SAN JUAN 15:21 - Chatino Tataltepec

²¹ Jua'a̱ cua'ni ngu' lo'o cu'ma̱ xqui'ya na' ―nacui̱ Jesús―, cha' ná nslo ngu' tilaca laca nu nda 'na lijya̱a̱ nde chalyuu.

SAN JUAN 15:21 Iomraidhean Croise

SAN MATEO 10:18

Ntsu'u ngu' nu tsaa lo'o ji'i̱ ma̱ slo ngu' nu laca loo cha' ñasi̱' ti ngu', hasta tyalaa ma̱ ca slo ycui' rey. Lo'o xcube' ngu' ji'i̱ ma̱ xqui'ya na', li' caja xi tyempo cha' ta ma̱ xi cha' jna' lo'o ngu' bi', masi lo'o ngu' xa' tsu'.

SAN MATEO 10:22

Lo'o jua'a̱ caca ti'í ti' lcaa ngu' ña'a̱ ngu' ji'i̱ ma̱ xqui'ya na'. Pana ñati̱ nu talo ji'i̱ lcaa cha' cuxi bi', clyaá ngu' li', caja chalyuu nu ná nga'a̱ cha' tye ji'i̱ ngu' bi'.

SAN MATEO 10:39

La cui' jua'a̱ ngu' nu ná ndyujuii ñati̱ ji'i̱ xqui'ya cha' lye la ndu'ni tyaca'a ngu' ji'i̱ ycui' ca ti ngu', ná caja chalyuu nu ná nga'a̱ cha' tye ji'i̱ ngu' bi'; pana caja chalyuu nu ná nga'a̱ cha' tye ji'i̱ ngu' si cujuii ñati̱ ji'i̱ xqui'ya cha' jna'.

SAN MATEO 24:9

’Nu lo'o xana cha' cuxi bi', tejeya' ngu' ji'i̱ ma̱ cha' xcube' ngu' ji'i̱ ma̱, hasta ña'a̱ cuayá' nu cujuii ngu' ji'i̱ ma̱, cha' ntsu'u ngu' tyucui ña'a̱ chalyuu nu caca ti'í ti' ngu' ña'a̱ ngu' ji'i̱ ma̱ xqui'ya na';

SAN MATEO 5:11

’Lo'o jua'a̱ tso'o ntsu'u tyiquee ma̱ masi xtyí lo'o ngu' ji'i̱ ma̱ xqui'ya na', masi lya' tsa ti' ngu' ji'i̱ ma̱, masi cuiñi tsa ngu', masi chcui' tsa ngu' cuentyu ji'i̱ ma̱ xqui'ya na'.

SAN MARCOS 13:13

Lye tsa caca ti'í ti' lcaa ñati̱ ji'i̱ ma̱ xqui'ya cha' ñati̱ jna' laca ma̱. Ná cube ti' ma̱; lcaa cu'ma̱ nu talo ma̱ ji'i̱ cha' cuxi bi' ña'a̱ cuayá' nu tye chalyuu, cua'ni lyaá ycui' Ni ji'i̱ ma̱ li'.

SAN LUCAS 21:12

’Lo'o cu'ma̱ ni, nu lo'o tya lyiji caca cha' bi', li' xñi ngu' ji'i̱ ma̱ cha' sca̱' ngu' ji'i̱ ma̱, ta ngu' cha' ti'í ji'i̱ ma̱, sta ngu' qui'ya ji'i̱ ma̱ su ndyu'u ti'i̱ ngu' ne' laa; lo'o jua'a̱ su'ba ngu' ji'i̱ ma̱ ne' chcua̱, tsaa lo'o ngu' ji'i̱ ma̱ slo rey, jua'a̱ slo xa' ngu' nu laca loo, xqui'ya cha' ngusñi ma̱ cha' 'na.

SAN LUCAS 21:17

cha' tyucui ña'a̱ chalyuu ntsu'u quiña'a̱ tsa ngu' nu ti'í ti' ngu' ña'a̱ ngu' ji'i̱ ma̱ xqui'ya na'.

SAN LUCAS 6:22

’Lo'o jua'a̱ tso'o ti caca tyiquee cu'ma̱ masi ti'í ti' ngu' ña'a̱ ngu' ji'i̱ ma̱, masi culo'o ngu' ji'i̱ ma̱ ca su ndi'i̱ ma̱, masi suba' tsa chcui' ngu' lo'o ma̱, masi hasta nga'aa nti' ngu' chcui' ngu' lo'o ma̱, xqui'ya cha' jlya ti' ma̱ jna', na' nu cua nda Ni lijya̱a̱ cha' caca na' ñati̱;

SAN JUAN 15:24

Ná ntsu'u qui'ya ji'i̱ ngu' bi' clyo, pana juani ni, cua nguti'i̱ na' slo ngu' bi', cua ngua'ni na' cña nu ná caca ji'i̱ xa' ñati̱ cua'ni; cua na'a̱ ngu' lcaa ña'a̱ cña tonu nu ngua'ni na', bi' cha' liye' ti' ngu' ña'a̱ ngu' jna'. Lo'o jua'a̱ ji'i̱ Sti na' liye' ti' ngu' ña'a̱ ngu' ji'i̱ Ni, bi' cha' cua ndyanu yabe' hichu̱' ngu' bi' ―nacui̱ Jesús―.

SAN JUAN 16:3

Jua'a̱ cua'ni ngu' bi', cha' ná nslo ngu' ji'i̱ ycui' Ndyosi Sti na'; la cui' jua'a̱ ná nslo ngu' jna' ―nacui̱ Jesús―.

SAN JUAN 17:25

Sti na' ―nacui̱ Jesús―, xcui' cha' liñi ndu'ni nu'u̱. Nslo na' jinu'u̱, masi ná nslo ñati̱ chalyuu jinu'u̱. Pana jlo ti' ñati̱ nu ngusñi cha' jna' cha' nu'u̱ laca nu nda 'na lijya̱a̱ nde chalyuu.

SAN JUAN 8:19

―¿Macala ntsu'u Sti nu'u̱ lacua? ―nacui̱ ngu' ji'i̱ Jesús li'. ―Ná nslo ma̱ jna' tsiya' ti, lo'o la cui' ti ná nslo ma̱ ji'i̱ Sti na' ―nacui̱ Jesús ji'i̱ ngu'―. Si cua ndyuloo ma̱ jna', la cui' jua'a̱ cua ndyuloo ma̱ ji'i̱ Sti na' li'.

SAN JUAN 8:54

Lo'o li' nacui̱ Jesús: ―Ná tso'o na' tsiya' ti si cua'ni na' cha' caca tlyu ycui' ca ti na', pana ycui' Ndyosi Sti na' ndu'ni cha' caca tlyu na' ―nacui̱―. Ndu'ni ma̱ cha' Sti ma̱ laca ycui' Ndyosi;

SAN JUAN 8:55

masi ná ndyuloo ma̱ ji'i̱ Ni, pana jua'a̱ ndu'ni ma̱. Nslo na' ji'i̱ Ni tu'ni. Ná taca ñacui̱ na' cha' ná nslo na' ji'i̱ Ni; cuiñi na' si jua'a̱ ñacui̱ na', ñi'ya̱ laca cu'ma̱, cha' cuiñi tsa ma̱. Chañi cha' nslo na' ji'i̱ Ni, jua'a̱ ndaquiya' na' ji'i̱ lcaa cha' nu nchcui' Ni lo'o na' ―nacui̱ Jesús ji'i̱ ngu' judío bi'―.

LOS HECHOS 17:23

Ndyaa na'a̱ na' xi calle quichi̱ re, lo'o li' na'a̱ na' lcaa jo'ó nu cuentya ji'i̱ cu'ma̱. Li' na'a̱ na' sca mesa nu ndu̱ laja ti su nscua sca cha'cña nde sii' mesa bi' nu ndi'ya̱ nchcui': “Nde laca mesa ji'i̱ jo'ó nu bilya tyuloo ya ji'i̱”. Cha' ji'i̱ ycui' Ndyosi nu bilya slo ma̱ tilaca laca Ni, cha' ji'i̱ nu ycui' Ndyosi bi' ta na' lo'o ma̱ juani ―nacui̱ yu―.

LOS HECHOS 26:9

’Clyo ngua ti' na' cha' lye tsa xcube' na' ji'i̱ ñati̱ nu cua ngusñi cha' ji'i̱ Jesús Nazaret,

LOS HECHOS 3:17

’Cu'ma̱ ngu' tya'a quichi̱ tyi na, jlo ti' na' cha' ná ngua tii ma̱ tilaca ngua Jesús nu lo'o ngüijña ma̱ chacuayá' cha' cujuii sendaru ji'i̱ yu. Lo'o jua'a̱ nu ngu' nu laca loo ji'i̱ ma̱, ná ngua tii ngu' na laca nu ngua'ni ngu', si cha' tso'o, si cha' cuxi ngua'ni ngu' li'.

LOS HECHOS 4:17

Pana ná tso'o si cuna xa' la ñati̱ cha' ji'i̱ Jesús; bi' cha' tso'o si xcutsi̱i̱ na ji'i̱ ngu' jua, cha' ná culu'u ngu' ji'i̱ xa' ñati̱ tilaca laca Jesucristo.

LOS HECHOS 5:41

Ndu'u ngu', chaa tsa ti' ngu' li', masi cua nchcube' ngu' nu laca loo bi' ji'i̱ ngu' xqui'ya cha' ngusñi ngu' cha' ji'i̱ Jesús.

LOS HECHOS 9:14

Lo'o juani cua ndyalaa yu quichi̱ re, ndyi'ya lo'o yu ji'i̱ quityi chacuayá' ji'i̱ xu'na sti jo'ó cha' sca̱' ji'i̱ cua, lcaa ngu' tya'a ya nu ngusñi ya cha' ji'i̱ ycui' nu'u̱.

LOS HECHOS 9:16

Culu'u na' ji'i̱ yu ñi'ya̱ cha' ti'í nu tyacua ji'i̱ yu lo'o ta yu cha' jna' lo'o ñati̱.

ROMANOS 1:28

Jua'a̱ laca ji'i̱ ngu', cha' ná nti' ngu' tyuloo ngu' ji'i̱ ycui' Ndyosi; bi' cha' nguxtyanu Ni ji'i̱ ngu' cha' cua'ni ngu' cha' cuxi bi', nda Ni xi tyempo cua'ni ngu' ñi'ya̱ nu nti' ti ngu' cua'ni ngu'.

1 CORINTIOS 15:34

Nga'a̱ cha' xtyanu ma̱ ji'i̱ cha' cuxi nu ndyu'ni ma̱, xana culacua tso'o ti' ma̱ li'; tso'o ti cua'ni ma̱ lo'o tya'a ma̱. Nti' na' cha' ntsu'u xi cu'ma̱ nu bilya ca cuayá' tso'o ti' ma̱ cha' ji'i̱ ycui' Ndyosi, bi' cha' nchcui' na' lo'o ma̱ jua'a̱ cha' caca tyuju'u ti' ma̱.

1 CORINTIOS 2:8

Ni sca ñati̱ nu laca loo chalyuu, ná ngua cuayá' ti' ngu' cha' bi'. Si ngua jlo ti' ngu' cha' bi', ñi'ya̱ nu ngua ti' ycui' Ndyosi cha' cua'ni Ni, ná ngujui'i̱ ca'a̱ ngu' bi' ji'i̱ Jesús lo crusi li', ycui' Jesús nu Xu'na na nu tlyu tsa cha' tso'o ntsu'u ji'i̱.

2 TESALONICENSES 1:8

Li' xcube' ycui' Ndyosi ji'i̱ cua ña'a̱ ca ñati̱ nu ná ntaja'a̱ taquiya' ji'i̱ Ni, lo'o jua'a̱ xcube' Ni ji'i̱ ñati̱ nu ná ntaja'a̱ xñi cha' tso'o ji'i̱ ycui' Jesús nu Xu'na na.

1 JUAN 3:1

Tlyu tsa cha' tso'o laca cha' ntsu'u tsa tyiquee ycui' Ndyosi Sti na ña'a̱ Ni ji'i̱ ca ta'a ngu' tya'a ntsu'u cha' ji'na lo'o Jesucristo; bi' cha' laca cha' nchcui' ycui' Ndyosi ji'na cha' sñi' ycui' Ni laca na, lo'o jua'a̱ chañi laca cha' bi'. Ná ntaja'a̱ ñati̱ chalyuu tyuloo ji'na cha' sñi' Ni laca na; la cui' jua'a̱ lo'o nguti'i̱ Jesucristo chalyuu, ná ntaja'a̱ ngu' tyuloo ngu' ji'i̱ yu li'.

3 JUAN 1:7

cña ji'i̱ Cristo ndya'a̱ ngu', bi' cha' ngutu'u ngu' bi' ndyaa ngu' tyijyu'. Ná ntaja'a̱ ngu' xñi ngu' ni sca centavo ji'i̱ xa' ñati̱ nu ná ndaquiya' ji'i̱ Cristo tsiya' ti, cha' xtyucua ji'i̱ ngu' tyucui̱i̱;

APOCALIPSIS 2:3

Lo'o jua'a̱ jlo ti' na' cha' ná nchca taja ti' ma̱; masi ndyiji tsa cha' ti'í ji'i̱ ma̱, ná ndya'a̱chu̱' ma̱ cha' jna'.