SAN LUCAS 6:13 - Chatino Tataltepec

¹³ Lo'o nguxee chaca tsa̱, li' ngusi'ya yu ji'i̱ ñati̱ nu ndya'a̱ lo'o yu cha' tya̱a̱ ngu' slo yu. Li' ngusubi yu ji'i̱ tii tyucuaa tya'a ngu'; nda yu chacuayá' ji'i̱ nu ngu' bi', cha' tsaa culu'u ngu' ji'i̱ xa' ñati̱.

SAN LUCAS 6:13 Iomraidhean Croise

SAN MATEO 10:2

Nde nscua na' xtañi ca ta'a tii tyucuaa tya'a ngu' nu ngusubi Jesús: nu clyo ngusubi yu ji'i̱ Simón, nu lo'o ndu'ni ngu' Pedro ji'i̱, lo'o Andrés tya'a ngula nu Simón bi'; li' ngusubi yu ji'i̱ Jacobo, lo'o Juan tya'a ngula Jacobo, nu laca sñi' Zebedeo;

SAN MATEO 19:28

―Cha' liñi nchcui' na' lo'o ma̱ juani ―nacui̱ Jesús ji'i̱ ngu'―, cha' nu lo'o caca chalyuu cucui bi' ni, li' ca̱a̱ na' nu cua nda Ni 'na lijya̱a̱ cha' caca na' ñati̱; tsaa tucua na' ca su tso'o tsa ña'a̱ ca bi', cha' cua'ni cuayá' na' ji'i̱ lcaa ñati̱ chalyuu li'. Lo'o cu'ma̱ nu ndya'a̱ ma̱ lo'o na', tiya' la tyucua ma̱ lo tii tyucuaa tya'a yaca nu tso'o tsa ña'a̱, cha' cua'ni cuayá' ma̱ ji'i̱ tya'a ñati̱ ma̱, nu tii tyucuaa tya'a taju ngu' Israel bi'.

SAN MATEO 9:36

Tya'na tsa ti' Jesús ji'i̱ nu quiña'a̱ tsa ñati̱ nu ndya'a̱ lca'a̱ ji'i̱, cha' ná nchca ji'i̱ ngu' bi'; nga'aa jlo ti' ngu' ñi'ya̱ nu tyi'i̱ tso'o la ngu'. Ñi'ya̱ ndu'ni xlya' nu ná ntsu'u nu ña'a̱si̱i̱ ji'i̱ ni', jua'a̱ ndu'ni ngu' quiña'a̱ bi', ngua ti' Jesús.

SAN MARCOS 6:30

Ca tiya' la xi xa' ndyalaa ngu' tya'a ndya'a̱ Jesús slo yu, ngu' nu ndyaa nchcui' lo'o ngu' xa' quichi̱ cha' ji'i̱ Jesús. Nda ngu' cha' lo'o yu ñi'ya̱ nu ngua'ni ngu', ñi'ya̱ nu ngulu'u ngu' ji'i̱ ñati̱ ca bi'.

SAN MARCOS 6:7

Lo'o li' ngusi'ya Jesús ji'i̱ nu tii tyucuaa tya'a ngu' nu ndyaca tsa'a̱ ji'i̱ bi', cha' chcui' yu lo'o ngu'. Ngulo yu cña ji'i̱ ngu' bi', cha' tyu'u ngu' tsaa ngu' cuentya latya ti ngu'; stu'ba ti tsaa tucua tya'a ngu' scaa quichi̱. Li' nda Jesús chacuayá' ji'i̱ ngu' cha' culo ngu' ji'i̱ cui'i̱ cuxi nu ntsu'u ji'i̱ ñati̱.

SAN LUCAS 11:49

’Tii tsa ycui' Ndyosi, bi' cha' ndi'ya̱ nchcui' Ni tya sa'ni la: “Tya culo na' cña ji'i̱ ngu' cha' ca̱a̱ ngu' slo ñati̱ chalyuu. Chcui' ngu' bi' cha' liñi lo'o xa' ñati̱ cuentya 'na. Lo'o li' cujuii ñati̱ chalyuu ji'i̱ tyu̱u̱ tya'a ngu' bi', jua'a̱ cua'ni lya' ti' ñati̱ ji'i̱ xa' la ngu' bi'”, nacui̱ quityi ji'i̱ ycui' Ndyosi bi'.

SAN LUCAS 22:30

Nga'a̱ cha' stu'ba ti cacu ma̱ co'o ma̱ lo'o na' ca su tlyu bi' su tyucua na'; nga'a̱ cha' stu'ba ti tyi'i̱ ma̱ lo'o na' nu lo'o cua'ni cuayá' na' ji'i̱ lcaa ñati̱; lo'o jua'a̱ cua'ni cuayá' ma̱ ji'i̱ tya'a ñati̱ ma̱, nu tii tyucuaa tya'a taju ngu' Israel tya'a na.

SAN LUCAS 6:14

Ndi'ya̱ naa xtañi ngu' nu ngusubi Jesús ji'i̱ nu ngua tya li': Simón, nu ngusta Jesús chaca xtañi Pedro naa yu, bi' laca tsaca ngu'; jua'a̱ Andrés tya'a ngula Simón, jua'a̱ Jacobo, jua'a̱ Juan, jua'a̱ Felipe, jua'a̱ Bartolomé,

SAN JUAN 4:33

Li' nchcui' ngu' nu ndyaca tsa'a̱ ji'i̱ lo'o tya'a ngu': ―¿Ha ya̱a̱ ngu' ya̱a̱ lo'o ngu' na cacu yu? ―nacui̱ ngu'.

LOS HECHOS 1:13

Yala ti ndyalaa ngu' quichi̱ bi', li' ndyaa ngu' ni'i̱ tucua ba'a su ndi'i̱ ngu': ndyaa Pedro, lo'o Jacobo, lo'o Juan, lo'o Andrés, lo'o Felipe, lo'o Tomás, lo'o Bartolomé, lo'o Mateo, lo'o chaca Jacobo sñi' Alfeo, lo'o Simón nu ngua sca ngu' ji'i̱ taju cananista, lo'o Judas tya'a Jacobo.

EFESIOS 2:20

Lcaa cu'ma̱ nu ngusñi ma̱ cha' ji'i̱ Cristo, cua laca ma̱ tya'a na; sca ti Cristo laca nu ndulo tsa cha' ji'i̱ cuentya ji'na. Xqui'ya Cristo, bi' cha' cua ndyanu tso'o cha' ji'i̱ ma̱ lo'o ycui' Ndyosi; xqui'ya Cristo, bi' cha' cua ngujui cña nu cua'ni scaa ma̱, cha' caca ma̱ cña ji'i̱ Ni, cha' cua ngua stu'ba cha' ji'i̱ ma̱ lo'o Ni. Ñi'ya̱ nti' sca ni'i̱ nu tso'o tsa ndya', jua'a̱ nti' ma̱. Tachaa tsa ntsu'u quiya' ni'i̱ bi', cha' ntsu'u sca quee tlyu nu cui'ya ji'i̱, nu ta juersa ji'i̱ ni'i̱ bi'; chu̱' bi' lijya̱ ndya' ña'a̱ tsaca ni'i̱ li'. Nu ngu' nu ngua tsa'a̱ ji'i̱ Jesús tya clyo, lo'o jua'a̱ jyo'o cusu' nu ngua tu'ba ji'i̱ ycui' Ndyosi nchcui' Ni lo'o ñati̱ nu ngua sa'ni la, ngu' bi' laca nu ngusta su̱u̱ cha', cha' ngusñi ma̱ cha' ji'i̱ ycui' Ndyosi; pana sca ti Cristo laca nu ndulo la cha' ji'i̱ cuentya ji'i̱ ma̱.

EFESIOS 4:11

Xqui'ya cha' tyu̱u̱ lo cha' tso'o nda Jesús lo'o ñati̱ chalyuu, bi' cha' taca cua'ni ñati̱ cña nu nda Ni ji'i̱ ngu' cha' cua'ni ngu': clyo cua ngua'a̱lo Cristo cña ji'i̱ la cui' ñati̱ nu ngua tsa'a̱ ji'i̱ yu; lo'o jua'a̱ cua nda Ni cña ji'i̱ ngu' cha' caca chcui' ngu' na laca nu cua cua'ni ti ycui' Ndyosi chalyuu; lo'o xa' la ñati̱ ji'i̱ Ni ntsu'u cña ji'i̱ cha' cacha' liñi ji'i̱ ñati̱ ñi'ya̱ caca clyaá ngu' ji'i̱ nu cuxi; lo'o jua'a̱ ngua'a̱lo Ni cña ji'i̱ ñati̱ nu caca loo ji'i̱ tya'a, cha' caca ngu' bi' mstru, cha' culu'u ngu' bi' cha' ji'i̱ ycui' Ndyosi ji'i̱ tya'a ngu'.

HEBREOS 3:1

Cu'ma̱ tya'a ngusñi na cha' ji'i̱ Cristo, cu'ma̱ nu cua ngusubi ycui' Ndyosi ji'i̱ ma̱, culacua tso'o ti' ma̱ tilaca laca Jesucristo. Cua nda ycui' Ndyosi Sti yu ji'i̱ yu cha' ya̱a̱ yu nde chalyuu, lo'o nu juani laca yu ñi'ya̱ laca sti jo'ó nu laca loo la cuentya ji'na, cha' ngusñi na cha' ji'i̱ ycui'.

2 PEDRO 3:2

Ntsu'u cha' tyi'u ti' ma̱ cha' nu cua nchcui' ngu' nu ngua tu'ba ji'i̱ ycui' Ndyosi cua sa'ni la; tso'o si tyi'u ti' ma̱ cha' bi' lu'ba ti, lo'o jua'a̱ ji'i̱ cha' nu cua nchcui' ycui' nu Xu'na na nu ngua'ni lyaá ji'na. Cua ngusubi ycui' nu Xu'na na ji'i̱ ya cha' culu'u ya cha' ji'i̱ ycui' Ni ji'i̱ cu'ma̱, bi' cha' tso'o si taquiya' ma̱ ji'i̱ lcaa cha' nu cua ndyuna ma̱ lo'o ngulu'u ya ji'i̱ ma̱.

APOCALIPSIS 12:1

Li' nde cua̱ ndyu'u tucua sca cuayá' nu nda ycui' Ndyosi cha' culu'u Ni ji'na, sca cha' nu ndyaca chalyuu laca bi'; bi' laca sca nu cuna'a̱ nu ntsu'u ste' ndubi ña'a̱. Ñi'ya̱ ndubi ña'a̱ xee cuichaa, jua'a̱ ña'a̱ late' lacu' nu cuna'a̱ bi'. Li' ngusta quiya' nu cuna'a̱ chu̱' co'. Tii tyucuaa tya'a cuii nscua lo xlya hique nu cuna'a̱ bi'; ñi'ya̱ nscua sca sne' ti, jua'a̱ nscua bi'.

APOCALIPSIS 18:20

Pana cacha' na' ji'i̱ ma̱ juani, cu'ma̱ nu ndi'i̱ ca su ntucua ycui' Ndyosi nde cua̱, cua'ni ma̱ cha' ca chaa tsa ti' ma̱ lo'o tyalaa hora cati̱ quichi̱ bi'; lo'o jua'a̱ cu'ma̱ ñati̱ chalyuu nu ntsu'u cha' ji'i̱ ma̱ lo'o ycui' Ndyosi, lo'o cu'ma̱ ñati̱ nu ngua'a̱loo Ni ji'i̱ ma̱ cha' cua'ni ma̱ cña ji'i̱ Ni, lo'o cu'ma̱ nu laca ma̱ tu'ba ji'i̱ ycui' Ndyosi cha' nchcui' Ni lo'o ñati̱, cua'ni ma̱ cha' ca chaa tsa ti' ma̱ cha' liñi tsa ndu'ni Ni lo'o xcube' Ni ji'i̱ ngu' quichi̱ bi', xqui'ya cha' xña'a̱ tsa ngua'ni ngu' bi' lo'o ma̱.

APOCALIPSIS 21:14

Tii tyucuaa tya'a quee tonu ntsiya quiya' lo'o; jua'a̱ hichu̱' quee bi' cua nscua xtañi nu tii tyucuaa tya'a ngu' nu ngua'a̱loo nu ñi'ya̱ ña'a̱ xlya' bi' cña ji'i̱ ngu', nu cua'ni ngu' cuentya ji'i̱ ycui' Ni.