SAN JUAN 9:39 - Chatino Tataltepec

³⁹ Li' nchcui' Jesús lo'o: ―Cua lijya̱ na' chalyuu cha' cua'ni cuayá' na' ji'i̱ ñati̱, tilaca laca nu xñi cha' jna', tilaca laca nu ná tyaja'a̱ xñi cha' jna' ―nacui̱ Jesús―. Ta na' xee nu tyu'ú ne' cresiya ji'i̱ ngu' nu xñi cha' jna', masi ñi'ya̱ nti' cuityi̱' ti ngu' ndi'i̱ ngu' chalyuu; tacu̱' na' xee ji'i̱ ngu' nu ná tyaja'a̱ xñi cha' jna' tsiya' ti, masi ndu'ni ngu' cha' tso'o tsa ycui' ngu'.

SAN JUAN 9:39 Iomraidhean Croise

SAN MATEO 11:5

Cacha' ma̱ cha' nu cua na'a̱ ma̱ ca nde ji'i̱ yu; cacha' ma̱ ji'i̱ cha' ndu'ni na' cha' ndyaca tso'o cloo ngu' nu ngua cuityi̱', cha' ndya'a̱ ngu' nu ngua quicha quiya', cha' ngua lubii cuaña' ngu' nu ndyatsu' cuaña', cha' nduna ngu' nu ngua cu'u̱ jyaca̱, cha' ndyu'ú ngu' chaca quiya' nu cua ngujuii, cha' nchca cuayá' ti' ngu' ti'i ñi'ya̱ nu cua'ni lyaá ycui' Ni ji'i̱ ñati̱ chalyuu ji'i̱ nu cuxi.

SAN MATEO 15:14

Lo'o jua'a̱ ná tso'o ngu' fariseo jua cuentya ji'i̱ ycui' Ni, bi' cha' nga'a̱ cha' xtyanu ma̱ ji'i̱ ngu' bi'; ñi'ya̱ nti' ngu' cuityi̱', jua'a̱ nti' ngu' fariseo jua ―nacui̱ Jesús―. Si culu'u sca nu cuityi̱' tyucui̱i̱ ji'i̱ chaca yu tya'a cuityi̱' ti yu, tyú tyucuaa ngu' sca to' cua'a̱ li', cha' ni tsaca ngu' ná nchca ña'a̱ ngu' tyucui̱i̱ su lijya̱ ngu' li'.

SAN MATEO 6:23

Pana si quicha si'yu cloo na, nga'aa caca cua'ni na cña, cha' talya xee ña'a̱ na li'. Lo'o jua'a̱ ne' cresiya ji'i̱ ma̱ ni, si ndyacu̱' xee ji'i̱ ma̱ cha' ntsu'u chalyuu cuxi ji'i̱ ma̱, nga'aa tyu'u xee ne' cresiya ji'i̱ ma̱ tsiya' ti li'; talya tsa tyanu cresiya ji'i̱ ma̱ li'.

SAN LUCAS 1:79

Li' ta Ni xee bi' cha' tyu'ú ne' cresiya ji'i̱ ngu' nu nga'aa ndyiji ñi'ya̱ cua'ni ngu', cha' talya tsa ña'a̱ ne' cresiya ji'i̱ ngu' bi'. Masi tya lu'ú ngu' bi', pana ñi'ya̱ nti' si na cua ngujuii nti' ngu', xqui'ya cha' cuxi nu ntsu'u ne' cresiya ji'i̱ ngu'. Culu'u Cristo ji'na ñi'ya̱ cua'ni na cha' tyi'i̱ ti̱ ti na lo'o tya'a na. Cua ndye cha' nu nda Zacarías li'.

SAN LUCAS 13:30

Lo'o li' nde loo la caca xi ngu' nu tyu'u tucua su cua tye ti cha'; jua'a̱ nde chu̱' la tyanu xi ngu' nu ndu'u tucua clyo.

SAN LUCAS 2:34

Lo'o li' ngulacua̱ nu cusu' Simeón ji'i̱ ngu' bi'. Nde laca cha' nu nda nu cusu' lo'o María xtya'a̱ Jesús li': ―Quiña'a̱ tsa cha' tso'o caca ji'i̱ ngu' Israel xqui'ya cubi' re ―nacui̱ nu cusu' bi'―, masi ntsu'u ñati̱ nu chi̱i̱ ntsu'u tyiquee ngu' ña'a̱ ngu' ji'i̱, pana ntsu'u ñati̱ nu caja chalyuu cucui ji'i̱ xqui'ya cubi' re. Culo tu̱ cubi' re lcaa cha' nu ntsu'u yacu̱' ne' cresiya ji'i̱ ñati̱; caca cubi' re sca cha' tlyu nu cua nda ycui' Ndyosi ji'i̱ ñati̱, masi ná tyaja'a̱ lcaa ñati̱ tucuá cha' ji'i̱ ―nacui̱ Simeón ji'i̱ María xtya'a̱ cubi' bi'―. Lo'o jua'a̱ jinu'u̱ ―nacui̱ nu cusu' bi'―, tyacua sca cha' xñi'i̱ ti' jinu'u̱ xqui'ya cha' ná taquiya' ngu' ji'i̱ sñi' nu'u̱.

SAN LUCAS 4:18

Cua ngulacua̱ ycui' Ndyosi nu Xu'na na jna', nacui̱ lo quityi bi'. Cua ngua'a̱ loo Ni jna', bi' cha' cua ndi'i̱ Xtyi'i ycui' Ndyosi lo na', cha' chcui' na' cha' tso'o lo'o ngu' ti'i. Cua nda Ni jna' lijya̱a̱ cha' cua'ni cho'o na' tyiquee ñati̱ nu xñi'i̱ tsa ti', nacui̱ lo quityi bi'. Ntsu'u cha' chcui' na' lo'o ngu' nu laca preso ji'i̱ nu xña'a̱, cha' cua tyu'u ti ngu' ya' nu xña'a̱ bi'. Ta na' xee nu tyu'u ne' cresiya ji'i̱ ñati̱ nu ndyacu̱' hique ngu'. Lo'o lya' tsa ti' ngu' ji'i̱ tya'a ngu' ni, li' ta na' chacuayá' ji'i̱ ngu' cha' tyu'u ngu' laja ti.

SAN LUCAS 7:21

Nu lo'o ndi'i̱ ngu' bi' slo Jesús, li' ngua'ni Jesús jo'o ji'i̱ tyu̱u̱ tya'a ñati̱; masi cua sa'ni ngusñi quicha ji'i̱ ngu', masi quicha ndya'a̱ ti, masi ngusñi cui'i̱ cuxi ji'i̱ ngu', hora ti ndyaca tso'o ngu' bi'. Lo'o nu cuityi̱', ngua'ni Jesús cha' ngulane xee cloo ngu' ña'a̱ ngu' chaca quiya'.

SAN JUAN 12:31

Cua ndyalaa hora cha' cua'ni cuayá' Ni ji'i̱ lcaa ñati̱ chalyuu, nu lo'o tyiji̱loo na' tsiya' ti ji'i̱ nu xña'a̱ nu laca loo nde chalyuu ―nacui̱ Jesús ji'i̱ ngu'―.

SAN JUAN 12:46

Cua lijya̱ na' chalyuu cha' caca na' ñi'ya̱ laca sca xee nu tyu'ú ne' cresiya ji'i̱ ñati̱. Lo'o xñi ñati̱ cha' jna', li' nga'aa tyi'i̱ ngu' chalyuu ñi'ya̱ laca si ná ntsu'u xee ne' cresiya ji'i̱ ngu' xqui'ya cha' cuxi nu ndu'ni ngu'.

SAN JUAN 3:17

Si'i cha' sta ycui' Ndyosi Sti na' qui'ya ji'i̱ ñati̱ chalyuu nda Ni jna' lijya̱ na' chalyuu, na cua lijya̱ na' cha' cuityi̱ na' qui'ya nu ntsu'u ji'i̱ ñati̱ chalyuu; bi' cha' cua nda Ni jna' lijya̱ na' ―nacui̱ Jesús―.

SAN JUAN 3:19

Na cua nda ycui' Ndyosi xee lijya̱ lo yuu, pana ná ntaja'a̱ ñati̱ chalyuu tyi'i̱ su xee bi'. Ntsu'u tsa ngu' nu ndiya la ti' tyi'i̱ ngu' su talya ña'a̱, cha' xña'a̱ tsa ngu' bi'; bi' cha' ntsu'u qui'ya nu ngusta Ni ji'i̱ ngu' bi'.

SAN JUAN 8:12

Chaca quiya' nda Jesús cha' lo'o ngu' ne' laa bi'. ―Na' laca̱ nu nda̱ xee cha' tyu'ú ne' cresiya ji'i̱ ñati̱ ―nacui̱ yu―. Tyanu xee lubii jna' ne' cresiya ji'i̱ ñati̱ nu xñi cha' jna', lo'o jua'a̱ ná nga'a̱ cha' tye chalyuu ji'i̱ ngu' bi' li'; nga'aa ntsu'u cha' tya'a̱ yu'u ngu' bi', ñi'ya̱ nu ndu'ni ngu' nu ná ntsu'u xee jna' ne' cresiya ji'i̱ tsiya' ti.

SAN JUAN 8:15

Cua laca ngusta ma̱ yabe' chu̱' na'. Lo'o ndyu'ni ma̱ jua'a̱, ndyu'ni ma̱ ñi'ya̱ ndu'ni ñati̱ chalyuu ti. Si'i na lijya̱ na' chalyuu cha' sta na' yabe' chu̱' ñati̱ ―nacui̱―,

SAN JUAN 9:25

―Ná nda na' cuentya si ntsu'u qui'ya ji'i̱ yu ―nacui̱ nu ngua cuityi̱' bi'―. Jlo ti' na' cha' cuityi̱' na' clyo, lo'o juani cua ntsu'u xee cloo na'. Tsa bi' ti cha' jlo ti' na'.

LOS HECHOS 26:18

cha' ñi'ya̱ si ndya'a̱ ngu' cuityi̱', jua'a̱ ndya'a̱ ñati̱ bi' chalyuu; ñi'ya̱ si talya tsa ña'a̱ su ndya'a̱ ngu', jua'a̱ ndyu'ni ngu' bi'. Bi' cha' ntsu'u cha' culu'u nu'u̱ cha' jna' ji'i̱ ngu' bi', cha' xñi ngu' cha' jna'. Li' nga'aa tya'a̱ ngu' su talya ña'a̱, ñi'ya̱ si cuityi̱' ti ngu'; taca tya'a̱ ngu' tyucui̱i̱ su xee cuentya ji'i̱ ycui' Ndyosi, taca ña'a̱ ngu' li'. Satanás laca nu nclyo cña ji'i̱ ngu' bi' juani, pana ca li' caca ngu' ñati̱ ji'i̱ ycui' Ndyosi. Ntsu'u cha' xñi ngu' bi' cha' jna', cha' taca cui'ya ycui' Ni cha' clyu ti' ji'i̱ cha' cuxi nu ntsu'u ji'i̱ ngu' bi'. Li' caca stu'ba cha' ji'i̱ ngu' bi' lo'o ñati̱ nu cua lubii cresiya ji'i̱ xqui'ya na'”, nacui̱ ycui' Jesús 'na li'.

2 CORINTIOS 2:16

Ñati̱ nu chiya'a̱ tsa ndu'ni ni, ná ndiya' ti' ngu' cha' nu nchcui' na tsiya' ti; na ndacane la cha' bi' ji'i̱ ngu' cha' cua chcuna' ti chalyuu ji'i̱ ngu' xqui'ya cha' cuxi nu ndyu'ni ngu'. Pana ñati̱ nu nti' clyaá ji'i̱ nu cuxi ni, xa' ña'a̱ ndu'ni ngu' bi'; cua jlo ti' ngu' cha' ntsu'u chaca chalyuu tso'o la nu caja ji'i̱ ngu'. Ntsu'u tsa ñati̱ nu ná caca cua'ni cña bi'; pana cuare ni, taca cua'ni ya ji'i̱ chacuayá' ji'i̱ ycui' Ndyosi.

EFESIOS 5:14

Bi' cha' ndi'ya̱ nchcui' quityi cusu': Quee ti' cu'ma̱, cha' ñi'ya̱ laca si na laja' ma̱, si na ngujuii ma̱, jua'a̱ laca ma̱ xqui'ya qui'ya nu ntsu'u ji'i̱ ma̱. Nga'aa tyu'u cha' ji'i̱ ma̱ lo'o cha' cuxi, cha' li' taca ta Cristo xee nu tyu'ú ne' cresiya ji'i̱ ma̱. Jua'a̱ nscua lo quityi.

2 TESALONICENSES 2:10

Tucua cha' ntsu'u tyiquee yu bi', pana ca jlya ti' ñati̱ chalyuu ji'i̱ lcaa cha' cuiñi nu chcui' yu bi', jlya ti' ngu' xqui'ya cha' cua tsaa ti ngu' ca bilyaa; ná nti' ngu' bi' xñi ngu' cha' tso'o nu caca cua'ni lyaá ji'i̱ ngu',

1 PEDRO 2:9

Pana cu'ma̱ ni, cua ngusubi ycui' Ndyosi ji'i̱ cu'ma̱ cha' caca ma̱ ña'a̱ tsaca taju ñati̱ nu ndyu'ni tlyu ji'i̱ ycui' Ni. Laca ma̱ ñi'ya̱ laca sca latya sti jo'ó nu cuentya ji'i̱ ycui' Ndyosi nu laca loo tsiya' ti; ñi'ya̱ tsaca taju ñati̱ lubii laca ma̱ cha' cua'ni tlyu ma̱ ji'i̱ ycui' Ndyosi lcaa tsa̱. Ndu'ni Ni lo'o ma̱: “Ñati̱ 'na laca ma̱”, nacui̱ Ni. Bi' cha' nti' tsa Ni cha' chcui' ma̱ lo'o lcaa ñati̱ lcaa ña'a̱ cha' tso'o nu ngua'ni ycui' Ndyosi lo'o ma̱; cua ngulo Ni ji'i̱ ma̱ ji'i̱ chalyuu cuxi su talya tsa ña'a̱, cha' tya'a̱ ma̱ ca su ndubi tsa xee ji'i̱ ycui' Ni.

1 JUAN 2:11

Ñati̱ nu ti'í ti' ji'i̱ tya'a ñati̱ ni, tya ntsu'u tsa cha' cuxi ne' cresiya ji'i̱ ngu' bi'; ñi'ya̱ nti' ngu' lo'o ndi'i̱ ngu' su talya ña'a̱, jua'a̱ ti nti' ngu' bi' ndi'i̱ ngu' chalyuu, cha' ná nchca quije tyucui̱i̱ liñi su tsaa ngu', cha' lye tsa ndacu̱' talya xee nu ña'a̱ ngu' bi' li'.