SAN JUAN 16:11 - Chatino Tataltepec

¹¹ Jua'a̱ cua'ni Ni cha' ca cuayá' ti' ngu' cha' ntsu'u cha' cua'ni cuayá' ycui' Ndyosi ji'i̱ lcaa ñati̱ chalyuu, xqui'ya cha' cua ngusta Ni yabe' hichu̱' nu xña'a̱ nu laca loo ji'i̱ ñati̱ chalyuu.

SAN JUAN 16:11 Iomraidhean Croise

SAN MATEO 12:18

Ña'a̱ ma̱ ji'i̱ msu 'na nu cua ngusubi na' ji'i̱, nacui̱ ycui' Ni. Tyaca'a tsa bi' jna', lo'o tso'o tsa ntsu'u tyiquee na' ña'a̱ na' ji'i̱ yu bi'. Cua'ni na' cha' ca'ya Xtyi'i ycui' na' lo yu bi', cha' chcui' yu lo'o lcaa ñati̱, masi si'i ngu' judío laca ngu'. Culu'u yu ji'i̱ ngu' ñi'ya̱ laca cha' liñi nu ndu'ni na' lo'o ñati̱, nacui̱ ycui' Ndyosi.

SAN MATEO 12:36

Ta na' sca cha' lo'o ma̱ juani: nu lo'o tyalaa tsa̱ nu cua'ni cuayá' ycui' Ni ji'i̱ lcaa ñati̱, li' ntsu'u cha' cacha' lyiji ycui' ca ngu' ji'i̱ lcaa cha' cuxi nu cua nchcui' ngu' nde chalyuu.

SAN LUCAS 10:18

Nchcui' Jesús lo'o ngu' li': ―Jua'a̱ tu'ni. Lo'o na' na'a̱ na' ji'i̱ Satanás lo'o ndyú yu lo yuu; ñi'ya̱ ndyalú tyi'yu nde lo yuu, jua'a̱ ndyú yu. Ngulo'o ycui' Ndyosi ji'i̱ nu xña'a̱ bi' ca su tlyu su ntucua Ni nde cua̱, ndyú yu lo yuu li'; bi' cha' ndaquiya' cui'i̱ cuxi bi' ji'i̱ cha' nu nchcui' ma̱ juani.

SAN JUAN 12:31

Cua ndyalaa hora cha' cua'ni cuayá' Ni ji'i̱ lcaa ñati̱ chalyuu, nu lo'o tyiji̱loo na' tsiya' ti ji'i̱ nu xña'a̱ nu laca loo nde chalyuu ―nacui̱ Jesús ji'i̱ ngu'―.

SAN JUAN 14:30

’Nga'aa quiña'a̱ tsa cha' chcui' na' lo'o ma̱ juani ―nacui̱ Jesús li'―. Cua lijya̱ nu xña'a̱ nu laca loo nde chalyuu, cua lijya̱ nu bi' ca su ndi'i̱ na re. Ná ntsu'u chacuayá' ji'i̱ nu bi' cha' caca loo jna'.

SAN JUAN 16:12

’Tya quiña'a̱ la cha' ntsu'u cha' nti' na' chcui' na' lo'o ma̱ nquicha' ―nacui̱ Jesús ji'i̱ ñati̱ nu ndyaca tsa'a̱ ji'i̱―, pana ná talo ma̱ cua'a̱ jyaca̱ ma̱ ji'i̱ cha' bi' juani, cha' tucui tsa cha' bi'.

LOS HECHOS 10:42

Tya li' cua ngulo Jesús cña ji'i̱ ya cha' ta ya cha' liñi ji'i̱ ycui' lo'o ñati̱, cha' cua nda ycui' Ndyosi cña ji'i̱ nu Jesús bi', cha' cua'ni cuayá' yu ji'i̱ lcaa ñati̱ chalyuu, masi nu cua ngujuii, masi nu tya lu'ú.

LOS HECHOS 24:25

Li' ngulu'u Pablo ji'i̱ ngu' cha' nti' ycui' Ndyosi cha' xcui' cha' liñi ti cua'ni ñati̱ chalyuu, cha' cua'a ngu' ji'i̱ ycui' ca ngu' cha' nga'aa cua'ni ngu' cha' cuxi, bi' laca cña nu nti' ycui' Ndyosi; jua'a̱ ngulu'u yu cha' ntsu'u cha' cua'ni cuayá' Ni ji'i̱ lcaa ñati̱ nu lo'o cua ndye chalyuu. Ndyutsi̱i̱ xi Félix li'. ―Tyaa nu'u̱ juani ―nacui̱ nu cusu' bi' ji'i̱ Pablo―. Xi'ya na' jinu'u̱ chaca quiya' si ntsu'u sca hora nu laja xi jna'.

LOS HECHOS 26:18

cha' ñi'ya̱ si ndya'a̱ ngu' cuityi̱', jua'a̱ ndya'a̱ ñati̱ bi' chalyuu; ñi'ya̱ si talya tsa ña'a̱ su ndya'a̱ ngu', jua'a̱ ndyu'ni ngu' bi'. Bi' cha' ntsu'u cha' culu'u nu'u̱ cha' jna' ji'i̱ ngu' bi', cha' xñi ngu' cha' jna'. Li' nga'aa tya'a̱ ngu' su talya ña'a̱, ñi'ya̱ si cuityi̱' ti ngu'; taca tya'a̱ ngu' tyucui̱i̱ su xee cuentya ji'i̱ ycui' Ndyosi, taca ña'a̱ ngu' li'. Satanás laca nu nclyo cña ji'i̱ ngu' bi' juani, pana ca li' caca ngu' ñati̱ ji'i̱ ycui' Ndyosi. Ntsu'u cha' xñi ngu' bi' cha' jna', cha' taca cui'ya ycui' Ni cha' clyu ti' ji'i̱ cha' cuxi nu ntsu'u ji'i̱ ngu' bi'. Li' caca stu'ba cha' ji'i̱ ngu' bi' lo'o ñati̱ nu cua lubii cresiya ji'i̱ xqui'ya na'”, nacui̱ ycui' Jesús 'na li'.

ROMANOS 16:20

Ná tyu̱u̱ tsa̱ lyiji cha' cua'ni tye ycui' Ndyosi ji'i̱ nu xña'a̱, cha' nga'aa tyaca̱' cña cuxi nu ndu'ni nu xña'a̱ bi' tsiya' ti. Cua'ni Ni cha' ti̱ ti tyi'i̱ tyiquee ma̱, ñi'ya̱ ntsu'u tyiquee ycui' Ni; lo'o jua'a̱ ña'a̱ ti cua'ni Jesucristo nu Xu'na na cha' tso'o lo'o lcaa tya'a ma̱.

ROMANOS 2:16

Jua'a̱ caca lacua, nu lo'o tyu'u lubii lcaa cha' nu ntsu'u ne' cresiya ji'i̱ ñati̱, tsa̱ li' lo'o culo Ni cña ji'i̱ Jesucristo cha' cua'ni cuayá' Ni ji'i̱ lcaa ñati̱; la cui' tyempo bi' culotu̱ Ni lcaa cha' nu ntsu'u cuaana ti ne' cresiya ji'i̱ ngu'. Jua'a̱ laca cha' nu nchcui' na' lo'o ñati̱ laja lo'o nclyu'u na' cha' tso'o ji'i̱ ycui' Ndyosi ji'i̱ ngu'.

1 CORINTIOS 4:5

Lo'o jua'a̱ cu'ma̱, ná yala tsa clyacua ti' ma̱ cha' sta ma̱ qui'ya ji'i̱ sca ñati̱; jatya ma̱ ña'a̱ cuayá' ca̱a̱ ycui' nu Xu'na na, bi' laca nu cua'ni cuayá' ji'i̱ ca ta'a na. Li' culotu̱ Ni ji'i̱ lcaa cha' cuxi nu ntsu'u cuaana ti ne' cresiya ji'na, masi sca cha' nu ná nti' na cacha' na ji'i̱ tya'a ñati̱ chalyuu na. Jua'a̱ cacha' Ni lcaa cha' nu ntsu'u ne' cresiya ji'i̱ lcaa ñati̱ chalyuu, lo'o li' ta Ni nu tso'o ji'na, cua ña'a̱ ca cha' tso'o nu ñacui̱ Ni cha' tyacua ji'i̱ scaa na.

2 CORINTIOS 4:4

Ná ntaja'a̱ ngu' bi' xñi ngu' cha' bi' xqui'ya nu xña'a̱ nu ñilo'o ji'i̱ ñati̱ chalyuu. Ndacu̱' nu cuxi bi' cha' ji'i̱ ngu' cha' ná cuna ngu' cha' tso'o nu cuentya ji'i̱ Cristo, bi' cha' ná nchca tyanu xee lubii ji'i̱ Cristo ne' cresiya ji'i̱ ngu' bi'. Tlyu tsa cha' laca ji'i̱ Cristo; lcaa cha' nu ntsu'u ji'i̱ Ni, stu'ba ntsu'u cha' ji'i̱ Ni lo'o ycui' Ndyosi Sti Ni ca su ntucua Ni juani.

EFESIOS 2:2

Nu ngua tyempo bi', ndya'a̱ tsa ma̱ ndu'ni ma̱ cua ña'a̱ ca cha' cuxi nu ndu'ni ñati̱ chalyuu; ndaquiya' tsa ma̱ ji'i̱ nu xña'a̱ nu laca loo ji'i̱ lcaa cui'i̱ cuxi nu ndya'a̱ nde chalyuu, la cui' nu cuxi bi' laca nu ndatsaa ji'i̱ ñati̱ chalyuu cha' ná taquiya' ngu' ji'i̱ ycui' Ndyosi.

COLOSENSES 2:15

La cui' ti lo crusi bi' cua ntiji̱loo Cristo ji'i̱ lcaa nu laca xu'na na, jua'a̱ ji'i̱ lcaa cui'i̱ nu laca loo ji'na. Lo'o ngua'ni chi̱ Ni loo Cristo xqui'ya cha' cua ntiji̱loo yu ji'i̱ lcaa xu'na na bi', li' ndyalo'o Cristo ji'i̱ xu'na bi' laja ñati̱ nu lijya̱ qui'i ti, cha' ña'a̱ cui'ya lcaa ñati̱ cha' cua ntiji̱loo Cristo ji'i̱ lcaa xu'na bi'.

HEBREOS 2:14

Nu na, ñati̱ chalyuu na ni, sca ti cuaña' na, sca ti tañi na lo'o ngu' cusu' ji'na, jua'a̱ lo'o ngu' tya'a na. Ca ta'a na nu cua ngusñi na cha' ji'i̱ Jesús laca na ñati̱ chalyuu; bi' cha' lo'o nu Jesús bi' ngua yu ñati̱, cha' li' ngua ji'i̱ yu ngujuii yu cuentya ji'na. Sca ti jua'a̱ ngujui ñi'ya̱ tyiji̱loo yu ji'i̱ nu xña'a̱ nu nclyo cña nde ca bilyaa, su nti' nu xña'a̱ bi' cha' tsaa cresiya ji'i̱ lcaa ñati̱.

HEBREOS 6:2

jua'a̱ cua nchcui' na ñi'ya̱ caca tyucuatya na chacuayá' ji'i̱ Cristo, ñi'ya̱ caca sta ya' ngu' hique na chacuayá' ji'i̱ Cristo; cua nchcui' na cha' tya tyu'ú na chaca quiya' nde loo la, masi cua ngujuii na, cha' li' ntsu'u cha' cua'ni cuayá' Ni ji'i̱ lcaa na lo'o tya'a na.

HEBREOS 9:27

Cua ña'a̱ ca na ndyijii na sca ti quiya', lo'o li' ndu'ni cuayá' ycui' Ndyosi ji'na;

2 PEDRO 3:7

Ca tiya' la li' xa' ngulo ycui' Ndyosi cña cha' ña'a̱ ti tyanu lcaa na nu ntsu'u nde cua̱, ña'a̱ ti tyanu lcaa lo na nu ntsu'u nde chalyuu, ña'a̱ cuayá' tyalaa tsa̱ nu cua'ni cuayá' Ni ji'i̱ lcaa na. Li' tye tyaqui̱ lcaa na bi', lo'o jua'a̱ tye cha' ji'i̱ lcaa ñati̱ nu ná ntsu'u cha' ji'i̱ lo'o ycui' Ndyosi.

1 JUAN 3:8

Lcaa ñati̱ nu ndu'ni xcui' cha' cuxi, cua laca ngu' bi' sñi' ycui' nu xña'a̱ nu laca xu'na cuiñaja; tya lyiji tye cha' cua'ni nu xña'a̱ bi' cha' cuxi. Sca ti Jesús nu Sñi' ycui' Ndyosi, cua ya̱a̱ Ni chalyuu cha' cua'ni tye Ni ji'i̱ lcaa cña nu ndyu'ni nu xña'a̱ bi'.

APOCALIPSIS 1:7

Cui'ya ma̱ cuentya, cha' tya tya̱a̱ Jesucristo nde chalyuu chaca quiya' laja coo. Ña'a̱ lcaa ñati̱ ji'i̱ yu li'; jua'a̱ nu ñati̱ nu liye' tsa ti' ña'a̱ ji'i̱ yu nu ngua tsubi', jua'a̱ nu ñati̱ nu cua ndyojo' chcua̱ ji'i̱ yu, lo'o ngu' bi' ña'a̱ ngu' ji'i̱ yu chaca quiya' li'. Xi'ya ñati̱ tyucui ña'a̱ chalyuu cha' xñi'i̱ ti' ngu' lo'o tya̱a̱ Jesús chaca quiya', cha' cua jlo ti' ngu' cha' ntsu'u qui'ya ji'i̱ ngu'. Jua'a̱ caca cha' bi' lacua.