SAN JUAN 7:16 - Chatino Tataltepec

¹⁶ Li' nda Jesús sca cha' lo'o ngu' nu ndi'i̱ ne' laa bi': ―Ná nclyu'u na' ji'i̱ ngu' cha' nu nda'ya hique ycui' ca ti na'; ña'a̱ cha' nu nclyacua ti' ycui' Ndyosi nu nda 'na lijya̱a̱ chalyuu, bi' laca cha' nu nclyu'u na' ji'i̱ ngu' ―nacui̱ Jesús―.

SAN JUAN 7:16 Iomraidhean Croise

SAN JUAN 14:10

¿Ha ná jlya ti' ma̱ cha' stu'ba ntsu'u cha' 'na lo'o ycui' Ndyosi Sti' na'? Lo'o jua'a̱ lcaa hora ndi'i̱ ycui' Ndyosi Sti na' lo'o na' ―nacui̱―. Si'i cha' nu ngulo hique ti na' nu nchcui' na' lo'o ma̱; stu'ba ntsu'u cha' ji'i̱ Sti na' lo'o na', lo'o ycui' Ni laca nu nclyo cña 'na, ñi'ya̱ nu cua'ni na'.

SAN JUAN 14:24

Pana ñati̱ nu ná ntsu'u tyiquee jna', ná ndaquiya' ngu' tsiya' ti ji'i̱ cha' nu nchcui' na' lo'o ngu'. Cua ndyuna cu'ma̱ cha' nu nda Sti na' 'na cha' culu'u̱ ji'i̱ ma̱, cha' si'i sca cha' nu nda'ya hique ti na' laca cha' nu nda na' lo'o ma̱.

SAN JUAN 17:14

Lcaa cha' nu cua nchcui' nu'u̱ lo'o na', cua nda na' cha' bi' lo'o ngu' bi' ―nacui̱―. Lo'o juani, ñi'ya̱ lo'o liye' ti' ñati̱ chalyuu 'na, jua'a̱ ca liye' ti' ñati̱ ña'a̱ ji'i̱ ngu' bi', xqui'ya cha' ná ntsu'u cha' ji'i̱ ya lo'o nu cuxi nu ntsu'u nde chalyuu.

SAN JUAN 17:8

Lo'o jua'a̱ cua ngulu'u na' ji'i̱ ngu' lcaa cha' nu ngulu'u nu'u̱ 'na ―nacui̱ Jesús―, ndaquiya' tsa ngu' cha' bi' juani. Jlo tsa ti' ngu' cha' ca slo nu'u̱ ngutu'u na' lijya̱a̱, jlya ti' ngu' cha' nu'u̱ laca nu cua nda jna' lijya̱a̱.

SAN JUAN 3:11

Liñi tsa cha' nu nda na' lo'o nu'u̱. Nu cuare, liñi nchcui' ya ji'i̱ sca cha' nu cua jlo ti' ya, sca cha' nu cua na'a̱ ya, pana ná ntucuá ma̱ tsiya' ti cha' nu nchcui' ya ―nacui̱ yu―.

SAN JUAN 3:31

Loo la laca ycui' Cristo cha' ngutu'u yu nde cua̱ ca su ntucua ycui' Ndyosi, ya̱a̱ yu nde chalyuu. Pana nu Juan ni, sñi' sca ñati̱ chalyuu ngua bi'; nde chalyuu ntsu'u tyi, nchcui' ñi'ya̱ nu nchcui' ñati̱ ti. Nu Jesucristo ni, ya̱a̱ yu bi' nde cua̱ ca su ndi'i̱ ycui' Ndyosi,

SAN JUAN 5:30

’Ná sca cña caca 'na si sca ti na' ―nacui̱ Jesús―. Lo'o ndyu'ni cuayá' na' ji'i̱ ñati̱, ndu'ni na' ñi'ya̱ nu nacui̱ Sti na' 'na cha' cua'ni na'. Stu'ba ndu'ni cuayá' na' ji'i̱ cua ña'a̱ ca ñati̱, cha' ndu'ni na' ñi'ya̱ nu nti' ycui' Sti na' nu nda 'na lijya̱a̱ chalyuu; ná ndu'ni na' sca cha' nu nda'ya hique ti na' ―nacui̱ Jesús li'―.

SAN JUAN 6:44

Ná tucui caca ñati̱ jna' si ná lo'o ycui' Ndyosi Sti na' ngua'ni cha' caca ngu' jua'a̱. Lo'o li' na' laca̱ nu cua'ni cha' tyu'ú ngu' bi' chaca quiya' lo'o cua tye ti chalyuu ―nacui̱ Jesús―.

SAN JUAN 8:28

Bi' cha' tya nchcui' la Jesús lo'o ngu' li': ―Tiya' la lo'o sicua̱ ma̱ jna' lo crusi, li' caca cuayá' ti' ma̱ cha' laca na' ñi'ya̱ nu ni na' ji'i̱ ma̱, na' nu lijya̱a̱ chalyuu cha' caca̱ ñati̱ ―nacui̱ Jesús―. Ná sca cña ndu'ni na' chacuayá' ji'i̱ ycui' ca na'; ycui' Ndyosi Sti na', bi' laca nu ngulu'u 'na lcaa ca cha' nu nchcui' na' ―nacui̱―.

2 JUAN 1:9

Lcaa ñati̱ nu tyatí̱ yu'u lo'o xa' la cha', ná ntsu'u cha' ji'i̱ ngu' bi' lo'o ycui' Ndyosi tsiya' ti, cha' ná cuayá' cha' ji'na lo'o jlya ti' na ji'i̱ Cristo, nti' ngu' bi'; pana lo'o cua ngusñi na cha' ji'i̱ Cristo ca ne' cresiya ji'na, li' stu'ba ntsu'u cha' ji'na lo'o ycui' Ndyosi, jua'a̱ lo'o ycui' nu sca ti Sñi' ycui' Ni.

APOCALIPSIS 1:1

Nde nscua na' cha' nu ngulu'u Jesucristo 'na. Juan laca na', lo'o nde nscua na' sca cha' nu ntsu'u yacu̱' ti tya sa'ni la. Tya clyo la cua nda ycui' Ndyosi cha' bi' lo'o Jesús cha' culu'u ji'i̱ ñati̱ ji'i̱ ycui' lcaa ña'a̱ cha' nu cua lijya̱ ti cha' caca nde chalyuu. Li' nda Jesús cha' bi' lo'o na', nu lo'o nda Ni sca xca̱ ji'i̱ Ni nu ngutu'u nde cua̱ ya̱a̱ ca slo na', cha' ndyu'ni na' cña ji'i̱ Ni.