SAN LUCAS 7:47 - Chatino Tataltepec

⁴⁷ Nde laca cha' nu ndacha' na' jinu'u̱ juani, cha' tso'o tsa ndyu'ni tya'na ti' nu cuna'a̱ cua jna', bi' cha' ca cuayá' ti' na cha' cua ngüityi̱ ycui' Ndyosi qui'ya nu ntsu'u ji'i̱ cho', masi quiña'a̱ tsa qui'ya ntsu'u ji'i̱ cho' ca slo Ni. Pana ñati̱ nu ná lye ntsu'u qui'ya ji'i̱ cha' cuityi̱ ycui' Ndyosi ji'i̱, xti la xi cha' ndube ti' ngu' bi' ña'a̱ ngu' ji'i̱ ycui' Ni ―nacui̱ Jesús ji'i̱ Simón.

SAN LUCAS 7:47 Iomraidhean Croise

SAN MATEO 10:37

’Tso'o tsa lo'o ndu'ni tyaca'a ngu' ji'i̱ sti ngu', ji'i̱ xtya'a̱ ngu'; pana si xti la ndu'ni tyaca'a ngu' bi' 'na, ná taca tya'a̱ ngu' bi' lo'o na'. Lo'o jua'a̱ tso'o lo'o ndu'ni tyaca'a ngu' ji'i̱ sñi' ngu', masi sñi' qui'yu, masi sñi' cuna'a̱; pana si xti la ndu'ni tyaca'a ngu' bi' 'na, ná taca tya'a̱ ngu' bi' lo'o na'.

SAN LUCAS 7:39

Lo'o nu yu fariseo nu cua nchcui' lo'o Jesús cha' tsaa cua'ni xlyaa ca slo yu ni, lo'o cua na'a̱ yu ji'i̱ nu cuna'a̱ bi', ndi'ya̱ cha' ngua'ya hique yu li': “Si'i cha' chañi laca re, cha' laca yu sca ñati̱ nu laca tu'ba ji'i̱ ycui' Ndyosi cha' chcui' Ni lo'o na. Si la cui' laca yu, li' ta yu cuentya tilaca laca nu cuna'a̱ nu nsta ya' lo quiya' yu juani; caca cuayá' ti' yu cha' sca nu cuna'a̱ nu chiya'a̱ tsa ndu'ni su ndi'i̱ chalyuu laca nu cua.”

SAN LUCAS 7:46

Lo'o jua'a̱ ná nda'a̱ nu'u̱ setye hique na' tsa̱; pana nu cuna'a̱ cua ni, cua ngusalú cho' setye tyixi xtyi'i chu̱' quiya' na'.

SAN LUCAS 7:48

Li' nchcui' Jesús lo'o nu cuna'a̱ bi': ―Cua ngüityi̱ ycui' Ndyosi lcaa qui'ya nu ntsu'u jinu'u̱ ―nacui̱.

LOS HECHOS 5:31

Nchca ji'i̱ Jesús bi' cuityi̱ yu cha' cuxi nu ntsu'u ji'i̱ ñati̱ chalyuu. Ycui' Jesús laca nu Xu'na na, bi' cha' la'a tsu' cui̱ ca su ntucua Ni nda ycui' Ndyosi su tyi'i̱ Jesús. Ngua'ni Ni jua'a̱ cha' caja ñi'ya caca tyuju'u ti' na nu laca na ngu' Israel ji'i̱ qui'ya nu ntsu'u ji'na, lo'o jua'a̱ cui'ya Ni cha' clyu ti' ji'na li'.

ROMANOS 5:20

Nu lo'o cuna na ni cña laca nu nclyo ycui' Ndyosi ji'na, li' nchca cuayá' la ti' na ñi'ya̱ laca qui'ya nu sta Ni ji'na. Masi ndube tsa ti' na cha' ntsu'u tsa cha' cuxi ji'na, la cui' jua'a̱ jlo ti' na cha' ntaja'a̱ Ni cua'ni lyaá Ni ji'na; jlo ti' na cha' nchca ji'i̱ Ni, cha' tso'o tsa ndu'ni Ni lo'o na.

2 CORINTIOS 5:14

Cua jlo ti' na cha' sca ti ycui' Cristo ngujuii lo crusi cuentya ji'i̱ lcaa ñati̱ chalyuu; ñi'ya̱ nti' si cua ngujuii lcaa ñati̱ chalyuu xqui'ya qui'ya nu ntsu'u ji'i̱ ngu', jua'a̱ laca cha', xqui'ya cha' ngujuii yu lo crusi bi'. Lo'o juani jlo ti' na cha' ntsu'u tsa tyiquee Cristo ña'a̱ Ni ji'i̱ lcaa ñati̱ chalyuu, bi' cha' nga'a̱ cha' chcui' na cha' ji'i̱ Jesús lo'o xa' ñati̱.

GÁLATAS 5:6

Lo'o jua'a̱ si chañi cha' stu'ba ntsu'u cha' ji'na lo'o Jesucristo, li' ná ndu'ni cha' masi ngulacua̱ na, masi ná ngulacua̱ na. Sca ti cha' ndulo tsa ji'na cha' cua'ni na, cha' xñi tso'o la na cha' ji'i̱ ycui' Ni; lo'o li' caca cua'ni na cha' tso'o ti tyu'u tyiquee na ña'a̱ na ji'i̱ tya'a ñati̱ na.

EFESIOS 6:24

Lo'o jua'a̱ nti' na' cha' ña'a̱ ti cua'ni Ni cha' tso'o lo'o lcaa cu'ma̱ nu ntsu'u tyiquee ma̱ ji'i̱ Jesucristo nu Xu'na na, cu'ma̱ nu nga'aa nti' tya'a̱chu̱' ma̱ ji'i̱ Cristo. Chañi cha' jua'a̱ caca cha' bi'.

FILIPENSES 1:9

Ndi'ya̱ laca cha' nu nchcui' na' lo'o ycui' Ndyosi cuentya ji'i̱ ma̱: ndijña na' chacuayá' ji'i̱ Ni cha' ña'a̱ ti tso'o la tyu'u tyiquee ma̱ ña'a̱ ma̱ ji'i̱ tya'a ñati̱ ma̱, cha' jua'a̱ taca ca cuayá' la ti' ma̱ lcaa cha', cha' jua'a̱ taca culacua tso'o la ti' ma̱;

1 TIMOTEO 1:14

Ntsu'u tsa tyiquee nu Xu'na na ña'a̱ Ni 'na, bi' cha' ngusñi na' cha' ji'i̱ ycui' Jesucristo li'; lo'o nu juani ntsu'u tyiquee na' ña'a̱ na' ji'i̱ Jesús, lo'o jua'a̱ ntsu'u tyiquee na' ña'a̱ na' ji'i̱ tya'a ñati̱ na'.

1 JUAN 1:7

Pana si lubii cresiya ji'na ñi'ya̱ lo'o lubii cresiya ji'i̱ ycui' Ni, ndu'ni na cha' tso'o li'; stu'ba ti caca tyiquee na lo'o tya'a ngusñi na cha' ji'i̱ Jesús li'. Lo'o jua'a̱ cuityi̱ Ni qui'ya nu ntsu'u ji'na, xqui'ya cha' cua ndyalú tañi Jesús Sñi' ycui' Ni lo'o ngujuii yu lo crusi.

1 JUAN 3:18

Cu'ma̱ sñi' na', nu lo'o ntsu'u tsa tyiquee na ña'a̱ na ji'i̱ ycui' Ndyosi lo'o ji'i̱ tya'a ñati̱ na, si'i sca cui̱i̱ ti laca nu chcui' na lo'o ngu', si'i sca cha' nu nda ti na lo'o ngu' caca bi'; tyucui tyiquee na nga'a̱ cha' xtyucua na ji'i̱ nu ngu' tya'a na bi'.

1 JUAN 4:19

Ntsu'u tyiquee na ña'a̱ na ji'i̱ ycui' Ni, xqui'ya cha' tya clyo ntsu'u tsa tyiquee Ni ña'a̱ Ni ji'na.

1 JUAN 5:3

Si chañi cha' ntsu'u tyiquee na ña'a̱ na ji'i̱ Ni, taquiya' na ji'i̱ cha' nu chcui' Ni lo'o na li', cha' si'i sca cña nu tucui tsa laca cha' taquiya' na ji'i̱ scaa cha' nu nchcui' Ni.