SAN JUAN 17:11 - Chatino Tataltepec

¹¹ ’Nga'aa tyi'i̱ na' lo yuu chalyuu ―nacui̱ Jesús―, cha' cua tya̱a̱ ti na' nde su ntucua nu'u̱; pana ngu' bi', tya tyi'i̱ la ngu' nde chalyuu. Lubii tsa laca nu'u̱, Sti na', bi' cha' ndijña na' cha' clyu ti' jinu'u̱ cuentya ji'i̱ ngu' nu cua nda nu'u̱ 'na. Cua nti' na' cha' cua'a nu'u̱ ji'i̱ ngu' bi' lo'o juersa ji'i̱ ycui' nu'u̱, cha' ná quiñu'u̱ tyiquee ngu'. Ñi'ya̱ nu stu'ba cha' jinu'u̱ lo'o na' ―nacui̱―, jua'a̱ cua'ni nu'u̱ lo'o ngu' bi', cha' caca stu'ba cresiya ji'i̱ ngu' bi' lo'o tya'a ngu' nu ngusñi cha' jinu'u̱.

SAN JUAN 17:11 Iomraidhean Croise

SAN MATEO 10:16

’Cua'a̱ jyaca̱ ma̱ 'na: Ta na' ji'i̱ ma̱ cha' tsaa ma̱ xa' quichi̱ ñi'ya̱ si laca ma̱ xlya' nu ndya'a̱ laja bo'o tyaala; bi' cha' tii ti ti' ma̱ tya'a̱ ma̱ laja ñati̱, ñi'ya̱ nti' ndya'a̱ cuaña nu tii tsa ti'. Tso'o ti tya'a̱ ma̱, ná cua'ni tyaala ma̱ ji'i̱ ngu' tsiya' ti. Caca ma̱ ñi'ya̱ laca paloma, cha' masu tsa ni', ná tyaala ni' tsiya' ti.

SAN MATEO 5:48

Ycui' Ndyosi Sti na nu ntucua nde cua̱ ni, xcui' cha' tso'o, xcui' cha' liñi, xcui' cha' lubii ndu'ni Ni; ñi'ya̱ ndu'ni ycui' Ni, jua'a̱ nga'a̱ cha' cua'ni ma̱ xcui' cha' tso'o lo'o lcaa ñati̱, si chañi cha' sñi' ycui' Ni laca ma̱.

SAN MATEO 6:9

Tso'o la si ndi'ya̱ chcui' ma̱ lo'o ycui' Ni lacua: Ndyosi Sti ya nu ntucua nde cua̱, tacati tsa cha' jinu'u̱.

SAN JUAN 13:1

Tyucuaa tsa̱ tya lijyi cha' caca ta'a pascua bi'; jlo ti' Jesús cha' cua ngulala tyempo ji'i̱, cha' tyu'u yu chalyuu re tyaa yu ca slo ycui' Ndyosi Sti yu. Xcui' cua ntsu'u tsa tyiquee Jesús ña'a̱ ji'i̱ ñati̱ chalyuu nu ngusñi cha' ji'i̱ yu; lo'o ña'a̱ ti tya ntsu'u tsa tyiquee yu ña'a̱ yu ji'i̱ ñati̱ bi' li', ña'a̱ cuayá' nu tye chalyuu ji'i̱.

SAN JUAN 13:3

Jlo ti' Jesús cha' lcaa cha' nu ntsu'u ji'i̱ ycui' Ndyosi Sti yu cua nda Ni ji'i̱ yu. Lo'o jua'a̱ jlo ti' yu cha' cua ngutu'u yu ca slo ycui' Ndyosi ya̱a̱ yu chalyuu, cha' cua tyaa ti yu ca slo ycui' Ndyosi chaca quiya'. Masi jlo ti' Jesús cha' bi',

SAN JUAN 14:20

Lo'o jua'a̱ caca cuayá' ti' ma̱ cha' stu'ba ntsu'u cha' jna' lo'o Sti na', cha' ntsu'u cha' ji'i̱ ma̱ lo'o na' ―nacui̱ Jesús―, lo'o jua'a̱ ntsu'u cha' jna' lo'o cu'ma̱.

SAN JUAN 16:28

Nde su ndi'i̱ Sti na' ngutu'u na' lijya̱ na' nde chalyuu; lo'o juani cua tyu'u ti na' chalyuu, tsa'a na' ca slo Sti na' chaca quiya'.

SAN JUAN 16:33

Cua nda na' lcaa cha' bi' lo'o ma̱ cha' ti̱ ti tyi'i̱ tyiquee ma̱ xqui'ya na' ―nacui̱―. Nde chalyuu ti'í ti' ñati̱ ña'a̱ ji'i̱ ma̱. Pana ná cube ti' ma̱, cua'ni tlyu tyiquee ma̱; na' laca̱ loo nde chalyuu, cha' cua ntiji̱loo na' tsiya' ti ji'i̱ nu xña'a̱.

SAN JUAN 17:23

Nu lo'o stu'ba ti ntsu'u tyiquee na' lo'o ngu' bi', lo'o jua'a̱ stu'ba ntsu'u tyiquee nu'u̱ lo'o na' ―nacui̱―, li' chañi cha' caca stu'ba cresiya ji'i̱ ngu' lo'o tya'a ngu'. Lo'o li' caca cuayá' ti' xa' ñati̱ chalyuu cha' cua nda nu'u̱ 'na lijya̱a̱ lo yuu, cha' ñi'ya̱ lo'o tyaca'a na' jinu'u̱, jua'a̱ cua'ni tyaca'a nu'u̱ ji'i̱ ngu' nu ngusñi cha' 'na.

SAN JUAN 17:25

Sti na' ―nacui̱ Jesús―, xcui' cha' liñi ndu'ni nu'u̱. Nslo na' jinu'u̱, masi ná nslo ñati̱ chalyuu jinu'u̱. Pana jlo ti' ñati̱ nu ngusñi cha' jna' cha' nu'u̱ laca nu nda 'na lijya̱a̱ nde chalyuu.

SAN JUAN 17:6

’Lcaa ca cha' ñi'ya̱ laca ycui' nu'u̱ ni, cua ndye nchcui' na' cha' bi' lo'o ñati̱ chalyuu nu cua ngusubi nu'u̱ ji'i̱ cha' caca ñati̱ jna', ña'a̱ cuayá' nu ndyuloo tso'o ngu' jinu'u̱ ―nacui̱―. Ñati̱ jinu'u̱ laca ngu' bi', pana cua nda nu'u̱ ngu' bi' jna'. Cua ndaquiya' ngu' lcaa cha' nu nda nu'u̱ lo'o ngu'.

SAN JUAN 7:33

Li' nacui̱ Jesús ji'i̱ ñati̱ nu ndi'i̱ ne' laa tonu bi': ―Tya tyi'i̱ na' la xi lo'o ma̱ nde lo yuu chalyuu ―nacui̱―, lo'o li' tya'a na' slo ycui' nu Xu'na na' nu nda 'na lijya̱a̱ ca nde ―nacui̱―.

LOS HECHOS 3:21

Ntsu'u cha' tyanu Jesús ca slo Ni nu juani ti; pana tiya' la, li' tyalaa sca tsa̱ lo'o chaca quiya' cua'ni cucui ycui' Ndyosi ji'i̱ lcaa na nu ntsu'u chalyuu, cha' li' tya̱a̱ Jesús. Jua'a̱ laca cha' nu nda ycui' Ndyosi lo'o jyo'o cusu' ji'na, cha' nu nguscua ngu' lo quityi cua sa'ni la.

ROMANOS 12:5

Lo'o jua'a̱ laca na, lcaa tya'a na nu ntsu'u cha' ji'na lo'o Cristo, cha' masi tyu̱u̱ tsa ngu' tya'a na, pana sca ti taju ñati̱ laca na lo'o tya'a na; sca ti ñati̱ laca tsaca na, pana lcaa na stu'ba ti ntsu'u cha' ji'na lo'o tya'a na.

ROMANOS 9:17

Ntsu'u sca cha' nu nscua lo quityi cusu', la cui' cha' nu nda ycui' Ndyosi lo'o jyo'o rey ji'i̱ ngu' Egipto nu ngua li': “Cua nda na' chacuayá' jinu'u̱ cha' caca nu'u̱ rey”, nacui̱ Ni, “cha' caca cuayá' ti' nu'u̱ cha' nguula tsa cña nu ndu'ni na' chalyuu. Lo'o jua'a̱ caca cuayá' ti' ñati̱ tyucui ña'a̱ chalyuu tilaca laca na'”, nacui̱ Ni ji'i̱ rey bi'.

1 CORINTIOS 1:10

Cu'ma̱ tya'a ngusñi na cha' ji'i̱ Cristo, chcui' na' lo'o cu'ma̱ juani chacuayá' ji'i̱ ycui' Jesucristo nu Xu'na na, cha' caca stu'ba cha' ji'i̱ lcaa cu'ma̱ lo'o tya'a ma̱, cha' ná chcui' ma̱ tucua lo cha'. Tso'o ti tyi'i̱ ma̱ lo'o tya'a ma̱, sca ti cha' culacua ti' ma̱, sca ti cha' tyu'u tyiquee ma̱.

GÁLATAS 3:28

Nu lo'o cua ngua stu'ba cha' ji'na lo'o Jesucristo, la cui' tyempo bi' ngua stu'ba cha' ji'na lo'o tya'a ñati̱ na; bi' cha' nga'aa chcui' na cha' ngu' judío laca ya, cha' ngu' xa' tsu' laca ma̱; nga'aa chcui' na cha' msu nu ngüi'ya ñati̱ laca ma̱, cha' ñati̱ nu ndi'i̱ tso'o ti laca na; nga'aa chcui' na cha' qui'yu laca na, cha' cuna'a̱ laca ma̱. Lcaa na, stu'ba cha' ji'na lo'o tya'a na juani.

EFESIOS 4:4

Lcaa na nu ngusñi na cha' ji'i̱ Cristo, sca ti ñati̱ laca na, sca ti Xtyi'i ycui' Ndyosi ndi'i̱ lo'o na; ndu̱ ti' na cha' stu'ba ti tyacua cha' ji'na chalyuu ca nde loo la, bi' cha' cua ngusubi Ni ji'na.

FILIPENSES 2:9

Bi' cha' juani cua ndyaa lo'o Ni ji'i̱ yu cha' stu'ba ti tyi'i̱ yu ca su tlyu la ca su ntucua ycui' Ni; juani tlyu tsa chacuayá' cua nda Ni ji'i̱ Jesús. Tyucui ña'a̱ chalyuu nga'aa ntsu'u la xa' chacuayá' nu tlyu la,

HEBREOS 1:3

Lcaa xee lubii nu ntsu'u ca slo ycui' Ndyosi, cua ndyanu xee bi' lo Jesús Sñi' Ni lo'o ñaa Jesús nguti'i̱ yu chalyuu. Ñi'ya̱ nu laca ycui' Ndyosi, la cui' jua'a̱ laca nu Jesús bi'; liñi tsa nclyo Jesús cña ji'i̱ lcaa na nu ntsu'u chalyuu tsiya' ti, bi' cha' laca ndi'i̱ tso'o ti lcaa na bi'. Nu lo'o ndye ngua'ni Jesús cña nu ntsu'u ji'i̱ yu nde chalyuu, cha' ngüityi̱ yu yabe' nu ntsu'u ji'i̱ ñati̱, li' nguxtyu̱u̱ yu ndyaa yu ca slo ycui' Ndyosi Sti yu, ndyaa tucua yu nde la'a tsu' cui̱ su tlyu ca su ntucua ycui' Ni.

HEBREOS 9:24

Bi' cha' nga'aa ndyaa Cristo nde ne' laa nu ngüiñá ñati̱ nde chalyuu ti, masi ntucua bi' cuentya ji'i̱ ycui' Ndyosi; na cua ndyaa liñi Ni ca slo ycui' Ndyosi ca nde cua̱. Ca bi' ntucua Ni juani, cha' chcui' lo'o ycui' Ndyosi cuentya ji'na.

SANTIAGO 4:4

cua nguxtyanu ma̱ ji'i̱ ycui' Ndyosi, cua ntsu'u cha' ji'i̱ ma̱ lo'o sca cha' nu cuxi tsa, si jua'a̱ ndyu'ni ma̱. ¿Ha ná nchca cuayá' ti' ma̱ cha' tya'a cusu̱u̱ ycui' Ndyosi laca na, si xcui' cha' ji'i̱ ycui' ca ti na ntsu'u tyiquee na? Na nxu̱u̱ tya'a na lo'o ycui' Ndyosi, si cua'ni tya'a na lo'o nu cuxi nu ntsu'u nde chalyuu.

1 PEDRO 1:5

Cua ngusñi ma̱ cha' ji'i̱ ycui' Ndyosi, bi' cha' ndu̱ Ni cua̱ ji'i̱ ma̱ juani cha' ña'a̱si̱i̱ Ni ji'i̱ ma̱. Ná ntsu'u ni sca na nu nguula la juersa ji'i̱, nu taca ji'i̱ tyiji̱loo ji'i̱ ycui' Ndyosi; cua'a Ni ji'i̱ ma̱ ji'i̱ nu cuxi, cha' cua'ni lyaá Ni ji'i̱ ma̱ lo'o tye chalyuu re, cha' cua ndyaa Ni ngua'ni cho'o Ni su tyi'i̱ ma̱ ca slo ycui' Ndyosi.

1 JUAN 3:12

Ná cua'ni na ñi'ya̱ nu ngua'ni jyo'o Caín; sñi' ycui' nu xña'a̱ ngua yu bi', cha' ndyujuii yu ji'i̱ tya'a yu. ¿Ni cha' laca ngua'ni yu jua'a̱? Ndyujuii yu ji'i̱ tya'a yu xqui'ya cha' xcui' cha' cuxi ngua'ni jyo'o Caín bi', bi' cha' ná ndiya ti' yu cha' xcui' cha' tso'o ngua'ni yu tya'a yu bi'.

1 JUAN 5:19

Jlo ti' na cha' ñati̱ ji'i̱ ycui' Ndyosi laca na, xqui'ya cha' cua ngusñi na cha' ji'i̱ Jesucristo; pana xa' la ñati̱ chalyuu nu ná ndaquiya' ji'i̱ Ni tsiya' ti, ña'a̱ ti tya laca nu xña'a̱ loo ji'i̱ ñati̱ bi'.

JUDAS 1:1

Judas naa na', la cui' tya'a Jacobo; cña laca na' cuentya ji'i̱ Jesucristo. Nscua na' quityi re cha' tsaa ca slo lcaa cu'ma̱ nu ndaquiya' ma̱ ji'i̱ ycui' Ndyosi Sti na, cha' cua ngusubi Ni ji'i̱ ma̱. Ycui' Ndyosi laca nu ngua'ni lubii ji'i̱ cresiya ji'i̱ ma̱, lo'o ña'a̱ ti tya cña'a̱si̱i̱ Ni ji'i̱ ma̱ juani xqui'ya Jesucristo.

JUDAS 1:24

Sca ti ycui' Ndyosi ntsu'u chalyuu. Taca cua'ni lyaá Ni ji'na xqui'ya Jesucristo nu Xu'na na; sca ti ycui' Ni nchca ji'i̱ Ni ña'a̱si̱i̱ Ni ji'na, laja lo'o ndya'a̱ na tyucui̱i̱ tso'o nu ngulu'u Ni ji'na. Xtyucua Ni ji'na cha' ná tyeje sna quiya' na, cha' ná tyu'utsu' na ji'i̱ tyucui̱i̱ bi', ña'a̱ cuayá' nu tyalaa na tso'o ti ca su ndubi tsa ña'a̱ xee, ca su ntucua ycui' Ndyosi. Lubii tsiya' ti caca cresiya ji'na lo'o cua ndyalaa na ca slo Ni, lo'o jua'a̱ caca chaa tsa ti' na li'. Bi' cha' juani cua'ni tlyu na ji'i̱ ycui' Ndyosi nu ntucua ca su tlyu nde cua̱, cha' sca ti ycui' Ndyosi ntsu'u nu tlyu tsa laca Ni; sca ti ycui' Ni laca Ni loo ji'i̱ lcaa lo na nu ntsu'u chalyuu, jua'a̱ sca ti ycui' Ni nchca ji'i̱ Ni cua'ni Ni lcaa lo cña tonu tsiya' ti. Lu'ú ycui' Ndyosi tya lo'o bilya tya' chalyuu, lo'o jua'a̱ lu'ú Ni juani; ná nga'a̱ cha' tye tyempo cha' lu'ú Ni ca nde loo la. Jua'a̱ laca cha' lacua.

APOCALIPSIS 15:4

¿Ha ná ntsi̱i̱ ngu' jinu'u̱? ¿Ha ná tyaja'a̱ ngu' ñacui̱ ngu' cha' tlyu tsa cña nu ndu'ni nu'u̱? Sca ti ycui' nu'u̱ nu lubii tsa cresiya jinu'u̱. Cua na'a̱ ngu' lcaa su ndyu'ni cuayá' nu'u̱ ji'i̱ ñati̱ cha' liñi tsa ndyu'u cha'; bi' cha' tya̱a̱ lcaa ñati̱ tyucui ña'a̱ chalyuu ca su ntucua nu'u̱, cha' cua'ni tlyu ngu' jinu'u̱. Ndye ji̱i̱ nu ndyula tu'ba ngu' li'.

APOCALIPSIS 19:12

Nu xee cloo Ni ni, tso'o tsa ngulane xee ñi'ya̱ laca lo'o cua̱ tsa ndyatu̱ quii'. Lo'o jua'a̱ tyu̱u̱ tya'a sne' oro ntucua lo xlya hique Ni. Cua nscua sca xtañi Ni hichu̱' Ni nu ndacha' ñi'ya̱ laca cña nu ndu'ni Ni. Ná taca ji'i̱ xa' ñati̱ ñacui̱ ngu' ñi'ya̱ ndyu'u cha' ji'i̱ xtañi bi', cha' sca ti ycui' Ni nslo Ni ñi'ya̱ ndyu'u xtañi bi'.

APOCALIPSIS 4:8

Scuá tya'a lu'be ntsu'u ji'i̱ scaa na'ni bi', pana ntucua cloo ni' tyucui ña'a̱ hichu̱' lu'be ni'; lo'o nde ne' lu'be ni', la cui' jua'a̱ ntucua cloo ni'. Nga'aa nchca ti̱ cha' ndula tu'ba ni' tsa̱ lo'o talya: Xcui' na lubii tsa cresiya ji'i̱ ycui' Ndyosi nu nchca ji'i̱ ndu'ni lcaa cña, nacui̱ ni' lo'o ndyula tu'ba ni'. Nu ngua tya clyo lu'ú ycui' Ni, la cui' jua'a̱ na lu'ú Ni juani, lo'o ña'a̱ ti tya lu'ú Ni tyempo nde loo la. Jua'a̱ nacui̱ ni' lo'o ndyula tu'ba ni'.