SAN LUCAS 16:23 - Chatino Tataltepec

²³ Pana nu lo'o cua ntsu'u nu culiya' bi' su nchcube' yu ca bilyaa, li' ngusicua̱ hique yu na'a̱ yu ji'i̱ jyo'o cusu' Abraham tyijyu' ti, lo'o jua'a̱ na'a̱ yu cha' stu'ba ti ntucua jyo'o Lázaro lo'o.

SAN LUCAS 16:23 Iomraidhean Croise

SAN MATEO 11:23

Lo'o cu'ma̱ ngu' Capernaum ni, ¿ha tso'o tsa quichi̱ tyi ma̱ nti' ma̱? ¿Ha laca quichi̱ tyi ma̱ loo ji'i̱ xa' quichi̱ nti' ma̱? Pana nde loo la quiñu'u̱ tsiya' ti quichi̱ tyi ma̱, tyaa ycui' ma̱ ca bilyaa li'. Quiña'a̱ tsa cha' tlyu ngua'ni na' slo cu'ma̱, lo'o ná jlya ti' ma̱ 'na tsiya' ti. La cui' jua'a̱ nu ngua sa'ni, xña'a̱ tsa ngua ngu' quichi̱ Sodoma; pana ná na'a̱ jyo'o ngu' bi' cha' tlyu ñi'ya̱ nu cua na'a̱ cu'ma̱ ngu' Capernaum. Si cua na'a̱ ngu' cha' bi', cua ngua tyuju'u ti' ngu' ji'i̱ cha' cuxi nu ngua'ni ngu' li', cua ngulochu̱' ngu' ji'i̱ cha' cuxi bi'; tya nscua quichi̱ tyi ngu' bi' juani lacua.

SAN MATEO 18:9

La cui' ti cha', masi ndiya tsa ti' ma̱ sca cha' cuxi nu ña'a̱ ma̱ ji'i̱, nga'a̱ cha' xtyanu ma̱ cha' bi' tsiya' ti, ñi'ya̱ si culo ma̱ ji'i̱ ycui' cloo ma̱ cha' nga'aa taquiya' ma̱ ji'i̱ cha' cuxi bi' tsiya' ti. Tso'o la xana chalyuu nu ná nga'a̱ cha' tye ji'i̱ ma̱, masi ná lo'o cha' cuxi bi' nu tiji̱' tsa ti' ma̱ ji'i̱, cha' li' ná tsaa ma̱ nde ca bilyaa su ná tye tsiya' ti cha' tyaqui̱ quii'.

SAN MATEO 23:33

’¡Ñi'ya̱ nti' cuaña, jua'a̱ nti' cu'ma̱! Tajua' tsa ndyu'ni ma̱ cha' cuxi. ¿Ha nti' ma̱ cha' clyaá ma̱ ji'i̱ ycui' Ndyosi cha' ná chcube' ma̱ ca bilyaa? Ná taca ji'i̱ ma̱ jua'a̱.

SAN MATEO 5:22

Pana quiña'a̱ la cha' chcui' na' lo'o ma̱ juani: masi ca ti'í ti' ngu' ji'i̱ tya'a ñati̱, li' ntsu'u cha' chcube' ngu' bi'; masi na chcui' ti ngu' cha' cuxi ji'i̱ tya'a ñati̱, ntsu'u cha' tsaa ngu' bi' slo ngu' nu laca loo ca Jerusalén, cha' caca cuayá' ji'i̱ ngu' cajua li'. Lo'o jua'a̱ si ñacui̱ ngu' ji'i̱ tya'a ñati̱: “¡Na ple tsa nu'u̱! ¡Na tonto tsa hique nu'u̱!” lo'o ñasi̱' tsa ngu' ji'i̱ tya'a ñati̱, li' nga'a̱ cha' tsaa ngu' bi' ca bilyaa su ná tye cha' tyaqui̱ quii'.

SAN MATEO 5:29

’Tso'o la si culo ma̱ si'yu cloo ma̱ la'a tsu' cui̱, xcua̱a̱ ma̱ ji'i̱ li', si si'yu cloo ma̱ ndacui qui'ya cha' ndu'ni ma̱ cha' cuxi. Masi cuityi̱' ma̱, tyanu lubii cresiya ji'i̱ ma̱ li', cha' ná tsaa ma̱ su lye ndyaqui̱ quii' ca bilyaa.

SAN MATEO 8:29

Lo'o li' ngua'ni cui'i̱ xña'a̱ cha' cui̱i̱ tsa ngusi'ya ngu' quicha bi': ―¿Ni cha' ndya'a̱ nu'u̱ slo cua, Jesús? ―nacui̱ ngu' quicha ji'i̱―. Nu'u̱ laca nu sca ti Sñi' ycui' Ndyosi. ¿Ha xcube' nu'u̱ ji'i̱ cua nti' nu'u̱, masi si'i tyempo juani caca cha' nchcube' bi'?

SAN LUCAS 16:24

Li' ngusi'ya nu culiya' bi' ji'i̱ Abraham: “Sti ya Abraham, cua'ni tya'na ti' nu'u̱ jna'. Ta nu'u̱ ji'i̱ Lázaro jua cha' ca̱a̱ ca̱lo'o xi hitya cha' co'o na', masi lo'o sne ti yu cuicha' yu xi tu'ba na' cha' ca'ya tyacala' xi ltse' na', cha' lye tsa tyique' nti' na' su ntsu'u na' lo quii' re.”

SAN LUCAS 16:28

ca su ntsu'u ca'yu tya'a ngu' tya'a na', cha' chcui' yu lo'o ngu', cha' ná ca̱a̱ ngu' ca nde su ntsu'u na' nchcube' na'.”

SAN LUCAS 8:28

Lo'o cua na'a̱ yu ji'i̱ Jesús, li' cui̱i̱ ngusi'ya yu, nclyú yu nde loo Jesús. ―¿Na laca cua'ni nu'u̱ lo'o na', cusu' Jesús? ―nacui̱ yu quicha bi'―. Jlo ti' na' cha' nu'u̱ laca Sñi' ycui' Ndyosi nu laca loo la. Cua'ni nu'u̱ cha' clyu ti' jna', ná cua'ni nu'u̱ cha' ti'í lo'o na' ―nacui̱ yu quicha bi' ji'i̱ Jesús.

1 CORINTIOS 15:55

nga'aa caca cua'ni nu xña'a̱ ngana ji'na cha' cajaa na, nga'aa caca cua'ni lya' ti' cha' ti'í bi' ji'na juani”, nacui̱ quityi bi'.

2 PEDRO 2:4

Nu cua sa'ni ni, ná ngua'ni clyu ti' ycui' Ndyosi ji'i̱ nu ngu' xca̱ ji'i̱ Ni nu ntsu'u qui'ya ji'i̱; nguxcua̱a̱ Ni ji'i̱ ngu' xca̱ nu xña'a̱ bi', ndyaa ngu' nde ca bilyaa, ca su talya ña'a̱ tsiya' ti. Ndyaaca̱' ngu' xca̱ bi' lo'o ju̱u̱ chcua̱, cha' ca bi' tyanu ngu' ña'a̱ cuayá' nu cua'ni cuayá' Ni ji'i̱ lcaa ñati̱ chalyuu, lo'o ji'i̱ ngu' xca̱ bi'.

APOCALIPSIS 20:10

Lo'o li' tyucua ya' Ni ji'i̱ nu xña'a̱ nu ngüiñilo'o ji'i̱ ngu' tya clyo, tyalo'o Ni ji'i̱ lo tayu' su ntsu'u quii' ndyaqui̱ lo'o yuu sufri; la cui' se'i̱ laca su cua nchcua̱a̱ Ni ji'i̱ nu na'ni chiya'a̱ ña'a̱ bi', su cua nchcua̱a̱ Ni ji'i̱ nu cuiñi nu nacui̱ cha' tu'ba ji'i̱ ycui' Ndyosi laca. Tsa̱ lo'o talya ná tye cha' ti'í tsa chcube' ngu' ca bi'.