SAN LUCAS 19:9 - Chatino Tataltepec

⁹ ―Juani cua ngulaá ngu' nu ndi'i̱ ni'i̱ re ji'i̱ nu cuxi nu ntsu'u ji'i̱ ngu' ―nacui̱ Jesús li'―, cha' jua'a̱ nu qui'yu re ni, tya'a ñati̱ na lo'o jyo'o Abraham laca yu.

SAN LUCAS 19:9 Iomraidhean Croise

SAN LUCAS 13:16

Lo'o jua'a̱ nu cuna'a̱ re nu la cui' tya'a ñati̱ ji'i̱ jyo'o Abraham ni, cua ti'ñu xna yija̱ nguta'a̱ ma' ndatsaa Satanás ji'i̱ ma'. ¿Ha ná tso'o nti' ma̱ si cua'ni lyaá na' ji'i̱ ma', masi tsa̱ ta'a? ―nacui̱ Jesús.

SAN LUCAS 13:30

Lo'o li' nde loo la caca xi ngu' nu tyu'u tucua su cua tye ti cha'; jua'a̱ nde chu̱' la tyanu xi ngu' nu ndu'u tucua clyo.

SAN LUCAS 16:24

Li' ngusi'ya nu culiya' bi' ji'i̱ Abraham: “Sti ya Abraham, cua'ni tya'na ti' nu'u̱ jna'. Ta nu'u̱ ji'i̱ Lázaro jua cha' ca̱a̱ ca̱lo'o xi hitya cha' co'o na', masi lo'o sne ti yu cuicha' yu xi tu'ba na' cha' ca'ya tyacala' xi ltse' na', cha' lye tsa tyique' nti' na' su ntsu'u na' lo quii' re.”

SAN LUCAS 16:30

Li' nguxacui̱ nu culiya' bi' cha' ji'i̱: “Tso'o lacua, sti na' Abraham. Pana si tsaa sca ngu' jyo'o re ca su ndi'i̱ ngu', li' culochu̱' ngu' cha' cuxi nu ndyu'ni ngu'.”

SAN LUCAS 2:30

Lo'o si'yu cloo ycui' ca na' cua na'a̱ na' ji'i̱ ycui' nu culo ji'i̱ ñati̱ laja cha' cuxi nu ntsu'u ji'i̱ ngu';

SAN LUCAS 3:8

Tso'o lacua, culu'u ma̱ ji'i̱ ya si chañi cha' cua ngulochu̱' ma̱ cha' cuxi nu ntsu'u ji'i̱ ma̱; ná ñacui̱ ma̱ cha' sñi' ycui' Ndyosi laca ma̱, xqui'ya cha' ndyu'u ma̱ ji'i̱ jyo'o Abraham. Cha' liñi ta na' lo'o ma̱ ―nacui̱ Juan―, cha' taca ji'i̱ ycui' Ndyosi subi Ni ji'i̱ xa' la ñati̱ nu caca sñi' Abraham ñi'ya̱ laca na juani, masi nti' ma̱ cha' na ple ti nu xa' la ñati̱ bi', masi nti' ma̱ cha' ñi'ya̱ laca quee re, jua'a̱ ti laca ngu' ―nacui̱ Juan ji'i̱ ngu'―.

ROMANOS 4:16

Ngüiñi cha' ji'i̱ Ni lo'o jyo'o Abraham lo'o ngusñi ti yu cha' ji'i̱ Ni, cha' caca cuayá' ti' lcaa na cha' xcui' cha' tso'o ntsu'u tyiquee Ni; bi' cha' nda Ni cha' bi' lo'o na. Ndyanu cha' bi' ji'i̱ lcaa ñati̱ ji'i̱ Abraham nu cala chalyuu ca nde loo la. Ni si'i tsa lo cua ti ñati̱ nu taquiya' ji'i̱ cha' cusu' ti laca nu tyanu cha' tso'o bi' ji'i̱, la cui' jua'a̱ tyanu cha' bi' ji'i̱ lcaa ñati̱ tya'a na nu xñi na cha' ji'i̱ ycui' Ndyosi ñi'ya̱ ngusñi ycui' Abraham cha' ji'i̱ Ni; jua'a̱ nti' na lo'o nacui̱ na cha' sti lcaa na ngua jyo'o Abraham bi' cuentya ji'i̱ ycui' Ndyosi.

GÁLATAS 3:14

Jua'a̱ ngua cha' lo'o ngu' xa' tsu' caja cha' tso'o ji'i̱ ngu' xqui'ya Jesucristo, cha' tso'o nu cua ngüiñi ji'i̱ ycui' Ndyosi lo'o nu jyo'o Abraham bi' nu ngua sa'ni. Li' caca ji'i̱ ngu' xa' tsu' ñi'ya̱ nu nchcui' ycui' Ndyosi lo'o Abraham, cha' caja Xtyi'i ycui' Ni ji'i̱ lcaa na nu lo'o xñi na cha' ji'i̱ Cristo.

GÁLATAS 3:29

Nu lo'o ngusñi na cha' ji'i̱ ycui' Cristo, li' la cui' jua'a̱ laca na ñati̱ nu ndyu'u ji'i̱ jyo'o Abraham, masi tiya' la ñaa na chalyuu. Su cua ndye, li' tyanu cha' ji'na, lcaa ña'a̱ cha' nu cua ngüiñi ji'i̱ ycui' Ndyosi lo'o nu Abraham bi' cua sa'ni la cha' tyacua ji'na.

GÁLATAS 3:7

Lo'o jua'a̱ nga'a̱ cha' ca cuayá' ti' ma̱ cha' cua ña'a̱ ca ñati̱ nu ngusñi cha' ji'i̱ Cristo, chañi cha' laca ñati̱ bi' ñi'ya laca ngu' judío, cha' ndyu'ni ngu' bi' la cui' ñi'ya̱ nu ngua'ni jyo'o Abraham, masi tyempo juani.

1 PEDRO 2:10

Nu juani laca ma̱ ñati̱ ji'i̱ ycui' Ndyosi, masi nu ngua tya tsubi' la ná ntsu'u cha' ji'i̱ ma̱ lo'o ycui' Ndyosi tsiya' ti. Lo'o jua'a̱ cua nchca cuayá' ti' ma̱ juani cha' ndyu'ni tya'na tsa ti' Ni ji'i̱ ma̱, masi tya tsubi' la ná nchca cuayá' ti' ma̱ cha' ji'i̱ ycui' Ndyosi tsiya' ti.