SAN LUCAS 2:10 - Chatino Tataltepec

¹⁰ Pana nchcui' xca̱ bi' lo'o ngu': ―Ná cutsi̱i̱ ma̱ tsiya' ti ―nacui̱―. Cua lijya̱ na' re cha' ta na' sca cha' tso'o lo'o ma̱ ―nacui̱―. Tso'o tsa caca tyiquee lcaa ñati̱ xqui'ya cha' nu ta na' lo'o ma̱ juani ―nacui̱ xca̱ ji'i̱ ngu' bi'―.

SAN LUCAS 2:10 Iomraidhean Croise

SAN MATEO 14:27

Hora ti ndacha' Jesús ji'i̱ ngu': ―Cua'ni tlyu tyiquee ma̱ ―nacui̱ Jesús ji'i̱ ngu'―. Na' laca̱, ná cutsi̱i̱ ma̱.

SAN MATEO 28:18

Li' ñaa Jesús cacua la, nchcui' lo'o ngu': ―Cua nda ycui' Ndyosi Sti na' lcaa chacuayá' 'na cha' laca na' loo ji'i̱ lcaa na, masi lcaa na nu ntsu'u ca slo ycui' Ni nde cua̱, masi lcaa na nu ntsu'u nde chalyuu ―nacui̱ Jesús ji'i̱ ngu'―.

SAN MATEO 28:5

Li' nchcui' xca̱ bi' lo'o nu ngu' cuna'a̱ bi': ―Ná cutsi̱i̱ ma̱ ―nacui̱ ji'i̱ ngu' cuna'a̱ bi'―. Jlo ti' na' cha' nclyana ma̱ ji'i̱ Jesús nu ngujuii lo crusi.

SAN MARCOS 1:15

―Cua ndyalaa hora cha' caca ycui' Ndyosi loo ne' cresiya ji'i̱ ñati̱ ―nacui̱ Jesús―. Ca tyuju'u ti' ma̱ ji'i̱ lcaa cha' cuxi nu ntsu'u ji'i̱ ma̱; culochu̱' ma̱ ji'i̱ cha' cuxi bi', cha' li' taca xñi ma̱ cha' tso'o nu ji'i̱ ycui' Ndyosi nu cua'ni lyaá ji'i̱ ma̱.

SAN MARCOS 16:15

―Tsaa ma̱ tyucui ña'a̱ chalyuu ―nacui̱ Jesús ji'i̱ ngu' bi' li'―. Ta ma̱ cha' lo'o lcaa ñati̱ cuentya jna'. Chcui' ma̱ lo'o ngu' cha' taca clyaá ngu' ji'i̱ nu cuxi xqui'ya na'.

SAN LUCAS 1:13

Nchcui' xca̱ bi' lo'o yu li': ―Ná cutsi̱i̱ nu'u̱ Zacarías ―nacui̱―. Cua ndyuna ycui' Ndyosi cha' nu tya'na tsa nchcui' nu'u̱ lo'o Ni, bi' cha' cala sca sñi' Elisabet clyo'o nu'u̱. Juan caca naa yu, jua'a̱ caca xtañi nu sta nu'u̱ ji'i̱.

SAN LUCAS 1:19

―Gabriel naa na' ―nacui̱ xca̱ ji'i̱ yu li'―. Na ndu̱ ti na' ca slo ycui' Ndyosi; bi' laca nu nda 'na lijya̱a̱ cha' chcui' na' lo'o nu'u̱, cha' ta na' cha' tso'o re lo'o nu'u̱.

SAN LUCAS 1:30

Xa' nchcui' xca̱ bi' lo'o nu cuna'a̱ cuañi' bi' li': ―María ―nacui̱―, ná cutsi̱i̱ nu'u̱ cha' cua nda ycui' Ndyosi sca cha' tso'o hi̱ ―nacui̱ xca̱ bi' ji'i̱―.

SAN LUCAS 2:11

Cua lijya̱ na' cacha' na' ji'i̱ ma̱ cha' juani cua ngula sca cubi' ca quichi̱ tyi ma̱, cha' la cui' quichi̱ tyi jyo'o David laca bi'; cubi' bi' laca nu cuityi̱ qui'ya nu ntsu'u ji'i̱ ma̱. Bi' laca nu Cristo nu laca ycui' nu Xu'na na, nu cua nda ycui' Ndyosi ji'i̱ cha' lijya̱ lo yuu chalyuu ―nacui̱―.

SAN LUCAS 24:47

Li' ntsu'u cha' ta ngu' cha' ji'i̱ ycui' na' lo'o ñati̱ tyucui ña'a̱ chalyuu. Nde Jerusalén xana ma̱ cacha' ma̱ cha' bi' ji'i̱ ngu' clyo. Nga'a̱ cha' chcui' ma̱ lo'o ñati̱ cha' ca tyuju'u ti' ngu' ji'i̱ cha' cuxi nu ntsu'u tyiquee ngu', cha' xtyanu ngu' ji'i̱ cha' cuxi nu ndu'ni ngu'; li' cua'ni clyu ti' ycui' Ndyosi ji'i̱ lcaa qui'ya nu ntsu'u ji'i̱ ngu'.

SAN LUCAS 8:1

Tiya' la li', ndu'u Jesús ndyaa yu tyu̱u̱ tya'a quichi̱, masi quichi̱ tonu, masi quichi̱ sube. Nchcui' tsa yu cha' tso'o ji'i̱ ycui' Ndyosi lo'o ngu' quichi̱ bi'; nchcui' yu cha' cua lijya̱ ti ycui' Ndyosi cha' caca Ni loo ne' cresiya ji'i̱ ñati̱. Stu'ba ndya'a̱ Jesús lo'o nu tii tyucuaa tya'a ngu' nu ndyaca tsa'a̱ ji'i̱.

LOS HECHOS 13:32

’Lo'o juani cua lijya̱ ya ca nde cha' culu'u ya cha' tso'o ji'i̱ ycui' Ndyosi bi' ji'i̱ cu'ma̱. Tya sa'ni la cua ngüiñi cha' ji'i̱ ycui' Ndyosi lo'o jyo'o cusu' ji'na;

ROMANOS 10:15

Pana ná tucui caca ji'i̱ tsaa cha' ta cha' bi' lo'o xa' la ngu' si ná culo Ni cña ji'i̱ cha' tsaa. Ndi'ya̱ nchcui' quityi cusu': “Tso'o tsa nti' na lo'o tyalaa ngu' slo na cha' ta ngu' cha' tso'o ji'i̱ ycui' Ndyosi lo'o na, cha' culu'u ngu' ñi'ya̱ caca cha' ti̱ ti tyi'i̱ tyiquee na”. Jua'a̱ nchcui' quityi.

EFESIOS 3:8

Ná tso'o la na' tsiya' ti que cua ña'a̱ ca ñati̱ nu ngusñi cha' ji'i̱ ycui' Ndyosi, tso'o la ngu' bi' que na'; pana nda Ni chacuayá' cha' tsa'a̱ slo ñati̱ nu ndi'i̱ xa' tsu'. Tso'o tsa cña nda Ni 'na, cha' cacha' na' cha' tso'o bi' ji'i̱ ngu', masi tya lyiji tsa cha' tye ca cuayá' ti' ycui' na' lcaa cha' tso'o nu ndu'ni Cristo lo'o ñati̱.

COLOSENSES 1:23

Pana juani ña'a̱ ti ndulo tsa cha' ji'i̱ ma̱ cha' tyanu tachaa la cha' ji'i̱ Cristo ne' cresiya ji'i̱ ma̱, cha' ycui' yu bi' laca su̱u̱ lcaa cha' bi'. Ná ta ma̱ chacuayá' cha' cñilo'o ngu' ji'i̱ ma̱, cha' si jua'a̱, nga'aa culacua ti' ma̱ ji'i̱ cha' tso'o nu tyacua ji'i̱ ma̱ nde loo la, la cui' cha' nu cua ndyuna ma̱ ji'i̱ tya clyo. Xqui'ya cha' tso'o ji'i̱ Cristo bi', bi' cha' ndya'a̱ ngu' tyucui ña'a̱ chalyuu nchcui' ngu' cha' bi' lo'o ñati̱. Lo'o jua'a̱ na', Pablo, ndya'a̱ tsa na' lo cña bi'.