SAN JUAN 5:44 - Chatino Tataltepec

⁴⁴ Bi' cha' ná caja ñi'ya̱ caca xñi ma̱ cha' ji'i̱ ycui' Ndyosi ―nacui̱ Jesús―. Ndulo cha' ji'i̱ ma̱ cha' tso'o ti chcui' ñati̱ ji'i̱ ma̱, pana ná ndulo cha' ji'i̱ ma̱ cha' tso'o ti cua'ni ycui' Ndyosi lo'o ma̱.

SAN JUAN 5:44 Iomraidhean Croise

SAN MATEO 23:5

Lcaa cha' nu ndu'ni nu ngu' bi' ni, ndu'ni ngu' ji'i̱ cha' ña'a̱ ti ñati̱ ji'i̱ ngu'; bi' cha' ndyaaca̱' juata su nscua cha' ji'i̱ ycui' Ndyosi hique ngu', lo'o jua'a̱ scu̱ ngu', cha' nti' ngu' cha' chcui' ñati̱ ji'i̱ ngu' cha' tacati tsa ndu'ni ngu'. Lo'o jua'a̱ nchcu' ngu' bi' payu̱ nu tonu tsa lsu ndacui lo cha' ña'a̱ ñati̱ ji'i̱.

SAN LUCAS 19:17

Li' nguxacui̱ rey cha' ji'i̱ msu bi': “Tso'o tsa lacua. Sca msu tso'o laca nu'u̱. Liñi tsa ngua'ni nu'u̱, masi lo'o sca cña xti ti; bi' cha' ta na' chacuayá' cha' caca nu'u̱ loo ji'i̱ tii tya'a quichi̱ cuentya jna'.”

SAN JUAN 12:43

Ndiya la ti' ngu' bi' cha' tso'o ti chcui' ñati̱ chalyuu cha' ji'i̱ ycui' ngu'. Ná nti' ngu' cha' caca tso'o tyiquee ycui' Ndyosi ña'a̱ Ni ji'i̱ ngu'.

SAN JUAN 17:3

Chalyuu nu ta na' ji'i̱ ngu' laca cha' tyuloo ngu' jinu'u̱, nu'u̱ nu laca sca ti ycui' Ndyosi nu ntucua nde cua̱; lo'o jua'a̱ tyuloo ngu' jna', cha' laca na' Jesucristo nu nda nu'u̱ lijya̱a̱.

SAN JUAN 3:20

Ná nti' nu ñati̱ xña'a̱ bi' cha' ta ycui' Ndyosi xee nu tyu'ú ne' cresiya ji'i̱ ngu'. Tyijyu' ti ndya'a̱ ngu' bi' su ná ña'a̱ xa' ñati̱ ji'i̱ ngu', xqui'ya cha' xcui' cha' cuxi ndu'ni ngu' bi' ―nacui̱ Jesús―.

SAN JUAN 5:41

’Si'i na nti' na' cha' cua'ni chi̱ ñati̱ loo na' ―nacui̱ Jesús ji'i̱ ngu'―.

SAN JUAN 8:43

¿Ni cha' laca ná ndaca'a̱ jyaca̱ ma̱ ji'i̱ cha' nu nchcui' na' lo'o ma̱? ―nacui̱ Jesús ji'i̱ ngu' li'―. Ná nchca ji'i̱ ma̱ tsiya' ti caca cuayá' ti' ma̱ cha' nu nda na' lo'o ma̱ ―nacui̱ yu ji'i̱ ngu' judío bi'―.

ROMANOS 2:10

Pana lcaa ñati̱ nu ndu'ni cha' tso'o ni, ta ycui' Ndyosi cha' tso'o nu ntsu'u ca slo Ni ji'i̱ ngu' bi'; cua'ni chi̱ loo Ni ji'i̱ ngu' bi' ca slo ycui' Ni li', cua'ni Ni cha' ti̱ ti tyi'i̱ tyiquee ngu' li'. Clyo tyacua cha' tso'o bi' ji'i̱ ngu' judío, lo'o li' la cui' jua'a̱ tyacua ji'i̱ ngu' xa' tsu'.

ROMANOS 2:29

si'i jua'a̱ laca na ngu' judío. Tyucui tyiquee ngu' judío laca na lo'o xñi tso'o na cha' ji'i̱ ycui' Ndyosi; liñi la tyu'u cha' ji'na lo'o Ni si chca'a̱ cuayá' ji'i̱ ycui' Ndyosi ca ne' cresiya ji'na. Li' taca culo Ni cña ji'na lo'o Xtyi'i ycui' Ni, si'i lo'o sca cha' nu nscua lo quityi ti. Lo'o li' tso'o tsa cua'ni ycui' Ndyosi lo'o na, nga'aa si'i ñati̱ chalyuu ti nu chcui' tso'o ji'na li'.

ROMANOS 2:7

sca chalyuu tso'o nu ná nga'a̱ cha' tye, bi' laca nu ta Ni ji'i̱ ngu' tso'o, nu ná nchca taja ti' ndu'ni ngu' cña tso'o lo'o tya'a ngu'. Xcui' ndya'a̱ cha' tyiquee ngu' bi' ji'i̱ cha' tso'o nu ntsu'u ca slo ycui' Ndyosi, xcui' nti' ngu' cha' tyi'i̱ tso'o ti ngu' cuentya ji'i̱ Ni, xcui' ndube ti' ngu' ji'i̱ chalyuu nu lijya̱ nde loo la.

1 CORINTIOS 4:5

Lo'o jua'a̱ cu'ma̱, ná yala tsa clyacua ti' ma̱ cha' sta ma̱ qui'ya ji'i̱ sca ñati̱; jatya ma̱ ña'a̱ cuayá' ca̱a̱ ycui' nu Xu'na na, bi' laca nu cua'ni cuayá' ji'i̱ ca ta'a na. Li' culotu̱ Ni ji'i̱ lcaa cha' cuxi nu ntsu'u cuaana ti ne' cresiya ji'na, masi sca cha' nu ná nti' na cacha' na ji'i̱ tya'a ñati̱ chalyuu na. Jua'a̱ cacha' Ni lcaa cha' nu ntsu'u ne' cresiya ji'i̱ lcaa ñati̱ chalyuu, lo'o li' ta Ni nu tso'o ji'na, cua ña'a̱ ca cha' tso'o nu ñacui̱ Ni cha' tyacua ji'i̱ scaa na.

2 CORINTIOS 10:18

Si'i na taquiya' tso'o la Ni ji'i̱ ñati̱ nu nchcui' tsa ji'i̱ cña nu ndyu'ni ycui' ca ngu'; nu lo'o tso'o ti nti' Ni ña'a̱ Ni ji'i̱ ñati̱, li' taquiya' Ni ji'i̱ cña nu ndyu'ni ngu' bi'.

FILIPENSES 2:3

Cua'ni ma̱ cha' ná quiña'a̱ cha' tyu'u tyiquee ma̱ lo'o cua'ni ma̱ sca cña; si'i xcui' cha' ji'i̱ ycui' ca ma̱ culacua ti' ma̱, ni si'i na cua'ni tyucuaa ti' ma̱ lo'o tya'a ma̱. Tso'o la si culacua ti' ma̱ cha' tso'o la laca nu xa' la ngu' tya'a ma̱, pana ná tso'o ycui' ca ma̱;

1 TESALONICENSES 2:6

Ná nti' ya cha' cua'ni chi̱ ma̱ loo ya, masi chacuayá' ji'i̱ ycui' Jesucristo ndyalaa ya slo cu'ma̱; si'i na nchcui' tyucuaa ti' ya lo'o ma̱, cha' loo laca ya ji'i̱ ma̱, ni si'i na tyixi ya cha' loo laca ya ji'i̱ xa' ñati̱.

1 TIMOTEO 1:17

Bi' cha' cua'ni tlyu na ji'i̱ ycui' Ndyosi juani, cua'ni chi̱ na loo Ni, cha' ná tye tsa̱ nu laca Ni loo tyucui ña'a̱ chalyuu; ná tye cha' ji'i̱ ycui' Ndyosi, cha' ná ntsu'u cha' cajaa Ni. Ná nchca ji'na ña'a̱ na ji'i̱ Ni cha' laca na ñati̱ chalyuu ti, pana sca ti ycui' Ni laca ycui' Ndyosi. Jua'a̱ laca cha' ji'i̱ Ni tu'ni.

HEBREOS 3:12

Cu'ma̱ tya'a ngusñi na cha' ji'i̱ Jesús, ña'a̱si̱i̱ ma̱ ji'i̱ ycui' ca ma̱, cha' ni tsaca ma̱ ná tya'a̱chu̱' ma̱ ji'i̱ cha' ji'i̱ ycui' Ndyosi nu lu'ú ca, cha' ná caca cuxi cresiya ji'i̱ ma̱, ñi'ya̱ si nga'aa taquiya' ma̱ cha' ji'i̱ Ni.

SANTIAGO 2:1

Cu'ma̱ tya'a ngusñi na cha' ji'i̱ Jesucristo nu Xu'na na, nu ntucua Ni ca su tso'o tsa ña'a̱ nde cua̱, ná tso'o si xa' ña'a̱ ntsu'u tyiquee ma̱ ña'a̱ ma̱ ji'i̱ xi scaa ñati̱; stu'ba ti cua'ni ma̱ lo'o cua ña'a̱ ca ñati̱, tso'o la.

1 PEDRO 1:7

Ndyacua cha' ti'í ji'i̱ ma̱ jua'a̱, cha' taca cua'ni cuayá' Ni ji'i̱ ma̱, si chañi cha' ngusñi ma̱ cha' ji'i̱ ycui' Ni. Jlo ti' ma̱ cha' quiña'a̱ tsa nga'a̱ chcua̱ oro; pana hora ti ndu'ni cuayá' ngu' ji'i̱ oro bi' lo'o quii' cha' tyalá bi', cha' ña'a̱ ngu' si chañi cha' xcui' oro laca bi'. Nde loo la quiñu'u̱ chcua̱ oro, tye cha' ji'i̱, masi quiña'a̱ tsa cña ngua'ni ngu' cha' tyubii oro bi' tya clyo; pana nu cha' ji'i̱ Jesús nu cua ngusñi ma̱ ni, ndulo tsa cha' bi' cuentya ji'i̱ ycui' Ndyosi. Masi quiña'a̱ tsa chcua̱ oro caja ji'na, ná stu'ba tsiya' ti cha' ji'i̱ bi' lo'o ycui' Jesús. Lo'o ndye ndalo ma̱ ji'i̱ lcaa cha' ti'í nu ndyacua ji'i̱ ma̱ xqui'ya cha' ngusñi ma̱ cha' ji'i̱ Ni, li' tso'o tsa cha' nu caja ji'i̱ ma̱ lo'o tyu'u tucua ycui' Jesucristo ca̱a̱ chaca quiya'; ta Ni sca su tso'o cha' tyi'i̱ ma̱ slo ycui' Ni laja xee nu ndubi tsa ca su ntucua ycui' Ni.