka tiꞌ ba, chaꞌ xñi suꞌwe la wan chaꞌ ꞌin Ndiose chunꞌ ndiꞌin la, chaꞌ bra kanꞌ kaꞌan la tñan ka kuꞌni ba loꞌo wan, ti kwiꞌ ñaꞌan nu wa nda Ni chabiyaꞌ chaꞌ kuꞌni ba.

2 CORINTIOS 10:7

Ndla ꞌa tiꞌ wan nchkwiꞌ wan chaꞌ ꞌwa. Suꞌwe la si kuwe chinꞌ tiꞌ wan ti kulo la sa ñaꞌan ndyoꞌo skaa chaꞌ nu ñi; nchga nten nu nxkeꞌ tiꞌ chaꞌ lka neꞌ chaꞌ ꞌin Krixtu, nꞌni chaꞌ kuwe suꞌwe la tiꞌ neꞌ kanꞌ, chaꞌ ka biyaꞌ tiꞌ neꞌ bra kanꞌ, chaꞌ loꞌo bare lka ba chaꞌ ꞌin Krixtu.

2 CORINTIOS 11:4

Loꞌo siꞌi ngwañaꞌan lka rsun nu mjwi ꞌñaǎn. Ndiya nu nchkwiꞌ chaꞌ suꞌwe ꞌa nchkwiꞌ wan loꞌo ya ñaꞌan ti nten nu ndijyan seꞌen ndiꞌin wan, ni siya xka ñaꞌan chaꞌ nchkwiꞌ neꞌ chaꞌ ꞌin Jesús; ja suꞌwa chaꞌ nu nchkwiꞌ neꞌ kanꞌ loꞌo chaꞌ nu wa ytsaꞌ ba ꞌwan nu ngwa ti kulo. Kwiꞌ ngwañaꞌan, nnan wan xka la chaꞌ kanꞌ, siꞌi chaꞌ suꞌwe ꞌin Jesús nu ndlaa ꞌñaan ꞌin nchga chaꞌ kuxi lka chaꞌ kanꞌ, ti kwiꞌ siꞌi chaꞌ nu wa ykwiꞌ ba loꞌo wan nu ngwa ti kulo. Kanꞌ chaꞌ xka tyiꞌi nsuꞌwi niꞌ kasiya ꞌwan ni, loꞌo siꞌi Tyiꞌi Ndiose lka kanꞌ.

2 CORINTIOS 12:19

Siꞌi nan nchka tiꞌ ba chaꞌ tyoꞌo luwi chaꞌ ꞌwa loꞌo wan; wa lka nduwe tiꞌ ba chaꞌ ñaꞌan Ndiose ꞌwa, kanꞌ chaꞌ sa kwa ti chaꞌ nchkwiꞌ ba, sa ñaꞌan chaꞌ nu nchka tiꞌ Krixtu chaꞌ chkwiꞌ ba loꞌo wan. Kwiꞌ ngwañaꞌan, nchga tñan nu ngiꞌni ba, ngiꞌni ba tñan kanꞌ chaꞌ tayaꞌ ba ꞌwan, chaꞌ suꞌwe ꞌa nka tiye ba ñaꞌan ba ꞌwan taꞌa suꞌwe ndiꞌin ba.

2 CORINTIOS 12:20

Kaꞌan chinꞌ chaꞌ ndaꞌan tiyeěn chaꞌ ꞌwan ni. Bra nu tiyaǎn seꞌen ndiꞌin wan, ¿ta tyija lyo chaꞌ ꞌwan ꞌñaǎn chaꞌ xka ñaꞌan ngiꞌni wan, siꞌi sa ñaꞌan nu ngwaꞌuǔn ꞌwan ti kulo a? ¿Ni sa ñaꞌan kuꞌniǐn loꞌo wan bra kanꞌ a? Ka biyaꞌ tiꞌ wan bra kanꞌ, chaꞌ ka ꞌñaǎn kuꞌniǐn tláǎn chinꞌ ꞌwan, ni siya ja ndiya tiꞌ wan chaꞌ kuꞌniǐn ngwañaꞌan. Nduwe ꞌa tiǎnꞌ chaꞌ ndiya chinꞌ neꞌ taꞌa wan nu ti nxuun neꞌ loꞌo taꞌa neꞌ, nu liyeꞌ ꞌa tiꞌ neꞌ ꞌin taꞌa neꞌ, nu msinꞌ ꞌa tiꞌ neꞌ ꞌin taꞌa neꞌ, nu ska lo ti chaꞌ ꞌin neꞌ nduwe tiꞌ neꞌ; kwiꞌ ngwañaꞌan, nchkwiꞌ ꞌa neꞌ kwentu ꞌin taꞌa neꞌ, nchkwiꞌ lyoꞌo neꞌ ꞌin taꞌa neꞌ, lye ꞌa ngiꞌni siyeꞌ neꞌ loꞌo taꞌa neꞌ. Nchga lo chaꞌ kuxi kanꞌ ngiꞌni neꞌ chunꞌ ja nduwe tiꞌ neꞌ ꞌin Ndiose siyaꞌ ti.

2 CORINTIOS 12:6

Siꞌi nan wa mnaꞌ chaꞌ tiya ꞌñaǎn nchkwiǐnꞌ chaꞌ ꞌñaǎn ti ykwiǐnꞌ tiǎn. Chañi lka chaꞌ nu nchkwiǐnꞌ loꞌo wan ni. Ja nchka tiǎnꞌ chkwiǐnꞌ kaꞌan ꞌa chaꞌ loꞌo wan, chunꞌ ja nchka tiǎnꞌ chaꞌ kuꞌni tnun neꞌ ꞌñaǎn si ja ya ñaꞌan neꞌ sa ñaꞌan ngiꞌniǐn, ta ja ya kunan neꞌ chaꞌ nchkwiǐnꞌ. Xa wa nsuꞌwi lyo neꞌ ꞌñaǎn, kanꞌ ka chkwiꞌ suꞌwe neꞌ chaꞌ ꞌñaǎn bra kanꞌ, nka tiyeěn.

2 CORINTIOS 4:15

Ndalo ba nchga nu tiꞌí nu ndyukwa ba chaꞌ ꞌwan; loꞌo ni, wa ndiya kaꞌan ꞌa taꞌa nten wan nu wa mjwi xuꞌwe nu nda Ndiose ꞌwan, kanꞌ chaꞌ chunꞌ ndiꞌin la ka tyituun kaꞌan la taꞌa nten wan nu tya xuꞌwe ꞌin Ndiose chaꞌ ꞌwa. Loꞌo suꞌwa ꞌa ka kuꞌni tnuan ꞌin ykwiꞌ Ni bra kanꞌ.

COLOSENSES 2:18

Ja kuwe tiꞌ wan ꞌin ya ñaꞌan ti nten nu kuꞌni siyeꞌ loꞌo wan, neꞌ nu kti la ngiꞌni, nxkeꞌ tiꞌ neꞌ, chaꞌ ngiꞌni tnun neꞌ ꞌin ska angajle nde niꞌ kwan; siꞌi ꞌin Ndiose ykwiꞌ ngiꞌni tnun neꞌ kanꞌ. Nten nu ngiꞌni ngwañaꞌan, nxkeꞌ tiꞌ neꞌ chaꞌ Ndiose ngwaꞌu xka chaꞌ nu suꞌwe la ꞌin neꞌ. Lye ꞌa ngiꞌni siyeꞌ neꞌ kanꞌ loꞌo taꞌa nten neꞌ, ni siya ja ndiꞌin chaꞌ kuꞌni neꞌ kanꞌ ngwañaꞌan, chaꞌ ñaꞌan ti ndiꞌin chaꞌ kuxi niꞌ kasiya ꞌin neꞌ;

1 TESALONICENSES 1:5

chaꞌ msñi wan chaꞌ suꞌwe nu ykwiꞌ ba loꞌo wan, ti kwiꞌ chaꞌ tnun nu ytsaꞌ Tyiꞌi Ndiose ꞌwa chaꞌ chkwiꞌ ba loꞌo wan; Tyiꞌi Ni yꞌni tñan bra nu ykwiꞌ ba loꞌo wan, kanꞌ chaꞌ msñi wan chaꞌ kanꞌ. Kwiꞌ ngwañaꞌan, jlyo tiꞌ wan sa ñaꞌan tñan yꞌni ba bra nu mdiꞌin ba seꞌen ndiꞌin wan.

2 TIMOTEO 2:10

kanꞌ chaꞌ ndaloǔn ꞌin neꞌ, ni siya lye ꞌa nda neꞌ nu tiꞌí ꞌñaǎn. Taloǔn ꞌin chaꞌ kuxi kanꞌ chaꞌ ꞌin taꞌa nten nu ngulo suwi Ndiose ꞌin, chaꞌ loꞌo kulaa Jesucristo ꞌin neꞌ, chaꞌ kaja chalyuu nu ja tsaa tii ꞌa ꞌin neꞌ. Loꞌo bra kanꞌ ka tyiꞌin neꞌ nde seꞌen ndiꞌin Ndiose, seꞌen suꞌwe ꞌa ñaꞌan nchga nan.