SAN LUCAS 8:25 - Chatino Tataltepec

²⁵ Li' nchcui' Jesús lo'o nu ngu' nu ndyaca tsa'a̱ ji'i̱ bi': ―¿Ni cha' ná jlya ti' ma̱ ji'i̱ ycui' Ndyosi cha' caca ji'i̱ Ni cua'ni Ni jua'a̱? ―nacui̱ Jesús ji'i̱ ngu' bi'. Pana ntsi̱i̱ tsa ngu' bi', ndube tsa ti' ngu' ña'a̱ ngu' ji'i̱ Jesús li'. ―¿Tilaca laca nu qui'yu re? ―nacui̱ ngu' ji'i̱ tya'a ngu'―, cha' lo'o cui'i̱ ndaquiya' ji'i̱ yu, lo'o jua'a̱ nduna clyoo' lo tayu' cha' nu nda yu ―nacui̱ ngu' ji'i̱ tya'a ndyaca tsa'a̱ ngu'.

SAN LUCAS 8:25 Iomraidhean Croise

SAN MATEO 14:31

Hora ti ngusñi Jesús ya' Pedro. ―Xti tsa tyempo ndalo nu'u̱ cha' jlya ti' nu'u̱ 'na ―nacui̱ Jesús ji'i̱ Pedro bi'―. ¿Ni cha' ná jlya tso'o ti' 'na?

SAN MATEO 17:20

Li' nguxacui̱ Jesús cha' ji'i̱ ngu' bi': ―Xti ti cha' jlya ti' ma̱ ji'i̱ ycui' Ni, bi' cha' ná ngua ji'i̱ ma̱ ―nacui̱ Jesús ji'i̱ ngu' bi'―. Cha' liñi nchcui' na' lo'o ma̱ juani, cha' si chañi ca cha' jlya ti' ma̱ cha' ji'i̱ ycui' Ndyosi, masi tsa lo cua sca si'yu cuxee ti nu piti tsa, si jua'a̱ ti jlya ti' ma̱ cha' ji'i̱ Ni, li' taca chcui' ma̱ lo'o ca'ya cua̱ nde: “Tyu'utsu' nu'u̱ tyaa nu'u̱ chaca se'i̱ cajua la”, ñacui̱ ma̱ ji'i̱. Lo'o li' taquiya' ca'ya bi' cha' nu nchcui' ma̱ lo'o, tyu'utsu' ca'ya bi' tsaa chaca se'i̱ li'. Ná ntsu'u cha' nu ná caca cua'ni ma̱ si chañi ca cha' jlya ti' ma̱ 'na.

SAN MATEO 6:30

Ñi'ya̱ lo'o tso'o tsa ngüiñá ycui' Ndyosi ji'i̱ queé cua, cha' nda Ni sca lo ste' bi', masi sca ti tsa̱ talo queé bi' lo'o li' tyaqui̱ ntsu'u quiya'; la cui' jua'a̱ ta ycui' Ni late' cacu' ma̱, masi xti tsa cha' jlya ti' ma̱ ji'i̱ ycui' Ni.

SAN MATEO 8:10

Ndube tsa ti' Jesús lo'o ndyuna cha' nu nchcui' capitán bi'. Li' nchcui' Jesús lo'o nu quiña'a̱ tsa ñati̱ nu lca'a̱ ji'i̱: ―Liñi tsa cha' nchcui' na' lo'o ma̱ juani ―nacui̱ Jesús ji'i̱ ngu'―. Bilya ña'a̱ na' tsiya' ti ji'i̱ sca ñati̱ nu tso'o tsa jlya ti' ji'i̱ ycui' Ndyosi, ñi'ya̱ jlya ti' nu capitán re; tyucui ña'a̱ nasiyu̱ Israel re ná ntsu'u ngu' nu jlya ti' jua'a̱.

SAN MATEO 8:26

Li' nguxacui̱ Jesús cha' ji'i̱ ngu' bi': ―¿Ni cha' ntsi̱i̱ tsa ma̱? ―nacui̱ ji'i̱ ngu'―. ¡Xi tsa tyempo ndalo ma̱, cha' ná jlya ti' ma̱ ji'i̱ ycui' Ndyosi cha' caca ji'i̱ Ni cua'ni Ni cña! Lo'o li' ndyatu̱ Jesús, nchcui' lo'o cui'i̱ lo'o clyoo' cha' cua'a ji'i̱ cha' bi'; hora ti ngua ti̱ bi' li'.

SAN MARCOS 4:35

Lo'o cua ngusi̱i̱ tsa, cua ndyaa cuichaa, li' nchcui' Jesús xi lo'o nu ngu' nu ndyaca tsa'a̱ ji'i̱: ―Tyeje tacui na ca chaca tsu' tayu' re ―nacui̱ Jesús ji'i̱ ngu' bi'.

SAN LUCAS 12:28

La cui' jua'a̱ lo'o quii nu ndi'i̱ ne' quixi̱' jua juani, ndyaluu quii bi' tso'o ti; pana chaca tsa̱, li' nga'aa tyaca̱' cha' cua ndyaqui̱. Ycui' Ndyosi ndu'ni cha' tso'o tsa ña'a̱ quii; jua'a̱ cu'ma̱ ni, chañi cha' ta ycui' Ni late' cacu' ma̱, masi xti tsa cha' jlya ti' ma̱ ji'i̱ Ni.

SAN LUCAS 8:24

Li' ndyaa nguxtyu'u ngu' ji'i̱ Jesús ca su ntsiya laja'. Nchcui' ngu' lo'o li': ―Cusu', cusu' ―nacui̱ ngu' ji'i̱―, que ti' nu'u̱. Cua quilyu'u ti yaca ni'i̱ re, cajaa na li'. Ndaca'a̱ Jesús li', ngulo yu cña ji'i̱ cui'i̱ lo'o ji'i̱ clyoo' bi'. Hora ti ngua ti̱ bi' li'; nga'aa ndyaca cui'i̱, nga'aa ntyucua clyoo'.

SAN LUCAS 8:26

Nde tsu' tayu' bi', loyuu su cuentya Galilea laca; lo'o nu chaca tsu' tayu' bi' loyuu su cuentya ngu' Gadara laca. Li' ndyaa ngu' ne' yaca ni'i̱ piti ti bi', ndyalaa ngu' ca loyuu ji'i̱ ngu' Gadara li'.

SAN JUAN 11:40

Li' nacui̱ Jesús: ―Caca ña'a̱ ma̱ cha' tlyu tsa nu ndu'ni ycui' Ndyosi nu lo'o jlya ti' ma̱ ji'i̱ Ni. ¿Ha si'i jua'a̱ ni na' ji'i̱ ma̱ tsa̱?