SAN JUAN 4:23 - Chatino Tataltepec

²³ Cua ngulala ti hora, cua la cui' hora ndyaca juani, cha' cua'ni tlyu ma̱ ji'i̱ ycui' Ndyosi tyucui tyiquee ma̱. Lo'o jua'a̱ xtyucua Xtyi'i ycui' Ni ji'i̱ ma̱ li', cha' jua'a̱ nti' ycui' Ndyosi cha' cua'ni na lo'o cua'ni tlyu na ji'i̱ Ni.

SAN JUAN 4:23 Iomraidhean Croise

SAN JUAN 1:17

Cua sa'ni nda jyo'o Moisés cha' lo'o ñati̱, lcaa ña'a̱ cña nu ntsu'u cha' cua'ni ñati̱ cuentya ji'i̱ ycui' Ndyosi. Pana nu lo'o ya̱a̱ Jesucristo ni, xa' ña'a̱ ngua'ni Ni; nda tsa Ni cha' xlya'be ji'na, ngulu'u Ni cha' liñi ji'na li'.

SAN JUAN 12:23

Lo'o li' nda Jesús sca cha' lo'o ngu': ―Cua ndyalaa hora cha' caca tlyu ycui' na' lo'o cajaa na', na' nu cua lijya̱a̱ chalyuu cha' caca̱ ñati̱ ―nacui̱ Jesús―.

SAN JUAN 16:2

masi ná ta ngu' chacuayá' ji'i̱ ma̱ cha' tsaa ma̱ ne' laa ji'i̱ ngu' li' ―nacui̱ Jesús―. Tyalaa sca tyempo nu culacua ti' ngu' cha' cña tacati cua'ni ngu' si cujuii ngu' ji'i̱ ngu' tya'a ma̱.

SAN JUAN 16:32

Cua'a̱ jyaca̱ ma̱ xi ji'i̱ cha' nu chcui' na' re lacua: Cua ngulala ti hora, cua la cui' hora ndyaca juani cha' tyaa ma̱ toni'i̱ ji'i̱ scaa ma̱. Li' tyanu na' ycui' ti na' ―nacui̱―, pana si'i sca ti na' tyanu na', cha' stu'ba ndi'i̱ Sti na' lo'o na'.

SAN JUAN 4:21

―Cua'a̱ jyaca̱ nu'u̱ jna' ―nacui̱ Jesús ji'i̱ nu cuna'a̱ bi'―. Cua ngulala ti tyempo cha' nga'aa cua'ni tlyu ma̱ ji'i̱ ycui' Ndyosi nde ca'ya tacati cua, ni si'i ca quichi̱ Jerusalén ―nacui̱―.

SAN JUAN 5:25

Lo'o jua'a̱ ta na' chaca cha' liñi lo'o ma̱ ―nacui̱―. Cua ngulala ti hora, cua la cui' hora ndyalaa juani, cha' xi'ya na' nu laca̱ Sñi' ycui' Ndyosi ji'i̱ lcaa ñati̱ nu ndi'i̱ chalyuu; ñi'ya̱ laca si na cua ngujuii ngu' laca, xqui'ya cha' cuxi nu ntsu'u ji'i̱ ngu'. Lo'o cuna ngu' bi' cha' nu chcui' na' lo'o ngu', li' caja chalyuu tso'o ji'i̱ ngu', lcaa ñati̱ nu xñi cha' jna' ―nacui̱ Jesús ji'i̱ ngu'―.

SAN JUAN 5:28

Ná quiña'a̱ tsa cha' culacua ti' ma̱; chañi cha' tyalaa hora lo'o cañi xi'ya ycui' Ndyosi Sti na' ji'i̱ lcaa jyo'o ca su ndi'i̱ ngu' nguatsi' ngu'. Li' taquiya' ngu' bi' cha' nu chcui' Ni, tyu'u ngu' ne' cuaá tyaa ngu' mala su ntsu'u cha' tsaa ngu'.

ROMANOS 1:9

Lo'o na' ni, cua ngujui cña jna' cha' chcui' na' cha' tso'o ji'i̱ Jesucristo Sñi' ycui' Ndyosi lo'o xa' ñati̱; tyucui tyiquee na' ndyu'ni na' cña bi' cuentya ji'i̱ Ni. Jlo ti' ycui' Ndyosi cha' lu'ba ti ndyi'u ti' na' ji'i̱ ma̱ laja lo'o nchcui' na' lo'o ycui' Ni.

ROMANOS 8:15

Na cua nda ycui' Ndyosi Xtyi'i Ni ji'i̱ ma̱, cha' ndu'ni Xtyi'i Ni cha' caca ma̱ sñi' ycui' Ndyosi; ndu'ni bi' cha' ndi'ya̱ taca chcui' na lo'o ycui' Ndyosi: “Sti ya”, ñacui̱ na ji'i̱ Ni. Si'i cha' cuxi ndu'ni Xtyi'i Ni nu lo'o nclyo bi' cña ji'i̱ ma̱, si'i cha' xcutsi̱i̱ ji'i̱ ma̱ ñi'ya̱ nu ntsi̱i̱ ma̱ cua sa'ni la, si'i jua'a̱ cña ndu'ni nu bi'.

ROMANOS 8:26

Bi' cha' laca cha' nxtyucua Xtyi'i ycui' Ndyosi ji'na, cha' ná nchca ji'na tsiya' ti. Ná jlo ti' na ñi'ya̱ nu tso'o la chcui' na lo'o ycui' Ndyosi, pana Xtyi'i ycui' Ni laca nu nclu'u ji'na ñi'ya̱ nu chcui' na lo'o Ni. Cua jlo ti' Xtyi'i ycui' Ni cha' ti'i̱ tsa cha' nu ntsu'u tyiquee na, cha' ná ndyiji ñi'ya̱ caca chcui' na cha' bi' lo'o Ni; bi' cha' lo'o Xtyi'i ycui' Ndyosi nchcui' lo'o ycui' Ndyosi Sti na cuentya ji'na li'.

GÁLATAS 4:6

Bi' cha' laca cua nda ycui' Ndyosi Xtyi'i ycui' Ni nu tyanu ne' cresiya ji'i̱ ma̱, cha' culu'u Ni ji'i̱ ma̱ cha' cua laca ma̱ sñi' ycui' Ni. Xtyi'i ycui' Ni ndu'ni cha' taca chcui' na lo'o ycui' Ndyosi chañi ca: “¡Papá! ¡Sti na'!” ñacui̱ na.

EFESIOS 6:18

Chcui' ma̱ lo'o ycui' Ndyosi nu lo'o nxu̱u̱ tya'a ma̱ lo'o nu cuxi, cha' jña ma̱ chacuayá' ji'i̱ Ni; lcaa tyempo xtyucua Xtyi'i ycui' Ndyosi ji'i̱ ma̱ cha' taca chcui' ma̱ lo'o Ni. Lo'o jua'a̱ chcui' ma̱ lo'o Ni cuentya ji'i̱ lcaa ñati̱ nu cua ngusñi cha' ji'i̱ Ni. Bi' cha' lacua, tii ti ti' ma̱ chcui' ma̱ lo'o Ni, cha' ná ca taja ti' ma̱.

FILIPENSES 3:3

Pana nu na ni, chañi laca cha' ngulacua̱ ycui' Ndyosi ji'na, masi xa' ña'a̱ nchcui' nu ngu' bi'. Cua ndu'ni tlyu na ji'i̱ ycui' Ndyosi xqui'ya Xtyi'i ycui' Ni; chaa tsa ti' na ndi'i̱ na chalyuu nu lo'o cua ngujui chalyuu ji'na xqui'ya Jesucristo, cha' nga'aa jlya ti' na ji'i̱ sca cha' nu ndatsaa ñati̱ chalyuu ji'na cha' cua'ni na ji'i̱.

1 PEDRO 2:9

Pana cu'ma̱ ni, cua ngusubi ycui' Ndyosi ji'i̱ cu'ma̱ cha' caca ma̱ ña'a̱ tsaca taju ñati̱ nu ndyu'ni tlyu ji'i̱ ycui' Ni. Laca ma̱ ñi'ya̱ laca sca latya sti jo'ó nu cuentya ji'i̱ ycui' Ndyosi nu laca loo tsiya' ti; ñi'ya̱ tsaca taju ñati̱ lubii laca ma̱ cha' cua'ni tlyu ma̱ ji'i̱ ycui' Ndyosi lcaa tsa̱. Ndu'ni Ni lo'o ma̱: “Ñati̱ 'na laca ma̱”, nacui̱ Ni. Bi' cha' nti' tsa Ni cha' chcui' ma̱ lo'o lcaa ñati̱ lcaa ña'a̱ cha' tso'o nu ngua'ni ycui' Ndyosi lo'o ma̱; cua ngulo Ni ji'i̱ ma̱ ji'i̱ chalyuu cuxi su talya tsa ña'a̱, cha' tya'a̱ ma̱ ca su ndubi tsa xee ji'i̱ ycui' Ni.