SAN JUAN 14:12 - Chatino Tataltepec

¹² Liñi tsa cha' nu ta na' lo'o ma̱ juani, cha' lcaa ñati̱ nu xñi cha' jna', taca cua'ni ngu' la cui' ña'a̱ cña tonu nu ndu'ni ycui' na'; lo'o jua'a̱ tlyu la cña caca cua'ni ngu' bi' li', cha' cua tya'a ti na' ca su ndi'i̱ ycui' Ndyosi Sti na' ―nacui̱ Jesús―.

SAN JUAN 14:12 Iomraidhean Croise

SAN MATEO 21:21

Li' nguxacui̱ Jesús cha' ji'i̱ ngu' bi': ―Cha' liñi nchcui' na' lo'o ma̱ juani ―nacui̱―. Si chañi cha' jlya ti' ma̱ ji'i̱ ycui' Ndyosi, si si'i cha' tucua ti cha' ntsu'u tyiquee ma̱ nchcui' ma̱ lo'o Ni, lo'o cu'ma̱ caca ji'i̱ ma̱ cua'ni ma̱ sca cha' tlyu jua'a̱. Si'i cha' quityi sca yaca ti chcui' ma̱ lo'o ycui' Ndyosi li', masi taca chcui' ma̱ lo'o ca'ya jua ndi'ya̱: “Tyu'utsu' nu'u̱, yaa xcua nu'u̱ nde lo hitya tyujo'o”, ñacui̱ ma̱ ji'i̱. Lo'o li' jua'a̱ caca ji'i̱, cha' tyu'utsu' ca'ya bi'.

SAN MARCOS 11:13

Na'a̱ yu cua tyijyu' xi su ndu̱ sca yaca quityi nu ntsu'u laca' ji'i̱. Ndyaa na'a̱ yu si ntsu'u si'yu lo, pana laca' ti ntsu'u, ná ntsu'u si'yu lo bi' tsiya' ti, cha' tya lyiji tyalaa tyempo tyu'u si'yu lo yaca bi'.

SAN MARCOS 16:17

Ñati̱ nu xñi cha' 'na ni, cua'ni ngu' bi' cha' tonu chacuayá' jna', cha' cube tsa ti' xa' ñati̱: culo ngu' bi' ji'i̱ cui'i̱ cuxi nu ngusñi ji'i̱ ñati̱; caja ñi'ya̱ nu chcui' ngu' bi' cha'cña ji'i̱ xa' ñati̱ chacuayá' jna';

SAN JUAN 14:28

Cua ndyuna ma̱ lo'o nchcui' na' ndi'ya̱: “Tya'a na', pana ca tiya' la li' ca̱a̱ na' su ndi'i̱ ma̱ chaca quiya'”. Bi' cha' taca ca chaa ti' ma̱ lo'o cuna ma̱ cha' cua tya'a ti na' slo ycui' Ndyosi Sti na', si chañi cha' ntsu'u tyiquee ma̱ ña'a̱ ma̱ jna'. Cua tlyu la cha' nu ntsu'u ji'i̱ ycui' Ndyosi Sti na', sube la cha' jna' ―nacui̱ Jesús―.

SAN JUAN 16:7

Pana ná cube tsa ti' ma̱. Cha' liñi nda na' lo'o ma̱ juani ―nacui̱ Jesús―, cha' tso'o la tyi'i̱ ma̱ si cua ndya'a na'. Ná ca̱a̱ Xtyi'i ycui' Ni nu xtyucua ji'i̱ ma̱ lcaa tsa̱ si ná tya'a na', cha' nu lo'o tya'a na', li' ta na' ji'i̱ nu bi' ca̱a̱ Ni.

SAN JUAN 4:37

Chañi laca cha' nu nchcui' ngu': “Tsaca laca nu ndyataa nscua', chaca laca nu cua'ni clacua”.

SAN JUAN 5:20

Ycui' Sti na' ni, ntsu'u tsa tyiquee Ni ña'a̱ Ni jna', cha' Sñi' ycui' Ni laca na' ―nacui̱ Jesús―. Lcaa cña nu ndu'ni Sti na', nclu'u Ni jna'. Lo'o jua'a̱ tya cua'ni la Ni cña tonu nu bilya ña'a̱ ma̱ ji'i̱, cha' cube ti' ma̱ ji'i̱ ycui' Ni.

SAN JUAN 7:33

Li' nacui̱ Jesús ji'i̱ ñati̱ nu ndi'i̱ ne' laa tonu bi': ―Tya tyi'i̱ na' la xi lo'o ma̱ nde lo yuu chalyuu ―nacui̱―, lo'o li' tya'a na' slo ycui' nu Xu'na na' nu nda 'na lijya̱a̱ ca nde ―nacui̱―.

SAN JUAN 7:39

Cua nti' Jesús chcui' lo'o ngu' cha' cua ta ti Ni Xtyi'i ycui' Ni cha' tyanu ne' cresiya ji'i̱ ñati̱ nu cua ngusñi cha' ji'i̱ ycui' Ni, bi' cha' nacui̱ yu jua'a̱. Bilya ta ycui' Ndyosi Xtyi'i ycui' Ni ca̱a̱ nde chalyuu, xqui'ya cha' bilya tyaa Jesús ca su tlyu su ntucua ycui' Ndyosi Sti yu.

LOS HECHOS 10:46

Li' jlo ti' nu ngu' judío bi', cha' chañi cha' cua nda ycui' Ndyosi Xtyi'i ycui' Ni ji'i̱ Cornelio lo'o ji'i̱ tya'a yu, nu lo'o ndyuna ngu' cha' nchcui' ngu' bi' cha'cña ji'i̱ ngu' xa' quichi̱, masi bilya chcui' ngu' jua'a̱ nquicha'. Lo'o jua'a̱ lye tsa ngua'ni tlyu ngu' bi' ji'i̱ ycui' Ndyosi. Li' nchcui' Pedro lo'o tya'a ndya'a̱ yu:

LOS HECHOS 16:18

Tyu̱u̱ tsa̱ lca'a̱ nu cuna'a̱ bi' ji'i̱ ya, lo'o la cui' jua'a̱ nxi'ya tsa. Li' nga'aa ndiya ti' Pablo cha' nxi'ya cho'. Nguxtyacui yu nde chu̱' yu tyucui̱i̱ su ndyaa yu, nchcui' yu lo'o nu cuna'a̱ quicha bi' cha' ji'i̱ cui'i̱ nu ngusñi ji'i̱ cho', cha' tyu'u cui'i̱ bi' tyaa li': ―Chacuayá' ji'i̱ Jesucristo nchcui' na' ―nacui̱ Pablo ji'i̱. ―Tyu'u cui'i̱ nu ntsu'u laja cuaña' nu'u̱ juani, tyaa nde liya'. Hora ti ngutu'u cui'i̱ bi' ndyaa li'. Ngua tso'o nu cuna'a̱ bi' li'.

LOS HECHOS 19:12

Lo'o jua'a̱ ngusñi ngu' lcaa late' nu cua ndyala' Pablo ji'i̱, ndyaa lo'o ngu' ji'i̱ late' bi' ca slo ngu' quicha tya'a ngu'. Ngua tso'o nu ngu' quicha bi' li', lo'o jua'a̱ ngu' quicha nu ngusñi cui'i̱ cuxi ji'i̱, ndu'utsu' cui'i̱ ji'i̱ ngu' bi' ndyaa li'.

LOS HECHOS 2:33

Li' ñaa ycui' Ndyosi ya̱qui'ya Ni ji'i̱ Jesús cha' tyaa yu ca slo ycui' Ni. Juani ndi'i̱ Jesús nde la'a tsu' cui̱ su tlyu ca su ntucua ycui' Ndyosi. Cua nda ycui' Ndyosi Sti yu Xtyi'i ycui' Ni ji'i̱ Jesús, lo'o nu juani cua nda Jesús Xtyi'i ycui' Ni cha' tyalaa nde chalyuu. Lcaa cha' nu cua ndyuna ma̱, lcaa cha' nu cua na'a̱ ma̱ tsa̱ juani, bi' laca cña nu ngua'ni ycui' Jesús.

LOS HECHOS 2:41

Lcaa ngu' nu jlya ti' cha' nu nchcui' Pedro lo'o ngu', ndyaa ngu' bi' cha' tyucuatya ngu' ji'i̱ ngu' bi' chacuayá' ji'i̱ Jesús. La cui' tsa̱ bi' nguxana sna mil tya'a ñati̱ ngusñi ngu' cha' ji'i̱ Jesucristo.

LOS HECHOS 4:16

―¿Ñi'ya̱ cua'ni na lo'o ngu' jua? ―nacui̱ ngu' cusu'―. Cua ngua'ni ngu' sca cha' tlyu, lo'o jlo ti' lcaa ngu' quichi̱ Jerusalén re cha' bi' ―nacui̱ ngu'―. Ná taca ñacui̱ na cha' cha' cuiñi laca bi' ―nacui̱ ngu'―.

LOS HECHOS 4:33

Lo'o nu ngu' nu ngua tsa'a̱ ji'i̱ Jesucristo tya clyo ni, tlyu tsa tyiquee ngu' nchcui' ngu' lo'o xa' ñati̱ cha' cua na'a̱ ycui' ca ngu' ji'i̱ Jesús nu Xu'na na lo'o cua ndyu'ú yu chaca quiya', nu lo'o ngujuii yu. Lo'o jua'a̱ nguxtyucua ycui' Ni ji'i̱ lcaa ngu' bi', cha' tso'o ti cua'ni ngu' lo'o lcaa ñati̱.

LOS HECHOS 4:4

Tso'o tsa ndyuna quiña'a̱ ñati̱ cha' ji'i̱ ycui' Ndyosi nu ngulu'u ngu' bi' ji'i̱ ngu', hora ti ngusñi ngu' cha' bi'. Cua ntsu'u ca'yu mil tya'a nu qui'yu ti nu ngusñi cha' ji'i̱ Jesucristo li'.

LOS HECHOS 5:15

Li' ndyaa ngu' quichi̱ bi', ndyaa qui'ya ngu' ji'i̱ ngu' quicha nu ntsiya slo ngu'. Li' ngusta ngu' ji'i̱ ngu' quicha bi' lo jaa', masi lo qui'ña, cha' tsaa lo'o ngu' ji'i̱ ngu' quicha bi' ca to' calle su tyeje tacui Pedro. Ngua ti' ngu' masi cua'a̱ ti tyacala' nu nda Pedro loo ngu' quicha bi', nu lo'o nteje tacui yu. Tyaca tso'o nu quicha bi' li'.

LOS HECHOS 6:7

Lcaa tsa̱ nda ngu' cha' ji'i̱ ycui' Ndyosi lo'o quiña'a̱ la ñati̱ nu ntaja'a̱ cua'a̱ jyaca̱ ji'i̱ cha' bi'. Jua'a̱ ngua quiña'a̱ la ngu' nu ndyaca tsa'a̱ cha' ji'i̱ Jesucristo nde quichi̱ Jerusalén, lo'o jua'a̱ ngua tyu̱u̱ tya'a sti jo'ó ji'i̱ ngu' judío nu ngusñi cha' ji'i̱ Jesucristo li'.

LOS HECHOS 8:7

Ngua'ni yu cha' ndyaca tso'o tyu̱u̱ tya'a ngu' quicha, jua'a̱ ngua'ni yu cha' ndyaca tso'o ngu' nu ngusñi cui'i̱ cuxi ji'i̱. Cui̱i̱ nxi'ya ngu' nu ntsu'u cui'i̱ cuxi ji'i̱, cuati ndu'u nu cui'i̱ cuxi nu ntsu'u ji'i̱ ngu' bi' ndyaa. Lo'o jua'a̱ ngua tso'o ngu' nu quicha quiya', ngua tso'o ngu' nu nchcu̱' tyijya̱.

LOS HECHOS 9:34

Li' nchcui' Pedro lo'o yu quicha bi': ―Eneas ―nacui̱― cua ngua'ni Jesucristo cha' ndyaca tso'o nu'u̱ juani ―nacui̱―. Bi' cha' tyatu̱ nu'u̱, xcua tso'o late' lo qui'ña cua. Hora ti ndatu̱ Eneas li'.

LOS HECHOS 9:40

Nchcui' Pedro lo'o ngu' li': ―Tyu'u ma̱ xi nde liya' ―nacui̱ yu ji'i̱ ngu'. Nu lo'o ndye ndu'u ngu' nde liya', li' ndyatu̱ sti̱' Pedro nchcui' yu lo'o ycui' Ndyosi. Nu lo'o ndye nchcui' yu lo'o ycui' Ndyosi, li' ndyaa yu nde su nscua jyo'o bi', nchcui' yu lo'o jyo'o bi' li': ―Tabita ―nacui̱ yu―, tyatu̱ nu'u̱ juani. Lo'o li' tsa tsiya' ca nguxuti'i̱ Tabita bi' cloo; li' nguxña'a̱ ji'i̱ Pedro, hora ti ndaca'a̱ li'.

ROMANOS 15:19

Ngua'ni Ni cña tonu nu ná ca cua'ni ñati̱ chalyuu, cha' cube ti' xa' ñati̱ cha' ycui' Ndyosi laca nu ndyu'ni cña bi'. Jua'a̱ ngua cha' cua ndya'a̱ na' ndi'i̱ na' ca loyuu tyijyu' la. Nguxana na' nde quichi̱ Jerusalén, ña'a̱ cuayá' ndyalaa na' loyuu su cuentya Ilírico. Lcaa quichi̱ su ndya'a̱ na', quiña'a̱ tsa cha' tso'o ji'i̱ Cristo nda na' lo'o ngu' ña'a̱ cuayá' nu ngua 'na.