SAN JUAN 9:4 - Chatino Tataltepec

⁴ Lo'o tya xee nga'a̱ cha' cua'ni na cña ―nacui̱ Jesús―, lo'o cua ndyaa cuichaa nga'aa caca cua'ni ni sca na cña li'. Lo'o jua'a̱ laca lo'o na' ―nacui̱―, nga'a̱ cha' cua'ni na' lcaa ña'a̱ cña nu ngulo ycui' Ndyosi jna' lo'o nda Ni jna' lijya̱ na' ca nde ―nacui̱ Jesús―.

SAN JUAN 9:4 Iomraidhean Croise

SAN MATEO 20:7

“Ná ntsu'u ñati̱ nu nti' msu juani”, nacui̱ ngu' ji'i̱. “Yaa clya ma̱ cua'ni ma̱ xi cña ne' lo'o 'na lacua”, nacui̱ xu'na msu bi' ji'i̱ ngu' li'.

SAN MARCOS 3:3

Lo'o li' nchcui' yu lo'o nu quicha bi': ―Ca̱a̱ nu'u̱, tyu̱ cla'be ne' laa re ―nacui̱ Jesús ji'i̱.

SAN JUAN 10:32

Li' nchcui' yu lo'o ngu' bi': ―Cua quiña'a̱ tsa cña tso'o ngua'ni na' chacuayá' ji'i̱ Sti na' slo cu'ma̱, lo'o jua'a̱ cua na'a̱ ma̱ cña nu ngua'ni na'. ¿Ha xqui'ya sca cña tso'o nu ngua'ni na', bi' cha' nti' ma̱ cuta ma̱ quee 'na?

SAN JUAN 10:37

Ná ntsu'u cha' jlya ti' ma̱ jna' ―nacui̱ Jesús li'―, si ná ndu'ni na' cua ña'a̱ ca cña nu ndu'ni Sti na' ―nacui̱―.

SAN JUAN 12:35

Li' nguxtyacui Jesús cha' lo'o ngu': ―Tya xi ca tsa̱ tya tyi'i̱ na' slo cu'ma̱, na' nu ta̱ xee nu tyu'ú ne' cresiya ji'i̱ ñati̱ ―nacui̱ Jesús―. Bi' cha' juani yaa ma̱ su nga'a̱ cha' tsaa ma̱ lo'o tya xee ti, cha' ná cua'ni nu cuxi ngana ji'i̱ ma̱, nu cuxi nu nda talya chalyuu. Nu lo'o talya ña'a̱ su ndya'a̱ na, ná jlo ti' na ma nde ndya'a̱ na li'.

SAN JUAN 17:4

’Nde lo yuu re su nguti'i̱ na' cua ngua'ni na' cha' tlyu tsa laca nu'u̱ ―nacui̱ Jesús―, jua'a̱ cua ndye ngua'ni na' lcaa cña nu nda nu'u̱ 'na cha' cua'ni na' ca nde.

SAN JUAN 4:34

Ndi'ya̱ nacui̱ Jesús ji'i̱ ngu' bi' li': ―Lo'o ndu'ni na' cña ji'i̱ ycui' Ndyosi Sti na', li' ndyaala' ti' na' ñi'ya̱ si cua ndyacu na', ñi'ya̱ si cua ndyo'o na' hitya ―nacui̱ yu―. Nga'a̱ cha' cua'ni tye na' cña nu nda Ni 'na lijya̱a̱ nde chalyuu ―nacui̱―.

SAN JUAN 5:19

Li' nguxacui̱ Jesús cha' ji'i̱ ngu' judío bi': ―Ta na' sca cha' liñi lo'o ma̱ juani ―nacui̱ yu―. Ná sca cña caca cua'ni na' ycui' ti na', na' nu laca̱ Sñi' ycui' Ndyosi. Ñi'ya̱ cña nu ña'a̱ na' cha' ndu'ni Sti na', jua'a̱ ti cña ndu'ni na' ―nacui̱―.

SAN JUAN 5:36

Pana xti ti cha' 'na nchcui' Juan lo'o ma̱; cua quiña'a̱ la cha' caca ña'a̱ ma̱ juani cuentya jna', nu lo'o ña'a̱ ma̱ cña tonu nu nda Sti na' 'na cha' cua'ni na'. Tya cua'ni na' cña bi' ña'a̱ cuayá' tye bi'. Xqui'ya cña bi' caca cuayá' ti' ma̱ cha' ycui' Sti na' ngulo cña jna' cha' ca̱a̱ na' nde chalyuu re ―nacui̱ Jesús―.

SAN JUAN 7:33

Li' nacui̱ Jesús ji'i̱ ñati̱ nu ndi'i̱ ne' laa tonu bi': ―Tya tyi'i̱ na' la xi lo'o ma̱ nde lo yuu chalyuu ―nacui̱―, lo'o li' tya'a na' slo ycui' nu Xu'na na' nu nda 'na lijya̱a̱ ca nde ―nacui̱―.

LOS HECHOS 4:20

Tso'o la nti' ya cha' cua'ni ya cña nu ngulo ycui' Ndyosi ji'i̱ ya; bi' cha' ná tye chca cha' chcui' ya lo'o ñati̱, lcaa cha' nu cua na'a̱ ya ji'i̱ Jesús, lo'o lcaa cha' nu cua ndyuna ya, cha' nu nchcui' yu lo'o ya.

GÁLATAS 6:10

Bi' cha' tso'o si lcaa quiya' lo'o ña'a̱ na ñi'ya̱ caca xtyucua na ji'i̱ cua ña'a̱ ca ñati̱, li' cua'ni clya na cha' xtyucua na ji'i̱ ngu' bi'. Clyo ndu'ni cha' xtyucua na ji'i̱ tya'a na, nu ngu' nu ntsu'u cha' ji'i̱ lo'o Cristo.

EFESIOS 5:16

Clyana ma̱ cha' tso'o nu cua'ni ma̱ laja lo'o ndi'i̱ ma̱ chalyuu, cha' ná tyu'u cha' ji'i̱ ma̱ lo'o cha' cuxi nu ndyu'ni xa' ñati̱ tyempo juani;

COLOSENSES 4:5

Tii ti ti' ma̱ tyi'i̱ ma̱ slo xa' ñati̱ nu bilya xñi cha' ji'i̱ Jesucristo; ná cua'ni ma̱ cha' tonto slo ngu' bi', cha' jua'a̱ lcaa quiya' lo'o ta ngu' tyempo cha' chcui' ma̱ lo'o ngu', li' tso'o tsa ta ma̱ cha' ji'i̱ Jesús lo'o ngu'.