SAN JUAN 3:3 - Chatino Tataltepec

³ Li' nchcui' Jesús lo'o: ―Liñi tsa cha' nu ta na' lo'o nu'u̱ juani: ndu'ni ycui' Ndyosi Sti na' cha' cala ñati̱ chaca quiya', si nti' ngu' xñi ngu' cha' ji'i̱ ycui' Ni cha' caca Ni loo ne' cresiya ji'i̱ ngu' ―nacui̱.

SAN JUAN 3:3 Iomraidhean Croise

SAN MATEO 16:17

―Tso'o ntsu'u tyiquee nu'u̱ Simón, sñi' Jonás ―nacui̱ Jesús ji'i̱ li'―. Si'i ñati̱ chalyuu ti nu ngulu'u cha' bi' jinu'u̱; pana ycui' Ndyosi Sti na' nu ntucua nde cua̱, nda Ni cha' bi' nu ngua'ya hique nu'u̱.

SAN MATEO 19:24

Lasa la cña tyeje tacui sca na'ni quiya' cuxa, masi sca na'ni tonu ñi'ya̱ nti' sca camello, lasa la cha' bi'; tucui la tyalaa sca ngu' culiya' ca su laca ycui' Ni loo.

SAN MATEO 21:31

¿Ñi'ya̱ nti' cu'ma̱ ni? Nu tyucuaa qui'yu cuañi' bi' ni, ¿tilaca laca nu ngua'ni cña nu ngua ti' sti ngu' cha' cua'ni ngu'? ―Sñi' clyo yu, bi' laca bi' ―nacui̱ ngu' ji'i̱ Jesús li'. ―Chañi cha' ji'i̱ ma̱ ―nacui̱ Jesús ji'i̱ ngu'―. Cha' liñi nchcui' na' lo'o ma̱ juani, cha' ntsu'u ngu' cuxi, ñi'ya̱ nti' nu msu ji'i̱ ngu' xa' tsu' nu cuiñi ti nxñi quiña'a̱ tsa cñi cña loo ngu', ntsu'u ngu' bi' nu yala la tyatí̱ cha' ji'i̱ ycui' Ndyosi, cha' caca Ni loo ne' cresiya ji'i̱ ngu'; jua'a̱ ntsu'u nu cuna'a̱ calle ti nu yala la tyatí̱ ngu' cha' ji'i̱ ycui' Ndyosi, cha' caca Ni loo ne' cresiya ji'i̱ ngu'. Pana cu'ma̱ ni, tiya' tsa tyalaa cu'ma̱ ca su ntucua ycui' Ni.

SAN MATEO 5:18

Cha' liñi nda na' lo'o ma̱ juani, cha' ni sca si'yu cha' nu nguscua jyo'o cusu' sa'ni cuentya ji'i̱ ycui' Ndyosi, ná taca cuityi̱ ngu' cha' bi' ña'a̱ cuayá' nu tye chalyuu; chañi cha' caca lcaa ca cha' nu nscua lo quityi ji'i̱ ycui' Ndyosi cua sa'ni la.

SAN MARCOS 10:14

Lo'o na'a̱ Jesús ñi'ya̱ nu ndyu'ni ngu' nu ndyaca tsa'a̱ ji'i̱, ná ndiya ti' yu cha' ndyu'ni ngu' jua'a̱: ―Ta ma̱ chacuayá' ji'i̱ nu sube cha' ca̱a̱ ngu' ca slo na' ―nacui̱ Jesús ji'i̱ ngu' bi'―. Ná cua'a ma̱ chacuayá' ji'i̱ nu sube bi', cha' ca̱a̱ ngu' slo na'. Ñi'ya̱ laca lo'o jlya ti' nu sube ji'i̱ sti ngu', la cui' jua'a̱ ntsu'u cha' jlya ti' ñati̱ ji'i̱ ycui' Ndyosi, nu lo'o laca Ni loo ne' cresiya ji'i̱ ngu'.

SAN MARCOS 9:47

La cui' ti cha', masi ndiya tsa ti' ma̱ sca cha' cuxi nu ña'a̱ ma̱ ji'i̱, nga'a̱ cha' xtyanu ma̱ ji'i̱ cha' bi' tsiya' ti, ñi'ya̱ si na culo ma̱ ji'i̱ ycui' cloo ma̱. Tso'o la si xana chalyuu nu ná nga'a̱ cha' tye ji'i̱ ma̱, masi ná lo'o cha' cuxi bi' nu ndulo tsa ji'i̱ ma̱ nquicha', cha' li' ná tyalaa ma̱ su cuxi tsa ca bilyaa.

SAN JUAN 1:13

Lo'o ñati̱ nu laca sñi' ycui' Ndyosi ni, ná nclya ngu' bi' ñi'ya̱ nu nclya scaa sñi' ñati̱; sñi' ycui' Ndyosi laca ngu' bi', si'i sca ñati̱ chalyuu laca nu ndu'ni cucui cresiya ji'i̱ ngu' bi'.

SAN JUAN 1:5

Ña'a̱ ti tya ntyiji'i̱ xee bi' su talya nu ntsu'u ne' cresiya ji'i̱ ngu' cuxi, cha' ná caca ji'i̱ ngu' cuxi xubi' xee bi'.

SAN JUAN 1:51

Lo'o li' nacui̱ Jesús ji'i̱ ngu': ―Ta na' sca cha' liñi lo'o ma̱ juani ―nacui̱ yu―. Nde loo la ña'a̱ ma̱ cha' tyucua yaala ca su ntucua ycui' Ndyosi nde cua̱. Li' caca cuayá' ti' ma̱ cha' cua nda Ni 'na lijya̱a̱ cha' caca na' ñati̱ chalyuu. Lo'o ca su tyu̱ na' bi', ca bi' ña'a̱ ma̱ ji'i̱ ngu' xca̱ nu ndi'i̱ slo ycui' Ndyosi; tya'a̱ ngu' bi', tyacui̱ ngu' bi' nde cua̱, ca'ya ngu' bi' nde su tyu̱ na'.

SAN JUAN 12:40

Cua ndacu̱' ycui' Ndyosi hique ngu' bi', ngua'ni Ni cha' cu'u̱ ti hique ngu' bi'. Jua'a̱ ngua cha' ná ña'a̱ ngu' ni cha' laca bi', cha' ná caca cuayá' ti' ngu' cha' bi'. Lo'o jua'a̱ ná ntaja'a̱ ngu' culochu̱' ngu' ji'i̱ cha' cuxi nu ntsu'u tyiquee ngu', bi' cha' ná nchca cui'ya na' cha' clyu ti' ji'i̱ ngu' ji'i̱ cha' cuxi bi' li', nacui̱ ycui' Ni.

SAN JUAN 3:4

―¿Ñi'ya̱ caca cala na chaca quiya' si cua cusu' na? ―nacui̱ Nicodemo ji'i̱ Jesús― ¿Ha taca tyatí̱ na ne' xtya'a̱ na chaca quiya' cha' xa' cala na? ―nacui̱.

2 CORINTIOS 4:4

Ná ntaja'a̱ ngu' bi' xñi ngu' cha' bi' xqui'ya nu xña'a̱ nu ñilo'o ji'i̱ ñati̱ chalyuu. Ndacu̱' nu cuxi bi' cha' ji'i̱ ngu' cha' ná cuna ngu' cha' tso'o nu cuentya ji'i̱ Cristo, bi' cha' ná nchca tyanu xee lubii ji'i̱ Cristo ne' cresiya ji'i̱ ngu' bi'. Tlyu tsa cha' laca ji'i̱ Cristo; lcaa cha' nu ntsu'u ji'i̱ Ni, stu'ba ntsu'u cha' ji'i̱ Ni lo'o ycui' Ndyosi Sti Ni ca su ntucua Ni juani.

2 CORINTIOS 5:17

Lo'o juani nu lo'o cua ngusñi sca ñati̱ cha' ji'i̱ Cristo, li' cua nguxcutsa'a̱ Ni cha' ji'i̱ ñati̱ bi'; cua ndye cha' ji'i̱ yu lo'o cha' cuxi nu ngua'ni yu nu ngua tya tsubi' la. Chaca chalyuu cucui, bi' laca nu cua ngujui ji'i̱ yu juani.

GÁLATAS 6:15

Nu lo'o stu'ba ntsu'u cha' ji'na lo'o Jesucristo, ná ndu'ni cha' masi ngulacua̱ na, masi ná ngulacua̱ na, sca ti cuayá' laca na. Sca ti cha' nu ndulo la ji'na juani, cha' xcutsa'a̱ Ni tsiya' ti lcaa cha' nu ndu'ni na lo'o ndi'i̱ na chalyuu, cha' xcui' cha' tso'o cua'ni na li'.

EFESIOS 2:1

Cua nda ycui' Ndyosi chalyuu ji'i̱ ma̱ chaca quiya' xqui'ya cha' cua ndyu'ú Cristo chaca quiya'. Nu ngua tsubi' la, ñi'ya̱ laca si na cua ndye chalyuu ji'i̱ ma̱, jua'a̱ ngua ma̱ xqui'ya qui'ya nu ntsu'u ji'i̱ ma̱ lo'o ycui' Ndyosi, cha' ná ndaquiya' ma̱ tsiya' ti ji'i̱ cha' nu nchcui' ycui' Ndyosi.

TITO 3:5

Lo'o li' ngua'ni lyaá Ni ji'na cha' tya'na tsa ti' Ni ña'a̱ Ni ji'na; pana si'i cha' ngua'ni na sca cha' tso'o, sca cña tacati, lo'o li' xqui'ya bi' ngua'ni tya'na ti' Ni ji'na. Si'i jua'a̱. Na cua ngua'ni lubii Ni ji'i̱ cresiya ji'na, bi' cha' caca chcui' na cha' cua ngula na chaca quiya'; cua ngua cucui cresiya ji'na xqui'ya cña nu cua ngua'ni Xtyi'i ycui' Ndyosi lo'o na.

SANTIAGO 3:17

Pana lcaa cha' nu nda ycui' Ndyosi cha' chcui' na lo'o ñati̱, xcui' cha' tso'o laca bi'; ná nguxa' cha' tso'o bi' lo'o cha' cuxi, ná ntsu'u cha' xu̱u̱ tya'a na lo'o tya'a ñati̱ na. Cha' tso'o ti laca nu nda Ni cha' chcui' na lo'o ñati̱, cha' xcui' na tso'o ti cua'ni na lo'o ñati̱ li'. Lo'o jua'a̱ ndu'ni cha' bi', cha' cua'ni tya'na ti' na ji'i̱ ñati̱, ña'a̱ cuayá' nu cua'ni na cha' tso'o cha' xtyucua na ji'i̱ ngu'; ndu'ni cha' sca ti cha' liñi chcui' na lo'o ñati̱, si'i cha' cuiñi chcui' na lo'o ngu'.

1 PEDRO 1:3

Cua'ni tlyu na ji'i̱ ycui' Ndyosi, la cui' bi' laca nu ndu'ni tlyu Jesucristo nu Xu'na na ji'i̱, la cui' Sti Jesucristo nu Xu'na na laca bi'. Tya'na tsa ti' ycui' Ni ña'a̱ Ni ji'na, bi' cha' ngua'ni cucui Ni cresiya ji'na; ntsu'u chalyuu cucui ji'na juani, xqui'ya cha' ndyu'ú ycui' Jesucristo chaca quiya' nu lo'o ngujuii yu. Lo'o nu juani cua ndu̱ ti' na cha' caja chalyuu nu ná nga'a̱ cha' tye ji'na,

1 JUAN 2:29

Cua nchca cuayá' ti' ma̱ cha' lubii tsa cresiya ji'i̱ Jesucristo, bi' cha' tso'o si ca cuayá' ti' ma̱ cha' cua ña'a̱ ca ñati̱ nu ndu'ni cha' tso'o ñi'ya̱ ndyu'ni ycui' Jesús, caca ngu' bi' sñi' ycui' Ndyosi.

1 JUAN 3:9

Ñati̱ nu laca sñi' ycui' Ndyosi ni, nga'aa nscua cha' cua'ni ngu' cha' cuxi, cha' cua nda ycui' Ndyosi chaca cha' tso'o la nu tyanu ne' cresiya ji'i̱ ngu' bi' xqui'ya Xtyi'i ycui' Ndyosi. Nga'aa tyaja'a̱ ngu' bi' cua'ni ngu' cha' cuxi, cha' sñi' ycui' Ndyosi laca ngu' bi'.

1 JUAN 5:1

Lcaa ñati̱ nu jlya ti' ji'i̱ Jesús, cha' laca yu Cristo nu cua nda ycui' Ndyosi ji'i̱ ya̱a̱ chalyuu, chañi cha' laca ngu' bi' sñi' ycui' Ndyosi. Ycui' Ndyosi laca Sti na, lo'o jua'a̱ ntsu'u tsa tyiquee na ña'a̱ na ji'i̱ Ni, bi' cha' ntsu'u tyiquee na ña'a̱ na ji'i̱ xa' la sñi' ycui' Ni, tya'a ngusñi na cha' ji'i̱ Jesús.

1 JUAN 5:18

Jlo ti' na cha' nga'aa ndu'ni ñati̱ ji'i̱ Jesucristo cha' cuxi. Jesucristo nu laca nu sca ti Sñi' ycui' Ndyosi, bi' laca nu ndaca'a ji'i̱ ngu', cha' ná taca cala' nu xña'a̱ ji'i̱ ngu' bi' li'.

1 JUAN 5:4

Cua ña'a̱ ca sñi' ycui' Ndyosi taca tyiji̱loo ji'i̱ lcaa nu cuxi nu ntsu'u chalyuu; taca tyiji̱loo na ji'i̱ nu cuxi, xqui'ya cha' cua ngusñi na cha' ji'i̱ Jesucristo.

APOCALIPSIS 3:14

’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Laodicea, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱: Chañi cha' ndyu'u tucua cha', lcaa cha' nu nda na' lo'o ñati̱; liñi tsa nchcui' na' cha' ji'i̱ ycui' Ndyosi Sti na' lo'o ñati̱, cha' tyucui tyiquee na' ndu'ni na' cña ji'i̱ ycui' Ni. Nu lo'o nguxana ndya' lcaa na nu ntsu'u chalyuu, stu'ba ti ndu̱ na' lo'o ycui' Ni nu ngua li', nacui̱ Jesús.