SAN JUAN 7:31 - Chatino Tataltepec

³¹ Masi jua'a̱ ngua'ni ngu' bi', tya ndi'i̱ quiña'a̱ ñati̱ nu ngusñi cha' ji'i̱ yu. Nchcui' ngu' lo'o tya'a ngu' li': ―La cui' ña'a̱ cña tonu cuentya ji'i̱ ycui' Ndyosi ndu'ni yu re, ñi'ya̱ nu nscua lo quityi cha' cua'ni nu ñati̱ tlyu nu cua ca̱a̱ ti; bi' laca yu re, nti' ya ―nacui̱ ngu'.

SAN JUAN 7:31 Iomraidhean Croise

SAN MATEO 12:23

Ndube tsa ti' lcaa ngu' nu na'a̱ ji'i̱ cha' bi' li'. ―¿Ha la cui' nu ñati̱ tya'a ji'i̱ jyo'o David bi' laca nu qui'yu re? ―nacui̱ ngu' ji'i̱ tya'a ngu'.

SAN LUCAS 8:13

Ñi'ya̱ laca nu chaca ycu' si'yu nu ndyú lo yuu lati tu'ba chu̱' quee, jua'a̱ laca lo'o ñati̱ nu tso'o tsa ntsu'u tyiquee ngu' lo'o ndyuna ngu' cha' tso'o bi' nquicha'. Pana ñi'ya̱ nti' nu calya sube bi', cha' ná qui'ñi ndyaa quiche su̱u̱ chu̱' quee bi', jua'a̱ nti' ñati̱ bi', cha' xti ti tyempo ndalo ngu' lo'o ngusñi ngu' cha' tso'o bi'; lo'o lya' ti' xa' ñati̱ ji'i̱ ngu' bi', yala ti tya'a̱chu̱' ngu' li'.

SAN JUAN 11:45

Lo'o li' quiña'a̱ tya'a ngu' judío bi' jlya ti' ngu' ji'i̱ Jesús, ñati̱ nu ndi'i̱ nxtyucua ji'i̱ María tsa̱ la, cha' cua na'a̱ ngu' cha' tlyu nu ngua'ni ca ti Jesús cuentya ji'i̱ ycui' Ndyosi.

SAN JUAN 12:11

cha' xqui'ya nu Lázaro bi', bi' cha' nguxtyanu quiña'a̱ tya'a ngu' judío ji'i̱ sti jo'ó, cha' ngusñi ngu' cha' ji'i̱ Jesús.

SAN JUAN 12:42

Lo'o jua'a̱ ngua, ndi'i̱ xi ngu' nu laca cña nu jlya ti' ji'i̱ Jesús; pana ntsi̱i̱ ngu' bi' ji'i̱ ngu' fariseo, bi' cha' ná ntaja'a̱ ngu' chcui' ngu' cha' ji'i̱ Jesús ca slo ñati̱. Ntsi̱i̱ ngu' si cua'a ngu' fariseo ji'i̱ ngu' cha' nga'aa ca tsaa ngu' ne' laa ji'i̱ tya'a ngu' judío.

SAN JUAN 2:11

Ca quichi̱ Caná nde loyuu su cuentya Galilea ngua cha' bi' lo'o nguxana ngua'ni Jesús cha' tlyu cuentya ji'i̱ ycui' Ndyosi. Lo'o cha' tlyu bi' ngulu'u loo ycui' Jesús ji'i̱ ngu', cha' ña'a̱ ngu' cha' tlyu tsa cha' nu ntsu'u ji'i̱ ycui' yu. Bi' cha' nguxana ngu' nu ndyaca tsa'a̱ ji'i̱ yu, jlya ti' ngu' ji'i̱ ycui' ca Jesús.

SAN JUAN 3:2

Ndyaa nu cusu' bi' sca talya su nga'a̱ Jesús: ―Mstru Jesús ―nacui̱―, jlo ti' ngu' cha' nu'u̱ laca sca mstru nu nda ycui' Ndyosi ji'i̱ lijya̱ chalyuu, cha' ná ngua jinu'u̱ cua'ni ni sca cha' tlyu si ná nxtyucua ycui' Ndyosi jinu'u̱. Ná nchca ji'i̱ ñati̱ chalyuu cua'ni ngu' jua'a̱ ―nacui̱ Nicodemo ji'i̱ Jesús.

SAN JUAN 4:29

―Cajua ti ndu̱ sca ñati̱ nu tii tsa ―nacui̱ nu cuna'a̱ bi'―. Lcua ti lo cña nu ngua'ni na' ya̱a̱ na' chalyuu, lcaa cha' bi' cua ndacha' nu cusu' bi' jna'. ¿Ha bi' nu laca Cristo nu ñati̱ tlyu nu cua ca̱a̱ ti, nti' cu'ma̱?

SAN JUAN 4:39

Lo'o jua'a̱ tyu̱u̱ tya'a ngu' Samaria, ngu' ca tyi ni, cua ngusñi ngu' cha' ji'i̱ Jesús xqui'ya cha' nu nda nu cuna'a̱ bi' lo'o ngu': “Lcua ti lo cña nu ngua'ni na' ya̱a̱ na' chalyuu, lcaa cha' bi' nchcui' nu cusu' bi' lo'o na'”, nacui̱ nu cuna'a̱ bi' ji'i̱ ngu'.

SAN JUAN 6:2

Tsa tlyu ti ndyaa lca'a̱ quiña'a̱ ñati̱ ji'i̱ yu, bi' ñati̱ laca nu cua na'a̱ cña tonu nu ngua'ni yu lo'o ngua'ni yu cha' ndyaca tso'o ngu' quicha.

SAN JUAN 7:26

Lo'o juani ña'a̱ ma̱ ñi'ya̱ nu ndyu'ni yu jua, ndu̱ yu nchcui' yu su ndi'i̱ lcaa ñati̱. Ná nchca ji'i̱ ngu' tsiya' ti cua'a ngu' ji'i̱ yu cha' nga'aa chcui' yu ―nacui̱ ngu' ji'i̱ tya'a ngu'―. ¿Ha ngujui cha' ji'i̱ nu laca loo ji'na lacua, cha' nu jua laca Cristo, nu ñati̱ tlyu nu cua ca̱a̱ ti?

SAN JUAN 9:16

Li' ntsu'u xi ngu' fariseo nu nacui̱: ―Si'i slo ycui' Ndyosi ya̱a̱ nu Jesús bi', bi' cha' ná ndaquiya' yu tsa̱ ta'a ji'i̱ ngu'. Lo'o jua'a̱ ntsu'u xi xa' ñati̱ nu nchcui' ji'i̱ yu ndi'ya̱: ―¿Ñi'ya̱ caca ji'i̱ yu bi' cua'ni yu cña tonu cuentya ji'i̱ ycui' Ndyosi si jua'a̱ ntsu'u tsa qui'ya ji'i̱ yu? Ná stu'ba cha' nu nchcui' ngu' bi' ji'i̱ Jesús.

LOS HECHOS 8:13

Lo'o ycui' Simón ni, ngusñi cha' bi' li', jua'a̱ ntyucuatya Felipe ji'i̱. Li' lcaa tsa̱ ndya'a̱ lca'a̱ ji'i̱ Felipe, cha' ndube tsa ti' Simón lo'o na'a̱ lcaa cña tonu nu ngua'ni nu Felipe bi'.

SANTIAGO 2:26

Lo'o jua'a̱ nu na ni, si ñacui̱ na cha' cua ngusñi na cha' ji'i̱ ycui' Ndyosi, pana ná ndu'ni na cha' tso'o nu xtyucua ji'i̱ tya'a ñati̱ na, li' laca na ñi'ya̱ laca ñati̱ nu ndyaa cresiya ji'i̱ cha' cua ngujuii ngu'.