SAN LUCAS 7:22 - Chatino Tataltepec

²² Bi' cha' ndi'ya̱ nguxacui̱ Jesús cha' ji'i̱ ngu' bi' li': ―Yaa clya ma̱ cacha' ma̱ ji'i̱ nu Juan bi' lcaa cha' nu cua na'a̱ ma̱ slo na', lcaa cha' nu cua ndyuna ma̱ ca nde. Ñacui̱ ma̱ ji'i̱ yu cha' xa' nda na' xee ña'a̱ tyu̱u̱ tya'a ngu' nu ngua cuityi̱'; lo'o juani tso'o tsa ndya'a̱ ngu' nu ngua quicha quiya'; jua'a̱ cua ngua lubii cuaña' ngu' nu ndyatsu' cuaña'; lo'o juani cua nduna tso'o ngu' nu ngua cu'u̱ jyaca̱; jua'a̱ xa' ndyu'ú ngu' chaca quiya', ngu' nu cua ngujuii; jua'a̱ ngu' ti'i ni, nduna ngu' cha' tso'o nu nda na' lo'o ngu' ñi'ya̱ ndu'ni lyaá Ni ji'i̱ ngu' ji'i̱ nu cuxi. Jua'a̱ ñacui̱ ma̱ ji'i̱ Juan bi'.

SAN LUCAS 7:22 Iomraidhean Croise

SAN MATEO 11:5

Cacha' ma̱ cha' nu cua na'a̱ ma̱ ca nde ji'i̱ yu; cacha' ma̱ ji'i̱ cha' ndu'ni na' cha' ndyaca tso'o cloo ngu' nu ngua cuityi̱', cha' ndya'a̱ ngu' nu ngua quicha quiya', cha' ngua lubii cuaña' ngu' nu ndyatsu' cuaña', cha' nduna ngu' nu ngua cu'u̱ jyaca̱, cha' ndyu'ú ngu' chaca quiya' nu cua ngujuii, cha' nchca cuayá' ti' ngu' ti'i ñi'ya̱ nu cua'ni lyaá ycui' Ni ji'i̱ ñati̱ chalyuu ji'i̱ nu cuxi.

SAN MATEO 21:14

Li' ñaa xi ngu' cuityi̱' ca su ndu̱ Jesús ca ne' laa tonu bi', lo'o jua'a̱ ñaa xi ngu' nu quicha quiya'; ngua'ni Jesús cha' ndyaca tso'o ngu' quicha bi' li'.

SAN LUCAS 4:18

Cua ngulacua̱ ycui' Ndyosi nu Xu'na na jna', nacui̱ lo quityi bi'. Cua ngua'a̱ loo Ni jna', bi' cha' cua ndi'i̱ Xtyi'i ycui' Ndyosi lo na', cha' chcui' na' cha' tso'o lo'o ngu' ti'i. Cua nda Ni jna' lijya̱a̱ cha' cua'ni cho'o na' tyiquee ñati̱ nu xñi'i̱ tsa ti', nacui̱ lo quityi bi'. Ntsu'u cha' chcui' na' lo'o ngu' nu laca preso ji'i̱ nu xña'a̱, cha' cua tyu'u ti ngu' ya' nu xña'a̱ bi'. Ta na' xee nu tyu'u ne' cresiya ji'i̱ ñati̱ nu ndyacu̱' hique ngu'. Lo'o lya' tsa ti' ngu' ji'i̱ tya'a ngu' ni, li' ta na' chacuayá' ji'i̱ ngu' cha' tyu'u ngu' laja ti.

SAN LUCAS 7:21

Nu lo'o ndi'i̱ ngu' bi' slo Jesús, li' ngua'ni Jesús jo'o ji'i̱ tyu̱u̱ tya'a ñati̱; masi cua sa'ni ngusñi quicha ji'i̱ ngu', masi quicha ndya'a̱ ti, masi ngusñi cui'i̱ cuxi ji'i̱ ngu', hora ti ndyaca tso'o ngu' bi'. Lo'o nu cuityi̱', ngua'ni Jesús cha' ngulane xee cloo ngu' ña'a̱ ngu' chaca quiya'.

SAN LUCAS 7:23

Taca caca tso'o tyiquee ma̱ si ná caca tyuju'u ti' ma̱ ña'a̱ ma̱ jna' ―nacui̱ Jesús ji'i̱ ngu'.

SAN JUAN 1:46

―¿Ha tso'o quichi̱ bi'? ―nacui̱ Natanael―. ¿Ha ntsu'u ñati̱ tso'o nde quichi̱ Nazaret bi'? ―Yaa na'a̱ nu'u̱ xi ji'i̱ lacua ―nacui̱ Felipe.

LOS HECHOS 26:18

cha' ñi'ya̱ si ndya'a̱ ngu' cuityi̱', jua'a̱ ndya'a̱ ñati̱ bi' chalyuu; ñi'ya̱ si talya tsa ña'a̱ su ndya'a̱ ngu', jua'a̱ ndyu'ni ngu' bi'. Bi' cha' ntsu'u cha' culu'u nu'u̱ cha' jna' ji'i̱ ngu' bi', cha' xñi ngu' cha' jna'. Li' nga'aa tya'a̱ ngu' su talya ña'a̱, ñi'ya̱ si cuityi̱' ti ngu'; taca tya'a̱ ngu' tyucui̱i̱ su xee cuentya ji'i̱ ycui' Ndyosi, taca ña'a̱ ngu' li'. Satanás laca nu nclyo cña ji'i̱ ngu' bi' juani, pana ca li' caca ngu' ñati̱ ji'i̱ ycui' Ndyosi. Ntsu'u cha' xñi ngu' bi' cha' jna', cha' taca cui'ya ycui' Ni cha' clyu ti' ji'i̱ cha' cuxi nu ntsu'u ji'i̱ ngu' bi'. Li' caca stu'ba cha' ji'i̱ ngu' bi' lo'o ñati̱ nu cua lubii cresiya ji'i̱ xqui'ya na'”, nacui̱ ycui' Jesús 'na li'.

LOS HECHOS 8:7

Ngua'ni yu cha' ndyaca tso'o tyu̱u̱ tya'a ngu' quicha, jua'a̱ ngua'ni yu cha' ndyaca tso'o ngu' nu ngusñi cui'i̱ cuxi ji'i̱. Cui̱i̱ nxi'ya ngu' nu ntsu'u cui'i̱ cuxi ji'i̱, cuati ndu'u nu cui'i̱ cuxi nu ntsu'u ji'i̱ ngu' bi' ndyaa. Lo'o jua'a̱ ngua tso'o ngu' nu quicha quiya', ngua tso'o ngu' nu nchcu̱' tyijya̱.

SANTIAGO 2:5

Cu'ma̱ ngu' tya'a na nu tyaca'a tsa ma̱ 'na, cui'ya ma̱ cuentya ji'i̱ cha' re: Cua ngusubi ycui' Ndyosi ji'i̱ ñati̱ ti'i cha' taca xñi tso'o ngu' cha' ji'i̱ ycui' Ni; ta Ni chalyuu tso'o ji'i̱ ngu' bi' li', la cui' chalyuu nu nacui̱ Ni cha' caja ji'i̱ ñati̱ nu ntsu'u tsa tyiquee ña'a̱ ji'i̱ ycui' Ni. Masi ti'i tsa ñati̱ bi' nde chalyuu, pana culiya' ngu' cuentya ji'i̱ ycui' Ndyosi.