SAN LUCAS 2:39 - Chatino Tataltepec

³⁹ Lo'o cua ndye ngua'ni ngu' lcaa cña nu nga'a̱ cha' cua'ni ngu', cña nu ngulo ycui' nu Xu'na na ji'i̱ ngu' judío cua sa'ni la cha' cua'ni ngu', li' nguxtyu̱u̱ ngu' ndyaa ngu' ca nde loyuu su cuentya Galilea; ndyalaa ngu' ca quichi̱ Nazaret nu laca quichi̱ tyi ngu' li'.

SAN LUCAS 2:39 Iomraidhean Croise

SAN MATEO 3:15

Li' nchcui' Jesús lo'o yu: ―Tso'o tyucuatya nu'u̱ jna' juani ―nacui̱ Jesús ji'i̱ Juan―, cha' jua'a̱ tso'o si cua'ni na lcaa cña nu nti' ycui' Ndyosi cha' cua'ni na. Lo'o ndyuna Juan cha' nu nchcui' Jesús lo'o, ntyucuatya yu ji'i̱ Jesús li'.

SAN LUCAS 1:26

Lo'o cua ntsu'u scuá co' nu ndya'a̱ tana Elisabet, li' ngulo ycui' Ndyosi cña ji'i̱ sca xca̱ ji'i̱ Ni, cha' tsaa ca quichi̱ Nazaret, sca quichi̱ nde loyuu su cuentya Galilea. Lo'o nu xca̱ bi' ni, la cui' Gabriel laca bi'.

SAN LUCAS 1:6

Liñi tsa ndu'ni tyucuaa ngu' bi' cuentya ji'i̱ ycui' Ndyosi, ndaquiya' ngu' lcaa cña ji'i̱ ycui' Ni; ndaquiya' tsa ngu' lcaa cha' nu cua nda Ni lo'o ñati̱ cua sa'ni la, jua'a̱ ná tucui nchcui' cha' cuxi ji'i̱ ngu' bi'.

SAN LUCAS 2:4

Cua ndi'i̱ sca quichi̱ nu naa Belén nde loyuu su cuentya Judea bi'; quichi̱ bi' laca quichi̱ tyi jyo'o David nu ngua jyo'o cusu' ji'i̱ José, bi' cha' ndu'u José quichi̱ Nazaret su laca quichi̱ tyi yu, ndyaa yu nde quichi̱ Belén. Stu'ba ti ndyaa yu lo'o María nu caca clyo'o yu, cha' xcua xtañi ngu', masi ngua tana nu cuna'a̱ bi'.

SAN LUCAS 2:51

Li' ndu'u nu piti bi' ndyaa nde Nazaret chaca quiya' lo'o ngu' cusu' ji'i̱ yu. Ña'a̱ ti tya ndaquiya' tsa yu ji'i̱ cha' nu nchcui' ngu' bi'. Lo'o jua'a̱ xtya'a̱ yu ni, nchco'o ma' lcaa cha' bi' ne' cresiya ji'i̱.

SAN LUCAS 4:16

Li' ndyalaa Jesús nde quichi̱ Nazaret, su nguluu yu. Lo'o ndyalaa tsa̱ nu ndi'i̱ cña' ngu', li' ndyaa yu ne' laa ji'i̱ ngu', cha' xcui' jua'a̱ ndu'ni yu tsa̱ bi'. Li' ndatu̱ Jesús cha' chcui' yu lo quityi nu nscua cha' ji'i̱ ycui' Ndyosi;

SAN LUCAS 4:23

Li' nguxacui̱ Jesús cha' ji'i̱ ngu' bi': ―Ná tyiquee' tiya' la xi ta ma̱ cha' re lo'o na': “Si nu jo'o laca nu'u̱, cua'ni nu'u̱ jo'o ji'i̱ ycui' ca lacua”. Lo'o jua'a̱ ná tyiquee' ñacui̱ ma̱ jna': “Cua ndyuna ya cha' ji'i̱ lcaa cña tonu nu ngua'ni nu'u̱ nde quichi̱ Capernaum bi'”, ñacui̱ ma̱. “La cui' jua'a̱ cua'ni nu'u̱ nde quichi̱ tyi na lacua, cha' ña'a̱ ya xi”, ñacui̱ ma̱ 'na li'.