SAN LUCAS 11:32 - Chatino Tataltepec

³² Lo'o jua'a̱ lo'o ngu' jyo'o quichi̱ Nínive ni, sta ngu' qui'ya ji'i̱ cu'ma̱ tsa̱ bi' lo'o cua'ni cuayá' ycui' Ni ji'i̱ cu'ma̱. Cua ndyuna ngu' Nínive bi', nu lo'o nchcui' Jonás lo'o ngu' chacuayá' ji'i̱ ycui' Ndyosi; ngua tyuju'u ti' ngu' bi', nguxtyanu ngu' lcaa cha' cuxi nu ntsu'u ji'i̱ ngu' li'. Pana cu'ma̱ ni, ná ntaja'a̱ ma̱ cuna ma̱ cha' nu nda na' lo'o ma̱, masi tlyu la cña ndyu'ni ycui' Ndyosi juani; xti la cha' ngua lo'o ndyaa jyo'o Jonás ca Nínive tyempo bi'.

SAN LUCAS 11:32 Iomraidhean Croise

SAN MATEO 12:39

Li' nguxacui̱ Jesús cha' ji'i̱ ngu' bi': ―Na xña'a̱ tsa ma̱ ca ta'a ma̱, cha' xcui' ndijña ma̱ cha' cua'ni na' sca cha' tlyu cha' ña'a̱ cui'ya ma̱ ji'i̱; laca ma̱ ñati̱ nu ná jlya ti' ji'i̱ ycui' Ndyosi tsiya' ti ―nacui̱ Jesús ji'i̱ ngu'―. Pana ná cua'ni na' jua'a̱. Nga'a̱ cha' tyi'u ti' ma̱ na laca ngua ji'i̱ jyo'o Jonás nu ngua tu'ba ji'i̱ ycui' Ndyosi cua sa'ni la.

SAN MATEO 12:41

Lo'o tyalaa tsa̱ nu cua'ni cuayá' ycui' Ndyosi ji'i̱ lcaa ñati̱, li' sta jyo'o ngu' Nínive qui'ya ji'i̱ cu'ma̱ nu lu'ú chalyuu juani. Cacha' ngu' jyo'o bi' lcaa ña'a̱ cha' nu ndyuna ngu', cha' nu nda jyo'o Jonás lo'o ngu' tyempo bi', cha' li' ngua tyuju'u ti' ngu' ji'i̱ lcaa cha' cuxi nu ngua'ni ngu'; nguxtyanu ngu' ji'i̱ cha' cuxi bi' xqui'ya cha' cua ngusñi ngu' cha' ji'i̱ ycui' Ni. Pana ná stu'ba cha' nu ngulu'u jyo'o Jonás bi' ji'i̱ ngu' sa'ni lo'o cha' nu nclyu'u na' ji'i̱ ma̱ juani; tlyu la cha' ji'i̱ ycui' Ndyosi laca nu nclyu'u na' ji'i̱ ma̱ juani, pana ná nduna cu'ma̱ cha' bi' tsiya' ti.

SAN LUCAS 11:31

Lo'o jua'a̱ cua laca ntsu'u yabe' ji'i̱ cu'ma̱ ñati̱ chalyuu ca slo ycui' Ndyosi lo'o tye chalyuu xqui'ya cha' cuxi nu ngua'ni ma̱; li' tyu'u tucua sca jyo'o cusu' nu ngua reina nu ngua loo chalyuu sa'ni la, cha' sta ma' qui'ya ji'i̱ ma̱ slo ycui' Ni. Li' chcui' ma' cusu' bi' ñi'ya̱ ngua lo'o ndyaa ycui' ma' slo jyo'o rey Salomón. Tyijyu' tsa quichi̱ tyi ma' reina bi', pana cua ngujui cha' ji'i̱ ma' cha' ngua tsa ji'i̱ nu rey Salomón bi', cha' tso'o tsa cui̱i̱ nda yu lo'o ñati̱; bi' cha' ndyalaa ma' slo rey bi' li', cha' cuna ma' cui̱i̱ nu nda rey bi'. Pana cu'ma̱ ni, ná ntaja'a̱ ma̱ cuna ma̱ cha' ji'i̱ ycui' Ndyosi, masi tlyu la cña ndyu'ni Ni juani, cha' ndi'i̱ na' chalyuu; xti la cha' ngua ji'i̱ jyo'o Salomón tya li'.

HEBREOS 7:26

Xñi na cha' ji'i̱ Jesús lacua; bi' laca sti jo'ó nu laca loo la, nu chañi cha' taca xtyucua ji'na. Ñati̱ lubii tsiya' ti laca Ni, cha' ná ntsu'u cha' cuxi, ná ntsu'u qui'ya ji'i̱ Ni. Xa' ña'a̱ laca Jesús, nu ná nda ycui' Ndyosi chacuayá' cha' tyanu yu slo ñati̱ chalyuu nu ndu'ni tsa cha' cuxi; cua nda Sti yu su tyucua yu la cui' su tlyu ca su ntucua ycui' Ndyosi Sti yu.