SAN JUAN 10:36 - Chatino Tataltepec

³⁶ ¿Ni cha' laca ngusta cu'ma̱ qui'ya jna' slo ycui' Ndyosi lo'o nacui̱ ma̱ cha' nchcui' na' cha' cuxi ji'i̱ ycui' Ni? ―nacui̱ Jesús―. Cua ngusubi Sti na' jna', nda Ni 'na lijya̱a̱ nde chalyuu. ¿Ni cha' laca ná tso'o nti' ma̱ cha' nacui̱ na' cha' nu sca ti Sñi' ycui' Ndyosi laca na'?

SAN JUAN 10:36 Iomraidhean Croise

SAN MATEO 27:43

Ndu̱ ti' yu ji'i̱ ycui' Ndyosi cha' xtyucua Ni ji'i̱ yu, nacui̱ yu. Tso'o la si cua'ni lyaá ycui' Ndyosi ji'i̱ yu juani, si chañi cha' tyaca'a yu ji'i̱ Ni; “Sñi' ycui' Ndyosi laca na'”, ndu'ni yu re.

SAN MATEO 27:54

Lo'o nu sendaru nu nga'a̱ cua̱ ji'i̱ Jesús bi', lo'o nu capitán ji'i̱ sendaru bi', ngulacua tsa ti' ngu' bi' li'; tlyu tsa cha' ndyutsi̱i̱ ti' ngujui ji'i̱ ngu' bi' lo'o na'a̱ ngu' ñi'ya̱ ngua cha' bi', ñi'ya̱ ngua lo'o ngulacui̱ chalyuu. ―Chañi tsa cha' Sñi' ycui' Ndyosi laca jyo'o re ―nacui̱ nu ngu' sendaru bi'.

SAN LUCAS 1:35

Li' nda xca̱ sca cha' lo'o: ―Ta ycui' Ndyosi Xtyi'i Ni cha' tya̱a̱ su ndi'i̱ nu'u̱, cha' tyu'ú tyucui ña'a̱ nu'u̱; sca cha' tlyu nu cua'ni ycui' Ndyosi nu laca loo caca cha' bi'. Nu lo'o cala sñi' nu'u̱, sca ñati̱ nu lubii tsa cuentya ji'i̱ ycui' Ndyosi caca cubi' nu cala bi', la cui' bi' laca nu caca naa Sñi' ycui' Ndyosi.

SAN JUAN 10:35

Jlo ti' na cha' ná caca ji'na tacu̱' na ni sca cha' nu nda ycui' Ndyosi lo'o na. Sca cha' nu nchcui' quityi bi' ni, nacui̱ cha' ñi'ya̱ laca ycui' Ndyosi, jua'a̱ laca ñati̱ nu ndaquiya' cha' nu nda Ni lo'o.

SAN JUAN 17:18

Ñi'ya̱ nda nu'u̱ 'na cha' lijya̱a̱ nde chalyuu ―nacui̱ Jesús ji'i̱ ycui' Ndyosi Sti yu―, jua'a̱ cua nda na' ji'i̱ ngu' bi', cha' tsaa ngu' culu'u ngu' cha' jinu'u̱ nde lo tyucui ña'a̱ chalyuu.

SAN JUAN 17:21

Ndijña na' jinu'u̱ cha' caca stu'ba cresiya ji'i̱ ngu' bi' lo'o tya'a ngu'. Sti na', ñi'ya̱ stu'ba ntsu'u cha' jinu'u̱ lo'o na', ñi'ya̱ stu'ba nchca tyiquee na' lo'o nu'u̱, jua'a̱ cua'ni nu'u̱ cha' caca stu'ba tyiquee ngu' bi' lo'o na; li' taca jlya ti' xa' ñati̱ cha' nu'u̱ nda 'na lijya̱a̱ ―nacui̱ Jesús―.

SAN JUAN 17:8

Lo'o jua'a̱ cua ngulu'u na' ji'i̱ ngu' lcaa cha' nu ngulu'u nu'u̱ 'na ―nacui̱ Jesús―, ndaquiya' tsa ngu' cha' bi' juani. Jlo tsa ti' ngu' cha' ca slo nu'u̱ ngutu'u na' lijya̱a̱, jlya ti' ngu' cha' nu'u̱ laca nu cua nda jna' lijya̱a̱.

SAN JUAN 19:7

Li' nguxacui̱ ngu' judío cha' ji'i̱ Pilato bi': ―Ntsu'u sca cha' ji'i̱ cuare ―nacui̱ ngu'―. Cuentya ji'i̱ ya ntsu'u qui'ya ji'i̱ yu, cha' nacui̱ yu cha' laca yu nu sca ti Sñi' ycui' Ndyosi; xqui'ya cha' bi' ntsu'u cha' cajaa yu.

SAN JUAN 20:28

―Xu'na na' laca nu'u̱, cusu' ―nacui̱ Tomás ji'i̱ Jesús―, lo'o jua'a̱ Ndyosi jna' laca nu'u̱.

SAN JUAN 20:31

Cha' nu nscua lo quityi re ni, nscua bi' cha' taca jlya ti' ma̱ cha' Jesús laca Cristo nu cua nda ycui' Ndyosi ji'i̱ lijya̱ chalyuu, cha' taca xñi ma̱ cha' ji'i̱ Jesús, cha' laca yu nu sca ti Sñi' ycui' Ndyosi. Li' caja chalyuu tso'o nu ná nga'a̱ cha' tye ji'i̱ ma̱ chacuayá' ji'i̱ ycui' Jesús.

SAN JUAN 3:17

Si'i cha' sta ycui' Ndyosi Sti na' qui'ya ji'i̱ ñati̱ chalyuu nda Ni jna' lijya̱ na' chalyuu, na cua lijya̱ na' cha' cuityi̱ na' qui'ya nu ntsu'u ji'i̱ ñati̱ chalyuu; bi' cha' cua nda Ni jna' lijya̱ na' ―nacui̱ Jesús―.

SAN JUAN 3:34

Nda Ni ji'i̱ nu Jesucristo bi' ya̱a̱ chalyuu, lo'o jua'a̱ xcui' cha' ji'i̱ ycui' Ndyosi nda yu lo'o na xqui'ya Xtyi'i ycui' Ndyosi. Lo'o ycui' Ndyosi ni, ná ntsu'u cha' tye cha' ta Ni Xtyi'i ycui' Ni ji'na.

SAN JUAN 5:30

’Ná sca cña caca 'na si sca ti na' ―nacui̱ Jesús―. Lo'o ndyu'ni cuayá' na' ji'i̱ ñati̱, ndu'ni na' ñi'ya̱ nu nacui̱ Sti na' 'na cha' cua'ni na'. Stu'ba ndu'ni cuayá' na' ji'i̱ cua ña'a̱ ca ñati̱, cha' ndu'ni na' ñi'ya̱ nu nti' ycui' Sti na' nu nda 'na lijya̱a̱ chalyuu; ná ndu'ni na' sca cha' nu nda'ya hique ti na' ―nacui̱ Jesús li'―.

SAN JUAN 6:27

Tso'o la ―nacui̱ Jesús li'―, si cua'ni cña ti' ma̱ cha' caja sca cha' nu talo ji'i̱ ma̱; chañi cha' tyaala' ti' ma̱ li', si caja chalyuu nu ná nga'a̱ cha' tye ji'i̱ ma̱. Nu na cacu na ni, xtyi'i ti talo na bi', yala ti quiñu'u̱ na bi'. Pana na' nu lijya̱a̱ cha' caca na' ñati̱, ta na' sca cha' tso'o ji'i̱ ma̱ nu cua'ni cha' tyaala' ti' ma̱, lo'o ná tye tsiya' ti cha' bi' ji'i̱ ma̱ ―nacui̱―. Na cua nda ycui' Ndyosi Sti na' chacuayá' jna' cha' ta na' cha' tso'o bi' ji'i̱ ma̱.

SAN JUAN 6:38

Cua ngutu'u na' nde slo ycui' Ndyosi Sti na', lijya̱ na' nde lo yuu cha' cua'ni na' cña nu ngulo Sti na' 'na; si'i cha' cua'ni na' ñi'ya̱ nu nta̱' cua'ni ta̱ ―nacui̱ Jesús―.

SAN JUAN 6:57

Lcaa tyempo lu'ú Sti na' nu nda 'na lijya̱a̱ ca nde, lo'o jua'a̱ chacuayá' ji'i̱ ycui' Ni lu'ú na'; chacuayá' 'na tyu'ú ñati̱ nu xñi cha' 'na, ñati̱ nu caja tyucui ña'a̱ na' ji'i̱.

SAN JUAN 6:69

Jlya ti' ya jinu'u̱. Cua jlo ti' ya cha' ycui' Ndyosi laca nu cua ngusubi jinu'u̱, cha' sca ti nu'u̱ nu chañi cha' laca nu'u̱ Sñi' ycui' Ndyosi nu lijya̱ chalyuu.

SAN JUAN 8:42

―¿Ha ycui' Ndyosi laca Sti cu'ma̱ lacua? ¿Ni cha' laca ná ntsu'u tyiquee ma̱ ña'a̱ ma̱ jna' lacua? ―nacui̱ Jesús―. Nde slo ycui' Ndyosi ngutu'u na'; xqui'ya Ni, bi' cha' ndi'i̱ na' nde chalyuu ―nacui̱ Jesús―. Si'i cuentya ji'i̱ ycui' ca ti na' lijya̱ na' chalyuu, ngulo ycui' Ndyosi cña jna' cha' ca̱a̱ na'.

ROMANOS 1:4

lo'o jua'a̱ laca Jesús nu sca ti Sñi' nu ntsu'u ji'i̱ ycui' Ndyosi. Ndi'ya̱ caca cuayá' tso'o ti' na cha' bi': chacuayá' ji'i̱ ycui' Ndyosi Sti yu ndyu'ú Jesús chaca quiya' lo'o cua ngujuii yu, tlyu tsa cha' ngua'ni Ni li'. Nu lo'o nda ycui' Ndyosi Xtyi'i ycui' Ni ji'i̱ Jesús, nda Ni cha' lo'o na cha' Sñi' ycui' ca Ni laca nu Jesús bi'.

ROMANOS 8:3

Cua ngua'ni Ni sca cha' tlyu nu ná ngua cua'ni nu cha' cusu' nu nda jyo'o Moisés lo'o ñati̱ nu ngua sa'ni. Ná ngua cña cha' bi', xqui'ya cha' cuxi tsa tyiquee ñati̱ chalyuu na; pana ngua ji'i̱ ycui' Ndyosi cua'ni cha' tlyu bi', nu lo'o nda Ni ji'i̱ Sñi' ycui' ca Ni ya̱a̱ chalyuu re cha' ngua ñati̱. Nda Ni ji'i̱ nu Jesús bi' ya̱a̱, cha' caca yu sca msta̱ lu'ú; bi' laca msta̱ nu ngua ji'i̱ cuityi̱ qui'ya nu ntsu'u ji'na. Ngua Jesús ñati̱; stu'ba ti ngua yu ñi'ya̱ laca cua ña'a̱ ca ñati̱ chalyuu, cha' jua'a̱ ngua ji'i̱ yu cua'ni tye yu ji'i̱ qui'ya nu ntsu'u ji'i̱ ñati̱ cuxi na. Bi' cha' ngua Ni ñati̱.

ROMANOS 9:5

Sñi' jyo'o cusu' ji'na laca ngu' bi'. Nu lo'o ngula Cristo chalyuu ngua Ni ñati̱, la cui' tya'a ngu' Israel ngua yu li'. La cui' jua'a̱ laca Cristo ycui' Ndyosi nu laca loo ji'i̱ lcaa na tsiya' ti, bi' cha' lcaa tyempo ndu'ni tlyu ngu' ji'i̱ Ni. Chañi tsa cha' bi'.

GÁLATAS 4:4

Pana lo'o cua ndyalaa tsa̱ nu ndu'u scua cha' nu ngüiñi ji'i̱ Ni lo'o na, li' cua nda ycui' Ndyosi ji'i̱ Sñi' ycui' ca Ni ñaa chalyuu; sñi' sca nu cuna'a̱ ngu' judío ngua nu Jesús bi', lo'o jua'a̱ ndaquiya' tsa yu ji'i̱ lcaa cha' cusu' nu jlya ti' ngu' judío.